Kahopoa dunia
12
1 Mololita mbuli malaeka au mewaru bula hai maalusu,* nauli, “I tempo iti, ina hawe tadulako mahile, iami Mikaeli, malaeka au mokampaihe hangka to Yahudimu. Ina ara kapari mahile, au bara mani hambela mewali, mepongka i kaarana ngamba-ngambaa hawe i tempo iti. Agaiana i tempo iti, hangka to Yahudimu ina rahoremahe, iami hema pea au teuki hangana i lalu sura ngkatuwo. 2 Tauna bosa au matemohe ina tuwo hulehe. Hanggaa ina molambihe katuwo au bara mokahopoa hai hanggaa ina molambihe pepopeahi-ahi hai kapari au bara mokahopoa. 3 Hai tauna au manoto lalunda ina mewangkahe nodo pewangka i langi. Ihira au moninimohe bosa tauna mobabehi au maroa hai manoto. Peisahe rapandiri nodo betue au mewangka i hae-haena.”4 Mololita mbuli malaeka iti iriko, nauli, “Agaiana oio Danieli, nuwuniangi ope-ope ngkora iti hai nupenemi sura iti bona bara tebubungkahi hawe i kahopoa dunia. Bosa tauna ina mohaoki hai mampepekiri apa au ina mewali; hai kapande ina tetambai.”
5 Roo indo, iko Danieli, moitana rodua au meangka i wiwi halu, hadua ntanda inde hai hadua ntanda orupe. 6 Au hadua iti mekune i hadua au ara ntanda i uluna, au mewaru bana bula maalusu,* nauli, “Hawe impira au metingkarai ide ina mewali?”
7 Roo indo, tauna au meangka ntanda i uluna, au mewaru bula maalusu iti, moangka taiena rorombali i langi hai mosumpa i lalu hangana Ia au monono tuwoNa, nauli, “Hinangka au metingkarai iti, ina mewali talu parena hantanga kamahaena; hai ane opemi kuasanda taunana Pue Ala, hopo womi pepopeahi-ahi iti!”
8 Ope-ope au nauli iti, tou-tou kuhadi, agaiana bara kuisa lempona. Ido hai kupekune, “Ampuku, apa au ina mewali i kahopoana hinangka iti?” 9 Agaiana nahanai, nauli, “Danieli, mesulemoko ide-ide i katinda lalu, lawi hinangkana iti tewuniangi hai rapenemi hawe i kahopoa dunia. 10 Bosa tauna ina rapetandaka hai rapamalelaha agaiana ope-ope tauna au kadake batenda mobabehi liliu dake. Bara huba hadua hangko irihira au ina moisa apa tunggaiana Pue agaiana tauna au manoto pea lalunda au ina moisa. 11 Mepongka i karapopengkaroona popenomba alo-alonab hai karapopeangkana anitu ‘Dake au Mepamaropu’ iti,c ara hasabu rongatu hahio pulona alona.d 12 Morasimohe tauna au matundu mampepegia hawe hasabu talu atuna talu pulona hai lima alona. 13 Oio Danieli mesulemoko, matunduko hawe i kahopoana tuwomu. Oio ina mateko agaiana ina tuwo huleko hai molambiko saromu i kahopoa dunia.”