Maalʉko 10

Ahwegane na‑alehane

(Mataayo 19:1-12; Luuka 16:18)

Ɨpo ʉYeesu na bhasundwe bhaakwe bhahasogola hu Kapelenawumu, bhahabhala hu mukowa ʉgwɨ Yudeeya. Bhahashizanya na‑alobhoshe hwi‑isyɨla ɨli‑isooho ɨlyɨ Yolodaani. Ɨmpʉga ɨngoosi ɨya bhantu yahamʼmʉngaanila nantele. Ahabhamanyizyaga nanshi sha‑alʉbhɨɨye abhombe wiila.

2 ABhafalisaayo bhamo bhahamʼmwɨnzɨla ʉYeesu huje bhanʼjele. Bhahamʼmʉzɨɨlɨzya bhahaga, “Bhʉlɨ, ɨhwɨtɨshɨlwa hu ndajizyo zyetu ʉnʼnume hunʼneshe ʉnʼshɨ waakwe?”

3 ɄYeesu ahabhaamula ahaga, “ɄMoose ahalajiziizye ndajizyo bhʉlɨ?” 4 Bhahamʼmwamula bhahaga, “ɄMoose ahɨtɨɨshe huje, ʉnʼnume anʼsimbilaje ʉnʼshɨ waakwe ɨkalaata ɨya hunʼneshe.” 5 Ɨpo ʉYeesu ahabhabhʉʉzya huje, “ɄMoose ahabhasimbiiye ɨndajizyo ɨyo hu nongwa yɨ khome wɨ mooyo geenyu. 6 Leelo, afume hu wandilo ʉNgʉlʉbhɨ lwa‑ahapelaga ɨnsi, ‘ahapelile ʉnʼnume nʉ nʼshɨ.’ 7 ‘Yɨ nongwa ɨnɨ, ʉnʼnume ahayihunʼneha ʉyise nʉ nyina, ahayipatiihana nʉ nʼshɨ waakwe. 8 Bhabhɨɨlɨ ɨbho bhahayibha mʼbɨlɨ gweka.’ Ɨshi, bhabhɨɨlɨ ɨbho saga bhabha bhantu bhabhɨɨlɨ nantele, lyoli bhabha mʼbɨlɨ gweka. 9 Abhantu ɨbho ʉNgʉlʉbhɨ abhapatihɨɨnye, asahasheele ʉmuntu nkʉ‑ʉmo hubhalehanye.”

10 Lwa bhatʉʉha nantele mu nyumba, abhasundwe bhaakwe bhahamʼmʉzɨlɨzyaga shinza hu nongwa ɨyo. 11 ɄYeesu ahabhabhʉʉzya huje, “Ʉnʼnume ʉyo ahunʼneha ʉnʼshɨ waakwe na hweje ʉwɨnjɨ, ahumʼmombela weegu ʉnʼshɨ ʉwa hwande. 12 Wope ʉnʼshɨ ʉyo ahunʼneha ʉnʼnume waakwe na hwegwe nʉ nʼnume ʉwɨnjɨ, ahumʼmombela weegu ʉnʼnume ʉwa hwande.”

ɄYeesu ahubhasaya abhaana abhadoodo

(Mataayo 19:13-15; Luuka 18:15-17)

13 Abhantu bhahanʼnetelaga ʉYeesu abhaana abhadoodo, huje abhapalamansye na hubhasaye. Leelo, abhasundwe bhaakwe bhahabhadaamila bhaala bha bhahabhaleetaga abhaana. 14 ɄYeesu lwa waalola bhabhomba shiila, ahaviitwa. Ahabhabhʉʉzya huje, “Bhaleshi abhaana abhadoodo bhɨnzaje huliinɨ, mugandi hubhakhaane! Abhantu bha bhali nanshi abhaana abhadoodo ɨbha, bha bhatʉʉha hu wumwɨnɨ ʉwa Ngʉlʉbhɨ. 15 Lyoli ɨhubhabhʉʉzya huje, ʉmuntu ʉyo saga ahwɨtɨha ʉlongozi wa Ngʉlʉbhɨ nanshi ʉmwana ʉnʼdoodo sha‑ahwɨtɨha, saga agatʉʉha nka lumo mu wumwɨnɨ ʉwa Ngʉlʉbhɨ.” 16 Ɨpo ahabhapagatila abhaana bhaala, ahabhabhɨshɨlaga ɨnyoobhe zyakwe, ahabhasayaga.

Ʉpala wa nʼtabhazi atʉʉshe hu wumwɨnɨ ʉwa Ngʉlʉbhɨ

(Mataayo 19:16-30; Luuka 18:18-30)

17 ɄYeesu na bhasundwe bhaakwe lwa bhahwanda asogole, ʉmuntu ʉmo ahanʼshɨmbɨɨlɨla, ahanʼsugamila. Ahamʼmʉzɨɨlɨzya ʉYeesu huje, “Mʼmanyizyi wʉ‑ʉli mwinza, ɨshi ɨmbombe wɨlɨ huje, ɨmbwaje ʉwʉʉmi ʉwa wiila?”

18 ɄYeesu ahamʼmwamula ahaga, “Yeenu ʉhunkwizya mwinza? Saga alɨɨho ya‑ali mwinza, lyoli yʉ Ngʉlʉbhɨ mwene! 19 Ɨshi, ʉzimɨɨnye ɨndajizyo zya Moose zya ziyiga, ‘Ʉgandi agoje, ʉgandi abhembushe, ʉgandi ahwibhe, ʉgandi afumye ʉsimishizi ʉwi‑ilenga, ʉgandi agobele, nantele ʉnʼtinihaje ʉso nʉ bhɨɨnyu.’ ”

20 Ʉmuntu ʉla ahamʼmwamula ahaga, “Mʼmanyizyi, ɨndajizyo ɨzyo zyonti ɨnzikhɨɨte afume hu waana waanɨ.” 21 ɄYeesu ahamʼmwenya, ahanʼgana, ahamʼmʉʉzya ahaga, “Ahantu heeka habhuliiye huliiwe. Bhalaga ʉkazye ɨvintu vyonti vyʉ‑ʉli navyo, ɨmpɨɨya ɨzyo ʉbhapeele abhapɨɨna, nawe wahayibha nɨ mfuha hwa Ngʉlʉbhɨ. Nkʉ‑ʉyɨnzaje, ʉmbɨnjɨlɨzyaje anɨ na‑abhe nʼsundwe waanɨ.” 22 Leelo, ʉmuntu ʉla lwa wʉmvwa shiila, ahazugumila hu mwoyo. Ahasogola sha‑azugumiiye haani, pɨpo ahali nɨ shʉʉma ɨshinji tee.

23 ɄYeesu ahabhazyamila abhantu ʉhwu nʉ‑ʉhwu, ahabhabhʉʉzya abhasundwe bhaakwe huje, “Hwahayibha hupala hwa bhatabhazi atʉʉshe mu wumwɨnɨ ʉwa Ngʉlʉbhɨ.”

24 Abhasundwe bhaakwe bhahaswiga hu mazwi gaakwe. ɄYeesu ahabhabhʉʉzya nantele huje, “Bhaana bhaanɨ, enyi sha huli hukhome atʉʉshe mu wumwɨnɨ ʉwa Ngʉlʉbhɨ. 25 Hupʉpʉʉsu tee ɨngamiya ashile mwa hadobhooli hɨ nsenelo, na‑aje, ʉmuntu ʉnʼtabhazi atʉʉshe mu wumwɨnɨ ʉwa Ngʉlʉbhɨ.” 26 Abhasundwe bhaakwe bhahaswiga haani hwi‑izwi ɨlyo. Bhahabhʉzɨlɨzanyaaga bhɨɨbho hu bhɨɨbho huje, “Ɨshi nkashele sha zili, weenu wa‑agafyʉlwa?” 27 ɄYeesu ahabhazyamila, ahabhabhʉʉzya ahaga, “Ɨzi saga zigabhombwa na bhantu, leelo hwa Ngʉlʉbhɨ zigabhombeha, pɨpo hwa Ngʉlʉbhɨ zyonti zibhombeha.”

28 ɄPeeteli ahamʼmʉʉzya ʉYeesu huje, “Wee Mwɨnɨ, enya atɨ tivileshile ɨvintu vyonti, tiʼbhɨnjɨlɨzɨɨzye aawe na‑abhe bhasundwe bhaaho!” 29 Ɨpo ʉYeesu ahaga, “Lyoli ɨhubhabhʉʉzya huje, ʉmuntu wowonti ʉyo aleshile ɨnyumba yaakwe, awe abhakʉlʉ bhaakwe, awe abhadoodo bhaakwe, awe abhayɨlʉmbʉ bhaakwe, awe ʉnyina waakwe, awe ʉyise waakwe, awe abhaana bhaakwe, awe amagʉnda gaakwe hu nongwa yaanɨ nɨ Nongwa ɨNyinza afume hwa Ngʉlʉbhɨ, 30 ʉNgʉlʉbhɨ ahayihumʼpeela ɨvinji haani ashile viila. Ɨshi hu habhaazyo ɨho ahayambɨɨlɨla ɨnyumba, abhakʉlʉ, abhadoodo, abhayɨlʉmbʉ, abhaanyina, abhaana na magʉnda. Peeka na viila vyonti, ahayibha na mayɨmba. Nantele, mu habhaazyo ha hahwɨnza, ahayambɨɨlɨla ʉwʉʉmi ʉwa wiila. 31 Leelo, abhinji bha bhatinihwa hu habhaazyo ɨha, saga bhahayitinihwa hu habhaazyo ha hahwɨnza. Nantele, abhinji bha saga bhatinihwa hu habhaazyo ɨha, bhahayitinihwa hu habhaazyo ha hahwɨnza.”

ɄYeesu akuwa afwe na‑azyʉshe hwakwe ʉlwa taatu

(Mataayo 20:17-19; Luuka 18:31-34)

32 ɄYeesu na bhasundwe bhaakwe lwa bhali mwi‑idala abhale hwi‑ibooma ɨlyɨ Yelusaleemu, ʉYeesu ahabhanga hwilongolela lyabho. Abhasundwe bha Yeesu na bhantu abhanjɨ bha bhahamʼmɨnjɨlɨzyaga, bhahali nʉ wooga nɨ nswigo. ɄYeesu ahabhakwizya nantele panshɨnjɨ abhasundwe bhaakwe ishʉmi na bhabhɨɨlɨ, ahanda hubhabhʉʉzye zya zyahayihumʼmwaga. 33 Ahayanga huje, “Enya, tizʉbha hwi‑ibooma ɨlyɨ Yelusaleemu. Ʉhwo, anɨ nɨMwana wa Muntu bhahayihuntwala hwa bhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose. Ɨbho bhahayihundonga huje ɨmfwe. Nantele, bhahayihuntwala hwa bhantu bha saga Bhayahuudi. 34 Abhantu ɨbho bhahayihunsʉfwanya na hunswɨlɨle amatɨ. Bhahayihuhoma nʉ chapo na hungoje. Leelo, isiku ɨlya taatu afume afwe hwanɨ nahayizyʉha.”

Ʉnʼgoosi mu wumwɨnɨ ʉwa Ngʉlʉbhɨ

(Mataayo 20:20-28)

35 ɄYaakobo nʉ Yoohani, abhaana bha Zebedaayo, bhahanʼsejeelela ʉYeesu, bhahamʼmʉʉzya bhahaga, “Wee Mʼmanyizyi, tilaabha ʉtibhombele lyolyonti lya tihwanza.”

36 ɄYeesu ahabhabhʉzɨɨlɨzya huje, “Muhwanza ɨmbabhombele yeenu?”

37 Bhahamʼmwamula huje, “Lwa wahayilongozya hu mwamu waaho, tihulaabha huje, ʉhatibhɨɨshe akhale peeka naawe. Weeka ʉhamʼmɨɨshe hu nʼkhono ʉgwa hu lɨɨlo, nʉ wamwabho ʉhamʼmɨɨshe hu nʼkhono ʉgwa hu mongo.”

38 ɄYeesu ahabhabhʉʉzya huje, “Saga mumɨɨnye lya mulaabha. Ɨshi wɨlɨ, mugamwelela ʉlupɨndɨ ʉlwɨ mayɨmba lwa nahayimwelela anɨ, awe mugoozewa ʉlwozyo ʉlwa‑afwe lwa nahayoozewa anɨ?”

39 Bhahamʼmwamula bhahaga, “Tigabhomba ɨsho.” ɄYeesu ahabhabhʉʉzya huje, “Lyoli mwahayimwelela ʉlupɨndɨ ʉlwɨ mayɨmba lwa nahayimwelela na hwozewe ʉlwozyo lwa nahayoozewa anɨ. 40 Leelo, ahumʼmɨɨshe ʉmuntu akhale peeka naanɨ, ɨyo saga mbombo yaanɨ. Lyoli ʉNgʉlʉbhɨ ahayihubhapeela bhaala ɨbho abhabhɨshɨɨye nzɨɨla.”

41 Abhasundwe abhamwabho ishʉmi lwa bhʉmvwa zya bhalaabha ʉYaakobo nʉ Yoohani, bhahanda hubhaviitilwe. 42 Ɨpo ʉYeesu ahabhakwizya huje bhasejeele hwa mwene. Ahabhabhʉʉzya ahaga, “Mumɨɨnye huje, abhantu bha saga Bhayahuudi bhahubhalongozya abhantu bhaabho hu khali, bhope abhagoosi bhahubhabhombezya shibhiibhi abhantu bhaabho. 43 Leelo, huliimwɨ amwɨ saga zinza‑abhe ɨsho. Lyoli ʉmuntu ʉyo ahwanza abhe nʼgoosi weenyu, ahwanziwa abhe mʼmomvi weenyu mwenti. 44 Wope ʉmuntu wa‑ahwanza abhe wa hwande mwaliimwɨ, ahwanziwa abhe nʼkalwe weenyu mwenti. 45 Nanɨ nɨMwana wa Muntu saga ɨnɨnzɨle abhombelwe, lyoli ɨnɨnzɨle hubhabhombele abhanjɨ na‑afumye ʉwʉʉmi waanɨ huje ɨmbagombole abhantu abhinji.”

ɄYeesu ahumʼponia ʉnʼtonko

(Mataayo 20:29-34; Luuka 18:35-43)

46 Bhahafiha hwi‑ibooma ɨlyɨ Yeeliko. ɄYeesu na bhasundwe bhaakwe nɨ mpʉga ɨngoosi ɨya bhantu lwa bhasogola mu Yeeliko, bhahamʼmwaga ʉmuntu ʉmo wa bhahagaga Batimaayo, ʉmwana wa Timaayo. Ʉmuntu ʉyo ahafwiye amaaso. Ahakhɨɨye panshɨnjɨ pi‑idala, ahalaabhaga ɨmpɨɨya. 47 Lwa wʉmvwa huje, yʉ Yeesu ʉwa hwi‑ibooma ɨlyɨ Nazaleeti wa‑ashizanya paala, ahanda hunʼkwizye hwi‑izwi igoosi huje, “Wee Yeesu, Mwana wa Daudi, ɨhulaabha ndolele ɨnkʉmbʉ!” 48 Abhantu abhinji bhahabha bhahunʼdaamila huje, apʉʉme. Leelo, ʉmwene ahonjelaga hunʼkwizye hwi‑izwi igoosi tee, ahaga, “Wee Mwana wa Daudi, ndolele ɨnkʉmbʉ!”

49 Ɨpo ʉYeesu ahɨmɨɨlɨla ahaga, “Nʼkwizye, ayɨnze ɨpa.” Bhahanʼkwizya ʉnʼtonko ʉla, bhahamʼmʉʉzya bhahaga, “Ʉhwipeele ʉmwoyo, ɨmɨɨlɨla! Ahukwizya.”

50 Wope ahataaga igolole lyakwe pa nsi, ahatomoha, ahabhala hwa Yeesu. 51 ɄYeesu ahamʼmʉzɨɨlɨzya huje, “Ʉhwanza huje, ɨʼbhombele yeenu?” Ʉnʼtonko ʉla ahamʼmwamula huje, “Mʼmanyizyi, ɨhulaabha huje, amaaso gaanɨ geenye.” 52 ɄYeesu ahamʼponia, ahaga, “Ʉponile hu nongwa yɨ lwɨtɨho lwaho. Bhalaga hu khaaya.” Pɨnɨɨpo, ʉmuntu ʉla ahanda alole, ahamʼmɨnjɨɨlɨla ʉYeesu mwi‑idala.