Mataayo 10

ɄYeesu ahubhasonteelezya abhasundwe ishʉmi na bhabhɨɨlɨ

(Maalʉko 3:13-19; 6:7-13; Luuka 6:12-16; 9:1-6)

ɄYeesu ahabhakwizya abhasundwe bhaakwe ishʉmi na bhabhɨɨlɨ, ahabhapeela ikhone ɨlya hugadaje amapepo na hubhaponie ʉbhinu ʉwɨ waaji wonti. 2 Amataawa ga bhasontwa ɨbho ishʉmi na bhabhɨɨlɨ ga gɨɨga, ʉwa hwande yʉ Siimoni ʉyo bhahanʼkwizyaga Peeteli, nʉ Anduleeya ʉmwanakwabho, ʉYaakobo ʉmwana wa Zebedaayo, nʉ Yoohani ʉmwanakwabho, 3 ʉFilipo, ʉBasolomaayo, ʉToomasi, ʉMataayo ʉnʼsomvya sonko, ʉYaakobo ʉmwana wa Alufaayo, ʉTadaayo, 4 ʉSiimoni ʉNʼzeloote hwa huje ʉlwɨla nsi yaakwe nʉ Yuuda Sikalyoti, ʉyo hu malishilo ahanʼsambushiiye ʉYeesu hwa bhalʉgʉ.

5 ɄYeesu ahabhasonteelezya ishʉmi na bhabhɨɨlɨ ɨbho, ahabhalajizya ahaga, “Mugandi abhale mu madala ga bhantu ɨbho bha saga Bhaizilaeeli, nantele musahasheele atʉʉshe mu mabooma gonti aga Bhasamaliya. 6 Leelo mubhale hwa Bhaizilaeeli ɨbho bhateejile nanshi ɨngoole ɨzyo ziteejile. 7 Nantele, hu habhaazyo lwa mubhala muula, lʉmbɨlɨlaji huje, ‘Ʉwumwɨnɨ ʉwa hu mwanya wupalamiiye.’ 8 Bhaponiaji abhabhinu, bhazyʉsyaji abhafwe, bhasangalusyaji abhɨ mpʉngo ɨyɨ makete na hugadaje amapepo. ɄNgʉlʉbhɨ abhapiiye ikhone ɨlyo lwene, namwɨ mubhavwaje abhantu lwene. 9 Musaheeje ɨzahaabu, awe ɨmpɨɨya, awe ɨnsabhaazya ɨzyɨ shaaba mu nyambɨ zyenyu. 10 Musaheeje ɨmbuguulu, awe ʉmwenda ʉgwa‑agaluzanye, awe ɨndaatʉ, awe ɨngoodo, pɨpo ʉmʼmomvi akhondɨɨye ahwambɨɨlɨle ɨvyalye afume hwa bhantu ɨbho ahubhabhombela.

11 Ibooma lyolyonti awe ɨshipanga shoshonti sha mutʉʉha, libhe ligoosi awe shidoodo, mumʼmwanze ʉmuntu ʉyo anza hubhambɨɨlɨle shinza. Ɨpo mwahakhalaje hwa mwene afishe ɨpo lwa mwahayisogola. 12 Hu habhaazyo ha mutʉʉha mu nyumba, mulamuhaje abhakhaaya huje bhabhanje nʉ tengaanu. 13 Ɨshi, nkashele abhantu abha mu nyumba bhabhambɨlɨɨye, bhaputilaji hwa Ngʉlʉbhɨ huje abhasaye. Leelo nkashele saga bhahubhambɨɨlɨla, ɨnsayo zya Ngʉlʉbhɨ zibhala‑asagale naamwɨ. 14 Nkashele mwafiha mu nyumba yoyonti awe mwi‑ibooma lyolyonti, na bhantu bhaakwe bhakhaana hubhejeelele awe hubhatejeelezye, musogole ɨpo na‑akunyunte inkondi afume mu manama geenyu. 15 Lyoli ɨhubhabhʉʉzya huje pi‑isiku ɨlya‑alongwe, abhantu abha hwi‑ibooma ɨlyo bhahayambɨɨlɨla ʉlufundo ʉlugoosi tee ashile abhantu abha hu mabooma agɨ Sodoma nɨ Gomola!”

Amalabha ga gahayifumila ɨnsiku ɨzya hu malishilo

(Maalʉko 13:9-13; Luuka 21:12-17)

16 ɄYeesu ahajendeelela ayanje ahaga, “Tejeelezyi! Ɨhubhasonteelezya nanshi ɨngoole paahati yɨ mbwalonde! Ɨshi, mubhe nɨ njeele nanshi ɨnzoha, nantele mubhe bhatonsu nanshi ɨnkʉnda. 17 Mubhanje maaso na bhantu, pɨpo bhahayihubhatwala mu makoloti aga bhalongozi, nantele bhahayihubhakhoma mu nyumba zyabho ɨzya‑apuutile na‑amanyiilile. 18 Bhahayihubhatwala pitagaalila lya bhalongozi bhɨ nsi na pitagaalila lya bhamwɨnɨ hu nongwa yaanɨ. Ɨho hahayibha habhaazyo aha‑asimishizye ɨNongwa ɨNyinza hwa bheene na hwa bha saga Bhayahuudi. 19 Ɨpo leelo lwa bhahayihubhatwala mu makoloti, mugandi ahwogope huje mubhala‑ayanje yeenu, awe mubhala‑ayanje wɨlɨ. Ɨnjanjile ɨsho, pɨpo ʉNgʉlʉbhɨ ahayihubhapeela aga‑ayanje hu habhaazyo hɨnɨɨho. 20 Amazwi aga‑ayanje saga gahayifuma huliimwɨ, lyoli hwa Mʼpepo wa Ngʉlʉbhɨ, ʉDaada weenyu, ʉyo ahayiyanga ashilile huliimwɨ.

21 Hu habhaazyo ɨho, abhanakwabho bhahayibha bhasambushilana hwa bhalʉgʉ huje ʉwɨnjɨ abudwe mwa bheene. Abhapaafi bhahayihubhasambushila abhaana bhaabho, bhope abhaana bhahayihubhasambushila abhapaafi bhaabho huje bhabudwe. 22 Abhantu bhonti bhahayihubhaviitilwa amwɨ, pɨpo muhumbɨnjɨɨlɨzya anɨ. Leelo, ʉla wa‑ahayijimbiilila afishe hu malishilo, ʉyo ahayifyʉlwa. 23 Abhantu abhi‑ibooma limo nkashele bhahubhayɨmvya, mushɨmbɨlɨlaje mwi‑ibooma ɨlyɨnjɨ. Lyoli ɨhubhabhʉʉzya huje, saga mwahayimala ashile mu mabooma gonti aga hu Izilaeeli hu habhaazyo ɨho anɨ nɨMwana wa Muntu shɨ‑ɨnsɨɨle ahwɨnze.

24 Ʉmuntu wa‑amanyila saga aganʼshila ʉmʼmanyizyi waakwe. Nantele, ʉnʼkalwe wope saga aganʼshila ʉmwɨnɨ waakwe. 25 Ʉmuntu wa‑amanyila ahwanziwa abhanje nanshi ʉmʼmanyizyi waakwe nʉ nʼkalwe wope ahwanziwa abhanje nanshi ʉmwɨnɨ waakwe. Nkashele bhahunkwizya anɨ nɨnʼgoosi wɨ nyumba huje nɨBelizebuuli, wɨlɨ, saga bhanza hubhakwizye abhantu bha bhali mu nyumba yaanɨ itaawa ibhiibhi tee?”

Ʉwa humʼmwogope yʉ Ngʉlʉbhɨ mwene

(Luuka 12:2-9)

26 Ɨpo ʉYeesu ahonjela ayanje ahaga, “Mugandi hubhoogope abhantu ɨbho. Ziila zyonti zya zili hu mfiso, zyahayimanyiha na‑abhe pa pazelu. Nantele ɨvintu vyonti vya vifisiilwe vyahayivundulwa. 27 Gonti ɨgo ɨhubhabhʉʉzya mu hiisi, gayangaji pa pazelu. Nantele, gonti ɨgo muhwʉmvwa hu mfiso galʉmbɨlɨlaji hu bhantu bhonti. 28 Mugandi hubhoogope ɨbho bhabuda ʉmʼbɨlɨ leelo saga bhabhajiiye abude ʉmwoyo. Leelo mumʼmwogopaje ʉNgʉlʉbhɨ, pɨpo ʉmwene abhajiiye ayazye ʉmʼbɨlɨ peeka nʉ mwoyo hu mwoto ʉgwa wiila na wiila. 29 Wɨlɨ, ɨntʉndʉʉlʉ zibhɨɨlɨ saga bhakazya hu mpɨɨya ɨndoodo lwene? Hwope ɨsho, nɨɨmo ɨntʉndʉʉlʉ nka yeeka mwɨ‑ɨzyo yɨ‑ɨfwa sinta kʉndwe wa Daada, ʉNgʉlʉbhɨ weenyu. 30 Leelo amwɨ, hwope isisi lyɨ matwe geenyu libhaziiwe lyonti nʉ Ngʉlʉbhɨ. 31 Ɨshi, mugandi ahwogope, pɨpo amwɨ mukhondɨɨye tee pa maaso ga Ngʉlʉbhɨ ashile ɨnyonyi ɨnyinji. 32 Ʉmuntu wowonti wa‑ahubhabhʉʉzya abhantu huje ahunɨɨtɨha anɨ, nanɨ nahayihumʼmʉʉzya ʉNgʉlʉbhɨ na bhantumi bhaakwe huje ʉyo nʼsundwe waanɨ. 33 Leelo, wowonti wa‑ahayihuhaana anɨ pitagaalila lya bhantu, nanɨ nahayihunʼkhaana pitagaalila lya Daada waanɨ wa‑ali hu mwanya.”

Ʉkhome ʉwa‑abhe nʼsundwe wa Yeesu

(Luuka 12:51-53; 14:26-27)

34 ɄYeesu ahonjela ayanje ahaga, “Mugandi asɨɨbhe huje ɨnɨnzɨle mu nsi ɨnɨ hu nongwa ya‑aleete ʉtengaanu. Ndaadi! Saga sha shɨɨsho. Leelo, ɨnɨnzɨle hu nongwa ya‑aleete ʉlegano. 35 Ɨshi, ɨnɨnzɨle huje ʉmwana ʉnʼsahaala nʉ yise waakwe, ʉmwana ʉnʼnɨndu nʉ nyina waakwe, ʉnyinavyala nʉ khamwana waakwe bhagandi hwʉmvwane. 36 Nantele, abhalʉgʉ bha muntu bhahayibha bhantu bhaala abha mu nyumba yaakwe. 37 Ʉmuntu wowonti wa‑ahunʼgana ʉyise waakwe awe ʉnyina waakwe ashile ahungane anɨ, ʉyo saga akhondɨɨye abhe nʼsundwe waanɨ. Nantele, wowonti wa‑ahunʼgana ʉmwana waakwe ʉnʼsahaala, awe ʉmwalɨ waakwe ashile hungane anɨ, ʉyo wope saga akhondɨɨye abhe nʼsundwe waanɨ. 38 Ʉmuntu ʉyo saga anyeemula ɨshikhobheehanyo shaakwe na humbɨnjɨɨlɨle, saga akhondɨɨye abhe nʼsundwe waanɨ. 39 Ʉmuntu wowonti wa‑ahwanza ahwifyʉle ʉwʉʉmi waakwe, ahayihuwuteezya. Nantele wowonti wa‑ahayihuwuteezya ʉwʉʉmi waakwe hu nongwa yaanɨ, ahayihuwaaga.”

Abhantu ɨbho bhahayiposheela ʉmʼposheelo

(Maalʉko 9:41; Luuka 10:16)

40 ɄYeesu ahonjela nantele ahaga, “Ʉmuntu wowonti ʉyo ahubhejeelela amwɨ, ɨpo ahunejeelela nɨɨnɨ. Nantele, wowonti ʉyo ahunejeelela anɨ, ɨpo ahumʼmwejeelela ya yʉʉla wa‑ahansonteleziizye anɨ. 41 Ʉmuntu wowonti wa‑ahumʼmwambɨɨlɨla ʉnʼkuwi hu nongwa ya‑aje nʼkuwi, ahayiposheela ʉmʼposheelo ʉgwɨ shikuwi. Nantele, wowonti wa‑ahumʼmwambɨɨlɨla ʉmuntu wa‑ali nʼgolosu pitagaalila lya Ngʉlʉbhɨ, hu nongwa ya‑aje nʼgolosu, ʉNgʉlʉbhɨ ahayihunʼsomba ʉmʼposheelo gwa muntu ʉnʼgolosu. 42 Lyoli ɨhubhabhʉʉzya huje, wowonti ʉyo ahumʼpeela ʉlupɨndɨ ʉlwɨ mɨnzɨ amakhatazu ʉmo mwɨ‑ɨbha bha saga bhali nɨ nshɨnshɨ hu nongwa ya‑aje bhasundwe bhaanɨ, lyoli ɨhubhabhʉʉzya huje ahayambɨɨlɨla ɨmpeesya yaakwe.”