Ɨshikulukulu ɨshɨ weeji mwi‑ibooma ɨlyɨ Kaana
2
Isiku ɨlya taatu afume lwa‑ayanga ɨgo,
pahalɨɨho nɨ shikulukulu ɨshɨ weeji mwi‑ibooma ɨlyɨ Kaana mu mukowa ʉgwɨ Galilaaya.
Mu weeji ʉwo ahalɨɨho wope ʉnyina waakwe ʉYeesu.
2 ɄYeesu peeka na bhasundwe bhaakwe bhope bhahali bhaniilwe hu weeji ʉwo.
3 Abhaanwa lwa bhaamala ɨdivaayi,
a ɨpo ʉnyina waakwe ʉYeesu ahamʼmʉʉzya ahaga,
“Wee mwana waanɨ,
abhaanwa bhamalile ɨdivaayi.”
4 ɄYeesu ahamʼmwamula ʉnyina ahaga,
“Wee maayɨ,
yeenu ʉyanga ɨsho?
Ahabhaazyo aha‑abhombe ɨmbombo yaanɨ hasɨɨle afishe.”
5 Ɨpo ʉnyina ahabhabhʉʉzya abhabhomvi ahaga,
“Lyolyonti lya‑anza hubhabhʉʉzye,
amwɨ bhombaji.”
6 Pa weeji paala zyahalɨɨho ɨnsaayo nʼtanda zya zyahagombwilwe hu mawe.
Mu nsaayo ɨzyo,
aBhayahuudi bhahabhɨshɨlaga amɨnzɨ aga hwisangalusye,
alɨngaane na miiho gaabho.
Shila nsaayo yahali ɨmema amadebe gasaanu agɨ mɨnzɨ awe nʼtanda.
7 Ɨpo ʉYeesu ahabhabhʉʉzya abhabhomvi bhaala ahaga,
“Memyi amɨnzɨ mu nsaayo ɨzyo.”
Bhope bhahamemya amɨnzɨ mu nsaayo ɨzyo afishe pa mwanya.
8 Ɨpo ʉYeesu ahabhabhʉʉzya ahaga,
“Ɨshi tapi amɨnzɨ mashe mu nsaayo ɨzyo,
mubhale,
mumʼpeele ʉnʼnongozi wɨ shikulukulu ɨshɨ weeji.”
Bhope bhahatapa amɨnzɨ na humʼpeele ʉnʼnongozi ʉla.
9 Ʉnʼnongozi ʉla ahalɨnga amɨnzɨ gaala ɨgo ʉYeesu ahagagalulɨɨnye abhe divaayi.
Ʉmwene saga ahamɨɨnye ʉhwo ɨdivaayi ɨla hwa yahafumile,
leelo abhabhomvi bha bhahatɨɨpe amɨnzɨ bhahamɨɨnye ʉhwo ɨfumile.
Ɨpo ahanʼkwizya ʉmweji.
10 Lwa wɨnza ʉmweji,
ʉnʼnongozi ahamʼmʉʉzya ahaga,
“Ʉmuntu wowonti hu wandilo ahwanda hubhapeele abhaanwa ɨdivaayi ɨnyinza nasʉʉti.
Ɨshi hu habhaazyo ɨho abhaanwa lwa bhamwela na‑akwɨlane,
ɨpo hu malishilo ahwɨnza nɨ divaayi ya saga nyinza.
Leelo aawe ʉleetile ɨdivaayi ɨnyinza tee hu malishilo!”
11 ɄYeesu ahabhombile ɨshimanyishizyo ɨshi mwi‑ibooma ɨlyɨ Kaana hu mukowa ʉgwɨ Galilaaya.
Ɨshimanyishizyo ɨsho shahali sha hwande alolesye ʉmwamu waakwe hwa bhantu.
Hu nongwa ɨyo,
abhasundwe bhaakwe bhahamʼmwɨtɨha.
12 Ɨshikulukulu ɨshɨ weeji lwa shamaliha,
ʉYeesu ahiiha abhale hwi‑ibooma ɨlyɨ Kapelenawumu peeka nʉ nyina waakwe,
abhadoodo bhaakwe na bhasundwe bhaakwe.
Ɨpo bhahakhala ʉhwo ɨnsiku nyishe.
ɄYeesu ahubhashɨmbɨzya abhachuluuzi mu nyumba ɨmfinjile ɨya Ngʉlʉbhɨ
13 Ahabhaazyo ahɨ shikulukulu ɨshɨ Paasakab ɨya Bhayahuudi lwa hapalamila,
ʉYeesu ahazʉbha abhale hwi‑ibooma ɨlyɨ Yelusaleemu.
14 Ɨpo ahatʉʉha mu lubhaga lwɨ nyumba ɨmfinjile ɨya Ngʉlʉbhɨ.
c Ʉmwo ahabhaaga abhantu bhakazya ɨngʼombe,
ɨngoole nɨ nkʉnda,
na bhanjɨ bhahali bhakhɨɨye mu meeza zyabho bhavunza ɨmpɨɨyad ɨzya‑abhombele mu nyumba ɨmfinjile.
15 ɄYeesu lwa wagalola ɨgo,
ahatabha ʉlukusa abhe nsanzʉ,
ahabhadaga bhonti ɨbho bhahali bhakazya mu lubhaga lwɨ nyumba ɨmfinjile ɨya Ngʉlʉbhɨ,
peeka nɨ ngʼombe nɨ ngoole.
Nantele ahazipetulanya ɨmeeza zya bhaala bha bhahavunzaga ɨmpɨɨya na‑anyampaanye ɨmpɨɨya zyabho.
16 Ɨpo ahabhalajizya ɨbho bha bhahali bhakazya ɨnkʉnda ahaga,
“Zyefwi ɨnkʉnda ɨzi ɨpa.
Mugandi huyibhɨɨshe ɨnyumba ya Daada waanɨ abhe nyumba ya‑achuluuzizye.”
17 Abhasundwe bhaakwe lwa bhʉmvwa ɨgo,
bhahiizuha amazwi ɨgo gasimbwilwe mu Nsimbo ɨMfinjile huje,
“Ʉlugano lwanɨ hu nyumba yaaho lunza humbude.”e
18 Ɨpo abhalongozi bha Bhayahuudi lwa bhagalola ɨgo ʉYeesu abhombile,
bhahamʼmʉzɨɨlɨzya bhahaga,
“Ʉnza‑abhombe shimanyishizyo wɨlɨ ɨsha‑alolesye huje ʉli ni‑ikhone ɨlya‑abhombe ɨga?”
19 ɄYeesu ahabhabhʉʉzya ahaga,
“Bhuguli ɨnyumba ɨnɨ,
anɨ ɨnza huyizenje nantele hu nsiku zitaatu.”
20 Ɨpo aBhayahuudi bhahaga,
“Ɨnyumba ɨmfinjile ɨya Ngʉlʉbhɨ ɨnɨ yahazengwilwe hu maaha amashʉmi ganɨ na nʼtanda.
Ɨshi aawe,
ʉnza huyizenje wɨlɨ nantele hu nsiku zitaatu?”
21 Leelo ʉYeesu ahali saga ayanga hu nongwa yɨ nyumba ɨmfinjile ɨya Ngʉlʉbhɨ,
lyoli ahali ayanga ɨnongwa ɨzyɨ mʼbɨlɨ gwakwe.
22 Pamandɨ ʉYeesu lwa wazyʉha,
abhasundwe bhaakwe bhahiizuha amazwi ɨgo ahayanjile.
Hwi‑idala ɨlyo,
bhahazyɨtɨha ɨNsimbo ɨMfinjile na mazwi ɨgo ʉYeesu ahayanjile.
ɄYeesu amɨɨnye ɨgo gali mu mooyo ga bhantu bhonti
23 ɄYeesu lwa‑ali hu shikulukulu ɨshɨ Paasaka hwi‑ibooma ɨlyɨ Yelusaleemu,
abhantu abhinji bhahanda humʼmwɨtɨshe hu nongwa ya‑alole amayelef ɨgo ahabhombile.
24 Leelo ʉYeesu saga ahabhɨtɨshɨɨye,
pɨpo ahabhamɨɨnye bhonti.
25 Nantele saga ahanzaga ʉmuntu wowonti humʼmʉʉzye ɨgo abhantu bhasɨɨbha,
pɨpo ʉmwene ahagamɨɨnye gonti ɨgo gali mu mooyo ga bhantu bhonti.