Ɨshikʉnjɨlwa ɨsha‑afumye ʉkuwi nɨ sha‑ayanje hu njango ɨnjenu
14
Mubagaje abhe nʉ kʉndwa na‑anyonywe abhe nɨ vikʉnjɨlwa ɨvya Mʼpepo ʉMʼfinjile,
tee ɨshikʉnjɨlwa ɨsha‑afumye ʉkuwi.
2 Ʉmuntu ʉyo ayanga hu njango ɨnjenu,
saga ayanga na bhantu,
lyoli ayanga nʉ Ngʉlʉbhɨ,
pɨpo ɨzyo ayanga nʉʉmo ʉyo ahuzyaganya.
Ʉmwene abha ayanga ɨnongwa ɨzya hu mfiso hwi‑ikhone ɨlya Mʼpepo ʉMʼfinjile.a
3 Leelo ʉyo akuwa,
ayanga na bhantu amazwi aga hubhazenje mu lwɨtɨho,
hubhazinzye na hubhakhamantanye mu mwoyo.
4 Ʉyo ayanga hu njango ɨnjenu,
ahwikhamantanya yʉʉyo mu lwɨtɨho,
leelo ʉyo afumya ʉkuwi,
ahushikhamantanya ɨshibhanza.
5 Anɨ ɨhwanza amwɨ mwenti mubhanje muyanga hu njango ɨnjenu,
leelo tee ɨhwanza mubhanje mufumya ʉkuwi.
Ɨyanga ɨsho,
pɨpo afumye ʉkuwi hubha nɨ zya pa mwanya tee hwa bhooziwa abhanjɨ ashile ayanje hu njango ɨnjenu.
Lyoli ʉmuntu lwa‑ayanga hu njango ɨnjenu,
ɨhwanziwa ʉmo ayiilule huje ashikhamantanye ɨshibhanza mu lwɨtɨho.
6 Ɨshi bhooziwa bhamwetu,
nkashele ɨnɨnze huliimwɨ na‑ayanje hu njango ɨnjenu,
wɨlɨ mubhajiiye ahwambulile hantu heenu?
Saga muhwambulila nahamo.
Lyoli nkashele ɨmbabhʉʉzye ɨgo ʉNgʉlʉbhɨ aniluliiye,
awe nkashele ɨnjanje ʉmanyiihanyi,
awe nkashele ɨmfumye ʉkuwi awe ɨmanyizye,
ɨpo mwambulilaga.
7 Ɨsho sha zili,
hwope hu vintu ɨvyo saga vili nʉ wʉʉmi,
ɨvyo vifumya izwi,
libhe lilonji,
ɨbhe ntonga.
Nkashele vifumya izwi sinta zingatizu,
ʉmuntu abhajiiye wɨlɨ amanye ʉluteelo?
8 Nantele,
nkashele ɨndudwe ɨfumya izwi ɨlyo saga limanyiha hwa bhantu,
weenu ʉyo anza hwilɨngaanye alwe ʉlʉgʉ?b
9 Ɨsho sha zili huliimwɨ,
nkashele muyanga amazwi ɨgo saga gamanyiihana,
weenu ʉyo abhajiiye amanye ɨgo muyanga?
Ɨpo ɨgo muyanga ganza‑abhe gateega nɨ nkʉngʉ.
10 Mu nsi muli nɨ njango ɨnyinji ɨzyɨ waaji nʉ waaji,
leelo nɨɨmo ɨnjango nka yeeka ɨyo saga ɨmanyiihana.
11 Ɨshi,
nkashele saga ɨhuyaaganya ɨnjango ɨyo ayanga ʉwɨnjɨ,
ɨmba nkati nʼjenu hwʉ‑ʉyo ayanga.
Wope ʉyo ayanga,
anza‑abhe nkati nʼjenu hwaliinɨ.
12 Hwope huliimwɨ sha shɨɨsho zili.
Muhwanza tee abhe nɨ vikʉnjɨlwa ɨvya Mʼpepo ʉMʼfinjile,
ɨshi mudandamalaje tee abhe nɨ vikʉnjɨlwa ɨvyo vilemvya abhooziwa mu shibhanza.
13 Ɨshi,
ʉmuntu ʉyo ayanga hu njango ɨnjenu,
anʼnaabhe ʉNgʉlʉbhɨ huje amʼmwavwe ahwilule.
14 Nkashele ɨpuuta hu njango ɨnjenu,
ʉmwoyo gwanɨ gwa gwʉgwo gupuuta,
leelo ɨnjeele yaanɨ saga ɨhuhaaganya nahamo.
15 Ɨshi,
ɨhondɨɨye abhombe yeenu?
Ɨnza‑apuute hu Mʼpepo ʉMʼfinjile hu njango ɨnjenu,
nantele ɨnza‑apuute hu njeele.
Ɨnza‑ateele hu njango ɨnjenu,
nantele ɨnza‑ateele hu njeele.
16 Nkashele ʉnʼsalifiizye ʉNgʉlʉbhɨ hu njango ɨnjenu,
hu habhaazyo lwʉ‑ʉmalile hunʼsalifye,
ʉmuntu ʉwɨnjɨ ʉyo saga ali nɨ shikʉnjɨlwa ɨsha‑amanye ɨnjango ɨnjenu,
ahwɨtɨha wɨlɨ huje,
“Aameni,”
lwa saga ahuzyaganya ɨzyo ʉyanga?
17 Hwaliiwe ʉnza‑abhe ʉhunʼsalifya ʉNgʉlʉbhɨ lyoli,
leelo ʉwɨnjɨ ʉla saga zihumʼmwavwa nahamo mu lwɨtɨho.
18 Ɨhunʼsalifya ʉNgʉlʉbhɨ hu nongwa ya‑aje ɨyanga hu njango ɨnjenu ashile amwɨ mwenti,
19 leelo mu shibhanza ɨsʉngwa tee ayanje amazwi gasaanu ɨgo gamanyiha hu njeele huje ɨmbamanyizye abhanjɨ.
Ɨlyo lya lyɨlyo linza ashile ayanje amazwi ɨelufu ishʉmi mu njango ɨnjenu.
20 Bhooziwa bhamwetu,
mugandi asɨɨbhe nanshi abhaana,
lyoli mubhanje musɨɨbha nanshi abhantu abhagoosi.
Leelo hu nongwa yɨ mbiibhi,
ɨpo mubhanje nanshi abhaana abheela.
21 Mu Nsimbo ɨMfinjile ɨsimbwilwe huje,
“ɄMwɨnɨ ayiga,
‘Nahayiyanga na bhantu ɨbha ashilile hwa bhajenu abha hutali
ɨbho bhayanga hu njango ɨzyɨnjɨ,
hwope ɨsho saga bhanza hunʉmvwe.’ ”c
22 Ayanje hu njango ɨnjenu saga shimanyishizyo shi‑ikhone lya Ngʉlʉbhɨ hwa bhooziwa,
lyoli hwa bha saga bhooziwa.
Leelo ɨshikʉnjɨlwa ɨshɨ kuwi saga shimanyishizyo hwa bhantu bha saga bhooziwa,
lyoli hwa bhooziwa.
23 Ɨshi,
nkashele amwɨ mubhooziwa mubhʉngɨɨne apuute,
nantele mwenti mwande ayanje hu njango ɨnjenu,
leelo nkashele bhatʉʉshe abhantu abhajenu awe ɨbho saga bhooziwa,
wɨlɨ saga bhanza‑aje muli bhabwalusu?
24 Leelo nkashele mwenti mukuwa,
lwa‑ahwɨnza ʉmuntu ʉnʼjenu awe ʉyo saga mwoziwa,
gonti ɨgo ayʉmvwɨzye ganza humʼmwavwe amanye ɨmbiibhi zyakwe.
Nantele gonti ɨgo ayʉmvwɨzye gahayihunʼnonga.
25 Ɨgo gali mu mwoyo gwakwe,
gabha pa pazelu.
Ɨpo ahayisugamila na humʼmwamishe ʉNgʉlʉbhɨ,
huje,
“Lyoli ʉNgʉlʉbhɨ ali peeka naamwɨ!”
Ʉzingatizu wa bhooziwa apuute
26 Ɨshi bhooziwa bhamwetu,
tiyanje yeenu?
Hu habhaazyo lwa mubhʉngɨɨne apuute,
ʉmo ali nʉ luteelo,
ʉmo ali nɨ manyizyo,
ʉmo ayanga ɨgo ʉNgʉlʉbhɨ alolesiizye,
ʉmo ayanga hu njango ɨnjenu,
ʉmo ahwilula.
Ɨga gonti gabhombeshe hu nongwa ya hubhakhamantanye abhooziwa.
27 Nkashele bhalɨɨho ɨbho bhayanga hu njango ɨnjenu,
bhayangaje bhabhɨɨlɨ awe bhataatu,
bhagandi ashile ɨpo.
Nantele ayangaje weeka weeka,
leelo abhanje ʉmuntu ʉwa hwilule ɨgo bhayanga.
28 Nkashele nʉʉmo ʉwa hwilule,
ʉyo ayanga hu njango ɨnjenu aleshe ayanje hu shibhanza,
lyoli ayanje nʉ Ngʉlʉbhɨ hu mwoyo gwakwe.
29 Bhope ɨbho bhafumya ʉkuwi bhabhanje bhabhɨɨlɨ awe bhataatu,
na bhanjɨ bhasimishizyaje amazwi ɨgo.
30 Nkashele ʉmo mwɨ‑ɨbho ɨbho bhatejeelezya limʼmwɨnzɨɨye izwi ɨlya‑ayanje afume hwa Ngʉlʉbhɨ,
ʉyo akuwa ahwanziwa huje apʉʉme.
31 Hwi‑idala ɨlyo,
shila muntu ʉyo ali nʉ kuwi,
abhe na habhaazyo aha‑akuwe huje abhantu bhonti bhamanyiziwe na‑ajine.
32 Ɨshikʉnjɨlwa ɨsha‑akuwe shilongozewa nʉ‑ʉyo akuwa,
33 pɨpo ʉNgʉlʉbhɨ weetu saga wɨ vwalanganu,
lyoli yʉ Ngʉlʉbhɨ wɨ tengaanu,
shɨnɨɨsho nanshi zili mu vibhanza vyonti.
34 Lwa mubhʉngɨɨne,
abhashɨ bhabhanje myɨ,
pɨpo saga bhɨtɨshɨlɨɨlwe ayanje.
Lyoli bhabhe bhatiniha nanshi ziyanga ɨndajizyo zya Moose.
35 Nkashele bhahwanza amanye ɨnongwa zimo,
bhabhanje bhahubhabhʉzɨɨlɨzya abhalume bhaabho hu khaaya,
hu nongwa ya huje nsoni ʉnʼshɨ ayanje hu shibhanza.
36 Izwi lya Ngʉlʉbhɨ saga lyahandile huliimwɨ,
nantele saga lyahɨnzɨle huliimwɨ mubheene!
37 Nkashele ʉmuntu ahwilola huje ali nɨ shikʉnjɨlwa ɨsha‑afumye ʉkuwi,
awe ali nɨ shikʉnjɨlwa ɨshɨnjɨ ɨsha Mʼpepo ʉMʼfinjile,
amanye huje gɨ‑ɨhubhasimbila zyɨ ndajizyo afume hwa Mwɨnɨ ʉYeesu.
38 Leelo ʉmuntu ʉyo asyonshela ɨga,
wope abhanje asyonshelwa.