Amos
Nabi au hangko i Tekoa mopahawe kana i pehukuna Pue
1
1 Idemi lolita au napahawe Pue Ala i Amos, hadua topokadipura dimba au hangko i Tekoa. Ia mewali nabi rompare hangko damani mewali linu au rumihia i tempona Datu Usia moparenta i kadatua Yehuda, hai Datu Yerobea, anana Yoas, moparenta i kadatua Isaraeli. Pue mopatongawa i Amos paka-pakana babehianda to Isaraeli.2 Mololitami Amos, nauli,
“Hangko i Sion, Pue mowotu nodo singa,
hangko i Yerusale Ia mampopahadi wotuNa nodo gumpata;
pada porewua mewalihe bangi,
hehi au i wowo bulu Karmel malauhe.”*
Siria
3 Node ngkorana Pue:
“Lawi morombela gagamohe au maida i wanua Damsikb i tampo Siria mobabehi dake,
batenda ina Kuhuku,
lawi rumihi gaga pampopeahi-ahinda to Gilead,
rapapatehe nodo pare au rahambe.
4 Idomi pane sou kadatuana Datu Hasael ina Kuhuwe,
hai bentena Datu Benhadadc ina pumpu naande api.
5 Ope-ope pehola babaka bente i Damsik ina Kupakarugi,
hai tauna au maidahe i lembod Awen ina Kupatunahe.
Tauna au moparenta i Bed-Eden ina Kupopendaulu hangko i kadatuana,
hai to Siria ina ratawanihe hai raantihe lao i tampo Kir.”e
Nodomi ngkorana Pue.
Pelisiti
6 Node ngkorana Pue:
“Lawi morombela gagamohe au maida i wanua Gasa i tampo Pelisiti mobabehi dake,
batenda ina Kuhuku,
lawi ope-ope tauna au hangko i ngamba ntanina au maida indo,
ratawani hai rapobaluhe i to Edom
bona rapopewalihe hawi.
7 Idomi pane ope-ope wala watu au motoleliki wanua Gasa ina Kuhuwe,
hai ope-ope bentenda ina pumpu naande api.
8 Ope-ope tauna au maida i wanua Asdod ina Kupatunahe,
nodo wori au moparenta i wanua Askelon.
Tauna au maidahe i wanua Ekronf ina Kuhukuhe,
hai ope-ope to Pelisiti au mampakahe melangka batenda Kupaone.”
Nodomi ngkorana Pue Ala.
Tirus
9 Node ngkorana Pue:
“Lawi morombela gagamohe au maida i wanua Tirus mobabehi dake,
batenda ina Kuhuku,
lawi moliungimohe podandi pohintuwu,
motawanihe ope-ope tauna au hangko i ngamba ntanina, au maida i hinangka boea,
hai rapobaluhe i to Edom bona rapopewalihe hawi.
10 Idomi pane wala watu au motoleliki Tirus ina Kuhuwe,
hai ope-ope bente wanuanda ina pumpu naande api.”
Edomg
11 Node ngkorana Pue:
“Lawi morombela gagamohe au maida i tampo Edom mobabehi dake,
batenda ina Kuhuku, lawi barapi ara kamaahinda.
Ihira mobungkamohe to Isaraeli, moleri mohalaluhe,
mamboli liliuhe karumpunda hai mepailalu liliuhe.
12 Idomi pane wanua Teman ina Kuhuwe
hai ope-ope bente i Bosra ina pumpu naande api.”
Amon
13 Node ngkorana Pue:
“Lawi morombela gagamohe au maida i tampo Amonh mobabehi dake,
batenda ina Kuhuku,
lawi i temponda mombeala bona mopamaemba tamponda,
ihira moberemohe tainda tomantimi au maida i Gilead.
14 Idomi pane wala watu au motoleliki wanua Raba ina Kuhuwe,
hai ope-ope bentena ina pumpu naande api.
Ina narumpahe pombeala hai pohewo-hewo
nodo angi mata i tempona kealimuru.
15 Datunda ina ratawani
hihimbela hai taunanahe au mapangka lantinda.”
Nodomi ngkorana Pue.