Ʉkʉndwa
13
Hwope nkashele nabhanga ɨyanga ɨnjango ɨzya bhantu nɨ njango ɨzya bhantumi,
leelo nkashele saga ɨndi nʉ kʉndwa,
nabhanga nanshi ibwago ɨlyi‑idebe lya saga lili na hantu
awe ibwago ɨli‑ipenga.
2 Nantele hwope nkashele nabhanga nɨ shikʉnjɨlwa ɨsha‑akuwe
na huzyaganye ɨmfiso zyonti na‑abhe nʉ manyiihanyi wonti,
hwope nkashele nabhanga nʉ lwɨtɨho ʉlugoosi ʉlwa‑asaamye amagamba,
leelo nkashele saga ɨndi nʉ kʉndwa,
anɨ saga hantu.
3 Nantele nkashele ɨmfumye ɨshʉʉma shaanɨ shonti
hubhapeele abhapɨɨna,
nantele nkashele ɨmfumye ʉmʼbɨlɨ gwanɨ
huje gupye nʉ mwoto,
leelo nkashele saga ɨndi nʉ kʉndwa,
ɨpo saga hahunaavwa nahamo.
4 Ʉkʉndwa wuhumʼmɨɨha ʉmuntu abhe nʼjimbiilizu,
abhe nʉ mwoyo ʉmwinza,
sinta abhe nɨ jɨɨla,
sinta abhe na mashento,
nantele sinta abhe na mabaado.
5 Ʉkʉndwa wuhumʼmɨɨha ʉmuntu huje abhe ahubhatiniha abhanjɨ.
Nantele,
wuhumʼmɨɨha ʉmuntu huje agandi asɨbhɨɨlɨle ga gali gaakwe lwene,
awe aviitwe lubhilo na‑abhute ilyoyo mu mwoyo.
6 Ʉkʉndwa wuhumʼmɨɨha ʉmuntu huje asahaseshele ɨmbiibhi,
lyoli aseshelaje ɨlyoli.
7 Ʉkʉndwa wuhumʼmɨɨha ʉmuntu ajimbiilile mu gonti,
abhe nʉ lwɨtɨho hu habhaazyo honti,
abhe nʉ lusʉʉbhɨlo hu habhaazyo honti,
nantele abagaje mu gonti.
8 Ʉkʉndwa saga wuli nʉ malishilo,
leelo ɨvikʉnjɨlwa vili nʉ malishilo,
nanshi ʉkuwi,
ayanje hu njango ɨnjenu,
na‑abhe nʉ manyiihanyi wumo.
9 Ɨnjanjile ɨsho,
pɨpo tigamɨɨnye mashe lwene,
nantele ʉkuwi weetu saga wulʉnjɨɨshe.
10 Leelo lwa wɨnza ʉlʉnjɨsu,
ɨgo mashe gahayimaliha.
11 Hu habhaazyo lwa nahali mwana,
nahali ɨyanga agɨ waana,
ɨnjeele zyahali zyɨ waana,
nahali ɨsɨɨbha ɨzyɨ waana.
Leelo ɨshi aga hu waana ɨngaleshile,
pɨpo ɨndi nʼgoosi.
12 Ɨsho sha tilola ɨshi,
ɨli nanshi alole ahantu mu shilolwe ɨho saga haloleha shinza,
leelo pamandɨ tahayilola shila hantu pa pazelu.
Hu habhaazyo ɨha timɨɨnye hashe,
leelo pamandɨ tahayimanya tee nanshi ʉNgʉlʉbhɨ ɨsho atimɨɨnye atɨ.
13 Ɨshi ɨvintu ɨvi vitaatu saga vyahayimaliha nka lisiku lyeka,
ʉlwɨtɨho,
ʉlusʉʉbhɨlo nʉ kʉndwa.
Hu vintu ɨvi,
lya lili ligoosi kʉndwa.