Kamagerona Isaraeli
6
1 Mololita mbuli Amos, nauli,“Hurewumohe tauna au mohadiahe katana maida i bulu Sion,
au mampemina kamaroa i bulu Samaria,
au tepamahilea tuwonda,
hai au doko rakahawei to Isaraeli merapi tulungi!
2 Laokau i wanua Kalne, hai nipeita,
hangko indolou molumaomokau lao i Hamat,
wanua au mahile iti i tampo Siria,
hai laokau i wanua Gat i tampo Pelisiti!
Nipehangu wanua iti maroho mani pane kadatua Yehuda hai kadatua Isaraeli,
ba maela mani tamponda pane tampomi?
3 Nipekiri mahae mani alo kapari,
agaiana anti babehiami, mopaholiga kahawena alo iti.
4 Hurewumokau au maturu-turu peakau i paturua au maroa ntepuu,
au rabungai ngihi gaja,
hai mohuda-huda peakau indo,
au mosusakau moande bau ana japi hai bau ana dimba au marudu.
5 Matanakau mokarahi nani nodo au nababehi Daudi,
hai niponani moula pomoni kecapi.
6 Maenu peamokau anggoro au maroa ntepuu i mangko au makara,
hai mopakekau lana mawongi au maroa ntepuu,
agaiana bara masusa lalumi anti kamagerona Isaraeli.a
7 Ido hai, ikamumi au nguru-nguruna ina ratawani,
hai ina hopomi posusami, ikamu au mohuda-huda peakau.”
8 Pue Ala mosumpami i lalu hangaNa haduduaNa;
node Ngkorana Pue, Pue Ala Au Makuasa:
“MokahihiNa kamampemahilenda to Isaraeli,b
hai mokahihiNa bentenda au maroho.
Ina mampehuhuangiNa pohudaa poparentanda
iami wanua Samaria hai hinangka ihina i iwalinda.”
9 Ane ara manihe hampulo tauna au mengkatuhu i lalu haogu sou, batenda pea ina mate.
10 Hai ane hadua halalunda au mourusi karatawunda hawe, mai mampopesuwu watana halaluna hangko i lalu sou iti, ia ina mekune i tauna au ara i taleu sou iti, nauli, “Ara mani pae tauna au tuwo hihimbela hai oio?”
Nahanai tauna iti, nauli, “Barapi ara.” Halalunda au mourusi karatawunda tomate iti ina manguli, “Mandii-ndiike! Bara maroa ane mouli-ulike hangana Pue.”
11 Mewali nipehadingi. Ane Pue mampopesuwu parenta,
hinangka sou au mahile hai kokoi ina rapamaropu.
12 Peisa pae dara melangka i wongko bulu watu?
Ara pae tauna au peisa mopajeko tahi mopake japi?
Agaiana ikamu, mobalikimokau kanoto mewali rasu,
hai au kana nisalai!
13 Mampemahilemokau anti kamonangimi Lodabar,c
hai niuli, “Anti kamarohonta,
peisake mamperampai wanua Karnaim.”d
14 Node ngkorana Pue, Pue Ala Au Makuasa,
“Nipehadingi to Isaraeli, ina Kutuduhe surodado
au hangko i ngamba ntanina mai moewakau,
hai ihira ina mokuasaikau hai mampopeahi-ahikau
mepongka hangko i rara lao i Hamat au i Raa
hawe i lembo Araba au i Lau.”