Pekambaroana Pue Ala i towawine to Samaria
4
1 Nipehadingi ngkorana Pue Ala ide,“Ikamu towawine au arakau i bulu Samaria,
kamarudumi nodo japi au maida i Basan tampo au marudu,
lawi mampohawikau tauna au i woi katuwonda,
tauna au meahi-ahi nitambai peahi-ahinda,
hai niuliangaahe tobalilomi, node,
Nipasilolonga paenu au melangui,
hai nianti mai bona maenu-enuke!
2 Pue Ala au malelaha mosumpami, node,
‘Katouana, ina hawe tempona,
ikamu ina radiikau hai popekai
nodokau ikane au kana pekaa.
3 Ikamu ina rabisosokau lao i raoa,
moliu i kalolu bente au rageromi iwalimi
hai ina radiikau lao ntanda i bulu Hermon.’
Nodomi ngkorana Pue.”
Penombanda to Isaraeli iami penomba au kadake
4 Pue Ala mongkora i to Isaraeli, Nauli,
“Madotakau lao menomba i Betel,
moleri lao peakau mobabehi dosa indo.
Madotakau lao menomba liliu i Gilgal,
mole melumburi pobabehimi dake indo.
Madondo moantikau binata nipopenomba,
hai popenomba hangkira hampulomi nianti i alo katalu.b
Kehapiri nodo, batemi pea madosa.
5 Madotakau mohuwe roti au raragii mewali popenomba kabula lalumi,
hai mampopaisakau kamampopenombami popenomba kabula lalu, moleri madosakau.
Bara pae itimi au niunde nibabehi, ikamu to Isaraeli?”
Nodomi ngkorana Pue Ala.
To Isaraeli barahe mau mesule i Pue
6 “Nauri Kupopewalimi bara ara paande i humalele paidaami,
Nauri Kupopewalimi rimi i humalele wanuami,
agaiana batemi pea bara mesule Iriko.”
Nodomi ngkorana Pue.
7 “Kutahami uda i tempona tuda-tudami moparaluu ntepuu owai,
iami talu mani wulana hangko da tempo mepare,
Kuudahi wanua au haogu,
hai wanua au ntanina bara Kuudahi.
Bonde au halimbona Kuudahi,
hai bonde au bara kana uda mewali bangi.
8 Hangko i bahangkia wanua, tauna maledemohe anti kamangkadounda,
ido hai laohe mohaoki owai i wanua ntanina,
agaiana owai indo bara handa.
Nauri nodo, batemi pea bara mesule Iriko.”
Nodomi ngkorana Pue.
9 “Kuhukumokau hai haki tuda-tuda,
hai pare au nituda malau hai mewali maeta.
Haki iti mopamalau anggoro au nituda i bondemi,
hai ope-ope kau saitun
hai kau ara au nituda i bondemi opemi raande kakomba.
Nauri nodo, batemi pea bara mesule Iriko.”
Nodomi ngkorana Pue.
10 “Kupakanamokau haki,
nodo au ralambi to Masiri.
Taunami au mangura Kupapatehe i pombeala,
hai ope-opehe darami raperampai.
Hinangka au moengaa bangka
Kupaara i bambarumi.
Nauri nodo, batemi pea bara mesule Iriko.”
Nodemi ngkorana Pue.
11 “Hangkira hangko irikamu ina Kupatunahe,
nodo kaKupatunana Sodomo hai Gumora.
Au tuwo manihe hangko i olomi,
nodohe tampa kau au radii hangko i lalu api.
Nauri nodo, batemi pea bara mesule Iriko.”
Nodemi ngkorana Pue.
12 “Idomi pane ikamu to Isaraeli, ina Kuhukukau.
Mewali, masilolongamokau molambi pehuku,
au ina kupopewali irikamu!”
13 Hinangka bulu hai himburu, Pue au mampopewali.
Apa pea tunggaiaNa, Napahawe i ope-ope tauna.
Ia au mampopewali mabaa hai kaindi,
Ia au moparenta i humalele dunia.
Pue Ala Au Makuasa mobabehi hinangkana ide.