Luuka 22

ɄYuuda Sikalyoti ahwɨtɨha hunʼsambushile ʉYeesu

(Mataayo 26:1-5, 14, 16; Maalʉko 14:1-2, 10-11; Yoohani 11:45-53)

Ahabhaazyo ahɨ shikulukulu ɨshɨ ntogito zya saga nsafu hahali pa pɨɨpɨ. Ɨshikulukulu ɨsho bhahagaga Paasaka. 2 Abhalongozi bha bhasayi bha Ngʉlʉbhɨ, peeka na bhamanyizyi abhɨ ndajizyo zya Moose bhahanzaga idala ɨlya humʼbude ʉYeesu. Bhahabhombaga ɨgo hu mfiso hu nongwa ya‑aje, bhahabhogopaga abhantu.

3 Ɨpo ʉSeetano ahanʼtʉʉha ʉYuuda ya bhahagaga Sikalyoti. Ʉmwene ahali ʉmo mwa bhasundwe bha Yeesu ishʉmi na bhabhɨɨlɨ. 4 Ɨshi, ʉYuuda ahabhala hwa bhalongozi bha bhasayi bha Ngʉlʉbhɨ na hwa bhagoosi bha bhalwi bha bhahalɨndɨlɨlaga ɨnyumba ɨmfinjile ɨya Ngʉlʉbhɨ. Ahayangana nabho sha bhabhala hunʼkhate ʉYeesu. 5 Abhagoosi bhaala bhahasha tee. Bhahɨtɨɨhana nʉ mwene humʼpeele ɨmpɨɨya. 6 ɄYuuda ahɨɨtɨha, ɨpo ahanda ahwanze ahabhaazyo ahinza ɨho ɨmpʉga ɨya bhantu nɨɨmo huje, anʼsambushile ʉYeesu.

Ʉlulɨngaanyo ʉlwɨ Paasaka

(Mataayo 26:17-25; Maalʉko 14:12-21; Yoohani 13:21-30)

7 Ɨshi, isiku ɨlyɨ shikulukulu ɨshɨ ntogito zya saga nsafu lyahafiha. Isiku ɨlyo, abhantu bhahabhoolaga ɨnyaana ngoole zya zyahabhɨhwɨlwe nzɨɨla hu nongwa yɨ Paasaka. 8 Ɨpo ʉYeesu ahanʼsonteelezya ʉPeeteli nʉ Yoohani, ahabhabhʉʉzya ahaga, “Bhalaji mutilɨnganyizizye ɨshalye ɨshɨ Paasaka.” 9 Bhahamʼmʉzɨɨlɨzya bhahaga, “Ɨshi, ʉhwanza aje, tibhale tiʼlɨnganyizizye pooshi?” 10 Ahabhabhʉʉzya ahaga, “Bhalaji mwi‑ibooma ɨlyɨ Yelusaleemu. Mubhala‑akhomaane nʉ nʼnume ʉmo wa‑anyemuuye ɨnsonta ɨyɨ mɨnzɨ, mumʼmɨnjɨlɨzyaje afishe mu nyumba ya‑atʉʉha. 11 Mumʼmʉʉzye ʉmwanɨɨsho nyumba ʉyo huje, ‘ɄMʼmanyizyi abhʉzɨɨlɨzya huje, “Ɨshidampa shɨ‑ɨmbala‑akhale alɨɨle ɨshalye ɨshɨ Paasaka peeka na bhasundwe bhaanɨ shili hwi?” ’ 12 Ɨpo ʉmwene abhala hubhalanje ɨshidampa ɨshigoosi sha shili mu nyumba ɨnjeleehanye. Muula mwa mubhale, mulɨngaanye huje, tilɨɨle ɨshalye ɨshɨ Paasaka.”

13 Abhasundwe bhaala bhahabhala, bhahafiha mwi‑ibooma ɨlyo. Lwa bhaafiha, bhahazyaga zyonti zili shishiila nanshi ʉYeesu sha‑ahabhabhʉzɨɨzye. Ɨpo bhahalɨngaanya ɨshalye ɨshɨ Paasaka.

ƗShalye ɨShifinjile

(Mataayo 26:20-30; Maalʉko 14:22-26; 1 aBhakolinto 11:23-25)

14 Ahabhaazyo aha‑alye lwa haafiha, ʉYeesu ahakhala alye ɨshalye peeka na bhasontwa bhaakwe. 15 Ahabhabhʉʉzya ahaga, “Ɨnsʉngwɨlwe tee alye ɨshikulukulu ɨshi ɨshɨ Paasaka peeka naamwɨ, lwɨ‑ɨnsɨɨle abhale mu malabha. 16 Ɨhubhabhʉʉzya huje, saga ɨmbala‑alye nantele ɨshikulukulu ɨshɨ Paasaka afishe lwa shahayibhombeha hu wumwɨnɨ ʉwa Ngʉlʉbhɨ lwa wɨnza.”

17 Ɨpo ʉYeesu aheega ʉlupɨndɨ, ahanʼsalifya ʉNgʉlʉbhɨ ahaga, “Eji ɨdivaayi ɨnɨ, mumwele mwenti! 18 Ɨhubhabhʉʉzya huje, afume sanyʉʉnʉ saga ɨmbala‑amwele lwonti ɨdivaayi, afishe lwa yabhombeha mu wumwɨnɨ ʉwa Ngʉlʉbhɨ.”

19 Ɨpo aheega ɨntogito, ahanʼsalifya ʉNgʉlʉbhɨ, ahayimensulanya, ahabhapeela abhasundwe bhaakwe, ahaga, “Ʉgu gwʉ mʼbɨlɨ gwanɨ gwa gufumiziwa hu nongwa yeenyu. Mubhombaje ɨshi shila lwa mulya, huniizushe anɨ.” 20 Lwa bhaamala alye, ʉYeesu ahabhomba shishiila, aheega ʉlupɨndɨ ʉlwɨ divaayi. Lwa‑ahubhapeela, ahaga, “Ʉlupɨndɨ ʉlwu lilagano lipya, ɨlyo ʉNgʉlʉbhɨ abhala‑abhombe hwi‑idala ɨlya hwitishe idanda lyanɨ hu nongwa yeenyu.

21 Leelo mumanye huje, ʉmuntu wa‑ahunsambushila, tilya peeka nawo pa meeza ɨpa. 22 Anɨ nɨMwana wa Muntu ɨmbala‑afwe, nanshi ʉNgʉlʉbhɨ sha‑ahasɨbhɨlɨɨye huje, zibhombeshe. Leelo, lwakwe ʉmuntu ʉyo wa‑abhala hunsambushile anɨ!” 23 Ɨpo bhahanda abhʉzɨlɨzanye bhɨɨbho hu bhɨɨbho aje, “Yʉ naanu mu mpʉga yeetu wa‑anza‑abhombe ɨgo?”

Yʉ naanu wa‑ali nʼgoosi

24 Abhasundwe bha Yeesu bhahanda adaliihane huje, yʉ naanu wa‑ahanziwaaga abhe nʼgoosi mu bheene. 25 Ɨpo ʉYeesu ahabhabhʉʉzya ahaga, “Abhamwɨnɨ bha bhantu bha saga Bhayahuudi bhahubhalongozya abhantu bhaabho hu khali, nantele abhamwɨnɨ ɨbho bhahwikwizya huje, bhali nɨ nkʉmbʉ hwa bhantu. 26 Leelo amwɨ, musahabhombe ɨsho. Lyoli ʉmuntu wa‑ali nʼgoosi huliimwɨ, ʉyo abhanje nanshi ʉmuntu ʉnʼdoodo hu bhonti. Ʉla wa‑ahubhalongozya abhantu, abhanje nanshi ʉmuntu wa‑ahubhabhombela abhanjɨ. 27 Ɨshi! Ʉnʼgoosi yʉ naanu? Wa‑akhala alye ɨshalye pa meeza awe wa‑ahubhatengaanya abhanjɨ ɨshalye? Wɨlɨ, saga ya yʉʉla wa‑akhala alye ɨshalye? Ɨshi, anɨ ɨndi peeka naamwɨ, nanshi ʉmuntu wa‑ahubhabhombela.

28 Amwɨ mwahali peeka naanɨ ahabhaazyo honti ahɨ njelo zyanɨ. 29 Ɨshi, nanshi ʉDaada waanɨ sha‑ahampiiye ikhone ɨlya‑alongozye, nanɨ ɨhubhapeela ikhone ɨlya‑alongozye mu wumwɨnɨ waanɨ. 30 Ɨpo mwahayilyanga na‑amwele naanɨ mu wumwɨnɨ waanɨ. Nantele, mwahayikhalaga mu matengo agɨ shimwɨnɨ, alongozye abhantu abhɨ vikholo ishʉmi na vibhɨɨlɨ ɨvya hu nsi ɨyɨ Izilaeeli.”

ɄYeesu akuwa huje, ʉPeeteli abhala hunʼkhaane hataatu

(Mataayo 26:31-35; Maalʉko 14:27-31; Yoohani 13:36-38)

31 Ɨpo ʉYeesu ahamʼmʉʉzya ʉPeeteli ahaga, “Siimoni, Siimoni! Tejeelezya shinza! ɄSeetano alaabhile na hwɨtɨshɨlwe hubhajele amwɨ, nanshi ʉmuntu wa‑agulusya ɨngano yaakwe. 32 Leelo anɨ ɨʼputiiye hwa Ngʉlʉbhɨ huje, ʉgandi hululeshe ʉlwɨtɨho lwaho huliinɨ. Nawe, lwʉ‑ʉnza‑abhe ʉngalushiiye anɨ, ʉbhajinjizyaje na bhamwenyu.” 33 Ɨpo ʉPeeteli ahamʼmʉʉzya ahaga, “Wee Mwɨnɨ! Anɨ ɨhwifumiizye abhe naawe, hubhe hukʉngwe mu hoobhe, hwope nkashele hufwe!”

34 ɄYeesu ahamʼmwamula ahaga, “Peeteli! Ɨhubhʉʉzya huje, ʉsanyʉʉnʉ ɨhanda shɨ‑ɨsɨɨle agʉgʉlɨɨje, ʉnza‑abhe wahaana anɨ hataatu huje saga ʉmɨɨnye anɨ.”

Ɨnsundo zya Yeesu hwa bhasundwe bhaakwe

35 Ɨpo ʉYeesu ahabhabhʉzɨɨlɨzya abhasundwe bhaakwe ahaga, “Lwa nahabhasonteleziizye sinta mpɨɨya, awe ɨmbuguulu, awe ɨndaatʉ, wɨlɨ, mwahabhuliliilwe hohonti?” Bhahamʼmwamula bhahaga, “Nahamo.” 36 Ɨpo ʉYeesu ahabhabhʉʉzya ahaga, “Ɨshi, ʉmuntu wa‑ali nɨ mpɨɨya mu nyambɨ zyakwe awe ɨmbuguulu, ahwanziwa aje, ayeeje. Wope wa saga ali ni‑ipanga ɨlyoji, akazye ikooti lyakwe huje, akale ipanga. 37 Ɨnjanjile ɨsho hu nongwa ya‑aje, ɨsimbwilwe mu Nsimbo ɨMfinjile huje, ‘Abhaziiwe peeka na bhananzi.’ Amazwi ɨgo gahasimbwilwe hu nongwa yaanɨ. Ɨshi, ɨhubhabhʉʉzya huje, ɨgo gahwanziwa abhombeshe huliinɨ, nantele gali pa pɨɨpɨ abhombeshe.” 38 Abhasundwe bhahamʼmʉʉzya bhahaga, “Wee Mwɨnɨ! Enya! Ɨpa galɨɨho amamaajɨ gabhɨɨlɨ.” Wope ahaga, “Leshi ɨnongwa ɨzyo!”

ɄYeesu apuuta hwi‑igamba ɨlyɨ Mizeyituuni

(Mataayo 26:36-46; Maalʉko 14:32-42)

39 Ɨpo ʉYeesu ahasogola, ahabhala hwi‑igamba ɨlyɨ Mizeyituuni, nanshi sha‑ahalʉbhɨɨye abhombe. Bhope abhasundwe bhaakwe bhahamʼmɨnjɨɨlɨla. 40 Lwa waafiha hwi‑igamba ɨlyo, ahabhabhʉʉzya abhasundwe bhaakwe ahaga, “Mumʼpuutaje ʉNgʉlʉbhɨ aje, abhapeele ikhone huje, mugandi amenwe nɨ njelo.”

41 Ɨpo ahabhaleha, ahabhala pilongolela hashe, ʉtali ʉwa‑avuguzye iwe. Ahasugamila, ahamʼpuuta ʉNgʉlʉbhɨ ahaga, 42 “Wee Daada! Nkashele ʉgɨɨne, ɨhulaabha ʉnefwezye ʉlupɨndɨ ʉlwu ʉlwɨ malabha. Leelo, zigandi abhombeshe ziila anɨ zyɨ‑ɨhwanza, lyoli zibhombeshe ziila zyʉ‑ʉhwanza aawe!” 43 Ɨpo ʉnʼtumi afume hu mwanya hwa Ngʉlʉbhɨ ahamʼmwɨnzɨla ʉYeesu, ahamʼpeela ikhone. 44 ɄYeesu ahonjela apuute tee hu nongwa ya‑aje, ahali nʉ bhaavi ʉgoosi. Lwa‑ahapuutaga, ɨntwinsi nanshi idanda yahatolihaga pa nsi.

45 Lwa wapuuta, ahɨmɨɨlɨla, ahabhala hwa bhasundwe bhaakwe, ahabhaaga bhagonile ʉtulo hu nongwa ya‑aje, bhahali nʉ zugumizu. 46 Ahabhabhʉʉzya ahaga, “Yeenu mugonile ʉtulo? Daamuli! Mumʼpuutaje ʉNgʉlʉbhɨ aje, abhapeele ikhone huje, mugandi amenwe nɨ njelo.”

ɄYeesu akhatwa

(Mataayo 26:47-56; Maalʉko 14:43-50; Yoohani 18:3-11)

47 ɄYeesu lwa‑ali sha‑ayanga ɨzyo, yahɨnza ɨmpʉga ɨya bhantu ya yahalongozɨɨnye nʉ Yuuda wa bhahagaga Sikalyoti. ɄYuuda ahali ʉmo mwa bhasundwe bhaakwe ishʉmi na bhabhɨɨlɨ. Ɨpo ʉYuuda ahanʼzʉmbɨɨlɨla ʉYeesu huje, anʼnunile. 48 ɄYeesu ahamʼmʉzɨɨlɨzya ahaga, “Wee Yuuda! Ʉhunsambushila anɨ nɨMwana wa Muntu hwa bhalʉgʉ, hwi‑idala ɨlya hununile anɨ?” 49 Ɨpo abhasundwe bha Yeesu lwa bhaalola ɨgo na‑amanye ga gabhala‑abhombeshe, bhahamʼmʉzɨɨlɨzya bhahaga, “Wee Mwɨnɨ! Wɨlɨ, tibhatemanganye na mamaajɨ?”

50 Ɨpo ʉmo mwa bheene ahanʼkhoma na hunʼdumule ikutu ɨlya hu lɨɨlo ʉnʼkalwe wa nʼsayi ʉnʼgoosi ʉwa Ngʉlʉbhɨ. 51 ɄYeesu ahaga, “Leha abhombe ɨsho!” Ahamʼpalamansya ikutu ɨlyo, ahamʼponia.

52 ɄYeesu ahabhabhʉzɨɨlɨzya abhalongozi bha bhasayi bha Ngʉlʉbhɨ na bhalwi abhɨ nyumba ɨmfinjile ɨya Ngʉlʉbhɨ peeka na bhagoosi bha Bhayahuudi ahaga, “Yeenu mwɨnzɨle na mapanga nɨ nduugu, nanshi abhantu bha bhabhala hunʼkhate ʉmuntu wa‑ali nʼnyambuda? 53 Wiila tahabhanga peeka mu lubhaga lwɨ nyumba ɨmfinjile ɨya Ngʉlʉbhɨ, leelo saga mwahahataga! Ɨshi, ɨha ha habhaazyo heenyu, ahabhaazyo ɨho ʉmwɨnɨ ʉwɨ hiisi ha‑alongozya.” 54 Ɨpo abhantu bhaala bhahanʼkhata ʉYeesu, bhahanʼtwala mu nyumba ya nʼsayi ʉnʼgoosi ʉwa Ngʉlʉbhɨ. ɄPeeteli wope ahabhɨnjɨlɨzyaga sha hutali lwene.

ɄPeeteli ahunʼkhaana ʉYeesu

(Mataayo 26:57-58, 69-75; Maalʉko 14:53-54, 66-72; Yoohani 18:12-18, 25-27)

55 Abhantu bhaala lwa bhaafiha mu nyumba ya nʼsayi ʉnʼgoosi wa Ngʉlʉbhɨ, bhahapemba ʉmwoto ʉgwa hwote paahati pa lubhʉngʉlʉ. Bhahakhala peeka ahwote ʉmwoto. Wope ʉPeeteli ahazʉmbɨɨla, ahakhala palishimo nabho. 56 Ɨshi, hu nongwa yɨ lukhozyo lwɨ mwoto, ʉnʼkalwe ʉmo ʉnʼnɨndu ahanʼnola ʉPeeteli akhɨɨye, ahamʼmwina shinza, ahaga, “Wope ʉmuntu ʉnʉ ahali peeka nʉ Yeesu.” 57 Leelo ʉPeeteli ahakhaana ahaga, “Wee nʼnɨndu aawe! Anɨ saga ɨmʼmɨɨnye!”

58 Pamandɨ hashe, ʉmuntu ʉwɨnjɨ ahanʼnola ʉPeeteli ahaga, “Nawe ʉli peeka nabho!” Leelo ʉPeeteli ahakhaana ahaga, “Wee muntu aawe! Saga nɨɨnɨ!”

59 Lwa lyashila isaala lyeka ɨshi, ʉmuntu ʉwamwabho ahasimishizya ahaga, “Lyoli, ʉmuntu ʉnʉ ahali peeka nʉ Yeesu! Ɨnjanjile ɨsho hu nongwa ya‑aje, wope ʉnʉ afuma hu mukowa ʉgwɨ Galilaaya!” 60 Leelo ʉPeeteli ahaga, “Wee muntu aawe! Ɨzyo zyʉ‑ʉyanga, anɨ saga ɨnzimɨɨnye!”

Papaala lwa‑ali sha‑ayanga ɨgo, ɨhanda yahagʉgʉlɨɨga. 61 ɄMwɨnɨ ʉYeesu ahagaluha, ahamʼmwenya ʉPeeteli. Ɨpo ʉPeeteli ahiizuha izwi lya Yeesu lya‑ahamʼmʉzɨɨzye huje, “Ʉsanyʉʉnʉ ɨhanda shɨ‑ɨsɨɨle agʉgʉlɨɨje, ʉnza‑abhe wahaana hataatu.” 62 Ɨpo ʉPeeteli ahafuma hwʉnzɨ, ahalila tee.

Abhalwi bhahunʼsʉfwanya ʉYeesu

(Mataayo 26:67-68; Maalʉko 14:65)

63 Abhalume bha bhahanʼnɨndɨlɨlaga ʉYeesu, bhahanʼsʉfwanyaaga na hunʼkhome. 64 Bhahamʼpinya na henda hu maaso na humʼmʉzɨɨlɨzye huje, “Kuwa! Weenu wa‑akhoma?” 65 Bhahajendelelaga hunʼnije ɨndigo ɨnyinji.

ɄYeesu alongwa na bhagoosi bha Bhayahuudi

(Mataayo 26:59-66; Maalʉko 14:55-64; Yoohani 18:19-24)

66 Lwa hwasha, abhagoosi bha Bhayahuudi, abhalongozi bha bhasayi bha Ngʉlʉbhɨ peeka na bhamanyizyi abhɨ ndajizyo zya Moose bhahabhʉngaana. Bhahanʼneeta ʉYeesu mwi‑ikoloti lyabho, bhahaga, 67 “Tibhʉʉzye! Aawe we Mʼfyʉli?” ɄYeesu ahabhaamula ahaga, “Hwope nkashele ɨhubhabhʉʉzya, saga mugɨɨtɨha nka lumo. 68 Nantele nkashele nabhabhʉzɨɨlɨzya, saga muganaamula nka limo. 69 Leelo, ahwande sanyʉʉnʉ, anɨ nɨMwana wa Muntu nahayibha ɨhɨɨye peeka nʉ Ngʉlʉbhɨ ʉwi‑ikhone lyonti.”

70 Ɨpo bhonti bhahaga, “Hwa huje, aawe ʉli Mwana wa Ngʉlʉbhɨ?” ɄYeesu ahabhaamula ahaga, “Amwɨ mwɨmwɨ mwayanga huje, anɨ nɨɨnɨ!”

71 Ɨpo abhagoosi bhaala bhahaga, “Tihwanza waashi ʉsimishizi nantele? Atɨ tɨɨtɨ tʉmvwɨzye izwi afume hwa mwene yʉʉyo!”