Sàákì 3

Á n'nɔn è cɛ̰hú a denfá.

¹ N kúcàpa nà n potɔ̰ɔ̰̀pa-nà, nɛ dá n'wɛhi nɛ mɛ̀m̀pà kpɛ̀i é m'biɔhànì-pa, è yá̰á̰ tḭ́ńti mɛ̀m̀pà biɔhanì-pa, nɛ yá̰á̰-ma è yɔ̀ ti kú sídàma kó wáńtá n'dɔǹ-ń-ma é ha̰tá tɔɔ̀pa kpɛ́ɛmá. ² Ti wɛǹni ti yeekú-ma cɛ̰má dɔ́ɔ́di. Kà nìdo pú yeekú o wɛmá mɛhɛká, ò yòǹ nìi mɔ́nń-dà, ò mɛ̀ɛ kó nɛɛ́ cɛ̰ɛ̰́-ma o cɔ̰́ɔ̰̀di tenten. ³ Ti pa̰kú sa̰mmáǹti sa̰nhí nùka mɛhɛká, è kpɛ̀i kà hí ti n'you-nà toòka-dà, ye wɔ̀ni kà hi wɔ̰̀ǹti wɛǹni é coá ti hì kpɛ̀i-nà-ka bɛ́ka. ⁴ Yoo nɛ́ cɔ́dí nɛ́ɛmá dawɛ́ɛ̀ti. Nà ti wɛhimù sá̰á̰pù, niìya̰ sḭ̀m̀mɔ́ǹya̰-dà péé ti mɛhɛká pà tì mɛ́mù-nà-sa. Bá kà yakpeekú kpɛ̀i kà kú n'sá̰á̰pu, ti mɛ́ńdáko tì kpɛ̀i-nà-ka bɛ́ka, mií-dà tì kɔ́dí-ma. ⁵ Ma cɔ̰́ɔ̰̀di-dà nà denfá. Fà yòǹ niìya̰ cɛ̰́masí-dà wɔ̰̀ǹti hḭ́ǹka, àmá kà fa há̰ fóǹ nà fà pa̰kú-ma niìya̰ sḭ̀ǹya̰ dɔ́ɔ́di. Nɛ́ cɔ́dí-ì! Ha̰pɛ̀pɛ́difá kó nɛɛ́-ma é dii fonsàdi. ⁶ Denfá há̰ yònà ha̰mú-dè. Sḭ̀ḭ̀ma yɛɛ̀hu-ní nà fa pesá-dà. Fà yòǹ ti wɔ̰̀ǹti bɛ̀m̀bɛ̀ni nìcɔ̰́-dà è há̰ tì cɔ̰hú ti wɛǹni. Ti denfá-dà tɔ̀ǹtì ha̰mú ti fòùmu wɛǹni, ye ha̰mú mɛ̀ɛ péé-nà-ní ha̰bíiní mɛhɛká-dà. ⁷ Niìfòùo kó nɛɛ́ cɛ̰ha-á-ma nɔtí boocí wɛǹni é tì nadí: foǹni nɔtí, nà nɛ̀hi, nà mìì fudì-sa ye pɛutí hḭ́ǹka, nà mìì fòù-sa nɛ́ɛmá mɛhɛká. ⁸ Àmá denfá mɛnfa, òcɔ̰́ǹ pú kó nɛɛ́ fà cɛ̰dí. Fà yòǹ sḭ̀ǹya̰-dà nìi pú kó nɛɛ́ kaàna-sá yɔkàma. Fà toó dɔ̀ɔ̀ma-dà kà mà kɔ̀ùdì. ⁹ Nà mɛnfá-dà ti duǹti-má Bateó ti Báàa, nà mɛnfá-dà mɛ̀ɛ tṵ́mà dɛ̀ɛ̀ ti nɔdí-ma nìpa Weèdi pa̰à̰-pa kà pà nì yònà. ¹⁰ Ye nùdi ni cɔ̰́ɔ̰̀di mɛhɛká-dà duntàma nà nɔdàma yɛɛ̀hu-má-ní. N kúcàpa nà n potɔ̰ɔ̰̀pa-nà, yè pú yònà é n'yòǹ mɛma. ¹¹ Nɛ mun dɛ́hà daadí yènì bíńtadá tàcɔ̰́ kú mɛhɛká, kà nɛ́ɛnaamá nà nɛ́ɛtohimá é pɛ́ɛ́ é yɛɛ̀ni? ¹² N kpɛ́ɛpá-nà, ka̰nka̰mú kó nɛɛ́ é pɛɛ́-dà wɛɛká? Yoo pɛ́ɛ̀sɔ̰pú kó nɛɛ́ é pɛɛ́-dà ka̰nka̰ká? Ma cɔ̰́ɔ̰̀di-dà bíńtadá mɛ̀ǹtà kú nɛ́ɛmá káá-ma kɔ́kɔ́mú pú kó nɛɛ́ kɔ̰́ɔ̰́-ma nɛ́ɛnaamá.

Yaǹfòùma mɛ̀mà péé-nà-ma-ní hḭ́ǹka.

¹³ Òcɔ̰́ǹ péé nɛ cɔhɔ̀kà è màhu è tonà ò káá yaǹfòùma è kó nɛɛ́ yekà niìi fem̀ma? Ye yaǹn é mà bɛka ò pa̰á̰ma suumá mɛhɛká, é m'pa̰kú o dehèna nà yaǹyɔ̀kàm̀ma mìì bɛkú-sa mìì héé-sa yaǹfòùma mɔ́mmá. ¹⁴ Àmá, kà yanditohimú sṵ́nà nɛ mɛhɛká, kà nɛ nɔhù-nà tɔɔ̀pa è kpɛ̀i é kádá é pà ha̰tá, nɛ dá n'fóǹ n'ɛ̀ɛ kú yaǹfòùmà-ní. Kà nɛ yòǹ mɛma, nɛ cɔ̰hú wɛbeèdi-dà nà nɛ nuǹhetí. ¹⁵ Ye kú yaǹfòùmà pú péé-nà-ní Weèdi pesá. Mà yòǹ teǹka kpɛ́ɛmá-dà, nìpa kpɛ́ɛmá, wɛsipá kɔ̰́ɔ̰̀-ma-ní. ¹⁶ Yandimú péé-sa nà nɔhìnàma è kó ha̰tá tɔɔ̀pa, héhécíma-dà mɛ̀ɛ té hɔ̰́ yè m'péé nà pa̰á̰kpákpààma wɛǹni. ¹⁷ Há̰kà, yaǹfòùma mɛ̀mà péé-nà-ma-ní Weèdi pesá weni-í-ma. Tṵ́màkaà, mà tɛ̀hu-nà-ní wɛ̀ɛ̀di-dà, nà yaǹyɔ̀kàm̀ma, è nakànì nìpa. Mà káá nánkɔḿma-dà tenten, nà pa̰á̰suumá. Mà pú bahù nìpa, mà mɛ̀ɛ pú báńti. ¹⁸ Mɛ̀m̀pà naanà-pa wɛ̀ɛ̀di kɔ̰́nì wɛ̀ɛ̀di-dà tɔɔ̀pa. Yè yònà pà bɔɔ̀-ma-dà coóma, pà mɛ̀ɛ kó kɔ̰ṵ-ṵ́-ma mà pɛní-sa.