Abhabhomvi bhatʉlwaje ɨvya mu mʼbɨlɨ
9
Wɨlɨ,
anɨ saga ɨndi nʼsatulwe?
Wɨlɨ,
anɨ saga ɨndi nʼsontwa?
Wɨlɨ,
anɨ saga nahanʼnolile ʉMwɨnɨ weetu ʉYeesu?
Nantele,
ɨmbombo ɨyo nahabhombile anɨ saga ya yɨɨyo ɨbhabhɨɨshɨle amwɨ humʼmwɨtɨshe ʉMwɨnɨ?
2 Hwope nkashele abhantu abhanjɨ bhahundola huje saga ɨndi nʼsontwa,
leelo huliimwɨ anɨ ɨndi nʼsontwa,
hu nongwa ya‑aje ʉlwɨtɨho lwenyu mwa Kilisiti shimanyishizyo ɨsho shilolesya aje anɨ ɨnsonteleziiwe nʉ Mwɨnɨ.
3 Ɨshi,
abhantu ɨbho bhahuhaana anɨ huje saga ɨndi nʼsontwa,
ɨhubhabhʉzɨɨlɨzya huje,
4 wɨlɨ,
atɨ saga tikhondɨɨye huvyaje ɨvyalye nɨ vimwelo hu nongwa yɨ mbombo yeetu ɨyɨ sontwa?
5 Wɨlɨ,
musɨɨbha aje atɨ saga tikhondɨɨye ashʉʉle na bhashɨ abhooziwa,
nanshi ɨsho abhomba ʉKeefa hwa huje ʉPeeteli na bhasontwa abhanjɨ,
peeka na bhadoodo bha Mwɨnɨ ʉYeesu?
6 Awe nɨɨnɨ nʉ Balinaaba lwene ɨbho saga tikhondɨɨye ahwambɨɨlɨle ɨvintu ɨvya hutaavwe hu nongwa yɨ sontwa weetu?
7 Nʼnwi wɨlɨ ʉyo abhala alwe ʉlʉgʉ nɨ mpɨɨya zyakwe yʉʉyo?
Weenu ʉyo avyala ɨmbeyu zyakwe,
leelo ɨviyabho lwa vyela bhalya abhanjɨ?
Nantele,
weenu ʉyo adiima ɨvyʉma sinta amwele isʉnsʉ ɨlyɨ vyʉma vyakwe?
8 Amazwi ɨgo ɨnjanjile,
saga nsɨɨbho zya bhantu,
zyope ɨndajizyo zya Moose sha ziyanga.
9 Mu ndajizyo zya Moose ɨsimbwilwe huje,
“Ʉgandi huyipinye ɨngʼombe ilomu hu habhaazyo ɨho ɨkhanyanga ɨngano asonzoole ɨnsanga pa lubhʉngʉlʉ.”
a Wɨlɨ,
mu mazwi ɨga hwa huje ʉNgʉlʉbhɨ asɨɨbha hu nongwa yɨ ngʼombe lwene?
10 Wɨlɨ,
saga ahayangaga ɨgo hu nongwa yeetu?
Sha zili!
Ɨnsimbo ɨzyo zyahasimbwilwe hu nongwa yeetu,
pɨpo ʉyo alima ʉnʼgʉnda,
nʉ‑ʉyo avuna mu nʼgʉnda guula,
bhonti bhakhondɨɨye asʉʉbhɨle huje bhope bhanza hushaaje ɨshilʉndɨlo.
11 Ɨshi,
atɨ tilʉmbɨlɨɨye ɨNongwa ɨNyinza huliimwɨ nanshi ʉmuntu ʉyo avyala ɨmbeyu.
Lyoli hukhome tee ahwambɨɨlɨle ɨvintu afume huliimwɨ ɨvya hutaavwe ɨvyɨ mʼbɨlɨ nanshi ʉmuntu ʉyo avuna?
12 Nkashele abhanjɨ bhakhondɨɨye huvyaje ɨvintu afume huliimwɨ,
ɨshi atɨ,
saga tikhondɨɨye tee ashile ɨbho?
Leelo atɨ saga tahɨsɨɨzye ɨgo tikhondɨɨye abhombelwe naamwɨ,
lyoli tijimbile mu gonti huje tisahasheele hubhadindizye abhantu ahwɨtɨshe ɨNongwa ɨNyinza ɨzya Yeesu ʉKilisiti.
13 Wɨlɨ,
saga mumɨɨnye huje ɨbho bhabhomba ɨmbombo mu nyumba ɨmfinjile ɨya Ngʉlʉbhɨ,
b bhalya ɨshalye shaabho afume mu nyumba ɨyo?
Bhope ɨbho bhabhomba ɨmbombo ɨya pa shipuuto,
bhahwambɨɨlɨla ɨshilʉndɨlo shaabho afume mu nsangu.
14 Shɨɨsho,
wope ʉMwɨnɨ ʉYeesu ahalajiziizye huje ɨbho bhalʉmbɨɨlɨla ɨNongwa ɨNyinza,
bhahwanziwa alye afumilane nɨ mbombo ɨyo.c
15 Leelo anɨ,
saga ɨndɨnjɨle alaabhe nka heeka mwɨ‑ɨgo ɨhondɨɨye abhombelwe.
Nantele,
saga ɨsimba ɨga huje ɨmbombelwe.
Hwaliinɨ hwashi afwe ashile ʉmuntu wowonti hunzijile anɨ ahwibaade hu nongwa ya‑alʉmbɨɨlɨle ɨNongwa ɨNyinza ɨzya Yeesu sinta mʼposheelo.
16 Leelo saga ɨhondɨɨye ahwibaade hu nongwa ya‑alʉmbɨɨlɨle ɨNongwa ɨNyinza lwene,
pɨpo ɨlyo lya lyɨlyo ɨndajiziiwe abhombe.
Nantele,
lwanɨ anɨ,
nkashele saga ɨlʉmbɨɨlɨla ɨNongwa ɨNyinza ɨzyo.
17 Nkashele nahali ɨbhomba ɨmbombo ɨnɨ hu kʉndwe waanɨ,
handɨ ɨsʉʉbhɨla ʉmʼposheelo,
leelo ɨshi ɨhwanziwa abhombe hu nongwa ya‑aje ʉNgʉlʉbhɨ ampiiye ɨmbombo ɨnɨ pɨpo ʉmwene ahali ahwanza.
18 Ɨshi,
ʉmʼposheelo gwanɨ ha hantu heenu?
Ʉmʼposheelo gwanɨ hulʉmbɨɨlɨle ɨNongwa ɨNyinza ɨzya Yeesu sinta asombwe,
sinta hwɨsye ɨgo ɨhondɨɨye ahwambɨɨlɨle hu nongwa ya‑alʉmbɨɨlɨle ɨnongwa ɨnɨ.
Ɨgo gakhondɨɨye abhombwe na bhasontwa
19 Anɨ saga ɨndi nʼkalwe wa muntu wowonti,
ɨndi nʼsatulwe.
Leelo ɨhwibhɨɨshɨle abhe nʼkalwe wa bhantu bhonti hu nongwa ya hubhaavwe abhantu abhinji bhamʼmwɨtɨshe ʉKilisiti.
20 Hu Bhayahuudi,
nahali ɨbhomba nanshi aBhayahuudi,
huje ɨmbaavwe aBhayahuudi bhamʼmwɨtɨshe ʉKilisiti.
Hwa bhaala bha bhalondolezya ɨndajizyo zyabho,
nahali nanshi ɨbho bhahuzilondolezya,
hwope nkashele saga nahali nʼkalwe wɨ ndajizyo zyabho,
huje ɨmbaavwe ɨbho bhalondolezya ɨndajizyo huje bhamʼmwɨtɨshe ʉKilisiti.
21 Hwɨ‑ɨbho bha saga bhazimɨɨnye ɨndajizyo ɨzya Bhayahuudi,
nahali nanshi ʉmuntu ʉnʼnanzi,
huje ɨmbaavwe bhamʼmwɨtɨshe ʉKilisiti.
Saga huje ɨlemba sinta alondolezye ɨndajizyo zya Ngʉlʉbhɨ,
ndaadi,
ɨhuzilondolezya hu nongwa ya‑aje ɨlongozewa nɨ ndajizyo zya Kilisiti.
22 Hwɨ‑ɨbho bha saga bhajinile mu lwɨtɨho,
nahali nanshi ʉyo saga ajinile mu lwɨtɨho huje ɨmbaavwe bhamʼmwɨtɨshe ʉKilisiti.
Hwa bhantu bhonti nahahwibhɨɨshɨle huje ɨndi wamwabho,
huje hu madala gonti ɨmbafyʉle abhanjɨ.
23 Ɨbhomba ɨgo gonti hu nongwa yɨ Nongwa ɨNyinza ɨzya Kilisiti,
huje nanɨ ɨmbe peeka na bhanjɨ ahwambɨɨlɨle ɨnsayo zyakwe.
24 Wɨlɨ,
saga mumɨɨnye huje abhantu ɨbho bhalwɨlana mu lubhilo,
bhonti bhashɨmbɨla,
leelo ʉyo ahwambɨɨlɨla ɨmpeesya abha weeka?
Ɨshi,
mubhanje mushɨmbɨla tee huje amwɨ mwahambɨɨlɨle ɨmpeesya.
25 Ɨbho bhalwɨlana mu lubhilo bhahwizijila mu minji hu nongwa yɨ lwɨlano.
Bhabhomba ɨsho huje bhambɨɨlɨle ɨmpeesya ɨyɨ habhaazyo hashe lwene.
Leelo atɨ tibhomba ɨsho huje tambɨɨlɨle ɨmpeesya ɨyo saga ɨnanjiha nka lisiku limo.
26 Ɨsho sha shɨɨsho nanɨ saga ɨshɨmbɨla nanshi ʉmuntu ʉyo ashɨmbɨla sinta nsɨɨbho,
nantele saga ɨlwa nanshi ʉmuntu ʉyo aponya ɨmbuli hwi‑ikhone ɨpo saga pali na hantu.
27 Lyoli ɨhuguyɨmvya na hugujinjizye ʉmʼbɨlɨ gwanɨ ajimbiilile,
huje lwa nabhalʉmbɨɨlɨla abhantu ɨNongwa ɨNyinza,
anɨ nɨɨnɨ ɨngandi akhaanwe nʉ Ngʉlʉbhɨ.