Hèbùdéèpa 10

¹ Mɔ̀yísì kpɛ̰́ńtìnùka yòǹ niìi mìì pení-sa-ní dìku-dà, kà pú bɛkú ye mɔ́ń-mɔ́nyá̰. Ye kú kpɛ́mú-dà tee, kà pú kó nɛɛ́ wekàna-má daadí yènì, mɛ̀m̀pà tɔ́kánì-pa-ní Weèdi. Kà pú kó nɛɛ́ mà hḭn, nà dɔ̀hàka ka cɔ̰́ɔ̰̀di pà pa̰kú-ka beeká wɛǹni. ² Kà dɔ̀hàka de hɔ̰́ nɛɛ́ pà wekàna-á-dà pópóí, è yenì mɛ̀m̀pà kà pa̰kú-pa kà nɛ̀hìnà-á-dà k'yè dɛu, è yá̰á̰ Weèdi de kó deèda pa sḭ̀ḭ̀ma cɔ̀ku màcɔ̰́-dà k'yé n'yɔ̀ɔ, pà koò pú kó n'tɛ̰́hí ma hḭ́ǹka. ³ Há̰kà ye dɔ̀hàkà pà pa̰kú-kà-ní, kà pà dèhènì beeká wɛǹni pa sḭ̀ḭ̀ma-dà, ⁴ mìì tee-sá naàdaàka hḭ̀ma nà bɔdaàka kpɛ́ɛmá pú kó nɛɛ́ deèda nìpa sḭ̀ḭ̀ma.

⁵ Ye kú kpɛ́mú-dà tee, k'ó nɛɛ́ tɛ̀ni teǹka hḭ́ǹka, Kídísì de cakáà-á-ma Weèdi è yɔ̀:

A pú dɔ́káà dɔ̀hàka nà pa̰ká,

àmá a n pa̰à̰ wɔ̰̀ǹku-dà.

⁶ A pú naakáà-nà nɔtí

pà dɔ̀haà-ti é tì pṵ́ná kà tí pedá,

a mɛ̀ɛ pú naakáà-nà nɔtí

pà dɔ̀haà-ti è cɔ̀hu sḭ̀ḭ̀ma deèdamá.

⁷ Ye wɔ̀ni kà n yɔ̀:

Ǹtɛ mmí, n Weèdi.

N pení è kó pa̰á̰ a kpɛ̀i-sá-dà,

é n'yònà pà wà̰tà-sa

n hḭ́ǹka kpɛ̰́ńtìnùka pɔ̀kàta mɛhɛká.

⁸ Kídísì de cetá é n'yɔ̀: A pú dɔ́káà dɔ̀hàka, nà pa̰ká, nà nɔtí pà pṵ́nà-ti kà tí pedá, a mɛ̀ɛ pú dɔ́káà sḭ̀ḭ̀ma deèdamá dɔ̀hàka. A pú naakáà-nà ye yècḭ́ḭ̀, nà pà baà de yè pa̰kú-mà kpɛ̰́ńtìnùka hḭ́n p'éè m'pa̰kú-ma kú bookú. ⁹ K'ó tuɛ̀ha è yɔ̀: Ǹtɛ, n tɛ̀ni n mɔ́nń è kó pa̰ná a dɔ́kàma-dà. Mɛmá-dà Kídísì tɛ̀ni é kpíá-ma dɔ̀hàka kpɛ̰́ɛ̰̀ka é kà cèda-nà o kpɛ́ɛdí ò pa̰à̰-di. ¹⁰ Sèsí-Kídísì pa̰à̰ Weèdi dɔ́sí-sa-dà, é kɔ̰́ɔ̰́ o cɔ̰́ɔ̰̀di kà p'óò pa̰á̰ dɔ̀hàdi cɔ̀ku màcɔ̰́ k'yé n'yɔ̀ɔ, ye kú kpɛ́mú-dà tee nì ti dedà-ma ti sḭ̀ḭ̀ma.

¹¹ Dɔ̀hàka yaǹn wɛǹni hɔ̰́ n'nɛɛ̀hi-í-ma daàka wɛǹni è pa̰kú o tɔná. Ò mɛ̀ɛ hɔ̰́ m'pa̰kú dɔ̀hàka ka cɔ̰́ɔ̰̀di nà ka cɔ̰́ɔ̰̀di-dà, kà mɛ̀ɛ pú hɔ̰́ nɛɛ́ é deèda nìpa sḭ̀ḭ̀ma. ¹² Àmá Kídísì mɛnn há̰ pa̰à̰ dɔ̀hàdi nìcɔ̰́-dà é deèda nìpa sḭ̀ḭ̀ma k'yé n'yɔ̀ɔ, ye kú dàhàka k'ó taá kaàdi Weèdi nɔ̀ǹkàǹheùma. ¹³ Sá̰mà-ní, ò ceí è yɔ̀ Weèdi-dà hḭ́ná o kà̰à̰tɔɔ̀pa o tàka fɔ̰̀di k'ó pà nɔ̀ùnà. ¹⁴ Nà dɔ̀hàdi nìcɔ̰́-dà pɔ́pɔ́ú, ò wekànà-ma pópóí k'yé n'kɔ́ɔ́ yɔ̀ɔmá ò dèdà-pa kú sḭ̀ḭ̀ma. ¹⁵ Mií-dà Weèdi Sèdi mɛ̀ɛ té ti cakú-ma è yɔ̀ yè yòǹ bemú-dà, è yá̰á̰ nì de wɛdà è yɔ̀:

¹⁶ Bateó wɛdà è yɔ̀:

Ǹtɛ múnáma n kó pa̰á̰-ma

nà mɛmpá ye kú daàka dàhàka.

N kó taàa n kpɛ̰́ńtìnùka

pa yàma mɛhɛká-dà,

é kà wà̰ta pa yam̀màhàdi mɛhɛká.

¹⁷ K'ó tuɛ̀ha è yɔ̀:

N koò pú kó deǹta pa sḭ̀ḭ̀ma

pà pa̰à̰-ma, nà pa yetáka.

¹⁸ Weèdi há̰ deè-sa nìpa sḭ̀ḭ̀ma, yè koò pú békú è yɔ̀ pá tṵ́má m'pa̰kú dɔ̀hàka è cɔ̀hu ma deèdamá.

Héé kà tí pàa-nà Weèdi.

¹⁹ N kúcàpa nà n potɔ̰ɔ̰̀pa-nà, Sèsíì hútà-mà o hḭ̀mà, ti káá-ma foóma è kó nɛɛ́ dúú bɛ̀m̀bɛ̀ǹwendí mɔ́nní mɛhɛká. ²⁰ Ò ti kpetà ye pesà cɔɔ̀pànkú-dà, ti kó tṵṵ̀na-kú é dɛ́tá fòùmu. Kùdáasàpu ò cɛ́tà-pu é kù kpetá, mɛmú-dà héé o wɔ̰̀ǹku. ²¹ Ye wɔ̀ni, ti káá dɔ̀hàka kpɛ̰́ǹn mɔ́nń-dà, Weèdi hḭ́nà-ko ni hɔ̰́ɔ̰́tà kpɛ́ɛpá hḭ́ǹka. ²² Ye kú kpɛ́mú, ti hɛ́tá-ní Weèdi pesá nà yàma màcɔ̰́, kà ti dandaní ní n'wɛhi. Tí nì hɛ́tá-ní è dènà sḭ̀ǹya̰ wɛǹni ti yàma mɛhɛká, è hɔ̀di ti wɔ̰̀ǹku nà nɛ́ɛwemmá. ²³ Tí n'sɔ̰ncí è dàdi-nà tenten daḿma ti wɛì-ma kú wɛmá, è yá̰á̰ Weèdi pú kó hédá nùka nì hḭ́nà-ka kà ká ɛ̰̀ḭ̀. ²⁴ Tí n'yá̰á̰ ti tɔɔ̀pa kpɛ́mú, é n'yahikànì ti tɔɔ̀pa wɔ̰̀ǹti kà tí dɔ̀hà é n'káá dɔ́kàma, nà suumá pa̰á̰ma. ²⁵ Ti dá yetá wɛ́í è pú n'kɔ́dì ti weèdɔɔ̀tɔ̀pa peèku-sá é n'yònà pàcɔ̰́ hɔ̰mpú. Múńdìkaà, nɛ́ dɔ́hà é n'yahikànì nɛ tɔɔ̀pa wɔ̰̀ǹti, mìì tee-sá nɛ dìi-í-dà kà Teó daadí hɛ́ɛ́kú-ní.

²⁶ Kà ti yɔ̀ɔ yá̰dápu wɛbeèdi, è há̰ tṵ́mà ta̰kadà è pa̰kú sḭ̀ḭ̀ma, kà tí n'yá̰á̰ è yɔ̀ dɔ̀hàdi nìcɔ̰́nì koò pú péé pà kó pa̰á̰-di kà ní nɛɛ́ deèda ti sḭ̀ḭ̀ma. ²⁷ Yè kó ti sɔ̰́ńtá tí n'kaàdi-í-ma é n'ceí sá̰à̰di nà bɔɔ̀pùukú Weèdi sídàma, nà ha̰kpeemú nì kó ká̰ńtá-pu kú mɛhɛká toyedàpa kà mú pà hàdi. ²⁸ Kà nìi de yetà-nà Mɔ̀yísì kpɛ̰́ńtìnùka, kà nìi pàdɛ́ɛ́ yoo pàta̰a̰ hḭ́n à̰à̰ t'oò dɛ́hà-á-ma, pà de hɔ̰́ kɔ̀ù-ú-ma ye yaǹn kà séèma é n'kɔ́ɔ́. ²⁹ K'yè de yòǹ mɛma nà Mɔ̀yísì kpɛ̰́ńtìnùka, ntɛ́ yè kó n'yòmà-dà kà nìi yɔ̰́sáà Weèdi Bíitá, è pú kɛdà yècḭ́ḭ̀ hḭ̀ma Weèdi ò pa̰à̰-nà-ma múnáma kà mà dèù o sḭ̀ḭ̀ma? Ntɛ́ yè kó n'yòmà-dà k'ò tèù Weèdi Sèdi mɛ̀nì pa̰kú-di pa̰á̰suumá? O kú toyɔ̰́ńti pú kó ha̰tá dò? ³⁰ T'oò yá̰á̰-ma, mɛ̀ǹǹ hḭ́n-kó è yɔ̀:

Mmí-dà bopù bàni,

mmí-dà bopù bá mɛ̀ǹǹ dɛ̀ɛ̀-ko sànà-sa.

Mɛnń-dà mɛ̀ɛ tṵ́mà hḭ́n è yɔ̀:

Bateó kó sída-á-ma o nìku.

³¹ Yè dɔǹ-ń-ma è yɔ̀ nìdo é dɔdi Weèdi mɛ̀nì fòù-di nɔ̀hi mɛhɛká.

³² Nɛ́ deǹta nɛ ceekú tḭ́ń wɔ̀ni nà Weèdi kà mìì é pa̰á̰-sa. Ye kú daàka mɛhɛká, nɛ de ta̰ntà Weèdi wɛmá kà pá nɛ diá náńkú-dà sàma, kà nɛ́ màa mɔ̀di kà nì kpenì. ³³ Wɔ̀ni nìcɔ̰́, pà de hɔ̰́ nɛ teùnaà-á-ma é nɛ diá náńkú nìpa yìhìka, wɔ̀ni tɔɔ̀di kà nɛ té pɛ́ɛ́ é dii-nà náńkú pà fá̰kápú-pa ma kú bookù . ³⁴ Mɔ́masí hḭ́ǹka, nɛ de pɛ́ɛ̀ é dii-nà-á-ma náńkú pà de kpenà-pa nà Sèsíì yèdi. Kà pà de fedà nɛ kááma màcɔ̰́mà, nɛ de hɔ̰́ teha-á-ma nà yaǹnaakú mìì tee-sá nɛ yá̰á̰-ma è yɔ̀ nɛ káá kááma tɔɔ̀ma, kà mà ha̰tà tɔɔ̀ma wɛǹni è pú yɔɔ̀hu. ³⁵ Nɛ dá yetá é féná nɛ daḿma. Kà nɛ sɔ̰ncí è mà káá, nɛ kó wáńtá dɛ́tá boutí sàti-dà Weèdi pesá. ³⁶ Yè békú nɛ́ pa̰á̰ wɛ̰́ɛ̰́ma-dà, k'yé teha kà nɛ́ nɛɛ́ pa̰á̰ Weèdi dɔ́sí-sa, ye kú dàhàka kà ní nɛ́ kɔ̰́ɔ̰́ nì hḭ́nà nùdi è yɔ̀ nì kó nɛ kɔ̰́ɔ̰́-sa. ³⁷ Mií-ì tee pà wà̰tà-ma Weèdi pɔ̀kàhi mɛhɛká è yɔ̀:

Wɔ̀ni cɛ̰́masí-dà kadí,

wɔ̀ni sim̀mɔ́ǹni mɔ́ń-mɔ́nní,

kà mɛ̀ǹǹ kó tɛ̀ni-kó-ní é tɛ̀ni,

ò koò pú kó yóka.

³⁸ Weèdi yɔ̀: Mɛ̀ǹǹ káá-ko dandaní,

mɛnń-dà coó ni yìhìka,

mɛnń-dà mɛ̀ɛ kó n'fòù.

Àmá k'ò tón dàhàka,

ni yaǹnaakú kùcɔ̰́kù

koò kó n'kɔ́ɔ́ o hḭ́ǹka.

³⁹ Tḭ́ńti, ti pú yòǹ nìpa mɛ̀m̀pà tóǹ-pa dàhàka è té taá fédí. Ti yòǹ nìpa mɛ̀m̀pà dań-pa-dà Weèdi hḭ́ǹka è yá̰á̰ è yɔ̀ ti kó dɛ́tá fḭ́táma.