ɄYeesu akuwa abhugulwe hu nyumba ɨmfinjile ɨya Ngʉlʉbhɨ
24
ɄYeesu ahafuma mu lubhaga lwɨ nyumba ɨmfinjile ɨya Ngʉlʉbhɨ.
Lwa‑ali sha‑ajenda,
abhasundwe bhaakwe bhahamʼmwɨnzɨla,
bhahanʼnolesya ʉzenji ʉwɨ nyumba ɨmfinjile ɨya Ngʉlʉbhɨ nɨ nyumba ɨzyɨnjɨ ɨzyo zyahayizyʉngʉʉlɨle.
2 Leelo ʉYeesu ahabhabhʉʉzya ahaga,
“Muhugalola gonti ɨga?
Gonti ɨga gahayibhugulwa.
Lyoli ɨhubhabhʉʉzya huje,
saga lyahayisyala iwe nka lyeka pa mwanya pi‑iwe ɨlyamwabho!”
Amalabha ga gahayifumila ɨnsiku ɨzya hu malishilo
3 Pamandɨ ʉYeesu ahabhala pi‑igamba ɨlyɨ Mizeyituuni,
ahakhala ɨpo.
Lwa waakhala,
abhasundwe bhaakwe bhahamʼmalila lwa‑ali mwene paala.
Bhahamʼmʉzɨɨlɨzya bhahaga,
“Wee Mʼmanyizyi,
tibhʉʉzye gonti ɨgo gʉ‑ʉyanga gahayifumila ndi?
Nantele,
heenu hahayibha shimanyishizyo ɨsha hwɨnze hwaho nʉ malishilo wɨ nsi?”
4 Ɨpo ʉYeesu ahabhaamula ahaga,
“Mubhanje maaso ʉmuntu wowonti agandi hubhagobele!
5 Abhantu abhinji bhahayibha bhahulibhombela itaawa lyanɨ hwi‑ilenga na‑ayanje huje,
‘Anɨ nɨ Mʼfyʉli.’
Abhantu ɨbho bhahayihubhagobela abhantu abhinji.
6 Namwɨ lwa mwazyʉmvwa ɨnongwa ɨzyɨ lʉgʉ nɨ nkwekwesi ɨzyɨ lʉgʉ,
mugandi ahwogope.
Lyoli ɨzyo zihwanziwa afumile,
leelo ʉmalishilo wahayibha wusɨɨle.
7 Ɨnsi ɨmo yahayilwa nɨ nsi ɨyamwabho,
ʉwumwɨnɨ wumo wahayilwa nʉ wumwɨnɨ ʉwamwabho.
Hwahayibha na mantensya agɨ nsi ɨpa na paala,
ɨnzala yope yahayigwa.
8 Ɨgo gahayibha wandilo lwene wɨ malabha,
nanshi sha‑abhawa ʉnʼshɨ wa‑ahwanda apaape.
9 Abhantu bha saga bhamʼmwɨtɨɨshe ʉNgʉlʉbhɨ,
bhahayihubhaviitilwa amwɨ pɨpo muhumbɨnjɨɨlɨzya anɨ.
Nantele,
bhahayihubhakhata huje bhabhalavye,
hwope na hubhagoje.
10 Ɨpo abhantu abhinji bhahayileha humbɨnjɨɨlɨle anɨ.
Bhahayisambushilana bhɨɨbho hu bhɨɨbho na‑avitilwane.
11 Abhakuwi abhinji abhi‑ilenga bhahayifumila,
bhope bhahayihubhagobela abhantu abhinji.
12 Ɨshi hu nongwa ya hwonjeelele ɨmbiibhi,
ʉlugano lwope mwa bhantu abhinji lwahayibha ludoodo.
13 Leelo ʉla wa‑ahayijimbiilila afishe hu malishilo,
ʉyo ahayifyʉlwa.
14 ƗNongwa ɨNyinza ɨzyɨ wumwɨnɨ ʉwa hu mwanya zyahayilʉmbɨɨlɨlwa mu nsi zyonti,
huje zibhe wusimishizi hwa bhantu bhonti.
Ɨpo ʉmalishilo wɨ nsi wahayɨnza.”
Amalabha amagoosi agamwabho ga gahayɨnza
15 “Hu habhaazyo ɨho,
mwahayihunʼnola ʉnʼnanzi wa‑aleeta ʉwaavua ayɨmɨlɨɨye mu nyumba ɨmfinjile pa saga ahwanziwa abhe.
Ahantu ɨho ha hɨɨho hahayangwilwe nʉ nʼkuwi ʉDaniyeeli.
b Ʉmuntu wowonti wa‑abhaazya ɨnsimbo ɨzi,
azyaganyaaje.
16 Ɨpo abhantu bha bhali hu mukowa ʉgwɨ Yudeeya,
bhahashɨmbɨlɨlaje mu magamba.
17 Wope ʉmuntu wa‑ali pa mwanya pa nyumba,
c asahasheele ahwishe ahweje ɨvintu vyakwe mu nyumba,
lyoli ahashɨmbɨlaje.
18 Nantele,
ʉmuntu wa‑ayagɨɨte hu nʼgʉnda,
asahasheele aweele hu khaaya ahweje ʉmwenda gwakwe.
19 Leelo,
bhasheelile abhashɨ bhaala bha bhahayibha nɨ nyanda na bha bhahayibha bhahwonsya abhaana mu nsiku ɨzyo!
20 Ɨshi,
puutaji hwa Ngʉlʉbhɨ huje ɨnsiku ɨzyo zigandi afumile mu nsiku ɨzi‑isasa awe pi‑isiku ɨlyɨ Sabaato,
21 pɨpo ɨnsiku ɨzyo zyahayibha zyɨ malabha amagoosi ga saga gahafumiiye hu habhaazyo ha hashilile,
afume hu wandilo wɨ nsi afishe sanyʉʉnʉ.
Nantele,
saga gahayifumila nantele nka lumo amalabha nanshi ɨgo.
22 Nkashele ʉNgʉlʉbhɨ saga wʉnzyaga ɨnsiku ɨzyo,
saga hwahabhanga nʉ muntu nkʉ‑ʉmo ʉwa‑afyʉlwe.
Leelo,
hu nongwa ya bhasalulwe bhaakwe,
ʉNgʉlʉbhɨ ahayiyʉnzya ɨnsiku ɨzyo.
23 Mu habhaazyo ɨho,
nkashele ʉmuntu ahubhabhʉʉzya ayiga,
‘Enya,
ʉMʼfyʉli ali ɨpa!’,
awe,
‘Ali huula!’,
mugandi humʼmwɨtɨshɨle lwonti,
24 pɨpo bhahayifumila abhantu bha bhahayihwikwizya hwi‑ilenga huje,
‘Anɨ nɨ Mʼfyʉli!’
Peeka na bhakuwi abhi‑ilenga,
bhope bhahayibhonesya ɨvimanyishizyo na mayele amagoosi huje bhalɨnje hubhateezye hwope na bhaala bha bhasaluliilwe nʉ Ngʉlʉbhɨ.
25 Ɨshi amwɨ mubhanje maaso!
Anɨ naatala nasʉʉti hubhasunde sha zisɨɨle afumile.
26 Ɨshi nkashele abhantu bhahubhabhʉʉzya,
‘Enya,
ʉKilisiti ali hu lʉʉgwa!’,
ʉhwo mugandi abhale.
Awe nkashele bhayiga,
‘Enya,
ali hu mfiso hu mpanda!’,
musahasheele hubhɨɨtɨshe.
27 Ɨnjanjile ɨsho hu nongwa ya‑aje,
lwɨ‑ɨweela anɨ nɨMwana wa Muntu,
nahayɨnza nanshi ʉlukhozyo lwɨ ntalala ahwande hwa litukulila isanya na‑afishe ambali hu swelo.
28 Ahwɨnze hwanɨ hwahayibha pa pazelu,
nanshi ɨsho ɨnsimula ziloleha hu habhaazyo lwa zibhʉngaana peeka ɨpo pali nʉ mʼbɨlɨ ʉmʼvunzu.”
ɄYeesu ayanga aweele hwakwe
29 “Hu habhaazyo hahaala lwene lwa gaashila amalabha gaala,
‘Isanya lyahayikhoma ɨhiisi,
ʉmwezi gwope saga gwahayilama lwonti,
ɨnzota zyope zyahayilagala pa nsi afume hu mwanya.
Ɨvintu vyonti ɨvya hu mwanya vyahayiyinga.’d
30 Ɨpo ɨshimanyishizyo ɨsha Mwana wa Muntu shahayiloleha hu mwanya,
na bhantu abhɨ nsi zyonti bhahayanda alile hu wooga.
Ɨpo abhantu bhonti bhahayihundola ɨhwɨnza mu mabhɨngo hwi‑ikhone nʉ mwamu ʉgoosi.
31 Ɨpo nahayihubhasonteelezya abhantumi bhaanɨ,
bha bhahayikhoma ɨndudwe huje bhabhabhʉngaanye bha bhasaluliilwe afume ɨmbali zyonti zinɨ ɨzyɨ nsi,
afume ɨmbali yeeka ɨyɨ malishilo wɨ nsi afishe ɨmbali ɨyɨnjɨ ɨyɨ malishilo wɨ nsi.”
Ɨshifwani ɨshi‑ikwi ɨlyɨ makʉ
32 ɄYeesu ahajendeelela ayanje ahaga,
“Manyilaji ɨshifwani ɨshi‑ikʉ.
Nkashele mwalola ɨnsamba zyakwe zyadugula na‑alembe,
mumanya lwene huje ahabhaazyo aha‑ayabhile hapalamiiye.
33 Ɨshi,
lwa muhuzilola ɨzyo zyonti zyatala abhombeshe,
manyaji huje ahabhaazyo haanɨ aha hwɨnze hapalamiiye.
34 Lyoli ɨhubhabhʉʉzya huje,
abhantu abhɨ habhaazyo ɨha saga bhahayifwa,
sha zisɨɨle abhombeshe ɨzyo zyonti.
35 Ɨnsi nɨ vintu vyonti ɨvya hu mwanya vyahayishila,
leelo amazwi gaanɨ saga gahayishila nka lumo.”
ɄNgʉlʉbhɨ mwene wa‑amɨɨnye isiku ɨlya‑aweele hwa Yeesu
36 “Leelo,
hu nongwa yi‑isiku awe ahabhaazyo aha‑aweele hwanɨ,
nʉʉmo ʉmuntu wa‑amɨɨnye huje zyahayibha ndi.
Bhope abhantumi abha hu mwanya awe anɨ nɨMwana,
tenti saga tizimɨɨnye lwonti.
Lyoli ʉDaada ʉNgʉlʉbhɨ ali mwene wa‑amɨɨnye zyonti ɨzyo.
37 Ɨshi ahwɨnze hwanɨ nɨMwana wa Muntu hwahayibha nanshi ɨsho zyahali mu nsiku zya Noowa.
38 Mu nsiku ɨzyo ɨmvula ɨmbiibhi lwɨ‑ɨsɨɨle ahwɨnze,
abhantu bhahalyanga na‑amwele,
bhaheegaga na hwegwe afishe isiku liila ʉNoowa lwa watʉʉha mu safina.
39 Abhantu ɨbho saga bhahamɨɨnye lwonti huje hantu heenu hanza‑afumile afishe ɨpo ɨmvula ɨmbiibhi yahɨnza na hubhayazye bhonti.
Ɨsho sha shɨɨsho hwahayibha ahwɨnze hwanɨ nɨMwana wa Muntu.
40 Ahabhaazyo ɨho,
abhantu bhabhɨɨlɨ bhahayibha hu nʼgʉnda,
weeka ahayinyeetulwa,
weeka ahayisagala.
41 Nantele abhashɨ bhabhɨɨlɨ bhahayibha peeka asye,
weeka ahayinyeetulwa,
weeka ahayisagala.
42 Ɨshi mubhanje maaso,
pɨpo saga mumɨɨnye isiku ɨlyo ahayɨnza ʉMwɨnɨ weenyu huje lyahayibha ndi.
43 Ɨshi,
mumanye shinza huje ʉmwanɨɨsho nyumba nkashele wamanyaga ahabhaazyo ɨho ʉmwibha ahwɨnza,
handɨ wabhanga maaso huje anʼzijile ʉmwibha agandi abhugule ɨnyumba yaakwe na hwibhe ɨvintu vyakwe.
44 Ɨshi hu nongwa ɨnɨ,
namwɨ muhwilɨnganyaaje!
Anɨ nɨMwana wa Muntu nahayɨnza ahabhaazyo ha saga muhasʉbhɨɨye.”
Ɨshifwani ɨsha mʼmomvi ʉmwinza nʉ mʼmiibhi
45 ɄYeesu ahabhabhʉʉzya abhasundwe bhaakwe ahaga,
“Yʉ naanu ʉmʼmomvi ʉnʼnʉnjɨsu nantele nʼtengamazu?
Ʉyo ya yʉʉyo ʉnʼgoosi waakwe wa‑ahumʼmɨɨha abhe mwɨmɨɨlɨli wa bhamwabho,
huje lwa‑ashʉʉla abhapeelaje ɨshalye hu habhaazyo ha hakhondɨɨye.
46 Asayiiwe ʉmʼmomvi ʉyo ʉnʼgoosi waakwe lwa‑ahayiweela,
ahayihumʼmwaga abhomba ɨsho.
47 Lyoli ɨhubhabhʉʉzya huje ʉnʼgoosi waakwe ahayihumʼmɨɨha ʉmʼmomvi ʉyo abhe mwɨmɨɨlɨli wɨ vintu vyakwe vyonti.
48 Leelo tije,
ʉmʼmomvi ʉyo ʉmʼmiibhi wasɨɨbha mu mwoyo gwakwe huje,
‘Ʉnʼgoosi waanɨ akhaabha aweele,’
49 ɨpo ahwanda hubhakhome abhabhomvi abhamwabho,
alye na‑amwele peeka na bhamwezi.
50 Ɨshi ʉnʼgoosi waakwe ahayiweela isiku na habhaazyo haala ha saga ahasʉbhɨɨye ʉmʼmomvi waakwe ʉyo.
51 Ɨpo ʉmwɨnɨ ʉla ahayihunʼtemanga shibhiibhi na humʼmɨɨshe peeka na bhagulugulu.
Ʉhwo bhahayililaga na‑azyeguzye amiino hu nongwa yɨ mavune amakhali.”