Nabi au napatoka Pue mopahawe ngkoraNa
3
1 Ikamu to Isaraeli, au Naninimokau Pue mesuwu hangko i tampo Masiri, nipehadingi ngkorana Pue, Nauli node:2 “Hangko i ope-ope tina i wongko dunia,
ikamu pea au Kukaisanga hai Kukamata ntepuu,
idomi pane ikamu ina Kuhukukau
anti kangkaiana dosami.”
Nodomi ngkorana Pue.
3 Mololita mbuli Amos, nauli,
“Arahe pae tauna molumao sambela
ane bara himbela tunggaianda?
4 Ara pae hambaa singa megoa i pandulu,
ane bara mani molambi paandena?
Ara pae ana singa megoa hangko i paidaana,
ane bara mani mehaka?
5 Peisa pae hambaa tadasi kana kalapu,
ane bara raopai au rataa?
Peisa pae hea au rataa i tampo maambe,
ane bara pekana?
6 Arahe pae tauna i wanua au bara langa
ane mohadi pomoni tatamburu pombeala?
Ara pae pepa mewali i wanua,
ane bara napopewali Pue?
7 Pue Ala bara mpuu ina mampopewali hinangkana,
hangko damani Napahawe tunggaiana iti i nabi, tuduaNahe.
8 Ane singa moau,
hema au bara langa?
Ane Pue Ala au mongkora,
hema au nabuku bara mopahawe lolitaNa?”
Kamaropuna Isaraeli
9 Mololita mbuli Amos, nauli, “Nipahaweahe ope-ope tauna
au maidahe i lalu bente Asdod hai Masiri,
niuliangaahe node, ‘Mogulumokau i bulu-bulu au hungku i Samaria,
bona peisa nipeita kamagunego mahile i lalu Isaraeli,
hai pepopeahi-ahi au mewali inditi.’ ”
10 Node ngkorana Pue,
“To Isaraeli iti moihiihe bentenda hai parewa au raperampai hai raago,
i karoonda mampopeahi-ahi tauna ntanina
hai ami bara mpuu manoto lalunda.”
11 Idomi pane nauli Pue Ala node,
“Tamponda iti ina ratoleliki iwalinda,
pengkatuwoanda ina ragero,
hai ihi bentenda ina rarampaki.”
12 Node ngkorana Pue,
“Nodo rombua biti dimba hai hambise talingana
au mala naperampai toporewu hangko i nganga singa,*
nodo wori to Isaraeli au ara i Samaria haodi pearaihe au mala rapelae,
nodo pearaihe hasepa komo
hai hantepo biti koi.”
13 Mongkorami Pue Ala Au Makuasa, Nauli,
“Pehadingi hai popaingaahe pemuleana Yako.
14 I tempoKu mohuku to Isaraeli
anti kamampopengaanami dosanda,
Ina mogeroNa ope-ope pointua popenomba i wanua Betel,
alana tandu-tanduna matepo hai manawo i tampo.
15 Hinangka sou au rapaidai i tempo makuli hai au rapaidai i tempo madii ina Kugero.
Ope-ope sou au mahile hai au rabungai ngihi gaja
ina Kugero wori.”
Nodomi ngkorana Pue.