Ɨshifwani ɨsha hubhasombe abhabhomba mbombo
20
ɄYeesu ahajendeelela ayanje ahaga,
“Ʉwumwɨnɨ ʉwa hu mwanya wulɨngaana nanshi ʉmwanɨɨsho nʼgʉnda ʉyo ahafumile shampwi tee hubhanze abhantu abha‑abhombe ɨmbombo mu nʼgʉnda gwakwe ʉgwɨ zabiibu.
2 Hu habhaazyo lwa wabhaaga,
ʉmwanɨɨsho nʼgʉnda ahɨtɨɨhana nabho hunʼsombe shila muntu ɨdinaalia yeeka hwi‑isiku,
ɨpo ahabhasonteelezya hu nʼgʉnda gwakwe.
3 Ɨshi ahabhaazyo lwa haafiha mu saala ɨya taatu shampwi,
ahafuma hwʉnzɨ nantele,
ahabhalola abhantu abhanjɨ bhɨmɨlɨɨye pa lembuka sinta mbombo.
4 Ahabhabhʉʉzya ahaga,
‘Namwɨ bhalaji abhombe ɨmbombo hu nʼgʉnda gwanɨ ʉgwɨ zabiibu.
Nanɨ ɨnza hubhasombe mwenti nanshi ɨsho ɨhwanziwa.’
5 Bhope bhahabhalile.
Ɨshi hu habhaazyo isanya lyabha pi‑itwe na hu saala ɨya fundihandwɨmo (9),
ahafumile hwʉnzɨ nantele abhinjizye abhantu abhanjɨ mu nʼgʉnda gwakwe guula.
6 Hu habhaazyo lwa hwabha lyabheela,
ahafuma hwʉnzɨ nantele,
ahabhalola abhantu abhanjɨ ɨbho bhɨmɨlɨɨye pa lembuka.
Ahabhabhʉzɨɨlɨzya ahaga,
‘Hu nongwa wɨlɨ mwɨmɨlɨɨye ɨpa isiku lyonti sinta mbombo?’
7 Bhope bhahamʼmwamula bhahaga,
‘Nʉʉmo ʉmuntu wa‑atipiiye ɨmbombo ɨya‑abhombe.’
Ʉmwene ahabhabhʉʉzya ahaga,
‘Namwɨ bhalaji abhombe ɨmbombo hu nʼgʉnda gwanɨ ʉgwɨ zabiibu.’
8 Hu habhaazyo lwa hwabha bhʉbhɨɨla,
ʉmwanɨɨsho nʼgʉnda ʉyo ahamʼmʉʉzya wa‑ahabhɨmɨlɨlaga abhabhomba mbombo bhaakwe ahaga,
‘Bhakwizye abhabhomba mbombo bhonti huje ʉbhasombe ʉmʼposheelo gwabho.
Lwʉ‑ʉhubhasomba,
ʉyande na bhabhomba mbombo ɨbho bhahɨnzɨle hu malishilo na‑amalɨɨzye hwɨ‑ɨbho bhahɨnzɨle hu wandilo.’
9 Ɨpo abhabhomba mbombo bhaala bha bhahɨnzɨle lyabheela,
bhahɨnza na hwambɨɨlɨle ɨmpɨɨya ɨzya‑alɨngaane nʉ mʼposheelo ʉgwi‑isiku lyeka.
10 Abhabhomba mbombo bha bhahɨnzɨle hu wandilo,
bhahasʉbhɨɨye ahwambɨɨlɨle ɨmpɨɨya zinyinji ashile abhamwabho bha bhahɨnzɨle hu malishilo.
Leelo bhonti bhahasombwilwe ɨmpɨɨya yɨyɨɨla yeeka ɨyɨ mʼposheelo ʉgwi‑isiku lyeka.
11 Ɨpo lwa bhaposheela ʉmʼposheelo,
bhahanda ahwibhune hwa mwanɨɨsho nʼgʉnda huje,
12 ‘Wee mwɨnɨ,
abhantu bhaala bhabhombile ɨmbombo isaala lyeka lwene,
ɨshi yeenu ʉtiposhelezɨɨzye ʉmʼposheelo gweka na bheene?
Atɨ tibhombile ɨmbombo ɨhome tee ʉsanya wonti!’
13 Ʉmwanɨɨsho nʼgʉnda ʉla ahamʼmwamula ʉmo mu bhantu bhaala ahaga,
‘Wee mʼmanyani,
saga ɨʼgobɨɨye.
Wɨlɨ,
saga tahɨtɨhɨɨne huje ʉnza‑abhombe ɨmbombo hu mpɨɨya ɨya‑akwɨlane nʉ mʼposheelo ʉgwi‑isiku lyeka?
14 Ega ɨmpɨɨya yaaho ɨnɨ,
sogola ɨpa!
Anɨ ɨnamuuye hunʼsombe ʉmuntu ʉnʉ ʉwa hu malishilo ʉmʼposheelo gwa gulɨngaana nʉ gwaliiwe.
15 Wɨlɨ,
saga ɨhwanziwa abhombele ɨvintu vyanɨ nanshi shɨ‑ɨsʉngwa?
Aawe ʉli nɨ jɨɨla pɨpo anɨ ɨhubhaavwa tee abhanjɨ?’ ”
16 ɄYeesu ahayanga nantele ahaga,
“Ɨsho sha shɨɨsho zili,
abhantu abha hu malishilo bhahayibha bha hwande,
nantele abha hwande bhahayibha bha hu malishilo.”
ɄYeesu akuwa afwe na‑azyʉshe hwakwe ʉlwa taatu
17 ɄYeesu lwa‑ali mwi‑idala azʉbha abhale hwi‑ibooma ɨlyɨ Yelusaleemu,
ahabheega panshɨnjɨ abhasundwe bhaakwe ishʉmi na bhabhɨɨlɨ ahabhabhʉʉzya ahaga,
18 “Enya,
ɨshi tizʉbha hwi‑ibooma ɨlyɨ Yelusaleemu.
Ʉhwo,
anɨ nɨMwana wa Muntu nahayibhɨɨhwa mu nyoobhe zya bhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose.
Ɨbho bhahayihundonga huje bhangoje.
19 Nantele,
bhahayihuntwala hwa bhantu bha saga Bhayahuudi huje bhansyonshele,
bhahayihuhoma nʉ chapob na huhomeele pa shikhobheehanyo.
Leelo isiku ɨlya taatu afume afwe hwanɨ,
ʉNgʉlʉbhɨ ahayihunzyʉsya.”
Ʉnʼgoosi mu wumwɨnɨ ʉwa hu mwanya
20 Ɨpo ʉnʼshɨ wa Zebedaayo ahabhalile hwa Yeesu na bhaana bhaakwe bhabhɨɨlɨ,
ahasugamila pitagaalila lyakwe huje amʼmwavwe.
21 ɄYeesu ahamʼmʉzɨɨlɨzya ahaga,
“Ʉhwanza ɨʼbhombele yeenu?”
Wope ahamʼmwamula ahaga,
“Ɨhulaabha ʉbhɨtɨshɨle abhaana bhaanɨ ɨbha bhabhɨɨlɨ huje bhabhe bhalongozi hu wumwɨnɨ waaho,
weeka ʉhamʼmɨɨshe hu nʼkhono ʉgwa hu lɨɨlo,
nʉ wamwabho ʉhamʼmɨɨshe hu nʼkhono ʉgwa hu mongo.”
22 ɄYeesu ahaamula ahaga,
“Saga mumɨɨnye lya mulaabha.
Wɨlɨ,
mugamwelela ʉlupɨndɨ ʉlwɨ mayɨmba lwa nahayimwelela anɨ?”
Bhahamʼmwamula bhahaga,
“Tibhajiiye.”
23 ɄYeesu ahabhabhʉʉzya ahaga,
“Lyoli mwahayilabha nanshi ɨsho nahayilabha,
leelo akhale ambali yɨ nʼkhono gwanɨ ʉgwa hu lɨɨlo awe ʉgwa hu mongo ɨyo saga mbombo yaanɨ hubhɨtɨshɨle.
Lyoli ɨfwasi ɨyo ya bhaala ɨbho ʉYise waanɨ abhabhɨshɨɨye nzɨɨla.”
24 Hu habhaazyo ɨho abhasundwe abhamwabho ishʉmi lwa bhʉmvwa ɨgo,
bhahabhaviitilwa abhanakwabho bhaala bhabhɨɨlɨ.
25 Ɨpo ʉYeesu ahabhakwizya huje bhasejeele hwa mwene.
Ahabhabhʉʉzya ahaga,
“Mumɨɨnye huje abhantu bha saga Bhayahuudi bhahubhalongozya abhantu bhaabho hwi‑ikhone,
nantele abhagoosi bhaabho bhahubhabhombezya shibhiibhi abhantu bhaabho.
26 Leelo huliimwɨ amwɨ saga zinza‑abhe ɨsho.
Lyoli ʉmuntu ʉyo ahwanza abhe nʼgoosi weenyu,
ahwanziwa abhe mʼmomvi weenyu mwenti.
27 Nantele,
ʉmuntu wa‑ahwanza abhe wa hwande mwaliimwɨ,
ahwanziwa abhe nʼkalwe weenyu.
28 Hwi‑idala ɨlyo,
anɨ nɨMwana wa Muntu saga ɨnɨnzɨle abhombelwe,
lyoli ɨnɨnzɨle hubhabhombele abhanjɨ na‑afumye ʉwʉʉmi waanɨ huje ɨmbagombole abhantu abhinji.”
ɄYeesu ahubhaponia abhantonko bhabhɨɨlɨ
29 ɄYeesu na bhasundwe bhaakwe bhahafiha hwi‑ibooma igoosi ɨlyɨ Yeeliko.
Lwa bhasogola mwi‑ibooma liila,
ɨmpʉga ɨngoosi ɨya bhantu yahali ɨhumʼmɨnjɨɨlɨla.
30 Abhantonko bhabhɨɨlɨ bhahakhɨɨye panshɨnjɨ pi‑idala ɨpo ʉYeesu ahali ashila.
Lwa bhʉmvwa huje yʉ Yeesu ashila,
bhahanʼkwizya hwi‑izwi igoosi bhahaga,
“Wee Mwɨnɨ,
Mwana wa Daudi,
tihulaabha ʉtilolele ɨnkʉmbʉ!”
31 Ɨmpʉga ɨya bhantu yahabha ɨhubhadaamila huje bhapʉʉme,
leelo abheene bhahonjela hunʼkwizye bhahaga,
“Wee Mwɨnɨ,
Mwana wa Daudi,
tihulaabha ʉtilolele ɨnkʉmbʉ!”
32 ɄYeesu ahɨmɨɨlɨla,
ahabhakwizya na hubhabhʉzɨɨlɨzye aje,
“Muhwanza ɨmbabhombele heenu?”
33 Ɨpo abhantonko bhaala bhahamʼmwamula bhahaga,
“Wee Mwɨnɨ,
tihulaabha huje amaaso geetu geenye.”
34 Ɨpo ʉYeesu ahabhalolela ɨnkʉmbʉ,
ahabhapalamansya amaaso gaabho.
Ɨpo amaaso gaabho gaala gahanda alole,
hu malishilo bhahamʼmɨnjɨɨlɨla ʉYeesu.