Moabi
2
1 Node ngkorana Pue:“Lawi morombela gagamohe au maida i tampo Moabia mobabehi dake,
batenda ina Kuhuku,
lawi mokaemohe talumbana datunda to Edom,
buu-buuna raala hai raintu duuna mewali awu.b
2 Idomi pane tampo Moabi ina Kuhuwe,
alana ope-ope bente i Keriot pumpu naande api.
To Moabi ina matehe i lalu pohewo-hewo pombeala,
naula pogee-gee i tempona tatamburu ratawue.
3 Ope-ope tauna au moparenta hai au mapangka lantinda i lalu kadatua Moabi
ina Kupapatehe.”
Nodomi ngkorana Pue.
Yehuda
4 Node ngkorana Pue:
“Lawi morombela gagamohe au maida i tampo Yehuda mobabehi dake,
batenda ina Kuhuku,
lawi barahe moula paturoNgku,
hai barahe moula hawaNgku,
agaiana rapakanawo peahe anitu
au rapenombai toiorunda.
5 Idomi pane tampo Yehuda ina Kuhuwe,
hai hinangka bente Yerusale ina pumpu naande api.”
Pehukuna Pue i to Isaraeli
6 Node ngkorana Pue:
“Lawi morombela gagamohe au maida i tampo Isaraeli mobabehi dake,
batenda ina Kuhuku.
Mampobaluhe tauna au manoto mewali hawi bona molambi peahe doi,
nodo wori topeahi-ahi au bara rabuku mobaiari indanda,
nauri indanda iti sukana pea holona hapari sandale.
7 Mopakaparihe tauna au malede,
hai mopakanawohe tauna au meahi-ahi.
To ntaliana laohe mampoluhi hadua hawi towawine,
alana mopakadakehe hangaNgku au malelaha.
8 Maturuhe i hola meja pohuwea popenomba,
mampoalihihe kumba au mewalimi popotanga indanda topeahi-ahi.c
I souNgku, ihira moenuhe anggoro
au raala hangko i tauna au ragiwu.
9 Moleri hangkoia, anti kaikamuna paneNa mopatuna to Amori
au kapangkanda nodo kau au mapangka ntepuu
hai kamarohonda nodo kau au matua ntepuu.
Opehe kupatuna mepongka i datunda
hawe i topeahi-ahi.
10 Ikomi au moantikau mesuwu hangko i tampo Masiri,
hai moninikau i pada wungi i lalu iba pulona parena kamahaena,
bona mopaidakau tamponda to Amori.
11 Kupileimohe bahangkia anami mewali nabi,
hai anami au mangura mewalihe Nasird
Noumba to Isaraeli, bara pae nodo?”
Nodomi ngkorana Pue.
12 “Agaiana, tauna au mewali Nasir nioakahe nipaenu anggoro
pane moliungihe podandinda Iriko.
Hai barahe nipaliu nabiNgku mopahawe lolitaNgku.
13 Mewali nipehadingi. Ide-ide ina Kuhukukau ope-ope,
alana terimbikikau nodo roda
au moanti pare mantimi-ntimi.
14 Mogalori tauna au malingkati bara ina peisa melangka,
tauna au maroho ina matanta rohonda,
hai tauna au keate mombeala bara ina rabuku melangka.
15 Tauna au mepana barapi ina rabuku mantaha,
tauna au magasi pelangkana barapi ina peisa melangka,
hai tauna au modara barapi ina rabuku mengkatuwo.
16 I alo iti, surodado au pebai ntepuu hangko i olonda au keate
ina melangkahe mopalehi parewa mpombeala.”
Nodomi ngkorana Pue.