Sàákì 4

Dɔ́kàma fòùku kpɛ́ɛsá hḭ́ǹka.

¹ Baà tee kà nɛ mɔù-nà nɛ tɔɔ̀pa, è kɔ̰̀m̀ta wɔ̀ka wɛǹni? Ye kú niiyà̰ péé-nà-ní nɛ dɔ́kàkpákpààma pesá-dà mɛ̀mà mɔ̀ù-ma wɔ̀ka wɛǹni nɛ wɔ̰̀ǹti mɛhɛká. ² Nɛ hɔ̰́ n'kpɛ̰dì nɛm̀mu è pú kó nɛɛ́ mù dɛ́tá, ye wɔ̀ni kà nɛ sɔ̀do té m'bii è yɔ̀ nɛ́ kɔ̀ù nìdo é nɛɛ́ mù dɛ́tá. Nɛ hɔ̰́ pa̰á̰ bìnɔ yècḭ́ḭ̀ kú hḭ́ǹka, há̰kà nɛ pú kó nɛɛ́ yè dɛ́tá, yè wɔ̀ni kà nɛ té m'mɔù-nà nɛ tɔɔ̀pa è kɔ̰̀m̀ta wɔ̀ka wɛǹni. Nɛ pú dɛ́ɛ́kú nɛ kpɛ̀i-sá mìì tee-sá nɛ p'éè cɔ̀hu Weèdi. ³ Nɛ cɔɔ̀hu nɛ pú dɛ́ɛ́kú yècḭ́ḭ̀, mìì tee-sá nɛ pú cɔɔ̀hu sukú. Nɛ cɔɔ̀hu è kpɛ̀i é kɔ̀ù nɛ dɔ́kàkpákpààma bìnɔ-dà. ⁴ Nɛ́na mɛ̀m̀pà pú péé-nà-pa Weèdi cɔ̰́ɔ̰̀di! Nɛ pú yá̰á̰ è yɔ̀ kà nɛ naa-nà fòùku kpɛ́ɛsá, nɛ hɔ̰́ n'kɔ̰ǹti-nà Weèdi-dà? Mɛ̀ǹǹ kpɛ̀i é n'yòǹ-ko fòùku kpɛ́ɛsá dóópo, ye yaǹn kpáhìnì o cɔ̰́ɔ̰̀di Weèdi kɔ̰ndìkàǹtɔ̀o-dà. ⁵ Nɛ dá m'maàhu è tonà pà wà̰tà-sa Weèdi pɔ̀kàhi mɛhɛká, yè cakú hécí-dà è tonà: Weèdi dɔ́sí-ma sèdi^a nì tàà-di ti mɛhɛká hádí è pú kpɛ̀i tɔɔ̀o nì yanta-nà ni hḭ́ǹka. ⁶ Àmá, pa̰á̰suumá Weèdi ti pɔ̰n-má ha̰tà-á-ma, è yá̰á̰ pà tṵ́mà wà̰tà Weèdi pɔ̀kàhi mɛhɛká è yɔ̀:

Weèdi pú tehú kà fóńfóǹti yam̀ma yudí foní-ní,

àmá nì pɔ̰n ni pa̰á̰suumá mɛ̀m̀pà kú yàma yɔkanì-pa-dà.

⁷ Ye kú kpɛ́mú, kɔ̰́ɔ̰́-nà nɛ cɔ̰́ɔ̰̀di Weèdi. Yee-nà nɛ cɔ̰́ɔ̰̀di Wɛɛ̀kupá wóódo, ò kó cocí é nɛ nátá-nà-á-ma. ⁸ Tɔ́ká-nà-ní Weèdi, ye wɔ̀ni kà ni mɔ́nní é nɛ tɔ́ká. Niìsḭ̀m̀ma-nà, nɛ́na mɛ̀m̀pà kú yàma to-totà-pa, pɔkàda-nà nɛ mɛhɛká, wekàna-nà nɛ pa̰á̰ma. ⁹ Ní m'péé-nà yaǹcɔ̰hàma mɛhɛká nà sḭ̀ḭ̀ma nɛ pa̰kú-ma kú kpɛ́mú, kɔń-nà é kaàdi kṵ́mú. Peǹta-nà nɛ dɛkèti kà tí hḭn dawòka, nɛ yaǹnaakú kà kú hḭn yaǹcɔ̰hàma. ¹⁰ Kpáhìna-nà nɛ cɔ̰́ɔ̰̀di cɛ̰́ma Weèdi yìhìka, kà ní nɛ yohòna.

Nɛ dá n'sídí tɔɔ̀pa.

¹¹ N kúcàpa nà n potɔ̰ɔ̰̀pa-nà, nɛ dá n'wɛì kpákpààma nɛ tɔɔ̀pa hḭ́ǹka. Mɛ̀ǹǹ wɛì-ko kpákpààma o tɔɔ̀o hḭ́ǹka yoo òò sídí, ye yaǹn wɛì ye kpákpààmà kpɛ̰́ńtìnùka hḭ́ǹka-dà, è tṵ́mà kà sídí. K'à mɛ̀ɛ sídí kpɛ̰́ńtìnùka, a koò pú kà tṵ̀n, a yòǹ ka sídàko-dà. ¹² Há̰kà, Weèdi cɔ̰́ɔ̰̀di-dà kɔ̰́nì kpɛ̰́ńtìnùka, mɛní cɔ̰́ɔ̰̀di-dà mɛ̀ɛ yòǹ sídàko. Mɛní cɔ̰́ɔ̰̀di-dà kó nɛɛ́ fḭ́hìna nìdo, è kó nɛɛ́ hédá k'ó sèǹ. Fɔ̰́ń há̰ héé wodà, fɔ̰́ń mɛ̀ǹǹ sídí-kò tɔɔ̀pa?

Mɛ̀m̀pà daakú-pa kṵ́ńweǹni daadí.

¹³ Fedá-nà toodí é n besí sukú sá̰kù-ní, nɛ́na mɛ̀m̀pà tonà-pa: Yenì yoo kṵ́ńweǹni ti kɔ́dí yɔtì mɛntì-dà è kó taá pa̰á̰ benní nìcɔ̰́. Ti kó tɛ̀i é tanta-á-ma é dɛ́tá dící. ¹⁴ Nɛ́na mɛ̀m̀pà hɔ̰́ n'wɛì-pa ma kú bookù, nɛ yá̰á̰-dà kṵ́ńweǹni daadí kó toó-sa-ní nɛ fòùmu mɛhɛká? Nɛ fòùmu yònà wɔ́ɔ̀di-dà, è té fodá-ní wɔ̀ni cɛ̰́masí é tṵ́má wiìda. ¹⁵ Ǹtɛ múńdìkaà nɛ de yònà é n'yɔ̀pu: Kà Bateó ti pɛ̰ḭ wɔ̰ǹni, ti kó pa̰á̰-ma miì yoo miì. ¹⁶ Kà nɛ há̰ hédá miya̰, è káá fóńfóǹti nɛ daakú-sa hḭ́ǹka. Ye kú fóńfóńtì kú bookù pú sudi. ¹⁷ Kà nìdo nɔn suumá pa̰á̰ma, àá pú mà pa̰kú, ye yaǹn pa̰à̰ sḭ̀ḭ̀ma-dà.