ɄYeesu akuwa abhugulwe hu nyumba ɨmfinjile ɨya Ngʉlʉbhɨ
13
ɄYeesu lwa‑afuma mu lubhaga lwɨ nyumba ɨmfinjile ɨya Ngʉlʉbhɨ peeka na bhasundwe bhaakwe,
ʉmo mu bhasundwe bhaakwe ʉhwu asonta ɨnyumba ɨmfinjile ɨyo,
ahamʼmʉʉzya ahaga,
“Wee Mʼmanyizyi!
Geenye amawe amagoosi ɨga na mayumba amagoosi ɨga sha gaswijizya!”
2 ɄYeesu ahaamula ahaga,
“Ʉhugaswiga amayumba amagoosi ɨga?
Gonti ɨgo gahayibhugulwa,
saga lyahayisyala iwe nka lyeka pa mwanya pi‑iwe ɨlyamwabho!”
Amalabha ga gahayifumila ɨnsiku ɨzya hu malishilo
3 Bhahabhala hwi‑igamba ɨlyɨ Mizeyituuni.
ɄYeesu lwa‑ahali akhɨɨye pi‑igamba ɨlyo,
ahenyiizye amaaso ambali hu nyumba ɨmfinjile ɨya Ngʉlʉbhɨ.
ɄPeeteli,
ʉYaakobo,
ʉYoohani nʉ Anduleeya bhahamʼmʉzɨɨlɨzya panshɨnjɨ lwa bhahali bheene,
bhahaga,
4 “Tihulaabha ʉtibhʉʉzye,
ɨgo gʉ‑ʉyanga gahayifumila ndi?
Nantele,
shimanyishizyo bhʉlɨ sha shahayibhonesya huje,
ɨgo gapalamiiye afumile?”
5 Ɨpo ʉYeesu ahanda hubhabhʉʉzye huje,
“Mubhanje maaso ʉmuntu wowonti agandi hubhagobele!
6 Abhantu abhinji bhahayibha bhahulibhombela itaawa lyanɨ hwi‑ilenga na‑ayanje huje,
‘Anɨ nɨ Mʼfyʉli,’
bhahayihubhagobela abhantu abhinji.
7 Namwɨ lwa mwazyʉmvwa ɨnongwa nɨ nkwekwesi ɨzyɨ lʉgʉ,
mugandi ahwogope.
Lyoli ɨzyo zihwanziwa afumile,
leelo ʉmalishilo wahayibha wusɨɨle.
8 Ɨnsi ɨmo yahayilwa nɨ nsi ɨyamwabho,
ʉwumwɨnɨ wumo wahayilwa nʉ wumwɨnɨ ʉwamwabho.
Hwahayibha na mantensya agɨ nsi ɨpa na paala,
ɨnzala yope yahayigwa.
Ɨgo gahayibha wandilo lwene wɨ malabha,
nanshi sha‑abhawa ʉnʼshɨ wa‑ahwanda apaape.
9 Leelo amwɨ,
mubhe maaso haani.
Abhantu bhahayihubhatwala mu makoloti aga bhalongozi na hubhakhome shibhiibhi mu nyumba ɨzya‑apuutile na‑amanyiilile.
Bhahayihubhatwala pitagaalila lya bhalongozi bhɨ nsi na pitagaalila lya bhamwɨnɨ hu nongwa yaanɨ huje,
mulongwe,
pɨpo munambɨlɨɨye anɨ.
Ɨho hahayibha habhaazyo aha‑asimishizye ɨNongwa ɨNyinza hwa bheene.
10 ƗNongwa ɨNyinza ɨzya huliinɨ zihwanziwa alʉmbɨɨlɨlwe nasʉʉti hwa bhantu abhɨ nsi zyonti.
11 Abhantu ɨbho lwa bhahubhadendemula na hubhatwale mu makoloti na hubhalonje zimo,
mugandi asɨɨbhe zya mubhala‑ayanje.
Mwahayangaje ziila ʉNgʉlʉbhɨ zya‑ahayihubhapeela hu habhaazyo hɨnɨɨho.
Saga mwɨmwɨ lwene mwahayiyanga,
lyoli ʉMʼpepo ʉMʼfinjile wa‑ali muuhati yeenyu ya‑ahayihubhaavwa ayanje.
12 Hu habhaazyo ɨho,
abhanakwabho bhahayibha bhasambushilana hwa bhalʉgʉ huje ʉwɨnjɨ abudwe mwa bheene.
Abhapaafi bhahayihubhasambushila abhaana bhaabho,
bhope abhaana bhahayihubhasambushila abhapaafi bhaabho huje bhabudwe.
13 Abhantu bhonti bhahayihubhaviitilwa amwɨ,
pɨpo muhumbɨnjɨɨlɨzya anɨ.
Leelo,
ʉla wa‑ahayijimbiilila afishe hu malishilo,
ʉyo ahayifyʉlwa.”
Amalabha amagoosi agamwabho ga gahayɨnza
14 Ʉmuntu ʉyo abhaazya ɨnsimbo ɨzi,
azyaganyaaje huje,
hwa huje bhʉlɨ.
ɄYeesu ahonjela ayanje,
“Ahabhaazyo hamo mwahayihunʼnola ʉnʼnanzi wa‑aleeta ʉwaavub a ayɨmɨlɨɨye mu nyumba ɨmfinjile,
pa saga ahwanziwa abhe.
Ɨpo abhantu bha bhali hu mukowa ʉgwɨ Yudeeya,
bhahashɨmbɨlɨlaje mu magamba!
15 Ʉmuntu wa‑ali pa mwanya pa nyumba,
c asahasheele ahwishe pa nsi na‑atʉʉshe mu nyumba ahweje ahantu hohonti,
lyoli ahashɨmbɨlaje!
16 Ʉmuntu wa‑ayagɨɨte hu nʼgʉnda,
asahasheele aweele hu khaaya,
asahaabhale ahweje ʉmwenda gwakwe,
lyoli ahashɨmbɨlaje!
17 Leelo,
bhasheelile abhashɨ bhaala,
bha bhahayibha nɨ nyanda na bha bhahayibha bhahwonsya abhaana mu nsiku ɨzyo!
18 Puutaji huje,
ɨnsiku ɨzyo zigandi afumile mu nsiku ɨzi‑isasa.
19 Ɨnsiku ɨzyo zyahayibha zyɨ malabha amagoosi ga saga gafumiiye nalumo,
afume hu wandilo ʉNgʉlʉbhɨ lwa‑ahapelaga ɨnsi,
afishe mu habhaazyo ɨho.
Nantele,
saga gahayifumila nantele nka lumo amalabha nanshi ɨgo.
20 Nantele,
nkashele ʉMwɨnɨ ʉNgʉlʉbhɨ saga wʉnzyaga ɨnsiku ɨzyo huje,
zibhe nyishe,
saga wɨnzaga‑abhe nʉʉmo ʉmuntu ʉwa‑afyʉlwe.
Leelo,
ʉNgʉlʉbhɨ ayʉnzɨɨzye ɨnsiku ɨzyo,
hu nongwa ya bhantu bhaala bha‑abhasaluuye huje,
bhabhe bhaakwe yʉʉyo.
21 Mu habhaazyo ɨho,
nkashele ʉmuntu ayiga,
‘Enya,
ʉMʼfyʉli ali ɨpa!’,
awe ʉmo ayiga,
‘Enya,
ali huula!’,
mugandi humʼmwɨtɨshɨle lwonti.
22 Bhahayifumila abhantu bha bhahayihwikwizya hwi‑ilenga huje,
‘Anɨ nɨ Mʼfyʉli!’
Peeka na bhakuwi abhi‑ilenga,
bhope bhahayibhonesya ɨvimanyishizyo na mayele huje,
bhalɨnje hubhateezye na bhaala bha bhasaluliilwe nʉ Ngʉlʉbhɨ.
23 Ɨshi amwɨ mubhanje maaso!
Anɨ naatala nasʉʉti hubhasunde zyonti ɨzyo sha zisɨɨle afumile.
24-25 Leelo,
mu nsiku ziila,
amalabha gaala lwa gaashila,
ɨvintu vyonti ɨvya hu mwanya vyahayiyinga.
Isanya lyahayikhoma ɨhiisi,
ʉmwezi gwope saga gwahayilama lwonti.
d Ɨnzota zyope zyahayilagala pa nsi afume hu mwanya.e
26 Ɨpo abhantu bhonti bhahayihundola anɨ nɨMwana wa Muntu ɨhwɨnza mu mabhɨngo hwi‑ikhone ɨlinji nʉ mwamu.f
27 Ɨpo nahayihubhasonteelezya abhantumi bhaanɨ huje,
bhabhabhʉngaanye bha bhasaluliilwe naanɨ afume ɨmbali zinɨ ɨzyɨ nsi,
afume hu wandilo wɨ nsi,
afishe hu malishilo waakwe.
28 Manyilaji ɨshifwani ɨshi‑ikʉ.
Nkashele mwalola ɨnsamba zyakwe zyadugula na‑alembe,
mumanya lwene huje,
ahabhaazyo aha‑ayabhile hapalamiiye.
29 Ɨshi,
lwa muhuzilola ɨzyo zyatala abhombeshe,
manyaji huje,
ahabhaazyo haanɨ aha hwɨnze hapalamiiye.
30 Lyoli ɨhubhabhʉʉzya huje,
abhantu abhɨ habhaazyo ɨha saga bhahayifwa,
sha zisɨɨle abhombeshe ɨzyo zyonti.
31 Ɨnsi nɨ vintu vyonti ɨvya hu mwanya vyahayishila,
leelo amazwi gaanɨ saga gahayishila nka lumo.”
ɄNgʉlʉbhɨ mwene wa‑amɨɨnye isiku ɨlya‑aweele hwa Yeesu
32 “Leelo,
hu nongwa yi‑isiku awe ahabhaazyo aha‑aweele hwanɨ,
nʉʉmo ʉmuntu wa‑amɨɨnye huje,
zyahayibha ndi.
Bhope abhantumi abha hu mwanya awe anɨ nɨMwana,
tenti saga tizimɨɨnye lwonti.
Lyoli ʉDaada ʉNgʉlʉbhɨ ali mwene wa‑amɨɨnye zyonti ɨzyo.
33 Mubhe maaso!
Hwilɨnganyaaji,
pɨpo saga mumɨɨnye huje,
ahabhaazyo ɨho hahayifiha ndi.
34 Aweele hwanɨ hulɨngaana nanshi ʉmuntu wa‑asogola pa khaaya,
ashʉʉla.
Lwa‑asɨɨle ashʉʉle ahabhaleshɨɨye abhakalwe bhaakwe huje,
bhasʉngaje ɨkhaaya.
Ahabhagabhiiye shila muntu ɨmbombo yaakwe ɨya‑abhombe.
Wope ʉnʼnɨndɨɨlɨli ʉwa pa lyango ahanʼnajiziizye huje,
abhanje maaso ahwenye ɨkhaaya.”
35 ɄYeesu lwa waamala hubhabhʉʉzye ɨsho,
ahonjela ahaga,
“Mubhanje maaso,
pɨpo saga mumɨɨnye huje,
anɨ nɨmwanɨɨsho nyumba nahayiweela ndi.
Saga mumɨɨnye huje,
lumo nahayiweela lyabheela,
awe nʉsiku paahati,
awe lwa huhwanda ashe ɨhanda lwa zigʉgʉlɨɨga,
awe shandaabhɨ.
36 Mubhe maaso huje,
hwope nkashele ɨngundusye ahwɨnze,
ɨnsahabhaaje mugonile ʉtulo.
37 Ɨli lyɨ‑ɨhubhabhʉʉzya amwɨ,
ɨhubhabhʉʉzya abhantu bhonti huje,
bhabhanje maaso.”