Mataayo 23

ɄYeesu ahubhakhajila abhalongozi bha Bhayahuudi

(Maalʉko 12:38-40; Luuka 11:37-52; 20:45-47)

Ɨpo ʉYeesu ahazibhʉʉzya ɨmpʉga ziila ɨzya bhantu na bhasundwe bhaakwe ahaga, 2 “Abhamanyizyi abhɨ ndajizyo zya Moose na Bhafalisaayo bhali ni‑ikhone ɨlya hubhamanyizye abhantu ɨndajizyo zya Moose. 3 Ɨshi gakhataji na hugabhombele ɨmbombo ɨgo gonti ga bhahubhabhʉʉzya. Leelo mugandi alondolezye ɨmbombo zyabho, pɨpo abheene saga bhabhomba na‑alondolezye gonti ɨgo bhamanyizya. 4 Abheene bhapinya ɨndajizyo zyonti nanshi amazigo amamwamu na hubhatwinshe abhantu abhanjɨ, leelo abheene bhakhaana agolosye hwope ahayoobhe ahɨ nʼkhono gwabho huje bhanyeemule. 5 Abheene bhabhomba ɨmbombo zyonti huje bhahwilolesye hwa bhantu. Bhakwata hu maaso na mu nyoobhe ɨvipatiho ɨvyɨ nkwembe vya visimbwilwe ɨndajizyo, vya vili vigoosi ashile ɨvya bhantu abhanjɨ. Nantele bhahwonjeezya ʉlupinto ʉlwɨ menda gaabho agɨ mpuuto ashile abhanjɨ. 6 Mu nsiku ɨzyɨ shikulukulu, bhasʉngwa tee akhale mu matengo agɨ nshɨnshɨ, na mu nyumba zyabho ɨzya‑apuutile na‑amanyiilile bhasʉngwa akhale mu matengo aga bhɨ nshɨnshɨ aga pilongolela. 7 Nantele, bhasʉngwa tee huje abhantu bhabhalamuhaje hu nshɨnshɨ mu lembuka, na‑aje bhabhakwizyaje, ‘Wee mʼmanyizyi.’

8 Leelo amwɨ mugandi hwɨtɨshe dumu nkashele bhahubhakwizya bhayiga, ‘Wee mʼmanyizyi!’ Ɨnjanjile ɨsho pɨpo muli nʉ Mʼmanyizyi weeka lwene, namwɨ mwenti muli bhabhɨnjɨɨlɨli bhaanɨ. 9 Nantele, mugandi hunʼkwizye ʉmuntu wowonti mu nsi huje, ‘Wee daada,’ pɨpo ʉDaada weenyu ali weeka lwene, ʉyo wa‑ali hu mwanya. 10 Nantele, mugandi hwɨtɨshe nkashele abhantu bhahubhakwizya, ‘Bhalongozi,’ pɨpo muli nʉ Nʼnongozi weeka lwene, ʉyo yʉ Mʼfyʉli. 11 Ʉmuntu wowonti ʉyo ahwanza abhe nʼnongozi weenyu, abhe mʼmomvi weenyu. 12 Ɨnjanjile ɨsho, pɨpo ʉmuntu wowonti wa‑ahwizʉvya huje nʼgoosi, ʉNgʉlʉbhɨ ahayihumʼmwisya pa nsi. Leelo ʉmuntu wowonti wa‑ahwiyiisya, ʉNgʉlʉbhɨ ahayihunʼzʉvya.

13 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Muhubhazijila abhantu abhanjɨ hulimanye idala ɨlya‑atʉʉshe mu wumwɨnɨ ʉwa hu mwanya. Amwɨ mwɨmwɨ saga mutʉʉha ʉmwo, nantele bha bhahwanza atʉʉshe, saga muhubhɨtɨshɨla.

14 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo! Amwɨ muli bhagulugulu, pɨpo muhunʼnaabha ʉNgʉlʉbhɨ hu mpuuto ɨntali tee huje muhwilolesye hwa bhantu, leelo ʉhwu muhubhafyʉla abhafwɨle ɨshʉʉma shaabho. Ɨshi, mumanye huje pi‑isiku ɨlya‑alongwe, ʉNgʉlʉbhɨ ahayihubhafunda ʉlufundo ʉlugoosi tee!

15 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Mushʉʉla alobhoshe ɨnsʉmbi na mu nsi ɨnyʉʉmu huje mumʼmwaje ʉmuntu ʉyo saga Nʼnyahuudi, huje abhe mʼmɨnjɨɨlɨli weenyu. Leelo nkashele mwamʼmwaga ʉmuntu ʉyo, muhumʼmomba abhe muntu wa‑akhondɨɨye ʉmwoto ʉgwa huzimu habhɨɨlɨ ashile amwɨ.

16 Lwenyu amwɨ mubhalongozi bhantonko! Amwɨ muyanga huje, ‘Nkashele ʉmuntu alapa hu nyumba ɨmfinjile ɨya Ngʉlʉbhɨ, ɨndapo yaakwe saga hantu. Leelo nkashele alapa hu zahaabu ɨyo ɨlɨɨho mu nyumba ɨmfinjile ɨya Ngʉlʉbhɨ, ʉmuntu ʉyo ahwanziwa abhombe nanshi sha‑ahalapile.’ 17 Amwɨ muli nanshi abhantonko abhafwasu! Hantu heenu ha hali hagoosi ashile ahamwabho? Wɨlɨ, zahaabu awe nyumba mfinjile ɨya Ngʉlʉbhɨ yɨ‑ɨbhɨɨha ɨzahaabu huje ɨbhe nsangalusu? 18 Nantele muyiga, ‘Nkashele ʉmuntu alapa hwa‑atashe ɨshipuuto ɨsha mu nyumba ɨmfinjile ɨya Ngʉlʉbhɨ ɨpo saga nongwa, leelo nkashele alapa hu nsangu ɨzya‑alʉngʉlɨzye zya zibha pa shipuuto, ʉmuntu ʉyo ahwanziwa abhombe nanshi sha‑ahalapile.’ 19 Amwɨ muli nanshi abhantonko! Hantu heenu ha hali hagoosi ashile ahamwabho? Wɨlɨ, nsangu awe shipuuto sha shibhomba ɨnsangu ɨzyo huje zibhe nsangalusu? 20 Ɨshi nkashele ʉmuntu alapa hwa‑atashe ɨshipuuto ɨshɨ nyumba ɨmfinjile ɨya Ngʉlʉbhɨ, abha alapa hwope na hu vintu vyonti vya vilɨɨho pa mwanya yaakwe. 21 Shɨɨsho ʉmuntu wowonti wa‑alapa hwa‑atashe ɨnyumba ɨmfinjile ɨya Ngʉlʉbhɨ, abha alapa hu nyumba ɨmfinjile ɨya Ngʉlʉbhɨ, hwope hwa Ngʉlʉbhɨ wa‑akhala mu nyumba ɨyo. 22 Wope wa‑alapa hwa‑atashe ɨmwanya, abha alapa hwi‑itengo ɨlyɨ shimwɨnɨ ɨlya Ngʉlʉbhɨ na hwa Ngʉlʉbhɨ yʉʉyo wa‑akhala pi‑itengo ɨlyo.

23 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Amwɨ muhumʼfumizya ʉNgʉlʉbhɨ ɨshilʉndɨlo sheeka mu vilʉndɨlo ishʉmi hwope na hu vintu ɨvidoodo lwene nanshi ɨvilemba ɨvyɨ mbeyu zyɨ nyungu, ibinzali nʉ lende. Leelo, muleshile ɨvintu ɨvigoosi vya vihwanziwa nɨ ndajizyo, nanshi ʉgolosu, ɨnkʉmbʉ nʉ lʉnjɨsu. Ɨvintu ɨvyo vya mwahanziwaaga akhate sinta aleshe ɨvyɨnjɨ. 24 Amwɨ mubhalongozi muli nanshi abhantonko amwɨ! Musʉʉya ɨvintu ɨvidoodo vya mumwela, leelo mumila ɨngamiya!

25 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Muhwibhɨɨha huje bhasangalusu pitagaalila lya bhantu. Muhwozya ʉlupɨndɨ nɨ ntandwa hwʉnzɨ lwene, leelo muuhati yeenyu mumemile ʉwiibha nʉ khandamanu nanshi ɨsho muuhati mu lupɨndɨ na mu ntandwa mumemile ʉkhandamanu ʉwɨ waaji nʉ waaji. 26 Amwɨ muBhafalisaayo, amwɨ muli nanshi abhantonko amwɨ! Laataji nasʉʉti hu mbiibhi ɨzyo zili muuhati yeenyu, nanshi ahwozye ʉkhandamanu ʉwo ʉli muuhati mu lupɨndɨ na mu ntandwa. Shɨnɨɨsho, ɨmbombo zyenyu zibhala‑abhe nyinza nanshi ɨsho ʉlupɨndɨ nɨ ntandwa vyabha vinza nanshi ɨsho ʉyoziizye muuhati.

27 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Muli nanshi ɨnkʉngwa ɨzyo bhazyema ɨnswagala, ɨzyo ziloleha shinza hwʉnzɨ, leelo muuhati gamemile mafupa ga bhantu bha bhafwiye nʉ khandamanu ʉwɨ waaji nʉ waaji. 28 Ɨsho sha zili naamwɨ, hwʉnzɨ muloleha bhantu bhagolosu, leelo mu mooyo geenyu mumemile ʉgulugulu nʉ bhiibhi.

29 Lwenyu amwɨ mubhamanyizyi bhɨ ndajizyo zya Moose namwɨ muBhafalisaayo, amwɨ muli bhagulugulu! Enya, muzenga ɨnkʉngwa ɨzya bhakuwi bha Ngʉlʉbhɨ na huzidone shinza ɨnkʉngwa ɨzya bhantu abhanjɨ ɨbho bhahali bhagolosu pitagaalila lya Ngʉlʉbhɨ. 30 Ɨpo muyiga, ‘Nkashele atɨ tahabhanga mu habhaazyo ɨho abhamaama bheetu lwa bhali bhʉʉmi, saga tahabhajilaga atʉʉlane nabho hubhagoje abhakuwi bha Ngʉlʉbhɨ.’ 31 Ayanje ɨsho, musimishizya huje naamwɨ muli bhabhiibhi nanshi abhamaama bheenyu ɨbho bhahabhagojile abhakuwi bha Ngʉlʉbhɨ! 32 Ɨshi malɨɨzyi ʉbhiibhi wuula ʉwo abhamaama bheenyu bhahandile huwubhombe!

33 Amwɨ muli nanshi ɨmpaapo ɨyɨ nzoha ɨyɨ kʉʉla! Mwahayishɨmbɨla wɨlɨ ʉlufundo lwa Ngʉlʉbhɨ lwa‑ahayihubhaponya mu mwoto? 34 Hu nongwa ɨyo, nahayihubhasonteelezya huliimwɨ abhakuwi bha Ngʉlʉbhɨ, abhantu abhɨ njeele na bhamanyizyi. Leelo amwɨ mwahayihubhagoga bhamo na hubhakhomeele pa shikhobheehanyo. Abhanjɨ mwahayihubhakhoma nʉ chapo mu nyumba zyenyu ɨzya‑apuutile na‑amanyiilile na hubhashɨmbɨzye afume mu mabooma na mabooma na hubhalavye. 35 Sha shɨɨsho ʉNgʉlʉbhɨ ahayihubhalonga amwɨ hu nongwa ya hubhagoje abhantu bhonti abhagolosu, afume abudwe hwa Aabeli ʉyo saga ahatulile hohonti, afishe abudwe hwa Zakaliya ʉyo ahali mwana wa Balakiya. Abhamaama bheenyu bhahanʼgojile ʉZakaliya paahati yɨ nyumba ɨmfinjile ɨya Ngʉlʉbhɨ nɨ shipuuto. 36 Lyoli ɨhubhabhʉʉzya huje ʉNgʉlʉbhɨ ahayihubhalonga abhantu abhɨ habhaazyo ɨha hu mbiibhi zyonti ɨzyo bhabhombile.”

ɄYeesu asʉngama hu nongwa ya bhantu abha hu Yelusaleemu

(Luuka 13:34-35)

37 Ɨpo ʉYeesu ahaga, “Amwɨ mubha hu Yelusaleemu, amwɨ mubha hu Yelusaleemu! Ahwande halɨ muhubhagoga abhakuwi bha Ngʉlʉbhɨ. Nantele, abhantu ɨbho bhasonteleziiwe huliimwɨ nʉ Ngʉlʉbhɨ, muhubhakhoma na mawe. Halɨnga nahanzaga hubhabhʉngaanye peeka huje, ɨmbalɨndɨɨlɨle nanshi ɨnkuku shɨ‑ɨhwʉbhatila ʉtwana nkuku twakwe pa nsi yɨ mapiho gaakwe, leelo saga mwahɨtɨhaga! 38 Tejeelezyi! Ɨshi, ʉNgʉlʉbhɨ ahayihubhaleha amwɨ ni‑ibooma lyenyu! 39 Ɨshi ɨhubhabhʉʉzya huje saga mwahayihundola nantele afishe ɨpo mwahayiyanga huje, ‘Asayiiwe wa‑ahwɨnza hwi‑ikhone lya Mwɨnɨ ʉNgʉlʉbhɨ!’ ”