Atakilane hwa bhooziwa
6
Nkashele ʉmo mwaliimwɨ ali nɨ nongwa nʉ mwoziwa ʉwamwabho,
atwala wɨlɨ ɨnongwa yaakwe hwɨ‑ɨbho saga bhooziwa?
Ɨshi,
saga akhondɨɨye atwale hwa bhooziwa abhamwabho huje bhalonje?
2 Saga mumɨɨnye huje abhooziwa bha bhɨɨbho bhahayihuyilonga ɨnsi ɨnɨ?
Ɨshi,
nkashele atɨ tibhooziwa tahayihuyilonga ɨnsi ɨnɨ,
yeenu mupootwa alonje ɨnongwa ɨmpʉpʉʉsu paahati yeenyu?
3 Saga mumɨɨnye huje tahayihubhalonga abhantumi?
Nkashele tahayihubhalonga abhantumi,
mukhondɨɨye amale ɨnongwa mu lemvu weenyu.
4 Ɨshi,
yeenu hu habhaazyo ɨho mulwiye hu nongwa yɨ lemvu weenyu,
mutwala ɨnongwa yeenyu hwa bhantu ɨbho saga bhɨtɨshɨlɨɨlwe nɨ shibhanza?
5 Ɨyanga ɨlyo huje mulole ɨnsoni.
Wɨlɨ,
paahati yeenyu nʉʉmo nkamba muntu wa‑ali nʼtengamazu,
ʉyo abhajiiye amale ɨnongwa ɨya bhooziwa abhamwabho?
6 Leelo amwɨ,
muli na miiho aga muntu hunʼtaake ʉmwoziwa ʉwamwabho hwɨ‑ɨbho saga bhooziwa!
7 Atakilane ʉhwo hulolesya huje mupotiilwe lwonti.
Wɨlɨ,
saga hwashi abhombelwe shibhiibhi na bhooziwa abhamwenyu?
Wɨlɨ,
saga hwashi ahwɨtɨshe afyʉlwe ɨvintu vyenyu?
8 Leelo ɨshi,
amwɨ mwɨmwɨ mubhomba shibhiibhi tee na‑afyʉle ɨvintu,
nantele mubhomba ɨgo hwa bhooziwa abhamwenyu!
9 Saga mumɨɨnye huje abhabhomba mbiibhia saga bhahayitʉʉha mu wumwɨnɨ ʉwa Ngʉlʉbhɨ?
Mugandi ahwigobele!
Abheegu,
abhantu ɨbho bhapuuta abhangʉlʉbhɨ,
abhabhembusu,
hwope ɨbho bhahwegana abhalume hwa bhalume,
10 abhiibha,
abhiimi,
abhamwezi,
abhɨ ndigo,
abhankoonya,
ɨbho bhonti saga bhahayitʉʉha mu wumwɨnɨ ʉwa Ngʉlʉbhɨ.
11 Bhamo muuhati yeenyu sha shɨɨsho bhahali.
Leelo ɨshi,
ashilile hwa Mwɨnɨ weetu ʉYeesu ʉKilisiti na hwa Mʼpepo wa Ngʉlʉbhɨ weetu,
mwoziiwe ɨmbiibhi zyenyu,
musaluliilwe abhe bhafinjile na‑abhaaziwe abhe bhagolosu.
Tileshe lwonti ʉweegu
12 Bhamo muuhati yeenyu bhayiga,
“Tɨtɨshɨlɨɨlwe abhombe ɨvintu vyonti ɨvyo tihwanza.”
Lyoli,
leelo saga huje ɨvintu vyonti vili nɨ zya pa mwanya huliitɨ.
Hwope nkashele muyiga,
“Tɨtɨshɨlɨɨlwe abhombe ɨvintu vyonti ɨvyo tihwanza,”
leelo anɨ saga ɨnza‑abhe nʼkalwe wa hohonti.
13 Bhamo muuhati yeenyu bhayiga,
“Lwa tili nɨ nzala,
tikhondɨɨye alye,
pɨpo amabɨlɨ gahwanza ɨshalye.”
Sha shɨɨsho zili,
leelo hahwɨnza ahabhaazyo ɨho ʉNgʉlʉbhɨ ahayigalulanya amabɨlɨ geetu gahayibha saga gahwanza ahantu aha‑alye.
Leelo ɨshi,
muleshe ayanje huje ɨhwanziwa abhombe ʉweegu,
nanshi shɨ‑ɨhwanziwa alye hu habhaazyo ɨho tili nɨ nzala.
ɄNgʉlʉbhɨ saga ahapelile amabɨlɨ geetu hu nongwa yɨ weegu,
lyoli ahapelile amabɨlɨ hu nongwa ya humʼmombele ʉMwɨnɨ,
wope ʉMwɨnɨ ahugasʉnga amabɨlɨ.
14 Nantele,
ʉNgʉlʉbhɨ ahayihutizyʉsya atɨ hwi‑ikhone lyakwe,
nanshi sha‑ahanʼzyʉsyɨzye ʉMwɨnɨ ʉYeesu.
15 Saga mumɨɨnye huje amabɨlɨ geenyu shipelwa shɨ mʼbɨlɨ gwa Kilisiti?
Ɨshi,
ɨshipelwa ɨshɨ mʼbɨlɨ gwa Kilisiti ʉbhajiiye abhɨɨshe aje mʼbɨlɨ gweka nʉ mwegu?
Ndaadi!
16 Ʉmuntu wowonti ʉyo abhomba ʉweegu ahayibha mʼbɨlɨ gweka nʉ mwegu.
Enya,
ɨsimbwilwe mu Nsimbo ɨMfinjile huje,
“Bhabhɨɨlɨ ɨbho bhahayibha mʼbɨlɨ gweka.”b
17 Leelo ʉmuntu wowonti ʉyo apatihɨɨnywe nʉ Mwɨnɨ,
abha hantu heeka nʉ mwene ashilile hwa Mʼpepo ʉMʼfinjile.
18 Ɨshi,
muleshe lwonti abhombe ʉweegu.
Amwɨ muyanga huje,
“Ɨmbiibhi zyonti ɨzyo ʉmuntu abhomba zili hwʉnzɨ yɨ mʼbɨlɨ gwakwe,”
leelo anɨ ɨyanga huje,
ʉmuntu ʉyo abhomba ʉweegu,
ahugubhombela ɨmbiibhi ʉmʼbɨlɨ gwakwe yʉʉyo.
19 Ɨshi,
saga mumɨɨnye huje amabɨlɨ geenyu yɨ nyumba mfinjile ɨya Ngʉlʉbhɨ?
Nantele huje ʉNgʉlʉbhɨ ahabhapiiye ʉMʼpepo ʉMʼfinjile,
ʉyo akhala muuhati yeenyu?
Ɨshi,
amabɨlɨ ɨgo saga geenyu,
lyoli shʉʉma sha Ngʉlʉbhɨ,
20 hu nongwa ya‑aje mwahagomboliilwe hu shʉʉma ɨshinji.
Ɨshi,
mumʼmwamihaje ʉNgʉlʉbhɨ mu mabɨlɨ geenyu.