Ɨnsundo hu nongwa yɨ weeji
7
Ɨshi,
ɨyanga hu nongwa yɨ nongwa ɨzyo mwahansimbiiye.
Muyanga huje,
“Shinza huje ʉnʼnume aleshe agone nʉ nʼshɨ.”
2 Ɨyanga ɨshi,
hu nongwa yɨ njelo ɨzya‑abhombe ʉweegu,
shila nʼnume abhe nʉ nʼshɨ waakwe yʉʉyo,
wope shila nʼshɨ abhe nʉ nʼnume waakwe yʉʉyo.
3 Ʉnʼnume abhanje ahumʼmombela ʉnʼshɨ waakwe nanshi shɨ‑ɨhwanziwa,
wope ʉnʼshɨ abhanje ahumʼmombela ʉnʼnume waakwe nanshi shɨ‑ɨhwanziwa.
4 Ʉnʼshɨ saga ali ni‑ikhone hu nongwa yɨ mʼbɨlɨ gwakwe,
lyoli ʉnʼnume waakwe.
Wope ʉnʼnume saga ali ni‑ikhone hu nongwa yɨ mʼbɨlɨ gwakwe,
lyoli ʉnʼshɨ waakwe.
5 Mugandi hwimane,
lyoli nkashele mwɨtɨhɨɨne abhombe ɨsho hu habhaazyo hashe lwene huje muhwifumye apuute hwa Ngʉlʉbhɨ.
Pamandɨ muwelelane nantele,
huje ʉSeetano asahasheele hubhajele hu nongwa ya‑apootwe ahwizijile.
6 Ɨmbabhʉzɨɨzye amazwi ɨgo hubhasunde,
saga huje ɨhwanza hubhabijiilizye.
7 Anɨ nɨnzaga‑asʉngwe huje abhantu bhonti bhabhe nanshi anɨ shɨ‑ɨndi,
a leelo saga zili ɨsho,
pɨpo shila muntu ʉNgʉlʉbhɨ amʼpiiye ɨshikʉnjɨlwa shaakwe,
ʉmo ɨshikʉnjɨlwa ɨshi,
ʉwɨnjɨ shiila.
8 Ɨshi,
ɨhubhabhʉʉzya ɨbho saga bhegɨɨne na bhafwɨle,
huje shinza bhasyale shɨɨsho sinta ahweje awe ahwegwe nanshi ɨndi anɨ.
9 Nkashele bhapootwa ahwizijile,
ɨpo shinza ahweje awe ahwegwe,
hu nongwa ya‑aje hwashi abhombe ɨsho ashile huje azʉvye ɨnsʉngwo ɨzyɨ mʼbɨlɨ.
10 Ɨshi,
ɨhubhapeela ɨndajizyo ɨbho bhegɨɨne.
Ɨndajizyo ɨyo saga yaliinɨ,
lyoli ɨfumile hwa Mwɨnɨ ʉYeesu,
huje ʉnʼshɨ asahanʼneshe ʉnʼnume waakwe.b
11 Nkashele anʼneshile,
asaheegwe ʉhwɨnjɨ,
awe ayɨtɨɨhane nʉ nʼnume waakwe na‑awelelane.
Wope ʉnʼnume asahanʼneshe ʉnʼshɨ waakwe.
12 Ɨshi,
ɨyanga na bhooziwa abhanjɨ.
Ɨgo ɨyanga nsɨɨbho zyanɨ saga ndajizyo zya Mwɨnɨ.
Nkashele ʉnʼnume ʉmwoziwa ayeejile ʉnʼshɨ ʉyo saga mwoziwa,
nʉ nʼshɨ ʉyo ayɨtɨɨshe ajendelelaje akhale nawo,
ʉnʼnume ʉyo agandi hunʼneshe.
13 Wope ʉnʼshɨ ʉmwoziwa,
nkashele ayegwilwe nʉ nʼnume ʉyo saga mwoziwa,
nʉ nʼnume ʉyo ayɨtɨɨshe ajendelelaje akhale nawo,
ʉnʼshɨ ʉyo agandi hunʼneshe.
14 Ɨyanga ɨsho,
pɨpo ʉNgʉlʉbhɨ ahunʼsangalusya ʉnʼnume ʉyo saga mwoziwa hu nongwa ya nʼshɨ waakwe.
Wope ʉnʼshɨ ʉyo saga mwoziwa,
ʉNgʉlʉbhɨ ahunʼsangalusya hu nongwa ya nʼnume waakwe.
Nkashele saga yabhanga ɨsho,
abhaana bheenyu handɨ bhali bhaavu,
lyoli ɨshi bhali bhaana bha Ngʉlʉbhɨ.
15 Leelo nkashele ʉyo saga mwoziwa ahwanza alehane nʉ wamwabho ʉmwoziwa,
munʼnehaje abhombe ɨsho.
Ɨpo ʉmwoziwa ʉyo saga apinywa mu weeji ʉwo.
Lyoli ʉNgʉlʉbhɨ abhakwiziizye huje mukhalaje hu tengaanu.
16 Saga ʉmɨɨnye!
Lumo ʉnʼnume waaho abhajiiye abhe mwoziwa hu nongwa yɨ lwɨtɨho lwaho.
Nawe we nʼnume wʉ‑ʉli mwoziwa,
saga ʉmɨɨnye huje ʉnʼshɨ waaho abhajiiye abhe mwoziwa hu nongwa yɨ lwɨtɨho lwaho.
Abhe nɨ njendo nanshi sha‑ahalajiziizye ʉNgʉlʉbhɨ
17 Ʉmuntu wowonti akhale nanshi ʉMwɨnɨ sha‑amʼmɨɨshɨle,
nantele asyale nanshi sha‑ahali hu habhaazyo ɨho ʉNgʉlʉbhɨ ahanʼkwizyaga.
Ɨnɨ yɨ ndajizyo yaanɨ hu vibhanza vyonti ɨvya bhooziwa.
18 Ʉmuntu ʉyo ahakwiziiwe nʉ Ngʉlʉbhɨ hu habhaazyo ɨho lwa‑ali atendiilwe ɨngoola ɨya hwitagaalila ɨyɨ lume,
c ʉyo aleshe ahwibhɨɨshe nkati saga bhabhombɨɨye ɨsho.
Nantele,
ʉmuntu ʉyo ahakwiziiwe nʉ Ngʉlʉbhɨ hu habhaazyo ɨho lwa‑ali saga atendiilwe ɨngoola ɨya hwitagaalila ɨyɨ lume,
ʉyo aleshe ayanje huje atendwe ɨngoola ɨyo.
19 Atende ɨngoola ɨyo awe sinta atende,
nazimo ɨzya pa mwanya.
Lyoli ahantu ɨho hali nɨ zya pa mwanya hukhate ɨndajizyo zya Ngʉlʉbhɨ.
20 Ɨshi,
shila muntu asyale nanshi ahali hu habhaazyo ɨho ʉNgʉlʉbhɨ ahanʼkwizyaga.
21 Nkashele ʉNgʉlʉbhɨ ahaʼkwiziizye hu habhaazyo ɨho ʉli nʼkalwe,
ɨlyo ligandi hutaamye.
Leelo nkashele ʉli ni‑idala ɨlya hwibhɨɨshe mu waawusu,
hwashi ʉbhombe ɨsho.
22 Ɨyanga ɨsho,
pɨpo ʉmuntu wa‑ahakwiziiwe nʉ Mwɨnɨ ʉYeesu lwa‑ali nʼkalwe,
ʉmuntu ʉyo agaluuhana abhe mwawusu wa Mwɨnɨ ʉYeesu.
Shɨɨsho ʉmuntu ʉmwawusu lwa‑akwiziwa agaluuhana abhe nʼkalwe wa Kilisiti.
23 Mwahagomboliilwe hu shʉʉma ɨshinji.
Ɨshi,
musahabhe bhakalwe bha bhantu.
24 Bhooziwa bhamwetu,
shila muntu ajendelelaje abhe nanshi sha‑ahali hu habhaazyo ɨho ahakwiziiwe nʉ Ngʉlʉbhɨ.
Ɨnsundo hwɨ‑ɨbho saga bhegwilwe na hwa bhafwɨle
25 Ɨshi,
hwa bhalɨndu ɨbho saga bhegwilwe,
saga ɨndi nɨ ndajizyo afume hwa Mwɨnɨ.
Leelo ɨhubhalangaanyizya hu nsɨɨbho zyanɨ,
anɨ ʉyo ʉNgʉlʉbhɨ ambɨɨshɨle abhe nʼnʉnjɨsu hwi‑idala ɨlya hundolele ɨnkʉmbʉ yaakwe.
26 Ɨshi,
hu nongwa yɨ mayɨmba ɨnsiku ɨzi,
ɨsɨɨbha huje shinza ʉmuntu asyale nanshi sha‑ali.
27 Wɨlɨ,
aawe ʉyeejile?
Nkashele ʉyeejile,
ʉsahasheele alehane nʉ nʼshɨ waaho.
Wɨlɨ,
aawe saga ʉyeejile?
Nkashele saga ʉyeejile,
ʉsahasheele ahweje.
28 Hwope nkashele ʉhwega,
saga ʉnza‑abhe ʉbhombile ʉbhiibhi.
Hwope ʉnʼnɨndu ʉnʼduvya wope nkashele ahwegwa,
saga anza‑abhe abhombile ʉbhiibhi.
Leelo,
ɨbho bhegɨɨne bhahayibha na mayɨmba aga mu nsi.
Nanɨ ɨhwanza hubhasunde huje gasahabhaaje ɨgo.
29 Bhooziwa bhamwetu,
ɨyanga huje,
hasyalile habhaazyo hadoodo aha humʼmombele ʉNgʉlʉbhɨ.
Afume ɨshi ɨbho bheejile bhaleshe asɨbhɨɨlɨle abhashɨ bhaabho lwene huje bhabhombe ɨmbombo ya Mwɨnɨ.
30 Bhope ɨbho bhalila,
ɨbho bhashiiye,
ɨbho bhakala ɨvintu,
31 nɨ‑ɨbho bhabhomba ɨvintu ɨvya mu nsi ɨnɨ,
ɨbho bhonti bhagandi ataamiwe tee nɨ‑ɨgo.
Bhabhe bhabhomba ɨmbombo ya Mwɨnɨ,
pɨpo ɨnsi ɨnɨ nanshi sha tihuyilola,
ɨshila.
32 Ɨsho,
ɨhwanza huje muleshe abhe nʉ wooga hu nongwa ya mu nsi.
Ʉnʼnume ʉyo saga ayeejile,
ahwifumya abhombe ɨmbombo ya Mwɨnɨ,
asɨɨbha ɨsho anza hunʼkhondeezye ʉMwɨnɨ.
33 Leelo ʉnʼnume ʉyo ayeejile,
ahwifumya abhombe ɨmbombo zyakwe,
asɨɨbha ɨsho anza hunʼkhondeezye ʉnʼshɨ waakwe,
34 ɨnsɨɨbho zyakwe zibha ɨmbali zibhɨɨlɨ.
Ʉnʼshɨ wa saga ali nʉ nʼnume nʉ nʼnɨndu wa saga ayegwilwe bhali paayo nʉ nʼshɨ ʉyo ayegwilwe.
Ɨbho bhahwifumya abhombe ɨmbombo ya Mwɨnɨ huje bhabhe bhafinjile amabɨlɨ gaabho na mooyo.
Leelo ʉnʼshɨ ʉyo ayegwilwe,
ahwifumya abhombe ɨmbombo zyakwe,
asɨɨbha ɨsho anza hunʼkhondeezye ʉnʼnume waakwe.
35 Amazwi ɨgo ɨhubhabhʉʉzya saga huje ɨhwanza hubhadindizye,
lyoli ɨhwanza hubhaavwe.
Ɨhwanza huje mubhanje mukhala mwi‑idala lya likhondɨɨye,
mubhanje muhumʼmombela ʉMwɨnɨ hu mwoyo gwonti.
36 Ʉnʼsahaala wowonti ʉyo alola saga anza‑abhe abhomba shinza asinte humʼmweje ʉnʼnɨndu ʉnʼduvya ʉyo anʼzinjiiye,
nantele hwope amaaha gaakwe aga hwegwe gashilile,
nʉ nʼsahaala ʉyo alola ɨkhondɨɨye bheegane,
abhombe nanshi sha‑ahwanza,
bheegane.
Ɨpo saga anza‑abhe abhombile ɨmbiibhi.
37 Leelo ʉnʼsahaala nkashele ayamuuye yʉʉyo afume hu mwoyo gwakwe huje saga ahumʼmwega ʉnʼnɨndu ʉyo,
nahamo ahantu ha hahumʼbijiilizya ahweje,
nantele abhajiiye ahwizijile ɨnsʉngwo zyakwe,
ɨshi anza‑abhe abhombile shinza.
38 Ɨshi,
ʉnʼsahaala ʉyo ahumʼmwega ʉnʼnɨndu ʉnʼduvya ʉyo ahanʼzinjiiye,
abhomba shinza.
Leelo ʉyo saga ahumʼmwega,
abhomba shinza tee.d
39 Nantele,
ʉnʼshɨ ʉyo ayegwilwe asyale mu weeji hu habhaazyo honti ɨho ʉnʼnume waakwe ali mwʉmi.
Leelo nkashele ʉnʼnume waakwe afwiye,
ɨpo abha nʼsatulwe ahwegwe nʉ muntu wowonti ʉyo ahumʼmwanza,
lyoli ʉnʼnume ʉyo abhanje mwoziwa wa Mwɨnɨ ʉYeesu.
40 Leelo hwashi,
ʉmʼfwɨle ʉyo asyale sinta hwegwe.
Ɨzyo nsɨɨbho zyanɨ,
leelo ɨsɨɨbha huje nanɨ ʉMʼpepo wa Ngʉlʉbhɨ ahundongozya ayanje amazwi ɨgo.