Hèbùdéèpa 11

Dekáà wɔ̀ni kpɛ́ɛpá kú dandaní.

¹ É n'káá dandaní héé á n'yá̰á̰-ma dɛ́dɛ́í è yɔ̀ niìya̰ a dań è kó dɛ́tá-sa, a yè yɔ̀ɔ wɛ̰ɛ̰́pu-dà. Yè cakú è yɔ̀ á n'yá̰á̰-ma tenten è yɔ̀ niìya̰ a pú mádí-sa péé-ma nà mɔ́ma. ² Dekáà wɔ̀ni kpɛ́ɛpá de káá ye kú dandanì-dà, kà Weèdi de wɛdá suumá pa hḭ́ǹka. ³ Dandaní-dà tee kà ti yá̰á̰ è yɔ̀ Weèdi pa̰à̰ fòùku nà ni nùdi wɛmá-dà, mìì cakú-sa è yɔ̀ niì ti mádí-sà, yè péé-nà-ní niìya̰ ti pú dìi-sá pesá-dà.

⁴ Àbɛ́dì de káá-ma dandaní kpɛ́mú-dà tee k'ò de é pa̰á̰ dɔ̀hàdi Weèdi kpɛ́mú kà nì ha̰tà Kàyɛ̰́ɛ̰̀ kpɛ́ɛdí. O dandaní kpɛ́mú-dà tee Weèdi de ò dìdà-ma niìcoóko ni yìhìka, yè wɔ̀ni é ta̰ǹta o pa̰ká. N'ɔ̀ɔ dandaní kpɛ́mú, Àbɛ́dì pa̰à̰-sa káà wɛì-í-ma háá nà yenì n'ɔ̀ɔ̀ baà kpíi-sà.

⁵ Ènɔ́kì de káá-ma dandaní kpɛ́mú-dà tee Weèdi de ò tódà-ma o fòùo óò dìka hḭ́ǹka mɛhɛká k'ò pú n'yɛɛ̀-nà kṵ́mú. Pà de koò p'óò dɛ́hà, mìì tee-sá Weèdi de ò dìkà ni pesá. Weèdi wɛmá pɔ̀kàhi cakú o hḭ́ǹka è yɔ̀, kà Weèdi é nɛɛ́ ò tódá óò dìka ni pesá, nì de sɛdáà-á-ma o pa̰á̰ma. ⁶ Kà nìi há̰ pú káá dandaní, Weèdi pú kó nɛɛ́ sɛda o pa̰á̰ma. Mɛ̀ǹǹ kpɛ̀i é pàdi-kó Weèdi pesá, ò yònà é n'dań-ma è yɔ̀ nì péé è kɔ̰́nì boutí mɛ̀m̀pà nì pɛnti-pá. ⁷ Nɔ̀wéè de káá-ma dandaní kpɛ́mú-dà tee, ò de pa̰à̰-ma nɛ́ɛmá dawɛ́ɛ̀ku é fḭ́hìna o hɔ̰́tàkpɛ́ɛpá. Weèdi de ò bɛkáà mìì pení-sa-dà-ní kà pà mun p'éè dìi, k'ò mɛ̀ɛ éè tódá mɔ́ma. N'ɛ̀ɛ kú pa̰á̰mà-ní, ò de bɛkáà è yɔ̀ nìpa tɔɔ̀pa yeekú-ma. O dandaní kpɛ́mú-dà mɛ̀ɛ tee, Weèdi de ò dìdà-ma niìcoóko ni yìhìka. ⁸ Àbààhám̀ de káá-ma dandaní kpɛ́mú-dà tee, ò de teháà-ma Weèdi yííma, é yídá é ka̰há teǹka nì de hḭ́n nì k'óò kɔ̰́ɔ̰́-ka kú mɛhɛká. Ò de kɛ̰hidi, è pú yá̰á̰ ò yòǹ-ka bɛ́ka. ⁹ Dandaní ò de káá-di kpɛ́mú-dà tee k'ò de taá è fòù ye teǹka Weèdi de hḭ́n nì k'óò kɔ̰́ɔ̰́-ka mɛhɛká, è yòǹ cà̰ǹn. Ò de wenti fḭ́ḭná mɛhɛká-dà, bá Ìsáákì nà Sàkɔ́pù Weèdi mɛ̀ɛ té de hḭ́nà-pa ye nùdì ni cɔ̰́ɔ̰̀di. ¹⁰ Àbààhám̀ de fòù mɛma, mìì tee-sá ò de ceí yɔtí Weèdi mɔ́nní kó kɔ́tá-ti-dà, é tì madí, kà ti makɔ̀dikú é n'kpenì.

¹¹ Sàdáà de káá-ma dandaní kpɛ́mú-dà tee, ò mɛ̀ɛ té de nɛɛ̀ é póń-ma é pɛdá bíitá n'ɔ̀ɔ̀ baà de yòǹ-sà poyɛ̰tadá k'òo beeká tṵ́mà ha̰tà. Yè de mà hḭn mìì tee-sá, ò de yá̰á̰-ma tenten è yɔ̀ Weèdi kó pa̰á̰-ma nùdi n'ɔ̀ɔ̀ hḭ́nà-di. ¹² Mɛmá-dà, nà yàdo òcɔ̰́ Àbààhám̀, k'ò tɔ́sí kṵ́mú, yaàbíiká dɔ́ɔ́di yɛɛ̀ni-má-ní, è wɔ̰̀ǹti è yònà hḭ́ǹka hà̰hi, è wɛhi è yònà dàmɛ́dì bíìdi pà pú kó nɛɛ́ kaàn-dí.

¹³ Ye nìpà wɛnnì kpíi nà dandaní-dà. Pà pú dɛ́hà niìya̰ Weèdi de hḭ́n nì kó pà kɔ̰́ɔ̰́-sa, àmá pà de yè dɛ́hà nà dɛùma-dà éè dɔa. Pa mɔ́mpá de wɛdà-á-ma è yɔ̀ pà yòǹ cà̰m̀ma-dà è cèǹtì teǹka hḭ́ǹka. ¹⁴ Nìpa mɛ̀m̀pà wɛdà-pa mɛma de bɛkú pópóí è yɔ̀ pà pɛnti heedí-dà. ¹⁵ Kà heedí pà yɛ̀ni-dí-ní níkú de pà cɛ̰dí, è yenì pà de dɛ́tà-á-ma bòdi é tón ni mɛhɛká. ¹⁶ Mɔ́masí hḭ́ǹka há̰kà, pà de pɛnti heedí mɛ̀nì ha̰tà-di-dà tɔɔ̀ka, hḭ́ńkà heedí. Ye kú kpɛ́mú-dà tee pà yún-má Weèdi è yɔ̀ pa Weèdi k'yè pú nì yònà fɛ̀ci, nì mɛ̀ɛ dɔɔ̀haà yɔtí-dà pa kpɛ́mú.

¹⁷ Àbààhám̀ de káá dandaní-dà, ye kú kpɛ́mú-dà tee Weèdi de ò bɛń tḭ́ń wɔ̀ni, ò de tódà-ma o bíitá Ìsáákì é tà pa̰á̰ dɔ̀hàdi. O sɔ̀do de bii-í-ma k'ò kó pa̰á̰ o bínàǹcɔ̰́ dɔ̀hàdi, kà Weèdi há̰ de yɔ̀ɔ ò hḭ́nápú nùdi. ¹⁸ Nì de ò hḭ́nà nùdi è yɔ̀: Nà Ìsáákì-dà a kó dɛ́tá-ma yaàbíiká. ¹⁹ Àbààhám̀ há̰ de yá̰á̰-ma è yɔ̀ Weèdi káá nɔɔ̀ti è kó nɛɛ́ yá̰hìna kpíìo. Ye kú kpɛ́mú-dà tee nì de ò tɛ̰́nà-ma o bíitá. Ye o bíitá tɛ̰́náma de yohènì ye kú pa̰á̰mà-dà.

²⁰ Ìsáákì de káá-ma dandaní kpɛ́mú-dà tee, ò de kónà-ma Sàkɔ́pù nà Èsàyúù, é wɛdá bá pa mɛ̀ǹǹ dɛ̀ɛ̀-ko kó wáńtá n'yòm̀pu.

²¹ Sàkɔ́pù de káá-ma dandaní kpɛ́mú-dà tee, ò de kónà-ma Sòsɛ́fù bíitá bá mɛ̀ǹtà dɛ̀ɛ̀-ta é nɛɛ́ kpíí. Ò de yḭncí o ká̰ńtá̰à̰ni hḭ́ǹka-dà é duntà-nà Weèdi.

²² Sòsɛ́fù de káá-ma dandaní kpɛ́mú-dà tee, ò de dòsi-má o kṵ́mú fɔ̰̀ɔ̰̀ku, é wɛdá Ìsìdàyɛ́dì bííhí yɛ̀ɛ̀ma Èsípútì teǹka, ye wɔ̀ni é caka hì kó n'yɛtì é hḭmpú o kɔ̰́ɔ̰̀ka k'ò kpíi.

²³ Mɔ̀yísì báàpa de káá dandaní-dà, ye kú kpɛ́mú-dà tee pà de ò pɛdà-ma óò sɔ̀na háá weèka kàta̰a̰. Pà de cɔ́ɔ́ é n'hɔ̰́tà ye bíitá suu-ú-ma, ye kú kpɛ́mú-dà tee pà de pú wampáà-ma wódo nùdi. ²⁴ Mɔ̀yísì de káá dandaní-dà, ye kú kpɛ́mú-dà tee ò de kpɛ̰́ń-ma é yeda è yɔ̀ pà dá ò yíí Fàdàɔ̰́ɔ̰̀ sepàǹn bíitá. ²⁵ Ò de ta̰kadà è yɔ̀ ó pɛ́ɛ́ dii náńkú nà Weèdi nìku-dà, nà w'aa dii-má wɛ̀ɛ̀di sḭ̀ḭ̀ma kɔ̰́nì-di bɛ̀m̀bɛ̀ni cɛ̰́masí mɛhɛká. ²⁶ Ò de hɔ̰́tà kà nìpa ò yɔ̰́sáà é n'yònà pà kó yɔ̰́sa-má kú bookú Kídísì Weèdi kó tɔn-kó-ní, yè ha̰tà-á-ma Èsípútì kááma wɛǹni. Ò de maàhaà mɛma mìì tee-sá, o nɔ̀ǹci de cɔ̰mú boutí Weèdi kó wáńtá óò kɔ̰́ɔ̰́-ti kú hḭ́ǹka-dà.

²⁷ Mɔ̀yísì de káá dandaní-dà, ye kú kpɛ́mú-dà tee ò de yídà-ma Èsípútì teǹka è pú wampáà wódo fɔ̰́ɔ̰́di. Ò de pú teháà k'yècḭ́ḭ̀ óò nampa o cɔ̀ku hḭ́ǹka, yè de yònà ò dìi-má-dà Weèdi òcɔ̰́ǹ pú dìi-dí. ²⁸ Dandaní ò de káá-di-dà tee, ò de dii-má Pákì kúúdi, é hédá kà Ìsìdàyɛ́dìpa é paàta nɔtí hḭ̀ma pa hɔ̰́ɔ̰́hí há̰ńnùka, k'yé teha kà Weèdi tɔntɔdikó mɛ̀ǹǹ de kó kɔ̀ù-ko pɔ̀ɔpá dá yetá kɔ̀ù pa kpɛ́ɛpá.

²⁹ Ìsìdàyɛ́dìpa de káá-ma dandaní kpɛ́mú-dà tee, pà de detà-ma kpàti dàmɛ́dì k'yè yònà kpeèdi. Àmá Èsípútì yam̀ma mɛmpa de tɛ̀ni-má-ní é bɛń è mɛ̀ɛ té kó deèta, kà nɛ́ɛmá-dà é pà dii.

³⁰ Ìsìdàyɛ́dìpa de káá-ma dandaní kpɛ́mú-dà tee, pà de yéńtà-ma Sèdìkóò yɔtí háá daàka kàyehì, kà ti maasàci é nɛɛ́ wuù-wuùdi teǹka. ³¹ Poyáyáta Hàdàhápù, de káá-ma dandaní kpɛ́mú-dà tee, tà de pú pɛ́ɛ̀ é kpíí-nà-ma mɛ̀m̀pà pú you-nà-pa Weèdi toòka, mìì tee-sá tà de codà sukú Ìsìdàyɛ́dìpa pà de tɔn-pá-ní è yɔ̀ pá cɔ́dí o yɔtí.

³² N kó n'sɔ̰ncí-dà è wɛì tɔɔ̀pa hḭ́ǹka? Bòdi pú kó n tɛ̀i n kó wɛɛ́-ma Sèdèyɔ̰́ɔ̰̀, nà Bàdákì, nà Sà̰m̀sɔ̰́ɔ̰̀, nà Sɛ̀fùtéè, nà Dàfítì, nà Sàmùyɛ́dì, nà Weèdi wɛtɛ̰́nápa, pa wɛnnì pà de pa̰à̰-sa wɛǹni. ³³ Pà de káá dandaní-dà, ye kú kpɛ́mú-dà tee pà de nɛdà-ma wóoteǹka, é wódí ka hḭ́ǹka nà coóma, é dɛ́tá Weèdi de hḭ́nà nùdi è yɔ̀ nì kó pà kɔ̰́ɔ̰́-sa, é kpená koòka nùdi. ³⁴ Pà de kɔù-ú-ma ha̰kpeemú, é fḭ́tá pà kó pà kɔ̀ù-ma nà sepɛ̰ɛ̰̀dí. Kpeèti de pà dóńtà-á-ma, àmá kà pá tón é tì dɛ́tá. Ta̰à̰pu mɛhɛká, kà pá bɛka è yɔ̀ pà daí, é bɔhà pa kɔ̰ndìkàǹtɔ̀pa ta̰nìpa. ³⁵ Poòpa de káá dandaní-dà, ye kú kpɛ́mú-dà tee, pà de dɛ́hà-ma kà pá yá̰hìna pa kpíípa é pà pà tɛ̰́ná. Tɔɔ̀pa mɛmpa, kà pá pà tɔ̰̀hì dɔnkú, àmá kà pá yeda pà kó pà fèda-má, mìì tee-sá pà de kpɛ̀i é kpíí náńkú mɛhɛká, kà Weèdi é pà yá̰hìna, kà pá dɛ́tá fòùmu mɛ̀mù ha̰tà-pu teǹka kpɛ́mú. ³⁶ Tɔɔ̀pa tṵ́màkaà, pà de pà dɛhí-ma, é pà podí dáùka, é pà dáká dákáti, é pà yɛ̰̀ḭ kódeedí, kà p'éè toó. ³⁷ Pàcɔ̰́, kà pá pà ká̰mu tá̰à̰ka é pà kɔ̀ù, tɔɔ̀pa kà pá pà fìta cɔ̀ku màdɛ́ɛ́ yoo é pà kɔ̀ù nà sepɛ̰ɛ̰̀dí. Tɔɔ̀pa de kɔ́ɔ́ bɛ̀m̀bɛ̀ni pà kó kaàdi-dí è cèǹtì páàku nà ku tɔkú, è báá hɔ̰̀ci nà bɔhí dɔcí, è kɔ́ɔ́ yècḭ́ḭ̀, kà pà pà fá̰kápú è pà diinì náńkú. ³⁸ Fòùku de pú sànà ye kú nìpà-ní. Pà de centì bɛ̀m̀bɛ̀ni nà ni tɔɔ̀di-dà càwenkú mɛhɛká nà ta̰à̰ka hḭ́ǹka, è wenti ta̰fɔ̰̀ɔ̰cí mɛhɛká nà teǹka kpɛ́cí mɛhɛká.

³⁹ Pa wɛnnì, Weèdi de teháà pa pa̰á̰ma nà pa dandaní kpɛ́mú-dà, há̰kà p'oòcɔ̰́ǹ de pú dɛ́hà Weèdi de hḭ́nà nùdi è yɔ̀ nì kó pà kɔ̰́ɔ̰́-sa. ⁴⁰ Yè yòm̀pu kpɛ́mú-dà Weèdi de hḭ́nà niìya̰ mìì suu-sá è ha̰tà-nà tɔɔ̀sa ti kpɛ́mú. Nì mɛ̀ɛ de pú kpɛ̀i kà pá ta̰ntá wekànamá sàma mɛhɛká kà t'eè kɔ́ɔ́.