11
ɄYeesu lwa waamala hubhabhʉʉzye aga‑abhombe abhasundwe bhaakwe ishʉmi na bhabhɨɨlɨ,
ahasogola paala.
Ahabhala mu mabooma agɨ mukowa ʉgwɨ Galilaaya alʉmbɨɨlɨle na hubhamanyizye abhantu izwi lya Ngʉlʉbhɨ.
ɄYoohani ʉMwozi asonteelezya ɨntumi hwa Yeesu
2 Hu habhaazyo ɨho,
ʉYoohani ʉMwozi ahali akʉngwɨlwe mu hoobhe.
Lwa‑ali mu hoobhe,
wʉmvwa ɨmbombo ɨzyo ʉKilisiti zya‑ahabhombaga.
Ɨpo ahabhasonteelezya abhasundwe bhaakwe huje bhabhale humʼmʉzɨɨlɨzye ʉYeesu huje,
3 “Timɨɨnye huje,
ʉMʼfyʉli ahayɨnza.
Wɨlɨ,
weewe,
awe tinʼgʉlɨlaje ʉwɨnjɨ?”
4 ɄYeesu ahabhaamula ahaga,
“Bhalaji mumʼmʉʉzye ʉYoohani zyonti zya muzilolile na huzyʉmvwe.
5 Abhantonko bhalola,
bha saga bhagajenda bhajenda,
abhɨ makete bhapona na‑asangalushe,
abhadinde bhahwʉmvwa,
abhafwe bhazyʉha na bhapɨɨna bhalʉmbɨɨlɨlwa ɨNongwa ɨNyinza.a
6 Nantele,
asayiiwe ʉmuntu wa saga ahululeha ʉlwɨtɨho hu nongwa yaanɨ!”
7 Hu habhaazyo ɨho abhasundwe bha Yoohani lwa bhahasogola,
ʉYeesu ahanda huyibhʉʉzye ɨmpʉga ya bhantu ɨnongwa ɨzya Yoohani huje,
“Mwahabhalile ahwenye yeenu mu lʉʉgwa?
Mwahabhalile humʼmwenye ʉmuntu wa‑ahwɨtɨha lyolyonti nanshi itete sha likhomwa nɨ nkʉngʉ hwonti hwonti?
Ndaadi!
8 Ɨshi,
mwahabhalile ahwenye yeenu?
Ʉmuntu wa‑akwɨte amenda aminza agɨ mpɨɨya ɨngoosi?
Ndaadi!
Abhantu bha bhakwata amenda agɨ mpɨɨya ɨngoosi bhahakhalaga mu nyumba ɨzyɨ shimwɨnɨ.
9 Ɨshi,
mwahabhalile ahwenye yeenu?
Mwahabhalile humʼmwenye ʉnʼkuwi?
Ena,
ʉYoohani nʼkuwi!
Nantele ɨhubhabhʉʉzya huje,
ʉYoohani ʉmwene,
ɨmbombo zyakwe ngoosi tee ashile ziila ɨzya nʼkuwi!
10 Ʉnʉ ya yʉʉyo ɨnongwa zyakwe zyahasimbwilwe mu Nsimbo ɨMfinjile huje,
‘Enya,
nahayihunʼsonteelezya ʉmʼmomvi waanɨ ʉyo ahayihutagaalila.
Ahayihubhabhɨɨha nzɨɨla abhantu huje,
bhahwejeelele,
nanshi abhantu sha bhalɨngaanya idala hu nongwa ya mwɨnɨ.’ ”b
11 ɄYeesu ahonjela ahaga,
“Lyoli ɨhubhabhʉʉzya,
mu bhantu bhonti bha bhapapwilwe nʉ nʼshɨ,
saga alɨɨho ʉnʼgoosi ashile ʉYoohani ʉMwozi.
Leelo,
wa‑ali nʼdoodo ashile abhamwabho mu wumwɨnɨ ʉwa hu mwanya,
ʉyo yʉ nʼgoosi ashile ʉYoohani.
12 Ahwande ɨnsiku ɨzya Yoohani ʉMwozi zya‑ahalʉmbɨlɨlaga afishe asanyʉʉnʉ,
ʉwumwɨnɨ ʉwa hu mwanya wugubwa hwi‑ikhone.
Bhope bha bhali ni‑ikhone,
bhalɨnga huwufyʉle hwi‑ikhone.
13 Ɨnjanjile ɨsho,
pɨpo abhakuwi bhonti peeka nɨ ndajizyo zya Moose,
bhahakuwile ɨnongwa ɨzyo afishe hu habhaazyo ha Yoohani ʉMwozi.
14 Ɨshi nkashele muhwɨtɨha ʉkuwi waabho,
munza‑amanye huje ʉYoohani yʉ Eliya ʉla wa‑ahayangwilwe na bhakuwi huje ahayɨnza hunʼnɨnganyizizye ʉMʼfyʉli.c
15 Ʉmuntu wowonti wa‑ahwʉmvwa,
azyaganyaaje na‑alembe mwɨ‑ɨgo ga nabhamanyizya!
16 Abhantu abhɨ habhaazyo ɨha ɨmbakholanye nɨ yeenu?
Bhalɨngaana nanshi abhaana bha bhakhala pa lembuka na hubhakwizye abhamwabho bhahaga,
17 ‘Tahabhakhomɨɨye ilonji,
leelo saga mwahanjile.
Nantele tahabhatelɨɨye ɨnteelo ɨzyɨ zugumizu,
leelo saga mwahalilile!’
18 Sha shɨɨsho hu habhaazyo ʉYoohani lwa‑ahɨnzɨle,
saga ahalyanga ɨntogito awe amwele ɨdivaayi,
abhantu bhahaga,
‘Ali ni‑ipepo.’
19 Ɨshi,
anɨ nɨMwana wa Muntu ɨnɨnzɨle,
ɨlya na‑amwele ɨdivaayi,
d abheene bhayanga,
‘Enya!
Mʼpafu ʉnʉ,
nantele mʼmwezi wɨ divaayi!
Mʼmanyani wa bhasomvya sonko na bhabhomba mbiibhi abhanjɨ!’
Leelo ʉtengamazu wa Ngʉlʉbhɨ wusimishiziwa huje wɨ lyoli hu njendo zya bhantu bhaakwe.”
ɄYeesu ahubhakhajila abhantu abha mu mabooma bha saga bhahumʼmwɨtɨha
20 Ɨpo ʉYeesu ahanda hubhakhajile abhantu abha mu mabooma gaala ɨgo ahabhombile amayele aminji,
hu nongwa ya‑aje saga bhahalambaga ɨmbiibhi zyabho.
Ahabhabhʉʉzya ahaga,
21 “Lwenyu mubhantu bha hwi‑ibooma ɨlyɨ Kolaziini!
Lwenyu mubhantu bha hwi‑ibooma ɨlyɨ Betisayida!
Ɨnjanjile ɨsho,
pɨpo amayele ga nabhomba huliimwɨ,
nkashele gahabhombehaga hu mabooma agɨ Tiilo nɨ Siidoni,
abhantu ɨbho handɨ bhalambile halɨ.
Handɨ bhakwɨte amenda agɨ magunila na hwipashe amalota alolesye huje,
bhalambile ɨmbiibhi zyabho na‑azugumile tee hwɨ‑ɨzyo.e
22 Leelo ɨhubhabhʉʉzya huje pi‑isiku ɨlya‑alongwe,
amwɨ mwahayambɨɨlɨla ʉlufundo ʉlugoosi tee ashile abhantu abha hu mabooma agɨ Tiilo nɨ Siidoni.
23 Namwɨ mubhantu bha mwi‑ibooma ɨlyɨ Kapelenawumu,
wɨlɨ,
muhwilola huje mwahayizʉviwa hu mwanya hwa Ngʉlʉbhɨ?
Ndaadi,
saga zyahayibha ɨsho,
lyoli mwahayitaagwa huzimu!
f Ɨnjanjile ɨsho,
pɨpo amayele ɨgo ga gahabhombɨɨshe huliimwɨ,
nkashele gahabhombehaga hwi‑ibooma ɨlyɨ Sodoma,
ɨshi,
ibooma ɨlyo handɨ lilɨɨho afishe sanyʉʉnʉ.
24 Leelo ɨhubhabhʉʉzya huje pi‑isiku ɨlya‑alongwe,
amwɨ mwahayambɨɨlɨla ʉlufundo ʉlugoosi tee ashile abhantu abha hwi‑ibooma ɨlyɨ Sodoma.”
Hwa Yeesu huli nʉ tʉʉzyo
25 Mu habhaazyo ɨho,
ʉYeesu ahaga,
“Wee Daada,
Mwɨnɨ wa hu mwanya na pa nsi,
ɨhusalifya.
Ɨhusalifya hu nongwa ya‑aje amazwi ɨga ʉbhafisile abhɨ njeele na bhamanyiihanyi,
leelo ʉbhalolesiizye abhantu bha bhahwiyiisya nanshi abhaana abhadoodo.
26 Ena Daada,
ɨsho sha shɨɨsho shʉ‑ʉsʉngwɨlwe weewe.
27 ɄDaada waanɨ ampiiye vyonti.
Nʉʉmo wa‑amɨɨnye anɨ nɨMwana,
lyoli yʉ Daada mwene.
Nantele,
nʉʉmo wa‑amʼmɨɨnye ʉDaada,
lyoli nɨɨnɨ nɨMwana nʉ wowonti ʉyo anɨ nɨMwana wɨ‑ɨsʉngwa humʼmwilulile sha‑alɨɨho.
28 Ɨnzaji hwaliinɨ amwɨ mwenti mwa muyɨmba na‑amenwe na mazigo amamwamu,
nanɨ nahayihubhatʉʉzya.
29 Hwipinyaji ikhongolog lyanɨ,
manyilaji hwaliinɨ huje mubhe nʉ tengaanu mu mooyo geenyu.
Ɨnjanjile ɨsho,
pɨpo anɨ ɨndi nʼtonsu nantele ɨndi nʼtengaanu.
30 Ikhongolo lyanɨ lipʉpʉʉsu ni‑izigo lyanɨ lyope lipʉpʉʉsu.”