Ɨnsangu ɨya hubhaavwe abhooziwa
16
Ɨshi,
ɨyanga hu nongwa yɨ nsangu ɨya hubhaavwe abhooziwa abha hwi‑ibooma ɨlyɨ Yelusaleemu.
a Mubhombaje nanshi sha nahabhabhʉzɨɨzye abhooziwa abha hu mukowa ʉgwɨ Galatiya.
2 Shila lisiku ɨlya Pamulʉngʉ,
shila muntu muuhati yeenyu abhanje abhɨɨha ɨmpɨɨya alɨngaane nɨ‑ɨsho azyajile,
huje lwa nɨnza huliimwɨ,
nahazyagaje mubhʉngɨɨnye.
3 Hu habhaazyo ɨho lwa nɨnza,
nahayihubhasonteelezya nɨ kalaata ɨyɨ shimanyishizyo hwa bhantu ɨbho mwahayihubhasalula huje bhatwale ɨnsangu ɨzyo hwi‑ibooma ɨlyɨ Yelusaleemu.
4 Nkashele ɨloleha huje nanɨ ɨhwanziwa abhale,
ɨpo pa pɨɨpo nahayibhala peeka nabho.
Ʉzingatizu wa Paulo ʉwa‑abhale hu Kolinto
5 Lwa naafuma hu mukowa ʉgwɨ Makedoniya,
nahayɨnza huliimwɨ,
pɨpo ɨhwanza nasʉʉti ashilile hu Makedoniya.
6 Hu habhaazyo ha nahayɨnza,
ʉlwɨnjɨ nahayikhala naamwɨ hu habhaazyo hamo,
awe hwope hu habhaazyo honti ahi‑isasa huje munaavwe ɨnjendeelele nɨ nshʉʉla ɨmbali zyonti ɨzyo nahayibhala.
7 Saga ɨsʉngwa akhomaane naamwɨ ɨshi hwa‑ashile lwene.
Nkashele ʉMwɨnɨ ahunɨtɨshɨzya,
ɨsʉʉbhɨla akhale huliimwɨ hu habhaazyo hamo.
8 Leelo ɨsyala hwi‑ibooma ɨli ɨlyɨ Efeeso afishe isiku ɨlyɨ shikulukulu ɨshɨ Pentekoositi.b
9 Ɨbhomba ɨsho,
pɨpo ʉNgʉlʉbhɨ ampiiye ahabhaazyo ahinza aha‑abhombe ɨmbombo ɨngoosi mwi‑ibooma ɨli,
leelo bhalɨɨho abhantu abhinji ɨbho bhahundindizya.
10 ɄTiimoti nkashele wɨnza huliimwɨ,
mumʼmwambɨɨlɨle na hunʼsʉnje huje akhale shinza sinta wooga,
pɨpo wope abhomba ɨmbombo ya Mwɨnɨ nanshi anɨ.
11 Ɨshi,
ʉmuntu wowonti asahanʼsyonshele.
Lyoli mumʼmwavwe asogole ʉhwo hu tengaanu,
huje ayɨnze hwaliinɨ,
pɨpo anɨ ɨhunʼgʉʉlɨla peeka na bhooziwa abhamwetu.
12 Ɨshi,
hu nongwa ya mwoziwa ʉwamwetu ʉApoolo,
ɨnʼnaabhile tee huje ayɨnze huliimwɨ peeka na bhooziwa abhanjɨ.
Leelo ʉmwene saga ahwanza ahwɨnze ɨshi,
lyoli ahayɨnza hu habhaazyo ɨho ali nɨ fwasi.
Amazwi aga hu malishilo peeka nɨ ndamuho
13 Mubhe maaso mujinaje mu lwɨtɨho,
nantele mudandamalaje na‑abaje mu lwɨtɨho sinta wooga.
14 Ɨnongwa zyenyu zyonti mubhanje mubhomba mu kʉndwa.
15 Mumɨɨnye huje ʉSiteefana peeka na bhantu abha mu nyumba yaakwe bhɨɨbho ɨbho bhahali bha hwande humʼmwɨtɨshe ʉYeesu ʉKilisiti mu mukowa ʉgwɨ Akaaya,
bhope bhahwifumiizye hubhaavwe abhooziwa.
Ɨshi bhooziwa bhamwetu,
ɨhubhalaabha huje,
16 namwɨ mubhanje muhubhatiniha abhantu nanshi ɨbho,
na bhanjɨ bhonti ɨbho bhafumya ikhone lyabho abhombe ɨmbombo ɨnɨ.
17 Ɨseshela tee alole ʉSiteefana,
ʉFilitunaato nʉ Akayiiko.
Bhɨnzɨle ɨpa,
hu nongwa ya hunaavwe gaala ga mwahapotiilwe humbombele amwɨ,
pɨpo mwahali hutali.
18 Bhansangalusiizye ʉmwoyo gwanɨ,
nantele bhabhasangalusiizye amooyo geenyu.
Ɨshi mubhatinihaje shinza abhantu nanshi ɨbha.
19 Abhantu ɨbho bhali mu vibhanza ɨvyɨ mukowa ʉgwɨ Aasiya,
bhahubhalamuha.
ɄAkila nʉ Pulisiila,
peeka na bhooziwa ɨbho bhabhʉngaana mu nyumba yaabho,
bhahubhalamuha tee mwi‑itaawa lya Mwɨnɨ ʉYeesu.
20 Abhooziwa bhonti ɨbho bhali ɨpa bhahubhalamuha.
Mulamuhanaje hu kʉndwa wa Yeesu ʉKilisiti.
21 Anɨ nɨPaulo ɨnsimbile ɨndamuho ɨzi hu nʼkhono gwanɨ nɨɨnɨ.
22 Ʉmuntu wowonti ʉyo saga anʼgɨɨne ʉMwɨnɨ,
agunwe.
Mwɨnɨ weetu,
ʉyɨnze!