Hèbùdéèpa 13

Tencí dɔ́ɔ́di.

¹ Nɛ́ n'sɔ̰ncí é n'dɔ́sí nɛ tɔɔ̀pa, nɛ yòǹ kúcàpa nà potɔ̰ɔ̰̀pa-dà. ² Nɛ dá dúí nɛ kó n'coní-ma cà̰ma nɛ hɔ̰́ɔ̰́hí mɛhɛká. Nɛ dá mà hḭn mìì tee-sá, nìpa dɔ́ɔ́di de codà-á-ma cà̰m̀ma pa hɔ̰́ɔ̰́hí mɛhɛká k'yèe cà̰ma yòǹ Weèdi tɔntɔndipá pà pú yá̰á̰. ³ Nɛ́ n'dèn mɛ̀m̀pà péé-pa kódeèka mɛhɛká é n'yònà pà pɛ́ɛ̀ nɛ kpeé-ma nà mɛmpá. Nɛ́ n'dèn pà diinì-pa náńkú, è yá̰á̰ nɛ mɔ́ḿpà-ní nɛ káá-ma wɔ̰̀ǹku kà kù yèku dɔnkú.

⁴ Nìpa wɛǹni ní n'kɛɛ̀hi potóóma. Dɔɔ̀o n'ɔ̀ɔ poòo, p'oòcɔ̰́ǹ dá yetá yɛ̀ɛ̀ é yódá tapaàdi, è yá̰á̰ Weèdi kó wáńtá sída-á-ma mɛ̀m̀pà dáhàta-pá héhécíma nà mɛ̀m̀pà cɔ̰hú-pa dɔɔdí.

⁵ Nɛ dá hédá kà dící dakú é nɛ n'túdí nɛ pa̰á̰ma mɛhɛká. Nɛ́ n'sà nɛ káá-sa sá̰mà, è yá̰á̰ Weèdi mɔ́nní-dà hḭ́n è yɔ̀:

N pú k'áa hédá a cɔ̰́ɔ̰̀di,

n mɛ̀ɛ pú k'áa wɛ́í.

⁶ Ye kú kpɛ́mú, ti kó nɛɛ́ wɛɛ́-ma é n'dań-nà è yɔ̀:

Bateó-dà n tempú-nà,

n pú kó n'wani yècɛ̰́ɛ̰̀.

Nìpa kó nɛɛ́ n pa̰á̰ ba?

⁷ Nɛ́ n'dèn nɛ yìkàǹyìkàpa mɛ̀m̀pà de nɛ cakáà-pa Weèdi wɛmá. Nɛ́ cɔ́dí pà de fòùkaàma kú bookú háá é yɔ̀ɔ kpíí, pà tempa-nà é n'káá pa dandaní bookú. ⁸ Sèsí-Kídísì pú kó peǹta. Ò wontà yòm̀pu, ò yòm̀pu-dà yenì, ò mɛ̀ɛ baà kó n'yòm̀pu-dà k'yé n'kɔ́ɔ́ yɔ̀ɔmá. ⁹ Nɛ dá yetá héé kà pá nɛ báńta é nɛ yehìna nà biɔhànamá tɔɔ̀ma màcɔ̰́mà mɛ̀mà pú nɔɔ̀nà-ma ti dandaní kpɛ́ɛmá. Mìì suu-sá, tí héé kà Weèdi pa̰á̰suumá-dà é ti tuɛ̀ha kpeèti ti yàma mɛhɛká, ti dá hédá kà nùka pà hḭ́nà-ka dipú hḭ́ǹka é mà hḭn. Mɛ̀m̀pà kà tṵ̀n-pá, kà pú pà tempáà-nà daadí yènì.

¹⁰ Dɔ̀hàdi cɔ̰̀ǹcɔ̰̀ni^a tḭ́ńti káá-di, dɔ̀hàka yam̀ma mɛ̀m̀pà pa̰kú-pa dɔ̀hàka Weèdi fḭ́ḭkú mɛhɛká pú kó nɛɛ́ é dii pà dɔ̀hu-sá ni hḭ́ǹka. ¹¹ Dɔ̀hàka kpɛ̰́ǹn de hɔ̰́ kɔ̀ù nɔtí, é tódá ti hḭ̀ma é dúùwa Weèdi fḭ́ḭkú mɛhɛká-dà, é tɛ̀i kɔń-nà Weèdi è yɔ̀ ní deèda nìpa sḭ̀ḭ̀ma. Àmá ye nɔtí pà kɔ̀ù-ti mɔ́ntí, pà de hɔ̰́ tì nátá-nà-á-ma pà kàdi-sá é tì tɔ̀n. ¹² Ye kú kpɛ́mú-dà tee, Sèsíì mɛ̀ɛ té de yɛɛ̀-ma yɔtí bɛ́ɛ́kú, é tɛ̀i kà p'óò kɔ̀ù, k'yé teha k'ó deèda nìpa sḭ̀ḭ̀ma n'ɔ̀ɔ mɔ́nń kú hḭ̀ma. ¹³ Yè yòǹ-mà mɛma, héé kà tí yɛ̀ɛ̀-nà yɔtí mɛhɛká, é taá o pesá. Tí teha-nà yɔ̰́sàma é n'yònà mɛnń, ¹⁴ mìì tee-sá ti pú káá tenkà mɛnkà kú hḭ́ǹka yɔtí mɛ̀ǹtì baà kó m'péé-ti. Ti bɔhàta kṵ́ńweǹni kpɛ́ɛtí mɛ̀ǹtì pení-ti-dà-ní. ¹⁵ Yè yòǹ-mà mɛma, nà Sèsíì kpɛ́mú, tí n'duǹti Weèdi wɔ̀ka wɛǹni k'yé n'yònà dɔ̀hàdi ti pa̰kú-di ni kpɛ́mú. Tí nì n'dùǹti duntàma mɛ̀mà kó n'wɛkànì-ma ni yèdi. ¹⁶ Nɛ dá dúí nɛ kó m'pa̰kú-ma suumá nà nɛ kó n'tempúnà-ma nɛ tɔɔ̀pa. Ye kú pa̰á̰mà-dà yòǹ dɔ̀hàka mɔ́nká Weèdi naanà-ka.

¹⁷ Nɛ́ n'you-nà nɛ kpɛ̰́m̀ma toòka, é n'tehú pà hḭ́mpú, è yá̰á̰ mɛmpá-dà nɛ púsí wɔ̀ka wɛǹni, pà mɛ̀ɛ kó wáńtá caka-á-ma Weèdi pà dekáàma ni kpɛ́mú. Kà nɛ pà you-nà toòka, pà kó m'pa̰kú pa tɔná nà yaǹnaakú-dà. Kà mɛma há̰ dɔ, pà kó nà m'pa̰kú nà yaǹcɔ̰hàma-dà, miya̰ mɛ̀ɛ pú kó nɛ tɛɛ̀ní cɔ́ńtídi nìcɔ̰́nì.

¹⁸ Nɛ́ n'sɔ̰ncí é m'pa̰kú weèdɔɔ̀pu ti kpɛ́mú. Ti yá̰á̰-ma è yɔ̀ yècḭ́ḭ̀ kɔ́ɔ́ ti yàma mɛhɛká è yòǹ kpákpààsa, mìì tee-sá ti ta̰kadà è kó m'pa̰kú k'yè sudi-í-ma wɔ̀ka wɛǹni. ¹⁹ N nɛ cɔɔ̀hu-ú-ma tenten, è yɔ̀ nɛ́ pa̰á̰ weèdɔɔ̀pu n kpɛ́mú, k'yé teha kà Weèdi n pa̰a̰ bòdi ká n tóní nɛ pesá feǹ-fem̀ma.

Weèdɔɔ̀mu.

²⁰ Weèdi mɛ̀nì pɔ̰n-dí wɛ̀ɛ̀di, mɛní-dà yá̰hìnà-ní kpíípa mɛhɛká ti Teó Sèsíì, k'ó kpáńtá hɔ̰ɔ̰̀cɛ̰nsào. N'ɔ̀ɔ hḭ̀ma ò hútà-ma-dà ò ti pa̰à̰-nà-ma múnáma mɛ̀mà kɔ́ɔ́-ma yɔ̀ɔmá. ²¹ Ye kú Weedì é nɛ tempanà kà nɛ́ n'nɔn è pa̰kú mìì suu-sá wɛǹni, k'yé teha kà nɛ́ m'pa̰kú nì kpɛ̀i-sá. Ní pa̰ná nì kpɛ̀i-sá ti fòùmu mɛhɛká nà Sèsí-Kídísì yèdi. Nìpa óò wɛkàna k'yé n'kɔ́ɔ́ yɔ̀ɔmá! K'yé mà n'yòǹ!

Dɔɔ̀mu.

²² N kúcàpa nà n potɔ̰ɔ̰̀pa-nà, n nɛ wa̰à̰haà-ní ye pɔ̀kàtà mɛntà è kpɛ̀i é yahikàna nɛ wɔ̰̀ǹti-dà. Tà̰ǹta-nà ta wɛmá nà yàma màcɔ̰́, mà múńtà pú dɛu. ²³ Nɛ́ n'yá̰á̰ è yɔ̀ ti kúcàa Tìmɔ̀téè koò pú péé kódedí mɛhɛká, p'òò wɛ́i. K'ò n ta̰ntà-ní fem̀ma, n kó m'pení nɛ pesá òò nɔɔ̀-nà-hɔ̰. ²⁴ Nɛ́ dɔa-ho nɛ yìkàǹyìkàpa wɛǹni, nà mɛ̀m̀pà kú wɛnnì yòǹ-pa Weèdi kpɛ́ɛpá. Ti kúcàpa mɛ̀m̀pà péé-pa Ìtàdíì teǹka nɛ dɔń-hɔ̰.

²⁵ Weèdi pa̰á̰suumá nɛ m'péé-nà nɛ wɛǹni.