Amos i

Amos

Pepongkaa lolita

Amos iami hadua nabi au mopahawe Ngkorana Pue i pare 760 hangko damani Yesu rapoanaka. I tempo iti, kadatuanda to Yahudi tegaami mewali ronggaa. Kadatua ntanda i Lau iami kadatuanda tina Yehuda hai tina Benami, pohudaa poparentana i Yerusale. Hai kadatua Isaraeli ntanda i Raa, kadatuanda hampulo tina ntanina, pohudaa poparentana i Samaria.

Amos hangko i wanua Tekoa i Yehuda, agaiana ia lao i kadatua Isaraeli hai mopahawe Ngkorana Pue i tauna au ara indo (Basa Amo. 7:10-12). Mewali, ngkaia bambari au hangko i Pue au napahawe nabi Amos, iti tetunggai i to Isaraeli iamohe tauna au maida i kadatua ntanda i Raa.

I tempo iti tauna au pebuku i tamponda to Isaraeli maroa katuwonda. Agaiana ara topebuku au mampopeahi-ahihe tauna au meahi-ahi. Bosahe tauna au ara indo menombahe i anitu. Agaiana tauna au menombahe i Pue bara mpuu hangko i lalunda lawi bara bula lalunda. Amos pebai mpuu mopahawe tewaina Pue i to Isaraeli, nauli, “Pue ina mohuku to Isaraeli, duunda ratawani hai raantihe lao i kadatua ntanina.” To Isaraeli napopaingaahe Amos bona mesulehe menomba i Pue hai mobabehihe au manoto. Ia mopahawe wori, i kahopoa dunia Pue ina moaro hule kadatuana Daudi hai mowatihe taunaNa (9:11-15).

Ihi sura

1. Pepongkana

2. Pue Ala ina mohuku to Isaraeli hai ope-ope tampo au hungku i Isaraeli (1:3–2:16)

3. Popahawe kana i pehukuna Pue (kirana 3:1–6:14)

4. Pampetudungia kana i bahangkia pakana pehuku (7:1–9:10)

5. Isaraeli ina raaro hule (9:11-15)