Sàákì 5

Káápa é pa̰á̰ yɔkàma.

¹ Nɛ́na mɛ̀m̀pà yòǹ-pa káápa, fedá-nà nɛ toodí é n besí sukú. Hódí-nà é múńtá n'kṵ́hú-nà, nà sḭ̀ǹya̰ mìì pení-sa-ní nɛ hḭ́ǹka kpɛ́mú. ² Nɛ kááma pɛ̰̀ḭ-ḭ́-ma, kà bíɔ̀ka yon nɛ tóhòka. ³ Nɛ wúdó nà nɛ díimáàti-dà wúnì, k'yèe wúnáma wɛì è nɛ pṵ́ṵ́nì. Mà mɛ̀ɛ kó pedá-ma nɛ wɔ̰̀ǹku é n'yònà pà kù tɔ̀n-má ha̰mú. Nɛ makanà kááma-dà, kà ti há̰ péé dadèǹdèka mɛhɛká. ⁴ Nɛ pú bodà dehèpa mɛ̀m̀pà deháà-pa nɛ yɛ̀ka mɛhɛká, dífa nɛ de yònà é pà bodá-fa. Ye kú kpɛ́mú, kà pà nɛ kɔǹ-nà háá kà pa dawòka é yɔ̀ɔ ta̰ntá-ho Bateó mɛ̀ǹǹ wódí-ko niìi wɛǹni hḭ́ǹka toòka mɛhɛká. ⁵ Nɛ de fòù teǹka hḭ́ǹka è yon pemá-dà è pa̰kú nɛ kpɛ̀i-sá. Nɛ de yon-ń-ma tenten, è biù è yònà nɔtí daadí kó pɛdá kà pá kpéha-tí. ⁶ Nɛ kɔ̰́ɔ̰̀-ɔ̰́-ma yetádi sídàma mɛhɛká, nìpa mɛ̀m̀pà pú pa̰à̰-pa yècḭ́ḭ̀ é pà kɔ̀ù. Pà mɛ̀ɛ pú nɛ pa̰à̰-nà kpeèti.

Tencí dɔ́ɔ́di.

⁷ N kúcàpa nà n potɔ̰ɔ̰̀pa-nà, pa̰á̰-nà mùyɔ̰ háá kà ti Teó é tɛ̀ni. Cɔ́ɔ́-nà ka̰ǹká̰ńto! É tódá tacececí háá nà dèǹdèǹci, ò hɔ̰́ m'pa̰kú mùyɔ̰-dà é n'ceí-nà o dití kó bii-má. ⁸ Nɛ́na mɛ̀ɛtékà, pa̰á̰-nà mùyɔ̰. Tí n'tasí tenten mìì tee-sá Teó tɛ̀mmá-ní tɔ́sí-ma. ⁹ N kúcàpa nà n potɔ̰ɔ̰̀pa-nà, nɛ dá n'kɔǹ nà nɛ tɔɔ̀pa k'yé teha kà Weèdi dá nɛ sída. Ǹtɛ, sídàko yɔ̀ɔ dòsipú-dà há̰ńnùdi. ¹⁰ N kúcàpa nà n potɔ̰ɔ̰̀pa-nà, cɔ́ɔ́-nà Weèdi wɛtɛ̰́nápa mɛ̀m̀pà de wɛɛ̀-pa nà Bateó yèdi. Nɛ́ tṵṵ̀na pa nɔ̀ka, mìì héé-sa mùyɔ̰ pà de káá-ko náńkú mɛhɛká. ¹¹ Ti pà yún wɛ̀ɛ̀di yam̀ma mìì tee-sá pà de púsí pa cɔ̰́ɔ̰̀di-dà dɛ́dɛ́í náńkú mɛhɛká. Nɛ yeèkaà-á-ma Sɔ̀ɔ́pù wɛmá, ò de tokáàma kú bookú náńkú. Nɛ mɛ̀ɛ yá̰á̰-ma ku yɔ̀ɔmá-hɔ̰ Bateó de ò kónà-ma kú bookú, mìì tee-sá Bateó káá nìpa nánkɔḿma-dà nà séèma.

¹² Wɛmà n kó wɛɛ́-mà mɛmà kú dàkà. N kúcàpa nà n potɔ̰ɔ̰̀pa-nà, nɛ té dá wɛ̰́ha. Nɛ té dá wɛ̰́ha nà Weèdi yèdi, yoo nà teǹka yèdi, yoo nà tɔɔ̀sa yècḭ́ḭ̀ kú yèdi. Nɛ à̰à̰ ní n'yòǹ à̰à̰-dà, kà nɛ á̰à̰ ní n'yòǹ á̰à̰, k'yé teha kà nɛ dá dɔdi Weèdi sídàma mɛhɛká.

¹³ N'ɔɔ̀cɔ̰́ǹ péé náńkú mɛhɛká? Ó pa̰á̰ weèdɔɔ̀mu. N'ɔɔ̀cɔ̰́ǹ péé yaǹnaakú mɛhɛká? Ó deèn é duntà Weèdi. ¹⁴ N'ɔɔ̀cɔ̰́ǹ mɔn? Ó yíí weèdɔɔ̀-nàmɔ̀ni kpɛ̰́m̀ma kà pá pa̰á̰ kɔ̀ma o yudí hḭ́ǹka, é pa̰á̰ weèdɔɔ̀mu o kpɛ́mú nà Teó yèdi. ¹⁵ Kà pà pa̰à̰ ye kú weèdɔɔ̀mù nà dandaní, mù kó kpekàna-á-ma ye mɔko. Teó k'óò yíkàna-á-ma, k'ò mɛ̀ɛ de pa̰à̰ sḭ̀ḭ̀ma, ò kó mà n'ɔ̀ɔ̀ dèda-á-ma. ¹⁶ Nɛ́ m'bahiní sḭ̀ḭ̀ma nɛ pa̰à̰-ma tɔɔ̀pa, é m'pa̰kú weèdɔɔ̀mu nɛ tɔɔ̀pa kpɛ́mú k'yé teha kà nɛ́ kpeka. Niìcoóko weèdɔɔ̀mu káá kpeèti-dà sàma dehàma hḭ́ǹka. ¹⁷ Èdíì de yòǹ nìdo-dà è yònà ti yòmà. K'ò de é pa̰á̰ weèdɔɔ̀pu tenten è yɔ̀ tafá dá dɔdi, fà mɛ̀ɛ de pú dɔdi háá é n'yòǹ beeká kàta̰a̰ nà yɛ̰̀ṵ̀ku. ¹⁸ Ye kú dàhàka k'ó tṵ́má pa̰á̰ weèdɔɔ̀mu è yɔ̀ fá dɔdi, kà hḭ́ǹka é fà pa̰á̰-ní kà fá tṵ́má é dɔdi, kà teǹka é tón é pɛɛ́ dití.

¹⁹ N kúcàpa nà n potɔ̰ɔ̰̀pa-nà, kà n'ɔɔ̀cɔ̰́ǹ yɛ̀ɛ̀ wɛbeèdi cɔ̀ku mɛhɛká, kà tɔɔ̀o óò tɛ̰́ná-ní kú hḭ́ǹka. ²⁰ Nɛ́ n'yá̰á̰ è yɔ̀, kà mɛ̀ǹǹ dènà-ko-ní niìsḭ̀ǹn cɔ̀ku ò de fée-kú kú mɛhɛká, òò dontà kṵ́mú mɛhɛká-dà, Weèdi mɛ̀ɛ kó deèda-á-ma ye niìsḭ̀ǹn sḭ̀ḭ̀ma dɔ́ɔ́di.