Danieli
Pepongkaa lolita
Sura ide nauki Danieli i temponda to Yahudi narumpa kapari lawi napopeahi-ahihe hadua datu au rahanga Nebukadnesar. Laomi Datu Nebukadnesar hangko i tampo Babeli mampombealaa to Yahudi, hai bosahe au ratawani raanti lao i tampo Babeli, tepesua Danieli au mouki sura ide.
Sura ide nguru-nguruna teuki i lalu rompaka basa. Kirana 1 hawe kirana 2:4a hai kirana 8 hawe kirana 12 rauki i lalu basa Ibarani. Kirana 2:4b hawe kirana 7:28 rauki i lalu basa Aram.
Tunggaia sura ide bona mopakaroho lalunda to Yahudi hai mopahawe kana i apa au mewali hai apa au naita i lalu bahangkia pakana pampetudungia. Napahawe kaPue Alana haduduaNa au ina mampeparaihe, hai ope-ope iwalinda ina Nanawohe. I sura ide teuki wori Pue Ala haduduaNa au ina moaro hambua kadatua au ina rapaidai taunaNa.
Ihina sura ide, ara rompaka. Kaisa iami lolitakana Danieli hampohimadaa au ratawani (Kirana 1:1–6:29). Barahe mala rapakanawo iwalinda, lawi maroho hai tetida pepoinalainda i Pue Ala. Ope-ope ide mewali i temponda datu Babeli hai datu Persia moparenta. Kadua iami pampetudungia au napahawe Pue Ala i Danieli (Kirana 7:1–12:13) au mopakanoto kaina hawena bahangkia datu au mombeusu-usu ina moparenta. Ope-ope iti mewali, mepongka i kadatua Babeli hawe-hawe i poparentana Pue Ala au mewali i kahawena Yesu Kerisitu (Kirana 9:25).
Hangko indo, tepakanoto i kahopoana dunia, ina hawe hadua au mepopeahi-ahi hai mampoiwali Kerisitu. Hai tepahawe wori kana i penangina taunana Pue Ala.
Ihi sura
1. Danieli hai ranganahe (1:1–6:29)
2. Pampetudungia au naita Danieli (7:1–12:13)
a. Iba baana binata (7:1-28)
b. Dimba laki hai towau laki (8:1–9:27)
c. Popahawena hadua malaeka hangko i suruga (10:1–11:45)
d. Kahopoana (12:1-13)