Ɨvyalye ɨvyo vifumiziiwe nsangu hwa bhangʉlʉbhɨ
8
Ɨshi,
ɨyanga hu nongwa yɨ vyalye ɨvyo vifumiziiwe nsangu hwa bhangʉlʉbhɨ.
a Ɨmɨɨnye muyanga huje,
“Atɨ tenti tili nɨ njeele.”
Leelo ɨnjeele zihubhabhɨɨha abhantu abhe na mashento.
Lyoli ʉkʉndwa wa wʉʉwo wuhubhakhamantanya abhantu mu lwɨtɨho.
2 Nkashele ʉmuntu ahwilola huje ali nɨ njeele,
ʉyo saga ali nɨ njeele nanshi shɨ‑ɨhwanziwa amanye.
3 Leelo ʉmuntu ʉyo ahunʼgana ʉNgʉlʉbhɨ,
ʉyo ya yʉʉyo amanyiha nʉ Ngʉlʉbhɨ yʉʉyo.
4 Ɨshi,
hu nongwa yɨ vyalye ɨvyo vifumiziiwe nsangu hwa bhangʉlʉbhɨ,
timɨɨnye huje abhangʉlʉbhɨ ɨbho bhahubhapuuta,
saga hantu mu nsi ʉmu.
Nantele,
timɨɨnye huje ali ʉNgʉlʉbhɨ weeka mwene.
5 Lyoli huje abhantu abhanjɨ bhasɨɨbha huje huli na bhangʉlʉbhɨ hu mwanya na hwope mu nsi.
Lyoli huli ɨvintu ɨvinji ɨvyo abhantu bhahuvikwizya huje bhangʉlʉbhɨ awe bhamwɨnɨ.
6 Leelo huliitɨ,
alɨɨho ʉNgʉlʉbhɨ weeka lwene,
yʉ Daada,
ya yʉʉyo ʉyo apelile ɨvintu vyonti.
Atɨ tilemba hu nongwa yaakwe.
Nantele,
yʉ Mwɨnɨ weeka lwene,
yʉ Yeesu ʉKilisiti,
ashilile hwa mwene ɨvintu vyonti vipeliilwe,
nantele ashilile hwa mwene natɨ tili bhʉʉmi.
7 Leelo ɨnjeele ɨzyo saga bhali nazyo abhantu bhonti,
pɨpo bhalɨɨho abhanjɨ ɨbho bhahali na miiho aga‑apuute hwa bhangʉlʉbhɨ.
Hwope ɨshi lwa bhalya ɨvyalye ɨvyo vifumiziiwe nsangu,
ɨvyalye ɨvyo vihubhaweezya shinsɨɨbho huje bhahubhapuuta abhangʉlʉbhɨ.
Nantele bhahwilola mu nsɨɨbho zyabho huje bhabhomba mbiibhi hu nongwa ya‑aje saga bhajinile mu lwɨtɨho.
8 Ɨshi,
ɨshalye saga shihutibhɨɨha abhe mu pɨɨpɨ nʉ Ngʉlʉbhɨ,
hu nongwa ya‑aje hwope nkashele tileha alye,
saga titeezya nahamo,
nantele hwope nkashele tilye,
saga tihwonjezewa nahamo.
9 Ɨshi,
muhwiyenyaaje shinza huje ʉsatulwe lwenyu lugandi hubhasonzye huje bhabhombe ɨmbiibhi ɨbho saga bhajinile mu lwɨtɨho.
10 Ɨyanga ɨsho,
pɨpo ʉmuntu ʉyo saga ajinile mu lwɨtɨho,
abhajiiye hulole aawe wʉ‑ʉli nɨ njeele ʉli mu nyumba ɨya‑apuutile hwa bhangʉlʉbhɨ,
ʉlya ɨshalye.
Wɨlɨ,
hu mwoyo gwakwe saga anza‑asɨɨbhe aje wope akhondɨɨye alye ɨshalye ɨsho bhafumiizye nsangu hwa bhangʉlʉbhɨ?
11 Hwɨ‑ɨlyo,
ʉwamwenyu ʉyo saga ajinile mu lwɨtɨho,
ʉyo ʉKilisiti ahamʼfwɨlɨɨye,
ateega alɨngaane nɨ njeele zyaho.
12 Ɨshi,
ɨpo muhubhabhombela shibhiibhi abhamwenyu ɨbho saga bhajinile mu lwɨtɨho na hubhavwalazye amooyo gaabho,
ɨpo munza‑abhe muhumʼmombela shibhiibhi yʉ Kilisiti yʉʉyo.
13 Ɨshi,
nkashele ɨshalye ɨsho ɨlya shihumʼmomba ʉmwoziwa ʉwamwetu abhombe ɨmbiibhi,
saga ɨnza‑alye nantele ɨshalye ɨshɨ waaji ʉwo dumu,
huje ʉwamwetu agandi ahwinjile mu mbiibhi.