Sàákì 2

Nɛ dá yetá é m'bahù nìpa.

¹ N kúcàpa nà n potɔ̰ɔ̰̀pa-nà, nɛ́na mɛ̀m̀pà dań-pa ti Teó Sésí-Kídísì mɛ̀ǹǹ wɛhi-kó, nɛ dá yetá m'bahù nìpa nɛ pa̰á̰ma mɛhɛká. ² K'yè yònà nìi pàdɛ́ɛ́ dúú-ní nɛ peèku-sá è pa̰kú weèdɔɔ̀pu, kà p'oòcɔ̰́ bádí díikpecí nɛǹti, è fḭ́ḭ́ wúdó mámú, kà tɔɔ̀ɔ mɛnn bádí nɛnkpɛ̰́ǹti kà tì cɛ́tà cɛ́tà, ³ k'yè yònà nɛ yṵkànà mɛ̀ǹǹ báá-ko díikpecí nɛǹti, òò cakáà è hḭ́n: Fɔ̰́ń, ǹtɛ kaàsuudí, kaàdi, è há̰ cakáà ye pɛ́íta è hḭ́n: Fɔ̰́ń, nɛɛ̀hi-hɔ̰ miì, yoo kaàdi-ho tenkà n tàkà fɔ̰̀dì, ⁴ kà nɛ hɔ̰n mɛma, niìbaàtafá dɔ nɛ pa̰kú-ma nɛ cɔhɔ̀ka? Nɛ yam̀màhàkpákpààka pú tee kà nɛ sídí ma kú bookù? ⁵ N kúcàpa nà n potɔ̰ɔ̰̀pa-nà, nɛ́na n dɔ́sí-pa dɛ́dɛ́í, besí-nà sukú! Nɛ pú yá̰á̰ è yɔ̀ Weèdi ta̰kadà mɛ̀m̀pà yòǹ-pa pɛ́íhí fòùkù mɛnkù kú kpɛ́ɛpá yìhìka, è kpɛ̀i é pà kpáhìna dandaní káàpa-dà, k'yé teha kà pá kpàdi ni wóòti nì de hḭ́nà nùdi è yɔ̀ nì kó kɔ̰́ɔ̰́-ti mɛ̀m̀pà nì dɔ́sí-pa? ⁶ Nɛ́na há̰kà, baà tee kà nɛ yɔ̰́sí pɛ́íhí? M̀mɔ́ḿpa-dà nɛ diìǹta náńkú, è nɛ fuùǹta síìnàmɔ̀ka mɛhɛká? Ntoò káápa-dà-ma? ⁷ Mɛmpá-dà mɛ̀ɛ tṵ́mà tèù Sèsí-Kídísì yeèsuudí pà yún-dí nɛ hḭ́ǹka.

⁸ Pà wà̰tà Weèdi pɔ̀kàhi mɛhɛká è yɔ̀: Ní n'dɔ́sí a tɔɔ̀o é n'yònà a mɔ́nń. Weèdi wóòti kpɛ̰́ńtìnùdi-dà ye pesà-ní. Kà nɛ nì tṵ̀n, nɛ pa̰kú k'yè suu-ú-ma. ⁹ Àmá, kà nɛ há̰ bahù nìpa, nɛ pa̰kú sḭ̀ḭ̀ma-dà ye pesà-ní, kpɛ̰́ńtìnùka mɛ̀ɛ nɛ kɔ̰́nì yetáma-dà mìì tee-sá nɛ pú kà tṵ̀n. ¹⁰ Kà nìi tṵ̀n kpɛ̰́ńtìnùka wɛǹni, è há̰ yetà-nà bá nìcɔ̰́ pɔ́pɔ́ú, ka wɛǹni-dà ò yetà-nà-ma mɛma, ¹¹ è yá̰á̰ Weèdi mɛ̀nì hḭ́n-dí: A dá yetá cɔ̰ha dɔɔdí, mɛní-dà tṵ́mà yɔ̀: A dá yetá kɔ̀ù nìdo. Ye wɔ̀ni, k'à pú cɔ̰háà dɔɔdí è há̰ kɔù nìdo, a yetà-nà kpɛ̰́ńtìnùka wɛǹni-dà. ¹² Ye kú kpɛ́mú, nɛ́ n'wɛì, é m'pa̰kú é n'yá̰á̰ è yɔ̀ Weèdi kó wáńtá nɛ síi-nà kpɛ̰́ńtìnùkà-dà mɛ̀ǹkà kɔ̰́nì-ka cɔ̰́ɔ̰̀di teemá. ¹³ Weèdi sídàma daadí mɛ̀ɛkà, nì pú kó kɔń séèma mɛ̀ǹǹ pú kɔǹ-ko o tɔɔ̀pa séèma. Àmá k'à kɔǹ séèma tɔɔ̀pa, a koò pú kó n'wani sídàma.

Bɛka a dandaní tɔná hḭ́ǹka.

¹⁴ N kúcàpa nà n potɔ̰ɔ̰̀pa-nà, kà nìi cakú è tonà ò káá-ma dandaní, è há̰ pú nì bɛkú tɔná hḭ́ǹka, miya̰ ò tɔ̀hɛ̀nì badà? Ye kú dandanì kó nɛɛ́-dà óò fḭ́hìna? ¹⁵ K'yè yònà nɛ weèdɔɔ̀o tɔɔ̀o òcɔ̰́ǹ, poò yoo dɔù kɔ́ɔ́ báatí n'ɔ̀ɔ̀ kó n'yon-sá daàka wɛǹni, ¹⁶ kà nɛ òcɔ̰́ǹ há̰ ò cakáà è hḭ́n: Taá báá báatí kà sémú yɔ̀ɔ, taá dii é dɛn. A kpɛ́mú nadi doò! K'òò hḭ́n mɛma, è p'óò kɔ̰́ɔ̰̀ y'òò békú-sa k'ò kó n'fòù-nà, ye kú wɛmà kó dɔ̀hà ba? ¹⁷ Ma cɔ̰́ɔ̰̀di-dà nà dandaní. K'à hḭ́n a nì káá, è há̰ pú nì bɛkú tɔná hḭ́ǹka, a dandanì kpíi-í-ma.

¹⁸ Òcɔ̰́ǹ kó nɛɛ́-ma é n'yɔ̀: Fɔ̰́ń kó nɛɛ́-ma é n'káá dandaní, kà mmí ní n'káá tɔná n pa̰kú-na. N kó tɛ̰́ná ye yaǹn è yɔ̀: N bɛka-ní a dandaní mɛ̀nì fòù-di è há̰ kɔ́ɔ́ tɔná, kà mmí áa bɛka nà tɔná n pa̰kú-na kú hḭ́ǹka n dandaní. ¹⁹ A dań-mà è yɔ̀ Weèdi nìcɔ̰́-dà péé, suumá-dà. Wɛɛ̀kupá mɔ́mpá mɛ̀ɛ té dań-ma è yɔ̀ nì péé, è múńtà cèùdi. ²⁰ Yíńtásà fɔ̰́ń! A kpɛ̀i mìì k'áa bɛka-sá-dà è yɔ̀ dandaní mɛ̀nì kɔ́ɔ́-di tɔná yòǹ hécí-dà? ²¹ Ti yàdo Àbààhám̀, baà de tee kà Weèdi óò dìda niìcoóko ni yìhìka? Yè pú yòǹ o tɔná kpɛ́mú-dà-à, ò de pa̰à̰ tḭ́ń wɔ̀ni dɔ̀hàdi o bíitá Ìsàákì cɔ̰̀ǹcɔ̰̀ni hḭ́ǹka? ²² A pú dìi è yɔ̀ o dandaní dehú o tɔná mɛhɛká-dà? Mɛná-dà mɛ̀ɛ de tee o dandaní kpɛ̰́ń-ma. ²³ Ma kú bookú-dà Weèdi wɛmá pɔ̀kàhi wɛɛ̀-sa de pa̰à̰-ma. Hì de yɔ̀: Àbààhám̀ de taà o dandaní Weèdi hḭ́ǹka-dà, ye kú kpɛ́mú kà n'ɔ́ɔ̀ dìda niìcoóko, óò yíí ni dóópo. ²⁴ Nɛ dɛ́hà nkɛ́ɛ̀, Weèdi mɛ̀ɛ té hɔ̰́ diìda nìdo è yɔ̀ ò coó n'ɔ̀ɔ tɔná kpɛ́mú-dà, yè pú yòǹ n'ɔ̀ɔ dandaní cɔ̰́ɔ̰̀di kpɛ́mú.

²⁵ Ma cɔ̰́ɔ̰̀di-dà mɛ̀ɛ té de dɛɛ̀ nà poyáyáta pà toò-ta Hàdàhápù. Weèdi de tà dìdà niìcoóko ni yìhìka nà tà de pa̰à̰-sa kú kpɛ́mú-dà. Tà de codà ta hɔ̰́ɔ̰̀ta mɛhɛká, nìpa Ìsìdàyɛ́dìpa de tɔn-pá-dà-ní, é pà tempa-nà kà pá yɛ̀dì cɔ̀ku tɔkú é fḭ́tá. ²⁶ É n'yònà wɔ̰̀ǹku hɔ̰́ kpíí-ma kà mɛǹta kɔ́ɔ́ ku mɛhɛká, ma cɔ̰́ɔ̰̀di-dà kà dandaní kɔ́ɔ́ tɔná, nì kpíi-í-ma.