Sàákì i

Pɔ̀kàta Sàákì wà̰haà-ta

Cetá Kam̀má

Mɛ̀ǹǹ wà̰haà-ko ye pɔ̀kàtà-ní, ò yèdi-dà héé Sàákì. Ò de yòǹ Weèdi nà Teó Sèsí-Kídísì deho-dà. Nìpa maàhu è tonà ò kó n'yòǹ Sèsíì kúcàa-dà. Ò de yòǹ niìsào-dà Sèdìsàdɛ́m̀ weèdɔɔ̀-nàmɔ̀ni mɛhɛká, è cakú Weèdi wɛmá Sùwífùpa. Ò de wa̰à̰haà ye pɔ̀kàtà-ní, Sùwífùpa mɛ̀m̀pà de kɔ̰́ɔ̰̀-pa-dà pa cɔ̰́ɔ̰̀di Sèsíì, è há̰ yaá-yahí teǹka hḭ́ǹka. Tà há̰ de pú dìi pa kú cɔ̰́ɔ̰̀di, àmá nà mɛ̀m̀pà kú wɛnnì yòǹ-pa-dà Weèdi kpɛ́ɛpá. Ò de kpɛ̀i é pà wekàna mìì héé-sa-dà weèdɔɔ̀mu mɔ́mmú, weèdɔɔ̀mu mɛ̀mù pa̰kú-pu tɔná è pú sá̰á̰ dandaní cɔ̰́ɔ̰̀di hḭ́ǹka. Yè de yòǹ biɔhànamá-dà ò pà kɔ̰́nì-ma è tṵ́mà yahikànì pa wɔ̰̀ǹti.

Wɛyuùka Sàákì wɛdà-ka kú hḭ́ǹka ye pɔ̀kàtà mɛhɛká, mɛnká-dà héé:

- Yaǹfòuma : Ò yɔ̀ mà péé-nà-ní Weèdi pesá-dà, nìi mɛ̀ɛ yònà é mà cɔ̀hà Weèdi nà dandaní-dà.

- Niìbaàtafá : Ò yɔ̀ weèdɔɔ̀pa pú yònà é m'bahù nìpa pa cɔhɔ̀ka.

- Dandaní nà tɔná : Ye niì ye dɛ́ɛ́dì yònà é pɛ́ɛ́ n'dehú-ma weèdɔɔ̀o fòùmu mɛhɛká. Mɛ̀ǹǹ pa̰kú-ko ye niì ye dɛ́ɛ́dì, o kú weèdɔɔ̀mu-dà yòǹ mɔ́mmú.

- Wɛyuùka tɔɔ̀ka ò wɛdà-ka kú hḭ́ǹka-dà héé : pɛ́íti nà kááma, bɛḿma nà yehènamá, denfá pa̰kú-pu tɔmú nìi fòùmu mɛhɛká, nìpa mɛ̀m̀pà sídí-pa yoo è kà̰à̰nì tɔɔ̀pa, káápa mɛ̀m̀pà diinì-pa náńkú pa dehèpa, nà tɔɔ̀ka tɔɔ̀ka.

Sàákì pɔ̀kàta wɛmá pú tṵn-tṵnà ma tɔɔ̀ma cóńcodí. Ti kó nɛɛ́ tí-tíkáná ta wɛyuùka wɛǹni kà ká n'yòǹ sàka kàta̰a̰-dà. Ǹtɛ-kà :

1.1 Dɔɔ̀mu.

Wɛyuudí cecedí : Bɛḿma nà yehènamá, mùyɔ̰ suu-sá.

1.2-4 : Bɛḿma-dà hɔ̰́ n'tee kà nìi kpeka Weèdi cɔ̀ku mɛhɛká.

1.12 háá 19a : Weèdi pú yɛ̰ṵ̀ òcɔ̰́ǹ kpákpààma mɛhɛká.

4.13-17 : Mɛ̀m̀pà daakú-pa kṵ́ńweǹni daadí.

5.1-6 : Káápa é pa̰á̰ yɔkàma.

5.7-11 : Tí n'káá datí bɛḿma mɛhɛká.

Wɛyuudí dɛ́ɛ̀di : Yaǹfòùma nà denfá tɔmú.

1.5-8 : A dá cɔhà yaǹfòùma Weèdi nà yam̀màhàka kàdɛ́ɛ́ kàdɛ́ɛ́.

1.19b - 21 : É n'nɔn è cɛ̰hú a denfá n'àa fɔ̰́ɔ̰́di. Wɛ́í kpákpààma.

3.1-12 : É n'nɔn è cɛ̰hú a denfá.

3.13-18 : Yaǹfòùma mɛ̀mà péé-nà-ma-ní hḭ́ǹka.

4.1-10 : Dɔ́kàma fòùku kpɛ́ɛsá hḭ́ǹka.

4.11-12 : Nɛ dá n'sídí tɔɔ̀pa.

5.12 : Nɛ té dá wɛ̰́ha nà Weèdi yèdi.

Wɛyuudí ta̰á̰di: Kááma nà pɛ́íti.

1.9-11 : Pɛ́íti nà kááma.

1.22-27 : Ti dá m'bekù Weèdi wɛmá sá̰à̰di, tí m'pa̰kú mà hḭ́mpú.

2.1-13 : Nɛ dá m'bahù nìpa nɛ pa̰kú-sa mɛhɛká.

2.14-26 : Bɛka a dandaní tɔná hḭ́ǹka.

5.13-18 : Tencí weèdɔɔ̀mu hḭ́ǹka.

5.19-20 : É tɛ̰́ná-ní mɛ̀m̀pà yɛ̀ɛ̀-pa wɛbeèdi cɔ̀ku hḭ́ǹka.