Hèbùdéèpa 12

Tí n'káá wɛ̰́ɛ̰́ma Weèdi tṵṵ̀namá hḭ́ǹka.

¹ Ye kú nìpà mɛ̀m̀pà de bɛkáà-pà pa dandaní Weèdi hḭ́ǹka, pà sṵ́n-ń-ma sàma è ti yéńtà. Pà ti bɛkáà cɔ̀ku-dà. Ye kú kpɛ́mú, tḭ́ńti mɛ̀ɛtékà, tí tɔ̰ɔ̰̀ta-nà mìì kú wɛnnì kpanì-sa ti kó taá-ma yìhìka, é wɛ́í sḭ̀ḭ̀ma mɛ̀mà ti wɔɔ́ wɔɔ́-ma. Tí cocí nà wɛ̰́ɛ̰́ma, cokemú Weèdi ti yíí-pu kú cocí-pu. ² Tí hédá kà ti nɔ̀ǹci é n'cɔ̰mú Sèsíì hḭ́ǹka. Mɛnń-dà yòǹ ti dandaní yudí, mɛnń-dà mɛ̀ɛ kó nì tanà ni suumú sàmu mɛhɛká. Ò teháà é kpíí kpíidɔkú hḭ́ǹka, ò pú didà fɛ̀ci mɛ̀ǹcì de yè péé-ci, mìì tee-sá ò de dìi yaǹnaakú pà hḭ́nà-ku-dà o kpɛ́mú. Sá̰mà-ní, ò kàdi Weèdi wóokàtàda heùma-dà. ³ Mahà-nà o hḭ́ǹka, é dɛ́há niìsḭ̀m̀ma de ò yeéè-nà-ma kú bookú, k'ò baà é toó ye kú niì wɛnnì. Ye kú kpɛ́mú, nɛ dá teha kà yaǹcɔ̰hàma é nɛ kɔ̀ù. ⁴ Bá nà nɛ mɔɔ̀-mà nà sḭ̀ḭ̀ma, n'ɔɔ̀cɔ̰́ǹ mun pú màa háá kà pá y'óò kɔ̀ù-nà ye kpɛ́mú. ⁵ Nɛ dúi-í-ma wɛmá Weèdi de nɛ cakáà-ma è kó yahikàna nɛ wɔ̰̀ǹt'aa? Nì de nɛ didà ni bííhí-dà é nɛ caka è yɔ̀:

N bidà, a dá yetá

yakàdà-nà Bateó nadíma.

A yàma mɛ̀ɛ dá cɔ̰ha

k'à yetà k'ò k'áa yíkàna,

⁶ è yá̰á̰ Bateó nadì

ò dɔ́sí-ko-dà,

è podì ò yá̰á̰-ko wɛǹni

è yɔ̀ ò yòǹ o bíitá.

⁷ Toó-nà náńkú Weèdi nɛ nadì-nà-ku. Nɛ yòǹ-ma kpɛ́mú-dà ni bííhí kà nì nɛ hɔ̰n mɛma. Bíitá m̀mɔ́ńta-dà péé kà ta báàa pú tà nadì? ⁸ Kà Weèdi pú nɛ nadì é n'yònà nì hɔ̰mpú ni bííhí wɛǹni, yè sá̰kà nɛ pú yòǹ ni bííhí mɔ́nhí-dà mɛmɛ-ɛ̀, nɛ yòǹ tapaàdi kpɛ́hí-dà. ⁹ Cɔ́ɔ́-nà ti báàpa tenkà kpɛ́ɛ́pà-ní, pà ti nadì-í-dà kà ti pà you-nà toòka. Weèdi mɛ̀nì há̰ yòǹ-di ti báàa hḭ́ńkà kóoó tá, ti pú kó nì yèkà-nà toòka k'yé ha̰tá k'yé teha kà tí dɛ́tá fòùmu? ¹⁰ Ti báàpa de ti nadì pà kpɛ̀kaàma bɛ̀m̀bɛ̀ni cɛ̰́masí mɛhɛká-dà. Àmá Weèdi mɛni, nì ti nadì è bɔ̀hàta ti suumá-dà. Nì kpɛ̀i tí nì n'yònà-á-ma, é n'weni pópóí. ¹¹ Mɔ́masí-dà, pà nadì tḭ́ń wɔ̀ni nìdo, yè pú hɔ̰́ n'nadi, yè hɔ̰́ n'dɔǹ-ń-ma. Há̰kà, mɛ̀m̀pà hɔ̰́ teha-pá ye nadíma, yè hɔ̰́ m'péé kà pá dɛ́há-ma ma suumá. Mà hɔ̰́ hédá kà pa fòùmu-dà é coá, kà pá n'fòù wɛ̀ɛ̀di mɛhɛká.

Tencí pà yònà é n'fòùkaàma hḭ́ǹka nà pà yònà é yentá-sa.

¹² Ye kú kpɛ́mú, tón é ca̰hìna-nà nɛ bakaná mɛ̀nà wéè-na, é tɔhìna kpeèti nɛ dúùka mɛ̀ǹkà tèkàdi-ká. ¹³ Tṵṵ̀na-nà cɔ̀ci mɛ̀ǹcì cɔ́dí-ci, k'yé teha kà hɔ̀ùta dá dehà é wɛ̰́tá ta tàdi, àmá k'yé teha kà tá kpeka.

¹⁴ Nɛ́ n'wɛ̰́dì é m'pɛnti wɛ̀ɛ̀di nà nìpa wɛǹni, é hédá kà nɛ fòùmu é dɔ̀hà n'weni. Kà mù pú weni, n'ɔɔ̀cɔ̰́ǹ pú kó dɛ́há Bateó. ¹⁵ Nɛ́ pa̰á̰ yɔkàma kà n'ɔɔ̀cɔ̰́ǹ dá yetá wɛ́í Weèdi pa̰á̰suumá. Nɛ́ pa̰á̰ yɔkàma kà n'ɔɔ̀cɔ̰́ǹ dá yetá kpáńtá míisḭ̀ǹku mɛ̀ǹkù káá-ku dɔ̀màma, ye wɔ̀ni é yɛɛ̀ni nɛ cɔhàka, é buupa nɛ sààpa pééma, é pà tòna ye dɔ̀màma. ¹⁶ N'ɔɔ̀cɔ̰́ǹ dá yetá m'pa̰kú yɔ́humú pa̰á̰ma, yoo é n'yɔ̰́sí mìì yòǹ-sa Weèdi kpɛ́ɛsá, é n'yònà Èsàyúù de hḭmpú é yɛda o pɔ̀ɔmá de ò kɔ̰́nì-sa nà dipú caadí sá̰à̰di. ¹⁷ K'yé m'péé, k'ò de n'kpɛ̀i k'òo báàa óò kóná, k'óò bɔ̀hà-ho. K'ò de é hódí dɛ́dɛ́í è pɛnti o báàa é peǹta yàma ò de pa̰à̰-sa hḭ́ǹka, yè pú cèn.

¹⁸ Nɛ pú tɔ́kánà-ní Weèdi pesá, k'yèe pesá yònà Ìsìdàyɛ́dìpa de tɔ́kánà Sìnàyíì ta̰à̰di càwenkú mɛhɛká k'yè yòm̀pu. Mɛmpa de kó nɛɛ́ nì pḭ́ń-ma, é dɛ́há ha̰mú kà mù cɔ́hú, é dɛ́há yḭ́ḭsàpu k'yè yòǹ hɛ̰́ṵ̀, nà yakpekú. ¹⁹ Nɛ pú yeèkaà kà pá heé tṵ́ńtṵ́ka, nɛ mɛ̀ɛ pú yeèkaà bokpeèku kùcɔ̰́kù kú wɛmá é n'yònà Ìsìdàyɛ́dìpa de kù yèkaà-ma é caka è yɔ̀ kù koò dá pà wɛɛ́-nà. ²⁰ Pà de mà hḭ́n mɛma mìì tee-sá, Weèdi de pà cakáà-sa pà de pú kó nɛɛ́ yè toó. Nì de yɔ̀:

Mɛ̀ǹǹ kú wɛnnì kó pḭ́ń-ko ye ta̰a̰dì,

bá kà nɔtá-dà,

pà yònà éè kɔ̀ù-ú-ma nà tá̰à̰ka.

²¹ Pà de dìi-sá k'yè pa̰kú de káá bɔɔ̀pùukú-dà, k'yé n'tee-nà kà Mɔ̀yísì é dedí kpeéma è yɔ̀: Wantafɔ̰̀di-dà n kɔ̀ù kà n cèùdi. ²² Àmá nɛ́na, nɛ kpɛ́ɛmá ceń-ma. Nɛ hɛ́tà-á-ma Sìyɔ̰́ɔ̰̀ ta̰à̰di, Weèdi mɛ̀nì fòù-di yɔtí péé-sa, Sèdìsàdɛ́m̀ hḭ́ńkà kóoó n'ɔ̀ɔ Weèdi tɔntɔndipá tòhìka dɔ́ɔ́di tísí-sa è yà̰ǹku kúúdi. ²³ Nɛ hɛ́tà-nà Weèdi bíicecehí hòǹhòni-dà, Weèdi wa̰tà-hi kú yèka hḭ́ǹka mɛhɛká. Nɛ hɛ́tà-nà Weèdi-dà, mɛ̀nì kó sída-dí nìpa wɛǹni. Nɛ hɛ́tà-ní mɛ̀m̀pà kú sèka coó-pa-dà Weèdi yìhìka, kà pà ta̰ntà wenimá mɔ́mmá mɛhɛká. ²⁴ Nɛ hɛ́tà-nà-ní Sèsíì-dà, mɛ̀ǹǹ hútà-ko o hḭ̀ma é ti wekàna. Mɛnń-dà yòǹ cawà̰do múnáma pàm̀ma mɛhɛká. O hḭ̀ma ò hútà-ma mɛ̀ɛ káà wɛì-í-ma yenì sukú é ha̰tá Àbɛ́dì kpɛ́ɛmá.

²⁵ Ye kú kpɛ́mú, nɛ́ pa̰á̰ yɔkàma. Nɛ dá yeda nɛ kó besí-ma mɛ̀ǹǹ nɛ wɛì-ko. Ìsìdàyɛ́dìpa mɛ̀m̀pà de yeéè-pa pà kó besí-ma Weèdi wɛmá Mɔ̀yísì de pà cakú-ma teǹka hḭ́ǹka, de pú fḭ́tà toyɔ̰́ńti mɛ̀ǹtì de dɔɔ-tí-ní pa hḭ́ǹka. Mɛ̀ǹǹ há̰ ti wɛì-ko tḭ́ńti, ò ti wɛì-nà-ní hḭ́ǹka-dà. Kà t'oò yedáà, ti kú toyɔ̰́ńti kó ha̰tá-ma pa kpɛ́ɛtí. ²⁶ Dekáà wɔ̀ni, o boòku de sa̰m̀paà teǹka-dà .Yenì kpɛ́ɛ́dì-ní, ò hḭ́nà nùdi-dà è yɔ̀: N kó tṵ́má sa̰mpà-á-ma teǹka é pɛ́ɛ́ nà hḭ́ǹka. ²⁷ Ye yèkà mɛnkà: «é tṵ́má», kà cakú è yɔ̀ niìya̰ Weèdi pa̰à̰-sa wɛǹni kó sa̰mpà-á-ma é áńtá, ye wɔ̀ni é sɔ̰́ńtá mìì pú kó nɛɛ́ sa̰mpà-sa cɔ̰́ɔ̰̀di k'yé n'kadí.

²⁸ Weèdi wóòti nì ti kɔ̰́nì-ti pú kó sa̰mpà daadí yènì. Ye kú kpɛ́mú, tí tɔná Weèdi, é nì n'dɔń nì kpɛ̀kaàma kú bookú, é nì n'wani é nì n'cùùnì, ²⁹ è yá̰á̰ ti Weèdi yòǹ ha̰mú-dà mɛ̀mù hɔ̰́ dii-pú nɛm̀mu pápáí.