Luuka 20

Ikhone lya Yeesu libhʉzɨlɨzɨwa

(Mataayo 21:23-27; Maalʉko 11:27-33)

Isiku limo ʉYeesu ahabhamanyizyaga abhantu mu lubhaga lwɨ nyumba ɨmfinjile ɨya Ngʉlʉbhɨ na hubhalʉmbɨɨlɨle ɨNongwa ɨNyinza. Ɨshi, lwa‑ajendeelela abhombe ɨsho, abhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose peeka na bhagoosi abhanjɨ bha Bhayahuudi bhahamʼmalila. 2 Ɨpo bhahamʼmʉzɨɨlɨzya bhahaga, “Tibhʉʉzye! Gaala gʉ‑ʉbhomba wiila, ʉbhomba hwi‑ikhone lya naanu? Nantele yʉ naanu ya‑aʼpiiye ikhone ɨlyo?”

3 Ahabhaamula ahaga, “Nanɨ ɨnza hubhabhʉzɨɨlɨzye izwi limo huje munaamule. 4 Ikhone ɨlya hwozye abhantu, ʉYoohani ahalyajile hwi? Lyahafumile hwa Ngʉlʉbhɨ awe lyahafumile hwa bhantu?” 5 Ɨpo bhahajeehana bheene huje, “Nkashele tiyiga, ‘Lyahafumile hwa Ngʉlʉbhɨ,’ anza hutibhʉzɨɨlɨzye atɨ huje, ‘Yeenu mwahasintile humʼmwɨtɨshe?’ 6 Leelo nkashele tiyiga, ‘Lyahafumile hwa bhantu,’ abhantu ɨbha bhonti bhanza hutikhome na mawe hu nongwa ya‑aje, bhahɨtɨɨshe huje ʉYoohani ahali nʼkuwi wa Ngʉlʉbhɨ.” 7 Ɨpo bhahamʼmwamula bhahaga, “Atɨ saga timɨɨnye lwonti ikhone hwa lyahafumile.” 8 ɄYeesu ahabhabhʉʉzya ahaga, “Nanɨ saga ɨmbala hubhabhʉʉzye lwonti huje, ɨgo ɨbhomba hwi‑ikhone lya naanu.”

Ɨshifwani ɨsha bhalimi abhabhiibhi

(Mataayo 21:33-46; Maalʉko 12:1-12)

9 Ɨpo ʉYeesu ahanda hubhabhʉʉzye abhantu ɨshifwani ɨshi ahaga, “Hwahali nʉ muntu ʉmo wa‑ahalimile ʉnʼgʉnda ʉgwɨ zabiibu.  Ahapasya hwa bhalimi, ʉmwene ahashʉʉla, ahabhala hu nsi ɨya hutali. Ʉhwo ahakhala ɨnsiku ɨnyinji. 10 Ahabhaazyo aha‑atʉngʉle ɨzabiibu lwa haafiha, ʉmuntu ʉyo ahanʼsonteelezya ʉnʼkalwe waakwe hwa bhalimi bhaala huje, bhamʼpeele ɨzabiibu ɨzya mwene afume mu nʼgʉnda gwakwe nanshi sha bhahɨtɨhɨɨne. Leelo abhalimi bhaala bhahanʼkhoma ʉnʼkalwe waakwe ʉla na hunʼshɨmbɨzye makhoono hwa mwɨnɨ waakwe.

11 Ʉmwanɨɨsho nʼgʉnda ahanʼsonteelezya ʉnʼkalwe ʉwamwabho. Leelo wope bhahanʼkhoma na hunʼsʉfwanye, bhahanʼshɨmbɨzya makhoono. 12 Ahanʼsonteelezya ʉwa taatu. Ʉyo wope bhahamʼvwalazya, bhahanʼtaaga hwʉnzɨ hu nʼgʉnda ʉgwɨ zabiibu.

13 Ɨpo ʉmwanɨɨsho nʼgʉnda ahahwibhʉzɨɨlɨzya ahaga, ‘Ɨshi, ɨmbala‑abhombe lyenu? Ɨmbala hunʼsonteelezye ʉmwana waanɨ ʉnʼkʉndwe! Lumo ʉnʉ, bhagabha nɨ nshɨnshɨ hwa mwene.’ 14 Ʉmwana waakwe ʉyo ahabhala, leelo abhalimi bhaala lwa bhanʼnola lwene, bhahajeehana bheene bhahaga, ‘Ʉnʉ yʉ nʼgaali wɨ nʼgʉnda ʉgu. Ɨshi, timʼbude huje, ɨngaali zyakwe ɨzyɨ nʼgʉnda ʉgu nka zibhe zyetu.’ 15 Bhahamʼfumya hwʉnzɨ yɨ nʼgʉnda, bhahanʼgoga.”

Ɨpo ʉYeesu ahabhabhʉzɨɨlɨzya, “Ɨshi, ʉmwanɨɨsho nʼgʉnda ʉyo ahayihubhabhomba yeenu abhalimi bhaala? 16 Ahayɨnza, ahayihubhagoga abhalimi bhaala. Ʉnʼgʉnda guula ʉgwɨ zabiibu ahayihubhapasya abhalimi abhanjɨ!” Abhantu lwa bhʉmvwa amazwi ɨgo, bhahaga, “Ɨgo gasahafumile nka lumo!” 17 Leelo ʉYeesu ahabhazyamila, ahabhabhʉzɨɨlɨzya ahaga, “Ɨshi, ɨnsimbo ɨzi hwa huje wɨlɨ?

‘Iwe lya bhahalikhɨɨne abhazenji abhɨ nyumba,

lyɨlyo lya lyabha liwe linza ɨlya pa mpɨnga

lya linyʉmʉʉye ɨnyumba yonti.’

18 Ʉmuntu wowonti nkashele wagwɨla pi‑iwe ɨlyo, anza‑abuduuhane tee na‑abhe tinyatinya. Nantele ʉmuntu wowonti nkashele iwe ɨlyo lyanʼgwɨla, lɨnza hunʼtinzanye tee.”

19 Ɨpo abhamanyizyi abhɨ ndajizyo zya Moose na bhalongozi bha bhasayi bha Ngʉlʉbhɨ bhahamanya lwene huje, ɨshifwani ɨsho shihubhayanga bhɨɨbho. Ɨshi bhahanzaga idala ɨlya hunʼkhate papaala, leelo bhahogʉʉpe ɨmpʉga ya bhantu.

Asombe ɨsonko hwa mwɨnɨ ʉnʼgoosi ʉKayisali

(Mataayo 22:15-22; Maalʉko 12:13-17)

20 Ɨpo abhalongozi bha Bhayahuudi bhahamʼmendaga ʉYeesu. Bhahabhasonteelezya abhantu bha bhahali nkati bhantu bhagolosu huje, bheenye ʉYeesu zya‑abhomba. Bhahabhombaga ɨsho huje, bhalyaje idala ɨlya hunʼtaake hu nongwa yɨ mazwi gaakwe yʉʉyo huje, bhanʼkhate na hunʼtwale hwa nʼnongozi huje, alongwe.

21 Ɨpo abhantu bhaala bhahamʼmʉzɨɨlɨzya ʉYeesu bhahaga, “Wee Mʼmanyizyi! Timɨɨnye huje, zyonti zyʉ‑ʉyanga na‑amanyizye zyɨ lyoli. Aawe saga ʉsaaga ʉgoosi wɨ mbombo ya muntu. Lyoli ʉhubhamanyizya abhantu ɨzyɨ lyoli huje, bhalondolezyaje gaala ga‑ahwanza ʉNgʉlʉbhɨ. 22 Bhʉlɨ, tihwanziwa asombe ɨsonko hwa mwɨnɨ ʉnʼgoosi ʉKayisali, awe tigandi asombe?”

23 Leelo ʉYeesu ahamanya ʉlwambɨ lwabho, ahabhabhʉʉzya ahaga, 24 “Ndolesyi ɨdinaali. Ɨsheeni ɨshi ni‑itaawa ɨli vya naanu?” Bhahamʼmwamula bhahaga, “Vya mwɨnɨ ʉnʼgoosi ʉKayisali yʉʉyo.” 25 Ɨpo ʉYeesu ahabhabhʉʉzya huje, “Ɨshi, ɨvintu vya Kayisali mumʼpeelaje ʉKayisali, nɨ vya Ngʉlʉbhɨ mumʼpeelaje ʉNgʉlʉbhɨ.”

26 Abhantu bhaala bhahaswiga tee shiila ʉYeesu sha‑ahabhamuuye, bhahapʉʉma myɨ! Bhahapootwa idala ɨlya hunʼkhate hu nongwa yɨ mazwi ga‑ahayanjile pitagaalila lya bhantu.

Azyʉshe hwa bhafwe

(Mataayo 22:23-33; Maalʉko 12:18-27)

27 Hwahali nɨ shipʉga shimo ɨsha Bhayahuudi sha bhahagaga Bhasadukaayo. Abheene bhahagaga nahumo azyʉshe hwa bhafwe. Isiku limo, bhamo mwɨ‑ɨbho bhahabhala hwa Yeesu, bhahamʼmʉzɨɨlɨzya bhahaga, 28 “Wee Mʼmanyizyi! Ʉnʼkuwi ʉMoose ahatilajiziizye huje, ‘Ʉmuntu nkashele waafwa na hunʼneshe ʉnʼshɨ waakwe sinta apaape ʉmwana, ʉholo waakwe anʼgaalaje ʉmʼfwɨle ʉla huje, amʼpaapile abhaana ʉholo waakwe wa‑ahafwiye.’ 29 Ɨshi, hwahali na bhalume pʉnga (7) bha bhahali bhanakwabho. Ʉwa hwande aheega ʉnʼshɨ, leelo ahafwa sinta aleshe abhaana. 30 Ʉwa bhɨɨlɨ ahanʼgaala ʉmʼfwɨle ʉla, leelo wope ahafwa sinta aleshe ʉmwana nka weeka. 31 Pamandɨ ʉwa taatu ahanʼgaala, wope ahafwa. Ɨpo zyahabha shɨnɨɨsho hu bhonti pʉnga (7). Ʉla ya‑ahamʼmwejile peeka na bhaala nʼtanda bha bhahanʼgaalile ʉnʼshɨ ʉla bhonti bhahafwiye, saga bhahaleshile ʉmwana nka weeka. 32 Hu malishilo, ʉnʼshɨ ʉla wope ahafwa. 33 Ɨshi, tibhʉʉzye, isiku liila abhantu lwa bhahayizyʉha, ʉnʼshɨ ʉyo ahayibha nʼshɨ wa naanu? Tibhʉzɨɨlɨzya ɨsho hu nongwa ya‑aje, ʉnʼshɨ ʉla ahegwilwe na bhalume bhaala bhonti pʉnga (7).”

34 ɄYeesu ahabhabhʉʉzya ahaga, “Abhantu abhɨ habhaazyo ɨha bhahwega na hwegwe. 35 Leelo abhantu ɨbho ʉNgʉlʉbhɨ alola huje, bhakhondɨɨye aje, abhazyʉsye afume hwa bhafwe na hubhakhazye mu nsi ɨnjenu, ɨbho saga bhahayeega awe ahwegwe nantele. 36 Peeka nɨ‑ɨgo, saga bhahayifwa nantele, pɨpo bhahayibha nanshi abhantumi bha Ngʉlʉbhɨ. Ɨshi, ɨbho bhabha bhaana bha Ngʉlʉbhɨ hu nongwa ya‑aje, bhazyʉshɨle afume hwa bhafwe.

37 Wope ʉMoose ahayanjile huje, abhafwe bhahayizyʉha. Ahayanjile ɨzyo mu Nsimbo ɨMfinjile, paala pa‑ahasimbile ɨnongwa ɨzyɨ hatatango lwa hahaahaga ʉmwoto. Ahayanjile huje, ‘ɄMwɨnɨ ʉNgʉlʉbhɨ yʉ Ngʉlʉbhɨ wa Abulahaamu, ʉwa Isaaka nʉ wa Yaakobo.’ 38 ɄNgʉlʉbhɨ saga Ngʉlʉbhɨ wa bhafwe, lyoli Ngʉlʉbhɨ wa bhantu bha bhali bhʉʉmi. Ʉhwo hwa huje, pa maaso gaakwe ɨbho bhonti bhalemba.”

39 Ɨpo abhamanyizyi bhamo abhɨ ndajizyo zya Moose bhahaga, “Mʼmanyizyi, wayanga shinza!” 40 Ahwande ɨpo, saga ahabha ʉmuntu nka weeka wa‑ahasheela humʼmʉzɨɨlɨzye nantele ʉYeesu ɨzya hunʼjele.

Ibhʉzɨɨlɨzyo hu nongwa ya Kilisiti

(Mataayo 22:41-46; Maalʉko 12:35-37)

41 ɄYeesu ahabhabhʉzɨɨlɨzya ahaga, “Abhantu bhayiga, ʉMʼfyʉli Mwana wa mwɨnɨ ʉDaudi shiwɨlɨ? 42 Ɨhubhabhʉzɨɨlɨzya ɨsho, pɨpo ʉDaudi yʉʉyo wa‑ahasimbile mu shitaabu ɨshɨ Nsalifyo, ahajile,

‘ɄMwɨnɨ ʉNgʉlʉbhɨ ahamʼmʉzɨɨzye ʉMwɨnɨ waanɨ, ahaga,

“Khala peeka naanɨ,

43 afishe ɨhwavwe hubhatole abhalʉgʉ bhaaho na hubhatabhaale.” ’ 

44 Ɨpo ʉDaudi ahunʼtaha ʉKilisiti huje yʉ Mwɨnɨ waakwe. Ɨshi, ʉKilisiti agabha wɨlɨ mwana waakwe?”

ɄYeesu asunda abhe maaso na bhamanyizyi abhɨ ndajizyo zya Moose

(Mataayo 23:1-36; Maalʉko 12:38-40; Luuka 11:37-54)

45 Hu habhaazyo ɨho abhantu bhonti ha bhahunʼtejeelezya ʉYeesu, ʉmwene ahabhabhʉʉzya abhasundwe bhaakwe ahaga, 46 “Mubhanje maaso na bhamanyizyi abhɨ ndajizyo zya Moose. Abheene bhasʉngwa ajende mwi‑idala sha bhakwɨte amagolole gaabho amatali agɨ nshɨnshɨ, na‑asʉngwe huje, abhantu bhabhalamuhaje hu nshɨnshɨ mu lembuka. Mwope mu nyumba ɨzya‑apuutile na‑amanyiilile, bhasʉngwa akhale mu matengo aga bhɨ nshɨnshɨ aga pilongolela. Hwope nkashele bhaniilwe mu shikulukulu ɨsha‑alye ɨshalye, bhasʉngwa akhale pa bhakhɨɨye abhaanwa abhɨ nshɨnshɨ. 47 Bhahubhafyʉla abhafwɨle ɨvyʉma vyabho. Nantele, hu gulugulu waabho, bhapuuta ɨmpuuto ɨntali huje abhantu bhagaje bhagolosu. Pi‑isiku ɨlya‑alongwe, ʉNgʉlʉbhɨ ahayihubhafunda ʉlufundo ʉlugoosi tee!”