Sàákì 1

Pɔ̀kàta Sàákì wà̰haà-ta

Dɔɔ̀mu

¹ Mmí Sàákì, kà n yòǹ Weèdi nà Teó Sèsí-Kídísì deho, mmí-dà wà̰hu ye pɔ̀kàtà mɛntà-ní, è dɔń Weèdi nìku mɛ̀ǹkù yahí-ku teǹka wɛǹni hḭ́ǹka.

Tí púsí ti cɔ̰́ɔ̰̀di tenten bɛḿma mɛhɛká.

² N kúcàpa nà n potɔ̰ɔ̰̀pa-nà, kà bɛḿma bodú bodú dɔɔ̀-ní nɛ fòùmu mɛhɛká, k'yé nɛ n'nadi dɛ́dɛ́í, ³ mìì tee-sá nɛ yá̰á̰-ma è yɔ̀ kà nɛ dandaní dúú bɛḿma mɛhɛká è yɛ̀dì, nì hɔ̰́ hédá kà nɛ́ dɔ̀hà é kpeka-á-ma Weèdi cɔ̀ku mɛhɛká.

⁴ Há̰kà, yè békú nɛ́ n'kpenì-í-ma Weèdi cɔ̀ku mɛhɛká háá é yɔ̀ɔ deèta, k'yé teha kà nɛ́ n'yòǹ nìpa mɔ́mpá, é n'kɔ́ɔ́ yetádi nìcɔ̰́nì, k'yèècḭ́ḭ̀ pú nɛ n'dóńtà.

⁵ Kà yaǹfòùma dóńtà n'ɔɔ̀cɔ̰́ǹ nɛ mɛhɛkà, k'ò pú yá̰á̰ ò kó hḭmù, k'ó mà cɔ̀hà Weèdi kà ní mà n'ɔ̀ɔ̀ pa̰a̰, è yá̰á̰ Weèdi pɔ̰n nìpa wɛǹni nà mɛkanaaká-dà, nì pú ta̰hì. ⁶ Àmá, k'yèe yaǹn kpɛ̀i cɔhà yècḭ́ḭ̀ Weèdi, k'ó yè cɔ̀hà nà dandaní, ò dá n'káá yam̀màhàka kàdɛ́ɛ́ kàkɛ́ɛ́. Mɛ̀ǹǹ káá-ko yam̀màhàka kàdɛ́ɛ́ kàkɛ́ɛ́, ò yònà nɛ́ɛsa̰ǹta yakú hɔ̰́ yíkàna-tá-dà, é tà n'fá̰kápú. ⁷ Ye kú nìì kú bookù dá m'maàhu è toò ò kó dɛ́tá yècḭ́ḭ̀ Teó nɔ̀hi mɛhɛká, ⁸ è yá̰á̰ o yàma hɔ̰́ n'totà-á-ma, ò mɛ̀ɛ pú hɔ̰́ yḭkaná niì yècɔ̰́ kú hḭ́ǹka ò pa̰kú-sa wɛǹni mɛhɛká.

Pɛ́íti nà kááma.

⁹ Yé n'nadi weèdɔɔ̀o mɛ̀ǹǹ yòǹ-ko pɛ́íta, nà Weèdi ò wɛkànà-ma. ¹⁰ Weèdɔɔ̀o mɛ̀ǹǹ há̰ káá-ko tá, yè mɛ̀ɛ t'óò n'nadi nà Weèdi ò yàkàdà-ma, mìì tee-sá ò kó ka̰há é n'yònà pémú kú tɔɔ̀ma-dà. ¹¹ Wèǹku hɔ̰́ yɛɛ̀ni, kà ku wìhìmu é tɔɔ̀n tebící kà cí kpɛí, kà ci péna é yoòta, kà na suukú é yɔ̀ɔ-ɔ́-ma. Ma cɔ̰́ɔ̰̀di-dà nà kááma yaǹn, kṵ́mú k'óò tódá ò pa̰kàta-sá kú mɛhɛká-dà.

Weèdi pú yɛ̰ṵ̀ òcɔ̰́ǹ kpákpààma mɛhɛká.

¹² Wɛ̀ɛ̀di-dà péé-nà nìi mɛ̀ǹǹ hɔ̰́ púsí-ko o cɔ̰́ɔ̰̀di bɛḿma mɛhɛká, è yá̰á̰ ma kú dàhàka, ò k'ó dɛ́tá-ma o nɛdáma boutí. Mɛntí-dà héé fòùmu Weèdi hḭ́nà nùdi è yɔ̀ nì kó kɔ̰́ɔ̰́-pu mɛ̀m̀pà nì dɔ́sí-pa.

¹³ Pà dá yetá m'bɛǹ òcɔ̰́ǹ è k'óò yehèna k'ó n'cakú è tonà: Weèdi-dà n bɛǹ. Weèdi pú kó nɛɛ́ é n'kpɛ̀i é pa̰á̰ kpákpààma, ni mɔ́nní mɛ̀ɛ pú bɛǹ òcɔ̰́ǹ. ¹⁴ Àmá, nìi naanà-sa k'yè pú coó, mií-dà ò yɛ̰̀ṵ̀ òò túdì kpákpààma mɛhɛká. ¹⁵ O yam̀màhàdi mɛ̀ɛ péé tḭ́ń wɔ̀ni wɔ̀ka wɛǹni niìya̰ ò naanà-sà kú hḭ́ǹka, yè hɔ̰́ tɛɛ̀ní sḭ̀ḭ̀ma-dà. Sḭ̀ḭ̀ma mɛ̀ɛ bii tḭ́ń wɔ̀ni, kà má tɛɛ̀ní kṵ́mú. ¹⁶ N kúcàpa nà n potɔ̰ɔ̰̀pa-nà, nɛ́na n dɔ́sí-pa dɛ́dɛ́í, nɛ dá m'báńtí nɛ cɔ̰́ɔ̰̀di. ¹⁷ Mìì kú wɛnnì ti tɛɛ̀hu-sá-ní è sudi, nà pa̰suuká wɛǹni, ye wɛǹni péé-nà-ní hḭ́ǹka-dà. Yè péé-nà-ní Weèdi mɛ̀nì pa̰à̰-di wèǹku, nà cḭ̀ma nà hà̰hi pesá-dà. Mɛni pú peèni, nì mɛ̀ɛ pú centì wèǹku kpɛ́ɛmá è té yɔ̀ɔ dɔdi kà binìku é tɛ̀ni. ¹⁸ Weèdi kpɛ̀i ti pa̰a̰ fòùmu-dà, ye kú kpɛ́mú-dà tee kà ní hédá kà tí yekà ni wɛmá mɛ̀mà yòǹ-ma wɛbeèdi. Nì hḭn mɛma, è kpɛ̀i kà tí n'yòǹ cecepá-dà nì pa̰à̰-sa wɛǹni mɛhɛká.

Nɛ́ m'pa̰kú Weèdi wɛmá nɛ yeèku-má hḭ́mpú.

¹⁹ N kúcàpa nà n potɔ̰ɔ̰̀pa-nà, nɛ́na n dɔ́sí-pa dɛ́dɛ́í, nɛ yònà é n'yá̰á̰-ma sukú miì: Bá mɛ̀ǹǹ dɛ̀ɛ̀-ko ní n'naa-nà é besí tɔɔ̀pa, àmá ò té dá sɛ̰ɛ̰̀dà é wɛdá, ò mɛ̀ɛ té dá teha kà fɔ̰́ɔ̰́di óò cɛ̰dí fem̀ma, ²⁰ è yá̰á̰ fɔ̰́ɔ̰́di pú pa̰kú mìì coó-sá Weèdi yìhìka. ²¹ Ye kú kpɛ́mú, nɛ́ wɛ́í mìì kú wɛǹni nɛ pa̰kú-sa yɔ̰́káma, nà mɛkatohisàka kpɛ́ɛsá wɛǹni. Nɛ́ n'ta̰à̰ni wɛmá Weèdi tanì-ma nɛ yàma mɛhɛká nà yaǹyɔ̀kàm̀ma, è yá̰á̰ mà káá-ma nɔɔ̀ti è kó nɛɛ́ nɛ fḭ́hìna.

²² Nɛ dá m'bekù Weèdi wɛmá sá̰à̰di, àmá nɛ́ m'pa̰kú mà hḭ́mpú, kà mɛma dɔ, nɛ báńtí nɛ cɔ̰́ɔ̰̀di-dà. ²³ Mɛ̀ǹǹ bekù-ko sá̰à̰di Weèdi wɛmá, è pú pa̰kú mà hḭ́mpú, ye yaǹn yònà nìi mɛ̀ǹǹ hɔ̰́ dentá-ko-dà o cɔ̰́ɔ̰̀di díhikú mɛhɛká, é dɛ́há ò yòm̀pu. ²⁴ Ò dɛ́hà-ma o cɔ̰́ɔ̰̀di é yɔ̀ɔ, ye wɔ̀ni é yídá ka̰há é ceḿ dúí ò yòm̀pu. ²⁵ Àmá kà mɛ̀ǹǹ fekamú-ko kpɛ̰́ńtìnùka p'òò biɔhànì-ka kà kà yòǹ dɛ́dɛ́í, è kɔ̰́nì cɔ̰́ɔ̰̀di teemá, k'yèe yaǹn wɛ̰́dì è pú kà bekù sá̰à̰di è té dúí, àmá k'ò pa̰kú kà hḭ́mpú, Weèdi k'óò kóná-ma ò kó pa̰á̰-sa wɛǹni mɛhɛká.

²⁶ K'òòcɔ̰́ǹ màhu è toò ò tṵ̀n Weèdi àá pú kó nɛɛ́ cɛ̰dí o denfá, ye yaǹn báńtí o cɔ̰́ɔ̰̀di-dà, o Weèdi tṵṵ̀namá mɛ̀ɛ yòǹ hécí-dà. ²⁷ Weèdi tṵṵ̀namá mɛ̀mà weni-má è tṵ́mà yòǹ mɔ́ma Báàa Weèdi yìhìka, mɛmá-dà héé: Á n'wisí kpíibííhí nà kpíipoòti pa náńcí mɛhɛká, é púsí a cɔ̰́ɔ̰̀di kà fòùku kpɛ́ɛsá dá a pa̰á̰ yɔ̰́káma.