Luuka 10

ɄYeesu ahubhasonteelezya abhasundwe amashʉmi pʉnga na bhabhɨɨlɨ

Lwa gaashila ɨgo, ʉMwɨnɨ ʉYeesu ahasalula abhasundwe abhamwabho amashʉmi pʉnga na bhabhɨɨlɨ (72) huje, abhasonteelezye. Ɨpo ahabhasonteelezya bhabhɨɨlɨ bhabhɨɨlɨ huje, bhatagaalile mu mabooma na munshɨnjɨ mwonti mwa‑ahasɨɨbhɨle abhale yʉʉyo. 2 ɄYeesu ahabhabhʉʉzya ahaga, “Ɨviyabho vinji tee vyelile mu nʼgʉnda, leelo abhavune bhali bhashe. Ɨshi, munʼnaabhe ʉmwanɨɨsho nʼgʉnda, asonteelezye abhavune. 3 Ɨshi, bhalaji! Leelo mumanyaje huje, ɨhubhasonteelezya nanshi ɨnyaana ngoole paahati yɨ mbwalonde! 4 Mugandi ahweje ɨmpɨɨya, awe ɨmbuguulu, awe ɨndaatʉ ɨzya‑agaluzanye. Nantele mugandi hunʼnamushe ʉmuntu wowonti mwi‑idala.

5 Lwa mutʉʉha mu nyumba yoyonti ɨla, mulamuhaje nasʉʉti aje, ‘ɄNgʉlʉbhɨ abhapeele ʉtengaanu mu nyumba ɨnɨ.’ 6 Nkashele ʉmwanɨɨsho nyumba ahubhambɨɨlɨla hu tengaanu, pa nyumba ɨyo pabhala‑abhe nʉ tengaanu. Leelo nkashele ʉmwanɨɨsho nyumba saga ahubhambɨɨlɨla hu tengaanu, ɨpo ʉtengaanu wubhala‑asagale naamwɨ.

7 Mu nyumba yoyonti ɨyo bhahayihubhejeelela, mugandi asaame‑saame. Mwahakhalaje mwʉnʉʉmwo na‑alye ɨshalye sha bhahayihubhapeela. Mubhombaje ɨsho hu nongwa ya‑aje, ʉmʼmomvi akhondɨɨye huje, aposheelaje. 8 Nkashele mwatʉʉha mwi‑ibooma limo, bhope abhakhaaya bhahubhambɨɨlɨla, lyanji ɨshalye shoshonti sha bhahubhapeela. 9 Mubhaponiaje abhabhinu bha bhali mwi‑ibooma ɨlyo na hubhabhʉʉzye huje, ‘Ʉwumwɨnɨ ʉwa Ngʉlʉbhɨ wupalamiiye huliimwɨ.’ 10 Leelo mwi‑ibooma ɨlyo abhantu saga bhahayihubhambɨɨlɨla lwonti, ʉmwo mwahasogolaje. Lwa musogola mu madala gaabho, mugaje, 11 ‘Hwope inkondi lya lili mu manama geetu, tikunyunta. Leelo mumanye huje, ʉwumwɨnɨ ʉwa Ngʉlʉbhɨ wupalamiiye!’ 12 Leelo ɨhubhabhʉʉzya huje, isiku ɨlyo ɨlya‑alongwe, abhantu abha hwi‑ibooma ɨlyo bhahayambɨɨlɨla ʉlufundo ʉlugoosi tee ashile abhantu abha hwi‑ibooma ɨlyɨ Sodoma!”

ɄYeesu ahubhakhajila abhantu abha mu mabooma bha saga bhahumʼmwɨtɨha

(Mataayo 11:20-24)

13 ɄYeesu ahonjela ahaga, “Lwenyu mubhantu bha hwi‑ibooma ɨlyɨ Kolaziini! Lwenyu mubhantu bha hwi‑ibooma ɨlyɨ Betisayida! Ɨnjanjile ɨsho, pɨpo amayele ga nabhomba huliimwɨ, nkashele gahabhombehaga hu mabooma agɨ Tiilo nɨ Siidoni, abhantu ɨbho handɨ bhalambile halɨ. Handɨ bhakwɨte amenda agɨ magunila na hwipashe amalota alolesye huje, bhalambile ɨmbiibhi zyabho na‑azugumile tee hwɨ‑ɨzyo. 14 Leelo, pi‑isiku ɨlya‑alongwe, mwahayambɨɨlɨla ʉlufundo ʉlugoosi tee ashile abhantu abha hu mabooma agɨ Tiilo nɨ Siidoni! 15 Namwɨ mubhantu bha mwi‑ibooma ɨlyɨ Kapelenawumu, wɨlɨ, muhwilola huje mwahayizʉviwa hu mwanya hwa Ngʉlʉbhɨ? Ndaadi, saga zyahayibha ɨsho, lyoli mwahayitaagwa huzimu!”

16 Ɨpo ʉYeesu ahabhabhʉʉzya abhasundwe bhaakwe ahaga, “Ʉmuntu wa‑ahubhʉmvwa amwɨ, ahunʉmvwa nɨɨnɨ, wa‑ahubhakhaana amwɨ, ahuhaana nɨɨnɨ. Nantele wa‑ahuhaana anɨ, ahunʼkhaana yʉ Ngʉlʉbhɨ wa‑ahansonteleziizye anɨ.”

Abhasundwe amashʉmi pʉnga na bhabhɨɨlɨ bhaweela

17 Pamandɨ abhasundwe bha Yeesu amashʉmi pʉnga na bhabhɨɨlɨ (72) bhahaweela sha bhashiiye. Bhahamʼmʉʉzya ʉYeesu bhahaga, “Mwɨnɨ, gope amapepo gahatitinihaga, lwa tihugadaga hwi‑itaawa lyaho!” 18 ɄYeesu ahabhabhʉʉzya ahaga, “Nahanʼnolile ʉSeetano agwa afume hu mwanya nanshi ɨntalala. 19 Enya, ɨmbapiiye ikhone igoosi tee ɨlya humʼmene ʉnʼnʉgʉ hu gonti. Hwi‑ikhone ɨlyo munza‑akhanyanje ɨnzoha nɨ nkoonya, nantele saga halɨɨho ahantu aha hubhavwalazye. 20 Leelo mugandi aseshele hu nongwa ya‑aje, amapepo gahubhatiniha, lyoli museshelaje, pɨpo amataawa geenyu gasimbwilwe nʉ Ngʉlʉbhɨ hu mwanya.”

Ʉluseshelo lwa Yeesu

(Mataayo 11:25-27; 13:16-17)

21 Ahabhaazyo hahaala, ʉMʼpepo ʉMʼfinjile ahamʼpeela ʉYeesu ʉluseshelo tee mu mwoyo. Wope ʉYeesu ahaga, “Wee Daada, Mwɨnɨ wa hu mwanya na pa nsi, ɨhusalifya. Ɨhusalifya hu nongwa ya‑aje, amazwi ɨga ʉbhafisile abhɨ njeele na bhamanyiihanyi, leelo ʉbhalolesiizye abhantu bha bhahwiyiisya nanshi abhaana abhadoodo. Ena Daada, ɨsho sha shɨɨsho shʉ‑ʉsʉngwɨlwe weewe.” 22 Nantele ahaga, “ɄDaada waanɨ ampiiye vyonti. Nʉʉmo wa‑amɨɨnye anɨ nɨMwana, lyoli yʉ Daada mwene. Nantele, nʉʉmo wa‑amʼmɨɨnye ʉDaada, lyoli nɨɨnɨ nɨMwana, na wowonti ʉyo anɨ nɨMwana ɨsʉngwa humʼmwilulile sha‑alɨɨho.”

23 Ɨpo ʉYeesu ahagaluha hubheenye abhasundwe bhaakwe, ahabhabhʉʉzya ahaga, “Musayiiwe nʉ Ngʉlʉbhɨ amwɨ mwa mugalolile ɨga! 24 Ɨhubhabhʉʉzya huje, bhahalɨɨho abhakuwi abhinji na bhamwɨnɨ bha bhahanzaga hugalole ga muhugalola amwɨ, leelo saga bhahagalolile. Nantele bhahanzaga ahwʉmvwe zya muhwʉmvwa amwɨ, leelo saga bhahʉmvwɨzye.”

Ɨshifwani ɨsha Nʼsamaliya ʉmwinza

25 Ɨshi, pɨnɨɨpo lwene ʉmʼmanyizyi ʉmo ʉwɨ ndajizyo zya Moose ahɨmɨɨlɨla, ahamʼmʉzɨɨlɨzya ʉYeesu hunʼjele ahaga, “Wee Mʼmanyizyi, ɨmbombe wɨlɨ huje, ɨmbwaje ʉwʉʉmi ʉwa wiila?” 26 ɄYeesu ahamʼmwamula ahaga, “Zyahasimbwilwe wɨlɨ mu ndajizyo? Ʉhuzyaganya wɨlɨ?” 27 Ahamʼmwamula ahaga, “ ‘Ʉnʼganaje ʉMwɨnɨ ʉNgʉlʉbhɨ, ʉNgʉlʉbhɨ waaho hu mwoyo gwaho gwonti, hu wʉʉmi waaho wonti, hwi‑ikhone lyaho lyonti na hu njeele zyaho zyonti.’ Nantele, ‘Ʉnʼganaje ʉmʼpalamani waaho, nanshi shʉ‑ʉhwigana aawe.’ ” 28 ɄYeesu ahaga, “Waamula shinza! Ʉbhombe shɨnɨɨsho nawe ʉnza huwaaje ʉwʉʉmi ʉwa wiila na wiila.”

29 Leelo ʉmʼmanyizyi ʉwɨ ndajizyo ʉla ahanzaga ahwibhɨɨshe huje nʼgolosu pa maaso ga Ngʉlʉbhɨ. Ɨpo ahamʼmʉzɨɨlɨzya ʉYeesu nantele ahaga, “Ɨshi, ʉmʼpalamani waanɨ yʉ naanu?” 30 ɄYeesu ahamʼmwamula ahaga, “Hwahali nʉ muntu weeka wa‑ahafumile hu Yelusaleemu, ahiihaga hwi‑ibooma ɨlyɨ Yeeliko. Mwi‑idala ahakhatwa na bhanyambuda. Bhahanʼguba, bhahamʼfyʉla amenda gonti na hunʼkhome tee, bhahanʼneha aziliishe. 31 Lwʉnʉʉlwo ʉnʼsayi ʉmo wa Ngʉlʉbhɨ ahashilaga mwi‑idala liila. Lwa wanʼnola ʉmuntu ʉla, ahashila hunshɨnjɨ. 32 Wope ʉNʼnaawi lwa waafiha paala, ahanʼnola ʉmuntu ʉla, ahashila hunshɨnjɨ. 33 Leelo ahɨnza ʉNʼsamaliya ʉmo wa‑ahashʉʉlaga, wope ahashila mwi‑idala liliila. Lwa wanʼnola ʉmuntu ʉla, ahanʼnolela ɨnkʉmbʉ. 34 Ahanʼsejeelela, ahamʼpotozya ʉnʼnembo nɨ divaayi mu malonda gaakwe huje, amʼponie. Ahamʼpinya amalonda, ahanʼzʉvya pa mwanya pa ndogobhi yaakwe. Ahanʼtwala mu nyumba ɨmo ɨya bhajenu, ahabha ahumʼminia. 35 Nɨndaabhɨ yaakwe, ʉNʼsamaliya ʉla ahafumya ɨdinaali zibhɨɨlɨ na humʼpeele ʉmwanɨɨsho nyumba. Ɨpo ahamʼmʉʉzya ahaga, ‘Ʉmʼminie ʉmʼminu ʉnʉ. Nkashele ɨmpɨɨya ɨzi zyamaliha, nkashele waafumya ɨmpɨɨya zyaho ɨzya pa mwanya humʼmwavwe, nahayihuweezezya lwa nahayiweela.’ ” 36 Ɨpo ʉYeesu ahamʼmʉzɨɨlɨzya ʉmʼmanyizyi ʉwɨ ndajizyo ʉla ahaga, “Ɨshi, mu bhataatu ɨbho, yʉ naanu yʉ‑ʉsɨɨbha huje, mʼpalamani wɨ lyoli hwʉ‑ʉla wa‑ahavwalaziiwe na bhanyambuda?” 37 Ahaamula ahaga, “Wa‑ahanʼnolɨɨye ɨnkʉmbʉ.” ɄYeesu ahamʼmʉʉzya ahaga, “Nawe bhalaga, ʉbhombaje shɨnɨɨsho!”

ɄYeesu mu nyumba ya Maalita nʉ Maliya

38 ɄYeesu na bhasundwe bhaakwe lwa bhali mwi‑idala abhale hu Yelusaleemu, bhahafiha pi‑ibooma limo. Ʉmwo, ʉnʼshɨ ʉmo ya bhahagaga Maalita ahamʼmwambɨɨlɨla ʉYeesu mu nyumba yaakwe. 39 ɄMaalita ahali nʉ nʼdoodo waakwe wa bhahagaga Maliya. Ahabhaazyo ɨho, ʉMaliya ahakhɨɨye panshɨnjɨ pa manama ga Mwɨnɨ ʉYeesu, ahatejelezyaga ɨmanyizyo zyakwe. 40 Leelo ʉMaalita ahadigɨɨne tee nɨ mbombo ɨnyinji ɨzya hunʼtengaanyizye ʉYeesu ɨshalye. Ɨpo ahamʼmʉʉzya ʉYeesu ahaga, “Wee Mwɨnɨ, saga ʉsaaga huje, ʉnʼdoodo waanɨ andeshɨɨye ɨmbombo zyonti nɨmwene? Ɨshi, ʉmʼmʉʉzye huje, anaavwe!”

41 ɄMwɨnɨ ahamʼmwamula ahaga, “Maalita, Maalita, yeenu ʉyɨmba na‑ataamiwe hu mbombo ɨnyinji? 42 Ɨshi, ha hahwanziwa hantu heeka lwene. Ɨho ha hinza, ɨho ʉMaliya ha‑asaluuye. Nantele nʉʉmo wa‑anza hwefwe afume hwa mwene.”