Mataayo 12

ɄYeesu yʉ Mwɨnɨ wi‑isiku ɨlyɨ Sabaato

(Maalʉko 2:23-28; Luuka 6:1-5)

Mu habhaazyo haala, ʉYeesu na bhasundwe bhaakwe bhahashilaga mu magʉnda agɨ ngano pi‑isiku ɨlyɨ Sabaato. Abhasundwe bhaakwe lwa bhali nɨ nzala, ɨpo bhahanda anyuntule amatwe gɨ ngano na‑alye. 2 ABhafalisaayo lwa bhazilola ɨzyo, bhahamʼmʉʉzya ʉYeesu bhahaga, “Wee Yeesu, enya abhasundwe bhaaho bhabhomba ɨmbombo mwi‑isiku ɨlyɨ Sabaato ɨzyo ɨndajizyo zya Moose zikhaana!” 3 ɄYeesu ahabhaamula ahaga, “Wɨlɨ, saga mubhaziizye mu Nsimbo ɨMfinjile ʉmwɨnɨ ʉDaudi sha‑ahabhombile, ɨnzala lwa yanʼnuma ʉmwene peeka na bhamwabho? 4 Ahatʉʉha mwi‑isebhele ifinjile ɨlya Ngʉlʉbhɨ, aheega ɨntogito ɨmfinjile ɨzya pa shipuuto. Ɨpo bhahalya ɨntogito ɨzyo ɨndajizyo zya Moose zikhaana, lyoli bhahɨtɨshɨlɨɨlwe bha bhasayi bha Ngʉlʉbhɨ bheene. 5 Saga mubhaziizye mu ndajizyo zya Moose huje abhasayi bhɨ nyumba ɨmfinjile ɨya Ngʉlʉbhɨ bhabhomba ɨmbombo pi‑isiku ɨlyɨ Sabaato, hwope ɨsho saga bhabhaaziwa huje bhabhomba mbiibhi? 6 Leelo ɨhubhabhʉʉzya amwɨ huje ɨpa alɨɨho ʉnʼgoosi ashile ɨnyumba ɨmfinjile ɨya Ngʉlʉbhɨ. 7 Nkashele mwayimanyaga ɨngalulanyo ɨyɨ Nsimbo ɨMfinjile zya ziyiga, ‘Ɨhwanza ɨnkʉmbʉ ashile ɨnsangu ɨzya‑alʉngʉlɨzye,’ saga mwɨnzaga hubhakhoote abhantu bha saga bhali na malando gogonti. 8 Mumanye huje anɨ nɨMwana wa Muntu ɨndi Mwɨnɨ wɨ Sabaato.”

ɄYeesu ahumʼponia ʉmuntu pi‑isiku ɨlyɨ Sabaato

(Maalʉko 3:1-6; Luuka 6:6-11)

9 ɄYeesu ahasogola paala, ahabhala na‑atʉʉshe mu nyumba yaabho ɨya‑apuutile na‑amanyiilile. 10 Ʉmwo, ahali ʉmuntu ʉmo ʉyo ʉnʼkhono gwakwe gwahafwiye. Nantele mwahali na Bhafalisaayo ɨbho bhahanzaga hunʼjele ʉYeesu huje bhalyaje idala ɨlya hunʼtaake. Ɨpo bhahamʼmʉʉzya bhahaga, “Wɨlɨ, ɨndajizyo zya Moose zihwɨtɨha humʼponie ʉmuntu pi‑isiku ɨlyɨ Sabaato?”

11 ɄYeesu ahabhaamula ahaga, “Weenu ʉmo muuhati yeenyu, nkashele ɨngoole yaakwe yadumbushila mwi‑iliina pi‑isiku ɨlyɨ Sabaato, ʉmwene ʉyo saga wɨnzaga huyikhate na huyeefwe? 12 Enya ʉmuntu ali nɨ nshɨnshɨ tee ashile ɨngoole! Ɨshi, ɨndajizyo zya Ngʉlʉbhɨ zihwɨtɨha abhombe ɨnyinza pi‑isiku ɨlyɨ Sabaato.”

13 Ɨpo ʉYeesu ahamʼmʉʉzya ʉmuntu wa‑ahali nʉ nʼkhono gwa gwahafwiye, ahaga, “Golosya ʉnʼkhono gwaho.” Ʉmuntu ʉla ahagolosya ʉnʼkhono gwakwe, gwahapona, gwahabha nanshi ʉgwamwabho. 14 Leelo aBhafalisaayo bhaala bhahafuma hwʉnzɨ na‑ajeehane sha bhanza hunʼgoje ʉYeesu.

Ʉmʼmomvi ʉyo ʉNgʉlʉbhɨ anʼsaluuye

15 Hu habhaazyo ɨho ʉYeesu lwa waamanya huje aBhafalisaayo bhajeehana hu nongwa ya hunʼgoje, ahasogola paala. Abhantu bhabhinji bhahamʼmɨnjɨɨlɨla, wope ahabhaponia bhonti bha bhahali bhabhinu. 16 Leelo ahabhasunda huje bhagandi huzinyampaanye ɨnongwa ɨzyo hwa bhantu. 17 ɄYeesu ahayanjile ɨsho huje gabhombeshe ɨgo ʉnʼkuwi ʉYesaaya ahasimbile mu Nsimbo ɨMfinjile huje,

18 “Enya, ʉnʉ yʉ Mʼmomvi waanɨ ʉyo ɨnʼsaluuye,

ʉNʼkʉndwe waanɨ,

ʉmwoyo gwanɨ guhunʼseshela.

Nahayibhɨɨha ʉMʼpepo waanɨ muuhati mwa mwene

huje anyampaanye ʉfyʉli

hwa bhantu abha mu nsi zyonti.

19 Saga ahayidaliihana na bhantu awe abwaje ibwago nabho.

Nantele nʉʉmo ʉmuntu wa‑ahayʉmvwa izwi lyakwe mwi‑idala.

20 Saga ahayihumʼvwalazya ʉmuntu wowonti wa‑ali mʼminu,

nanshi ɨsho ilanzi lya ligondɨɨne,

nantele saga ahayihumʼvwalazya wa‑apalamiiye afwe,

nanshi ɨsho ʉmwoto ʉgwo gupalamiiye azime.

Hu malishilo ahayibhɨɨha ʉfyʉli amene ɨmbiibhi.

21 Nantele bha saga Bhayahuudi bhahayihunʼsʉʉbhɨla ʉmwene.”

ɄYeesu ali ni‑ikhone ashile ʉSeetano

(Maalʉko 3:20-30; Luuka 11:14-23)

22 Ɨpo abhantu bhamo bhahɨnza hwa Yeesu nʉ muntu ʉmo ʉyo ahali ni‑ipepo. Ipepo ɨlyo lyahamʼmɨɨshɨle huje abhe nʼtonko nantele mʼbwibwi. ɄYeesu ahamʼponia ʉmuntu ʉla, wope ahanda ayanje na‑alole nantele. 23 Ɨmpʉga ɨya bhantu yahaswiga na‑abhʉzɨlɨzanye bheene hu bheene bhahaga, “Wɨlɨ, ʉnʉ abhajiiye abhe Mwana wa mwɨnɨ ʉDaudi?” 24 Leelo aBhafalisaayo lwa bhʉmvwa ɨgo, bhahaga, “Ʉmuntu ʉnʉ ahugadaga amapepo hwi‑ikhone lya Belizebuuli, ʉnʼgoosi ʉwɨ mapepo gonti.”

25 ɄYeesu ahamanya zya bhahasɨɨbhaga, ahabhabhʉʉzya ahaga, “Nkashele abhantu abhɨ wumwɨnɨ weeka bhatapuhɨɨne, ɨpo ʉwumwɨnɨ ʉwo wunza‑agwe. Nantele, nkashele abhantu abhi‑ibooma lyeka awe ɨnyumba yeeka bhatapuhɨɨne, ɨpo bhanza‑anyampaane. 26 Wope ʉSeetano nkashele ahunʼshɨmbɨzya ʉSeetano, ʉwumwɨnɨ waakwe wutapuhɨɨne. Wɨlɨ, ʉwumwɨnɨ waakwe wubhajiiye wɨlɨ ajendeelele? 27 Nkashele muyiga anɨ ɨhugadaga amapepo hwi‑ikhone lya Belizebuuli, ɨshi abhasundwe bheenyu bhahugadaga hwi‑ikhone lya naanu? Hu nongwa ɨyo, abhasundwe bheenyu bha bhɨɨbho bhahayihubhalonga amwɨ. 28 Lyoli ɨhugadaga amapepo hwi‑ikhone lya Mʼpepo wa Ngʉlʉbhɨ, ɨpo mumanyaje huje ʉwumwɨnɨ ʉwa Ngʉlʉbhɨ wubhɨnzɨɨye amwɨ. 29 Nʉʉmo ʉmuntu wa‑abhajiiye atʉʉshe mu nyumba ya muntu ʉwi‑ikhone huje amʼfyʉle ɨvintu vyakwe sinta humʼpinye nasʉʉti. Ɨpo abhajiiye humʼfyʉle ɨvyo vya vili mu nyumba yaakwe.

30 Ʉmuntu wowonti wa saga ali peeka naanɨ, ʉyo nʼnʉgʉ waanɨ. Nantele wa saga abhʉngaanya peeka naanɨ, ʉyo apalanganya. 31 Hu nongwa ɨyo ɨhubhabhʉʉzya huje ʉNgʉlʉbhɨ abhajiiye hubhakhobhoshele abhantu ɨmbiibhi zyabho zyonti na hunʼshente hwabho, leelo ʉmuntu wa‑ahunʼshenta ʉMʼpepo ʉMʼfinjile, ʉyo saga anza‑akhobhoshelwe. 32 Nantele ʉNgʉlʉbhɨ abhajiiye hubhakhobhoshele abhantu bha bhahunʼshenta ʉMwana wa Muntu, leelo saga abhajiiye hubhakhobhoshele abhantu bhaala bha bhahunʼshenta ʉMʼpepo ʉMʼfinjile hu habhaazyo ɨha awe ɨho ha hahwɨnza.”

Ikwi limanyiha hu mantongooni gaakwe na bhantu hu njendo zyabho

(Luuka 6:43-45)

33 “Ikwi ɨlinza lihwela amantongooni aminza, ni‑ikwi ibhiibhi lihwela amantongooni amabhiibhi. Abhantu bhahulimanya ikwi alɨngaane na mantongooni gaakwe. 34 Amwɨ muli bhabhiibhi nanshi ɨnzoha! Mubhajiiye wɨlɨ ayanje amazwi aminza lwa muli bhabhiibhi? Ɨnjanjile ɨsho, pɨpo zya‑ayanga ʉmuntu, zya zimemile mu mwoyo gwakwe. 35 Ʉmuntu ʉmwinza ayanga na‑abhombe ɨnyinza zya zifuma mu mwoyo gwakwe, leelo ʉmuntu ʉmʼmiibhi ayanga na‑abhombe ɨmbiibhi zya zimemile mu mwoyo gwakwe. 36 Leelo ɨhubhabhʉʉzya amwɨ huje pi‑isiku ɨlya‑alongwe liila, abhantu bhahayanziwa ayanje ɨmbiibhi zyonti ɨzyo bhahayanjile. 37 Ɨshi ʉNgʉlʉbhɨ ahayihubhaazizya huje ʉli nʼgolosu hu mazwi gaaho aminza, awe ahayihulonga hu mazwi gaaho amabhiibhi.”

ABhafalisaayo bhahwanza ɨshimanyishizyo afume hwa Yeesu

(Maalʉko 8:11-12; Luuka 11:29-32)

38 Ɨpo bhamo mwa bhamanyizyi abhɨ ndajizyo zya Moose na Bhafalisaayo bhahamʼmʉʉzya ʉYeesu bhahaga, “Wee Mʼmanyizyi, tihwanza ʉbhombe ɨshimanyishizyo sha shimanyisya huje ʉfumile hwa Ngʉlʉbhɨ.” 39 ɄYeesu ahabhaamula ahaga, “Abhantu abhɨ habhaazyo ɨha, bhabhiibhi nantele bheegu, bhahwanza ɨshimanyishizyo! Saga ɨnza hubhalolesye ɨshimanyishizyo shoshonti, lyoli shɨ shimanyishizyo sheene ɨsho ʉNgʉlʉbhɨ sha‑ahabhombile ashilile hwa nʼkuwi waakwe ʉYoona. 40 Nanshi ʉYoona sha‑ahadɨɨlɨle ɨnsiku zitaatu mu vyanda vyɨ nswɨ ɨngoosi pasanya na nʉsiku, shɨɨsho nanɨ nɨMwana wa Muntu nahayidɨɨla ɨnsiku zitaatu mu nkʉngwa pasanya na nʉsiku. 41 Pi‑isiku ɨlya‑alongwe, abhantu abha hwi‑ibooma ɨlyɨ Ninaawi bhope bhahayifumila hu habhaazyo ɨho abhantu abhɨ habhaazyo ɨha lwa bhahayilongwa. Abheene bhahayisimishizya aje abhantu abhɨ habhaazyo ɨha bhali nɨ mbiibhi, pɨpo abheene bhahalambile na huzileshe ɨmbiibhi zyabho, ʉYoona lwa wabhalʉmbɨɨlɨla izwi lya Ngʉlʉbhɨ. Ɨshi enyi, ɨpa pali nʉ nʼgoosi ashile ʉYoona! 42 Nantele, pi‑isiku liila ɨlya‑alongwe, ʉmwɨnɨ ʉwɨ shishɨ ʉwa hu nsi ɨyɨ Sheeba ahayɨmɨɨlɨla na hubhalonje abhantu abhɨ habhaazyo ɨha huje bhali nɨ mbiibhi. Ɨnjanjile ɨsho, pɨpo ʉmwene ahashʉʉlɨle afume hutali, huje ayɨnze atejeelezye amazwi agɨ tengamazu aga mwɨnɨ ʉSolomooni. Ɨshi ɨhubhabhʉʉzya huje, ɨpa alɨɨho ʉmo wa‑ali nʼgoosi ashile ʉSolomooni. Leelo amwɨ mukhaana humʼmwʉmvwe!”

Ɨmanyizyo hu nongwa yɨ mapepo

(Luuka 11:24-26)

43 ɄYeesu ahajendeelela ayanje ahaga, “Ipepo lwa lyafuma mwa muntu, lihweleela shaaha hwa saga huli na mɨnzɨ, ahwanze apa‑atʉʉye, leelo saga lihupaaga. 44 Ɨpo lihwiyanjila huje, ‘Ɨmbala‑aweele mu nyumba yaanɨ mwa nahafumile.’ Lwa liweela lihuyaaga ɨnyumba ɨla nyaazi, ɨyʉsɨɨlwe na‑adonwe shinza. 45 Ɨpo libhala hweje amapepo aganjɨ pʉnga (7) amabhiibhi tee ashile ɨlyene. Gatʉʉha mwa muntu ʉyo na‑akhale. Ɨpo ʉmuntu ʉyo atonta tee ashile sha‑ahali hu wandilo. Ɨsho sha shɨɨsho sha hwahayibha hwa bhantu abhabhiibhi abhɨ habhaazyo ɨha.”

Abhaholo bha Yeesu abhɨ lyoli

(Maalʉko 3:31-35; Luuka 8:19-21)

46 Hu habhaazyo ɨho ʉYeesu lwa‑ali sha‑ayanga nɨ mpʉga ɨya bhantu, ʉnyina na bhaholo bhaakwe bhahafiha na hwɨmɨɨlɨle panzɨ, bhahanzaga ayanje nawo. 47 Ɨpo ʉmuntu ʉmo ahamʼmʉʉzya ʉYeesu ahaga, “Ʉbhɨɨnyu na bhaholo bhaaho bhali panzɨ, bhahwanza ayanje naawe.” 48 Leelo ʉmwene ʉYeesu ahamʼmwamula ahaga, “Ʉnyina waanɨ weenu? Nantele abhaholo bhaanɨ bha naanu?” 49 Ɨpo ahagolosya ʉnʼkhono hwa bhasundwe bhaakwe ahaga, “Enya, ɨbha bha bhaanyina bhaanɨ na bhaholo bhaanɨ! 50 Ʉmuntu wowonti wa‑abhomba zya‑agɨɨne ʉDaada waanɨ wa‑ali hu mwanya, ʉyo ya yʉʉyo yʉ nʼkʉlʉ waanɨ, yɨlʉmbʉ waanɨ, nantele nyina waanɨ.”