Nani pandawi kana i to Isaraeli
5
1 O to Isaraeli, pehadingi nani pandawi au ina kunanika irikamu:2 “To Isaraeli au rapandiri nodo anantowawine,
madampami hai bara ara au moaro,
rapalikangaa i wongko tampona,
bara ara au mampopeangka.”
3 Node ngkorana Pue Ala i to Isaraeli:
“Hasabu surodado au lao mombeala hangko i hambua wanua,
hangatu pearai au ina mesule,
hai hangatu surodado au lao mombeala,
hampulo pearai au ina mesule.”
Rara molambi katuwo
4 Node ngkorana Pue i to Isaraeli:
“Mesulemokau Iriko,
bona barakau ina Kuhuku hai tuwo peakau!
5 Ineekau mohaoki petulungi i Betel,
ineekau lao i Gilgal
hai ineekau lao i Barseba,
lawi tauna au maida i Gilgal manotomi ina ratawanihe,
hai Betel ina raropui.”
6 Amos mololita i to Isaraeli, node:
“Mesulemokau i Pue bona tuwo peakau,
hai Ia bara ina mai nodo api
au mangulele hai mopapumpukau ope-ope to Isaraeli.a
I Betel bara ina ara au ina nabuku mopapate api iti.
7 Hurewumokau, ikamu au mopahala bataka au manoto,
hai morampaki kiranda tauna au manoto.
8 Pue au mobabehi hinangka betue.
Ia au mobaliki kaindi mewali mabaa hai mabaa mewali kaindi.
Ia au moatoro owai tahi pane mewali uda
bona moudahi lore.
Hinangkana ide, Pue haduduana au mobabehi.
9 Ia au mopatuna tauna au maroho,
hai mogero bentenda.
10 Mokahihikau tauna au manoto pobotusinda kara-kara,b
hai au mololita i katou-touana i lalu peparesaa.
11 Lawi mopakaparimokau tauna au meahi-ahi,
hai niperampai hangkira hangko i rasinda,
nauri mobabehimokau soumi au meawa,
agaiana bara ina nipaidai.
Nauri mantudamokau ngkaia anggoro,
agaiana bara ina nienu owaina.
12 Kuisa noumba karumihina kakadakemi
hai noumba kangkaiana dosami.
Mampopeahi-ahikau tauna au maroa,
hai rapaimpohikau
bona topeahi-ahi molambihe kapari i lalu peparesaa.
13 Anti babehiami iti, tauna au matopahec ina mandii-ndii i tempo iti,
lawi tempo iti iami tempo au kadake.
14 Hangangaa nipari-pari mobabehi au maroa
hai ineekau mobabehi dake,
bona tuwo peakau,
hai bona Pue Ala au Makuasa ina mamporangaikau,
nodo au niulimi.
15 Hangangaa nikahihi au kadake hai mobabehikau au maroa,
nipatogomi kamanoto i lalu pobotusimi,
babila Pue Ala au Makuasa ina mampokaahi
ope-ope tauna au mentara hangko i to Isaraeli.d
16 Pue, Au Makuasa, Pue Ala au kupenombai mongkora, node:
‘I hinangka rara hai i poteteruhua tauna bosa,
ina arahe tauna au moteria hai meraroa
anti kamaparina rahadi.
Mogalorihe topobonde au meahi-ahi ina rakakiohe
bona moteriahe hihimbela hai tauna au rasaro moteriahi tomate.
17 I humalele bonde anggoro ina ara poteria
anti kahaweNgkumi mohukukau.’
Nodomi ngkorana Pue.”
Alo pehukuna Pue
18 Hurewumi tauna au moharunga kahawena alona Pue!
Apa au niharunga i alo iti?
Alo iti iami alo pehukuna Pue,
bara alo au maroa.
19 I alo iti, ikamu ina nodokau hadua tauna
au mampelangkaha singa au ina mehaka,
agaiana mampohidupaari berua,
ba nodo hadua tauna au mesule i souna,
hai mempaga i rindi watu,
agaiana natilori ile.
20 Alona Pue tou-tou mpuu ina mopaara kamakaindi,
bara mopaara kamabaa,
lawi alo iti iami alo pehukuna Pue.
Penombanda to Isaraeli nakahihi Pue
21 Node ngkorana Pue:
“Kukahihi hai bara Kupokana penombami,
hai posusa alo-alo mahile agamami bara Kupokatana.
22 Ane mohuhukau popenomba rahuwe,
bara Kupokana.
Ane mohuhukau popenomba paande Iriko,
bara Kudoko.
Binatami au marudu au niintu mewali popenomba podame Iriko,
bara Kuunde.
23 Nipopengkaroo ope-ope nanimi au mebongoli iti.
Bara Kuunde mohadi pomonina kecapimi.
24 Aginari nipari-pari mobabehi au maroa
nodo owai au moili liliu,
hai mobabehikau au manoto
nodo mata owai au bara hambela mati.
25 Ee to Isaraeli! I kaKunininda toiorumi molumao i pada wungi iba pulona parena kamahaena, kamadudunda bara paraluu rapatongawa i lalu pohuhunda popenomba Iriko. 26 Agaiana, ide-ide menombarikau i Sakut, anitumi au niuli datumi, hai Kewan, anitu betue au nipenombai. Idomi hai hinangka anitu au nibabehi hangko i watu, hangangaa nianti haduduami, 27 i tempomi Kuhuku bona ratawanikau i hambua paidaa au karao hangko i Damsik.”
Pue, Pue Ala Au Makuasa au mongkora.