Ɨnsundo hu nongwa ya‑apuute ɨvifwani ɨvya bhangʉlʉbhɨ abhi‑ilenga
10
Amwɨ mubhooziwa mubhamwetu,
ɨhwanza mumanye shinza huje abhamaama bheetu hu habhaazyo ɨho bhahashilaga mu lʉʉgwa,
bhonti bhahali bhalongozewa ni‑ibhɨngo,
a nantele bhonti bhahashilile paahati yɨ nsʉmbi.
2 Alongozewe ni‑ibhɨngo ɨlyo na‑ashile paahati yɨ nsʉmbi,
hwahali nanshi aje ahwozewe na‑abhe bhasundwe bha Moose.b
3 Bhonti bhahaliiye ɨshalye shishiila sha shahafumile hu mwanya.c
4 Nantele bhonti bhahamwelile amɨnzɨ gagaala ɨgo ʉNgʉlʉbhɨ ahabhapiiye hwi‑idala ɨlyɨ mayeled afume mwi‑ilyalawe.
e Ilyalawe ɨlyo ahali yʉ Kilisiti ʉyo ahali ajenda peeka nabho.
5 Leelo abhinji mu bheene bhahali bhabhomba ɨgo saga asʉngwa ʉNgʉlʉbhɨ.
Hu nongwa ɨyo bhahayaziwa,
amavimba gaabho gahabha shaaha mu lʉʉgwa.
6 Ɨshi,
ɨnongwa ɨzi shifwani huliitɨ hu nongwa ya hutisunde,
huje tigandi anyonywe ɨmbiibhi nanshi abheene ɨsho bhahali bhanyonywa.
7 Mugandi apuute abhangʉlʉbhɨ nanshi ɨsho bhamo mu bheene bhahali bhabhomba.
Hu nongwa yaabho ɨsimbwilwe mu Nsimbo ɨMfinjile huje,
“Abhantu bhahakhɨɨye,
bhahalya na‑amwele,
pamandɨ bhahɨmɨɨlɨla ahwanje shiweegu.”f
8 Nantele,
tigandi abhe bheegu nanshi bhamo mwɨ‑ɨbho bhahali bheegu,
bhahayaziwa abhantu ɨelufu amashʉmi gabhɨɨlɨ na zitaatu (23,000) hwi‑isiku lyeka.g
9 Nantele,
tigandi hunʼjele ʉKilisiti nanshi ɨsho bhamo bhahanʼjelile hwi‑idala ɨlya‑abhombe ɨmbiibhi,
bhahalumwa nɨ nzoha,
bhahafwa.h
10 Nantele,
mugandi ahwibhune nanshi ɨsho bhamo mu bheene bhahali bhahwibhunanzya,
bhahayaziwa nʉ nʼtumi ʉnʼgoji.i
11 Ɨshi,
gonti ɨgo ga gahabhaajile abheene,
gahasimbwilwe huje gabhe shifwani ɨsha hutisunde atɨ ta tikhala mu nsiku ɨzi ɨzya hu malishilo.
12 Ɨshi,
ʉyo ahwilola huje ayɨmɨlɨɨye shinza mu lwɨtɨho,
ahwiyenyaaje huje agandi agwe.
13 Ɨnjelo ɨzyo zibhaajile amwɨ,
zili nanshi ɨzyo abhantu abhanjɨ bhajelwa shila lisiku.
ɄNgʉlʉbhɨ nʼnʉnjɨsu,
ʉmwene saga anza hubhaleshe mujelwe ashile ikhone lyenyu.
Leelo hu habhaazyo aha‑ajelwe,
anza hubhapeele idala ɨlya‑afumile,
huje mubhe ni‑ikhone ɨlya‑ajimbe.
Ɨnsundo hu nongwa yɨ Shalye ɨShifinjile
14 Ɨshi bhakʉndwe bhaanɨ,
muleshe lwonti apuute abhangʉlʉbhɨ!
15 Ɨyanga naamwɨ mwa muli nɨ njeele,
musɨɨbhe shinza ɨgo ɨyanga.
16 Ɨshi,
tihunʼsalifya ʉNgʉlʉbhɨ hu nongwa yɨ lupɨndɨ ʉlwo timwelela hu habhaazyo ahɨ Shalye ɨShifinjile.
Wɨlɨ,
lwa tibhomba ɨsho saga tibha lwʉmvwano mwi‑idanda lya Kilisiti?
Nantele,
hu habhaazyo ɨho timensulanya ɨntogito na‑alye,
wɨlɨ saga tibha lwʉmvwano mu mʼbɨlɨ gwa Kilisiti?
17 Enya,
ɨntogito ɨli yeeka,
hwope nkashele atɨ tili bhinji,
tili mʼbɨlɨ gweka,
pɨpo atɨ tenti tilya ɨntogito yɨɨyo yeeka.
18 Bheenyi aBhaizilaeeli.
Lwa bhalya ɨvintu ɨvyo bhaputiiye pa shipuuto,
bhabha lwʉmvwano huje bhamʼpuute ʉNgʉlʉbhɨ.j
19 Ɨshi,
ɨhwanza ɨnjanje yeenu?
Wɨlɨ,
ɨvintu ɨvyo bhafumya hwa bhangʉlʉbhɨ vili nɨ zya pa mwanya zyozyonti?
Nantele,
bhope abhangʉlʉbhɨ,
wɨlɨ,
bhɨ lyoli?
20 Ndaadi!
Ɨnsangu ɨyo bhafumya ɨbho saga bhamʼmwɨtɨɨshe ʉNgʉlʉbhɨ,
saga bhahumʼfumizya ʉNgʉlʉbhɨ,
lyoli bhafumya hu mapepo.
Anɨ saga ɨhwanza huje amwɨ mubhanje lwʉmvwano na mapepo.
21 Saga muhwanziwa amwelele ʉlupɨndɨ ʉlwa Mwɨnɨ weetu ʉYeesu ʉKilisiti,
nantele amwelele ʉlupɨndɨ ʉlwɨ mapepo.
Saga muhwanziwa alye ɨShalye ɨShifinjile,
nantele alye ɨshalye ɨshɨ mapepo.
22 Ɨshi,
tihwanza humʼviisye ʉMwɨnɨ?
Wɨlɨ,
tili ni‑ikhone ashile ʉmwene?
Ɨgo tibhomba gamʼmwamihaje ʉNgʉlʉbhɨ
23 Bhamo bhayiga,
“Ɨvintu vyonti vyɨtɨshɨlɨɨlwe abhombwe.”
Leelo anɨ ɨyanga huje saga vyonti vili nɨ zya pa mwanya.
Nantele bhayiga,
“Ɨvintu vyonti vyɨtɨshɨlɨɨlwe abhombwe.”
Leelo anɨ ɨyanga huje saga vyonti ɨvyo vihwavwa hubhakhamantanye mu lwɨtɨho.
24 Ʉmuntu agandi asaaje ɨgo gahumʼmwavwa yʉʉyo,
lyoli asaagaje ɨgo gahubhaavwa abhamwabho.
25 Ɨnyama ɨzyo bhakazya mu lembuka mubhanje mulya sinta abhʉzɨɨlɨzye‑bhʉzɨɨlɨzye huje zifumile hwoshi.
Ɨnyama ɨzyo zigandi hubhataamye mu mooyo geenyu,
26 pɨpo mu Nsimbo ɨMfinjile ɨsimbwilwe ɨshi,
“Ɨnsi zyonti peeka nɨ vintu vyonti ɨvyo vihwɨli,
vya Mwɨnɨ.”k
27 Ʉmuntu ʉyo saga mwoziwa nkashele abhaanile alye,
namwɨ mwɨtɨɨshe abhale,
ɨvyalye vyonti ɨvyo abhatengɨɨnye,
mubhanje mulya sinta abhʉzɨɨlɨzye‑bhʉzɨɨlɨzye,
huje ɨnyama ɨzyo zigandi hubhataamye mu mooyo geenyu.
28 Leelo nkashele ʉmuntu abhabhʉzɨɨzye huje,
“Ɨshalye ɨshi bhaputiiye hwa bhangʉlʉbhɨ abhi‑ilenga,”
ɨpo musahasheele alye hu nongwa ya muntu ʉyo abhabhʉzɨɨzye,
nantele hu nongwa ɨya‑ataamiwe mu mwoyo.
29 Lwɨ‑ɨyanga huje,
“Hu nongwa ɨya‑ataamiwe mu mwoyo,”
saga ɨhubhayanga amwɨ,
lyoli ɨyanga ʉmuntu ʉyo abhabhʉzɨɨzye.
Leelo yeenu amayɨmba aga mu mwoyo ʉgwa wɨnjɨ gazijile ʉsatulwe lwanɨ?
30 Nkashele anɨ ɨlya ɨshalye ɨsho hwa hunʼsalifye ʉNgʉlʉbhɨ,
yeenu ɨyangwa shibhiibhi hu nongwa yɨ vintu ɨvyo ɨnʼsalifiizye ʉNgʉlʉbhɨ?
31 Ɨshi,
hohonti ɨho mulya,
awe amwele,
awe ahanjɨ hohonti ɨho mubhomba,
mubhombaje hu nongwa ɨya humʼmwamishe ʉNgʉlʉbhɨ.
32 Mugandi hubhaviisye aBhayahuudi awe bha saga Bhayahuudi,
awe ɨshibhanza ɨsha Ngʉlʉbhɨ.
33 Mubhanje nanshi anɨ.
Ɨlɨnga hubhakhondeezye abhantu bhonti hu nongwa zyonti ɨzyo ɨbhomba.
Saga huje ɨbhomba ɨsho huje anɨ ɨnzyaje ɨzya pa mwanya,
lyoli ɨbhomba ɨsho huje abhantu abhinji bhazyaje ɨzya pa mwanya,
huje bhafyʉlwe.