Azyʉshe hwa Kilisiti
15
Ɨshi bhooziwa bhamwetu,
ɨmbiizusye ɨNongwa ɨNyinza ɨzyo nahalʉmbɨlɨɨye huliimwɨ,
namwɨ mwahazyambɨlɨɨye.
Ɨzyo zya zyɨzyo zihubhabhomba huje mubhe nʉ lwɨtɨho ʉlwo muli nalwo.
2 Nkashele mukhata izwi ɨlyo nahalʉmbɨlɨɨye huliimwɨ,
ɨpo muhuwaaga ʉfyʉli.
Leelo nkashele saga mukhata,
ʉlwɨtɨho lwenyu saga lubha nɨ zya pa mwanya.
3 Anɨ nahabhamanyiziizye ɨmanyizyo ɨngoosi ɨyo nahambɨlɨɨye nanshi ɨsho ɨsimbwilwe mu Nsimbo ɨMfinjile huje,
ʉKilisiti ahafwiye hu nongwa yɨ mbiibhi zyetu.a
4 Nantele ahasyɨlwa,
ni‑isiku ɨlya taatu ahazyʉha nanshi ɨsho ɨsimbwilwe mu Nsimbo ɨMfinjile.b
5 Ahanʼnoleshela ʉKeefa hwa huje ʉPeeteli,
nantele ahabhaloleshela abhasontwa bhaakwe ishʉmi na bhabhɨɨlɨ.
6 Pamandɨ ahabhaloleshela abhooziwa ashile ɨmya zisaanu ɨbho bhahali peeka.
Abhinji mwɨ‑ɨbho hwope ɨshi bhali sha bhʉʉmi,
bhamo bhafwiye.
7 Nantele ahanʼnoleshela ʉYaakobo,
pamandɨ ahabhaloleshela abhasontwa bhonti.
8 Hu malishilo,
lwa wabhaloleshela bhonti,
ahahwilolesya hwaliinɨ,
leelo anɨ nahabha nʼsontwa hu habhaazyo ɨho saga nahakhondɨɨye.c
9 Anɨ ɨndi nʼdoodo hu bhasontwa,
saga ɨhondɨɨye hwope akwiziwe nʼsontwa,
hu nongwa ya‑aje nahabhalaviizye abhooziwa.
10 Leelo ɨmpyana ɨya Ngʉlʉbhɨ ya yɨɨyo ɨmbɨɨshɨle anɨ abhe nʼsontwa.
Nantele ɨmpyana yaakwe hwaliinɨ saga yahali yɨ lwene,
pɨpo ashilile ɨmpyana ɨyo ɨmbombile ɨmbombo ashile abhasontwa bhonti.
Saga ɨmbombile ɨgo hwi‑ikhone lyanɨ,
lyoli ʉNgʉlʉbhɨ hu mpyana yaakwe,
ya yʉʉyo abhomba ɨmbombo peeka naanɨ.
11 Ɨshi,
nkashele nɨɨnɨ ɨlʉmbɨɨlɨla awe bhabhe bhasontwa bhanjɨ bhaala,
tihubhalʉmbɨɨlɨla ɨNongwa ɨNyinza ziziila,
nantele ɨzyo zya zyɨzyo mwɨtɨɨshe.
Azyʉshe hwa bhafwe
12 ɄKilisiti alʉmbɨɨlɨlwa huje ahazyʉshɨle afume hwa bhafwe.
Ɨshi,
ɨbha wɨlɨ abhanjɨ muuhati yeenyu bhayiga nahumo azyʉshe hwa bhafwe?
13 Nkashele nahumo azyʉshe hwa bhafwe,
hwa huje wope ʉKilisiti saga ahazyʉshɨle.
14 Nkashele ʉKilisiti saga ahazyʉshɨle,
ɨpo alʉmbɨɨlɨle hwetu saga hubha nɨ zya pa mwanya,
lwope ʉlwɨtɨho lwenyu saga lubha nɨ zya pa mwanya.
15 Nantele,
atɨ tiloleha huje tili bhasimishizi bhi‑ilenga mu nongwa zya Ngʉlʉbhɨ,
pɨpo tisimishizya huje ʉNgʉlʉbhɨ ahanʼzyʉsyɨzye ʉKilisiti afume hwa bhafwe.
Leelo nkashele abhafwe saga bhazyʉsyɨwa,
ɨshi ʉNgʉlʉbhɨ saga ahanʼzyʉsyɨzye.
16 Ɨyanga ɨsho,
pɨpo nkashele abhafwe saga bhazyʉha,
wope ʉKilisiti saga ahazyʉshɨle.
17 Nantele nkashele ʉKilisiti saga ahazyʉshɨle,
ʉlwɨtɨho lwenyu luli lwɨ shaana,
lyoli munza‑abhe saga mufyʉlɨɨlwe mu mbiibhi zyenyu.
18 Bhope ɨbho bhafwiye lwa bhali bhamʼmwɨtɨɨshe ʉKilisiti,
bhateejile lwonti.
19 Nkashele ʉlusʉʉbhɨlo lwetu hwa Kilisiti hu huwaaje ʉwʉʉmi ʉwa mu nsi ɨnɨ lwene,
ɨpo pa pɨɨpo tibha bhantu bha‑alolelwe ɨnkʉmbʉ ashile abhantu bhonti.
20 Leelo ɨshi,
ɨlyoli ya yɨɨnɨ,
ʉKilisiti azyʉshɨle afume hwa bhafwe,
ʉmwene yʉ wa hwande azyʉshe mu bhonti bha bhahayizyʉha afume hwa bhafwe.
21 Nanshi ɨsho ʉfwe wahɨnzɨle afumilane nʉ muntu weeka,
shɨɨsho hwope azyʉshe hwa bhafwe hwahɨnzɨle afumilane nʉ muntu weeka.
22 Nanshi abhantu bhonti bhafwa hu nongwa ɨya‑apatiihanywe hwabho nʉ Aadamu,
shɨɨsho abhantu bhonti bhahayizyʉha hu nongwa ɨya‑apatiihanywe hwabho nʉ Kilisiti.
23 Ʉzingatizu ʉwa‑azyʉshe wa wʉʉwu,
ʉKilisiti yʉ wa hwande azyʉshe,
pamandɨ bhahayizyʉsyɨwa abhantu bhaakwe ʉKilisiti lwa wɨnza.
24 Ɨpo pa pɨɨpo wahayɨnza ʉmalishilo wɨ vyonti,
hu habhaazyo ɨho ʉKilisiti lwa‑ayaziizye ʉwumwɨnɨ wonti na maha gonti na bhi‑ikhone bhonti na humʼpeele ʉDaada ʉNgʉlʉbhɨ ʉwumwɨnɨ waakwe.
25 Ɨyanga ɨsho,
pɨpo ʉKilisiti ahwanziwa alongozye afishe ʉNgʉlʉbhɨ abhamene na hubhabhɨɨshe abhalʉgʉ bhaakwe bhonti mwi‑ikhone lyakwe.d
26 Ʉnʼnʉgʉ ʉwa hu malishilo ayaziwe,
wʉ fwe.
27 ƗNsimbo ɨMfinjile ziyiga,
“Ahayihuvibhɨɨha ɨvintu vyonti pa nsi yi‑ikhone lyakwe.”
e Saga huje wope ʉNgʉlʉbhɨ ahayibha pa nsi yi‑ikhone ɨlyo,
pɨpo ʉmwene ya yʉʉyo abhɨɨshɨle ɨvyo vyonti pa nsi yi‑ikhone lya Yeesu.
28 Leelo ɨvintu vyonti lwa vibhɨhwɨlwe pa nsi yi‑ikhone lya Mwana waakwe,
f ɨpo wope ʉMwana ahayihwibhɨɨha mwi‑ikhone lya Ngʉlʉbhɨ ʉyo abhɨɨshɨle ɨvintu vyonti mwi‑ikhone lya Mwana waakwe,
huje ʉNgʉlʉbhɨ abhe nʼnongozi wa vyonti.
29 Ɨshi,
abhantu ɨbho bhahwozewa hu nongwa ya bhafwe bhasʉʉbhɨla hantu heenu?
Nkashele abhafwe saga bhazyʉha nka lisiku limo,
yeenu abhantu ɨbho bhahwozewa hu nongwa ya bhafwe?
30 Natɨ yeenu tihwibhɨɨha mwi‑ibho shila lisiku?
31 Bhooziwa bhamwetu,
shila lisiku anɨ ɨndi mu mayɨmba aga‑afwe.
Ɨyo yɨ lyoli,
nanshi ɨsho lyoli huje ɨhwibaada hu nongwa yeenyu,
pɨpo mupatihɨɨnywe nʉ Yeesu ʉKilisiti ʉMwɨnɨ weetu.
32 Nkashele nahumo azyʉshe,
nahali nɨ zya pa mwanya wɨlɨ alwe na bhalʉgʉ abha hwi‑ibooma ɨlyɨ Efeeso bha bhahali nanshi ɨhanu ɨhali?
Nkashele nahumo azyʉshe,
ɨshi hwa huje,
“Tibhanje tilya na‑amwele,
pɨpo ɨndaabhɨ tahayifwa.”g
33 Muleshe agobelwe na bhantu ɨbho bhayanga ɨsho,
pɨpo ɨnjango ɨyiga,
“Abhamanyani abhabhiibhi bhanangaanya ɨnjendo ɨnyinza.”
34 Mubhanje nɨ njeele,
nantele sɨɨbhaji shinza,
muleshe abhombe ɨmbiibhi,
pɨpo bhamo paahati yeenyu saga bhamʼmɨɨnye ʉNgʉlʉbhɨ.
Ɨyanga ɨgo huje ɨmbakenyensye.
Ʉmʼbɨlɨ ɨsho gwahayibha isiku ɨlya‑azyʉshe
35 Leelo ʉmuntu abhajiiye abhʉzɨɨlɨzye huje,
“Abhafwe bhazyʉha sha wɨlɨ?
Bhabha nʉ mʼbɨlɨ wɨlɨ?”
36 Ɨzyo nsɨɨbho zyɨ lema!
Nkashele ʉtotile ɨmbeyu,
saga ɨbhajiiye amele sinta afwe nasʉʉti.
37 Ɨmbeyu ɨyo mutota,
ɨbhe yɨ ngano awe ɨmbeyu ɨzyɨnjɨ,
saga ɨlɨngaana ni‑imelela lyakwe.
38 Leelo imelela ɨlyo lifuma mu mbeyu ɨla,
ʉNgʉlʉbhɨ abhomba nanshi sha‑ahwanza yʉʉyo,
shila mbeyu shɨ‑ɨlɨɨho.
39 Ɨvipelwa vyonti vili na mabɨlɨ,
leelo amabɨlɨ ɨgo saga galɨngaana.
Amabɨlɨ ga bhantu gali paayo,
agɨ hanu gali paayo,
agɨ nyonyi gali paayo,
gope agɨ nswɨ gali paayo.
40 Nantele ɨnzota nɨ vintu ɨvyamwabho ɨvya hu mwanya vili paayo nɨ vintu ɨvya mu nsi.
Ʉwinza ʉwɨ nzota wuli paayo,
nʉ winza ʉwɨ vintu ɨvya mu nsi wuli paayo.
41 Enya ʉwinza ʉwɨ vintu ɨvya hu mwanya sha wuli paayo,
ʉwi‑isanya,
ʉwɨ mwezi nʉ wɨ nzota.
Zyope ɨnzota shila nzota ɨli nʉ winza waakwe.
42 Ɨsho sha shɨɨsho yahayibha hu habhaazyo abhafwe lwa bhazyʉha.
Ʉmʼbɨlɨ gusyɨlwa ʉgwo gunanjiha,
leelo ʉNgʉlʉbhɨ ahayihuguzyʉsya ʉmʼbɨlɨ ʉgwo saga gunanjiha.
43 Ʉmʼbɨlɨ lwa gusyɨlwa,
gusyonshelwa,
leelo lwa guzyʉsyɨwa,
gubha nɨ nshɨnshɨ.
Lwa gusyɨlwa,
gubha gugandile,
leelo lwa guzyʉsyɨwa,
gubha ni‑ikhone.
44 Ʉmʼbɨlɨ ʉgwo gusyɨlwa gwʉ mʼbɨlɨ gwa mu nsi ɨnɨ,
leelo ʉmʼbɨlɨ ʉgwo ʉNgʉlʉbhɨ ahayihuguzyʉsya gwahayibha mʼbɨlɨ mʼpya ʉgwo tipeewa nʉ Mʼpepo ʉMʼfinjile.
Nkashele guli mʼbɨlɨ gwa mu nsi,
nantele gwope ʉmʼbɨlɨ ʉmʼpya gulɨɨho ʉgwo ʉMʼpepo ʉMʼfinjile ahayihutipeela.
45 Mu Nsimbo ɨMfinjile ɨsimbwilwe huje,
“Ʉmuntu ʉwa hwande yʉ Aadamu,
ahapeliilwe,
ahabha muntu mwʉmi,”
h leelo ʉAadamu ʉwa hu malishilo yʉ Kilisiti,
yʉ Mʼpepo ʉyo ahubhapeela abhantu ʉwʉʉmi.
46 Leelo ʉmʼbɨlɨ ʉgwo gutagaalila apelwe gwʉ mʼbɨlɨ gwa mu nsi ɨnɨ,
pamandɨ guhwɨnza ʉmʼbɨlɨ ʉmʼpya ʉgwo tipeewa nʉ Mʼpepo ʉMʼfinjile.
47 Ʉmuntu ʉwa hwande,
ʉAadamu,
ahafumile mu nsi,
ahapeliilwe afume mu longo.
Ʉmuntu ʉwa bhɨɨlɨ,
ʉKilisiti,
ahafumile hu mwanya.
48 Ɨshi,
abhantu bhonti abha mu nsi ɨnɨ bhali na mabɨlɨ aga mu nsi nanshi ʉmʼbɨlɨ gwa Aadamu.
Bhope abhantu bhonti ɨbho bhahayibha hu mwanya,
bhahayibha na mabɨlɨ aga hu mwanya nanshi ʉmʼbɨlɨ gwa Kilisiti.
49 Nanshi ɨsho tilɨngaana nʉ Aadamu ʉyo ahapeliilwe afume mu longo,
sha shɨɨsho tahayilɨngaana nʉ Kilisiti ʉyo ahafumile hu mwanya.
50 Ɨshi bhooziwa bhamwetu,
ɨyanga huje,
ʉmʼbɨlɨ gwɨ nyama ni‑idanda saga vibhajiiye atʉʉshe mu wumwɨnɨ ʉwa Ngʉlʉbhɨ,
nɨ‑ɨsho shinanjiha saga shibhajiiye abhe nʉ wʉʉmi ʉwa wiila na wiila.
51 Tejeelezyi,
ɨhubhabhʉʉzya ɨgo gafisiilwe pitagaalila lyenyu huje atɨ saga tahayifwa tenti,
lyoli tenti tahayigaluuhana
52 hu habhaazyo hashe lwene nanshi ahabhaazyo aha muntu asinzile na hwenye.
Ɨlyo lyahayibhombeha,
lwɨ‑ɨkhoola ɨndudwe ɨya hu malishilo.
Hu habhaazyo ɨho,
abhafwe bhahayizyʉsyɨwa na‑abhe na mabɨlɨ ɨgo saga gahayifwa nantele,
natɨ ta tili bhʉʉmi tahayigaluuhana.
53 Yahayibha ɨsho,
pɨpo ʉmʼbɨlɨ ʉgu ʉgwo gunanjiha,
guhwanziwa gugaluuhane gubhe mʼbɨlɨ ʉgwo saga gunanjiha,
nantele ʉmʼbɨlɨ ʉgwo gufwa,
guhwanziwa gugaluuhane abhe mʼbɨlɨ mʼpya gwa saga gufwa.
54 Ɨshi,
ʉmʼbɨlɨ ʉgu ʉgwo gunanjiha na‑afwe,
lwa gwagaluuhana abhe mʼbɨlɨ ʉgwo saga gunanjiha na‑afwe,
ɨpo lɨnza‑abhe libhombɨɨshe izwi ɨlyo lyahasimbwilwe mu Nsimbo ɨMfinjile huje,
“ɄNgʉlʉbhɨ amenile ʉfwe lwonti!”i
55 “Aawe wʉfwe,
ʉmenwe waaho wuli hwoshi?
Lili hwoshi ikhone lyaho ɨlya‑aleete ʉbhaavi?”j
56 Ʉbhaavi ʉwɨ fwe wufumilana nɨ mbiibhi,
nantele ɨmbiibhi ziloleha huje zili ni‑ikhone alɨngaane nɨ ndajizyo.
57 Leelo tihunʼsalifya ʉNgʉlʉbhɨ ʉyo ahutipeela amene ɨmbiibhi nʉ fwe hwi‑idala ɨlya Mwɨnɨ weetu ʉYeesu ʉKilisiti.
58 Ɨshi bhooziwa bhamwetu bhakʉndwe,
mujinaje mu lwɨtɨho sinta ayinje.
Jendelelaji ahwifumye abhombe ɨmbombo ɨya Mwɨnɨ ʉYeesu,
pɨpo mumɨɨnye huje,
ɨmbombo ɨyo mubhomba hu nongwa ya Mwɨnɨ ʉYeesu,
saga yɨ lwene.