Pampetudungia kaisa: Kakomba
7
1 Idemi au napopaita Pue Ala iriko, Amos: I lalu pampetudungia iti, kuita Pue Ala mopaara hangguruma kakomba i tempona hehi kirana datu au ina mewali paandena binatana opemi rahambe, hai hehi pohambea iti mepongkami motumbe hule. 2 I temponda kakomba mepongka mopaope hehi i tampo, mololitamona, kuuli,“O, Pue Ala Au Makuasa, kuperapi Nuampungihe taunaMu!
Noumbami karabukuna to Isaraelia ina mantaha?
Bara pae ihira iti tauna au maledehe?”
3 Ido hai Pue mobaliki pekiriNa iti hai mongkora, Nauli,
“Apa au nuita iti, bara ina mewali.”
Pampetudungia kadua: Api
4 Idemi au napopaita Pue Ala iriko: Pue Ala motudungiana noumba kaina mohukuNa taunaNa hai kamapana api au rumihib. Api iti ina mopabangi humalele tahi au maemba duuna mati hai ina mopapumpu wori ope-ope bonde. 5 Ido pane mololitana, kuuli,
“O Pue Ala, ane peisa, Nupopengkaroo api iti.
Noumba kapeisanda to Isaraeli ina mantaha?
Bara pae ihira iti tauna au maledehe?”
6 Ido hai Pue mampopengkaroo tunggaiaNa iti hai mongkora, node:
“Au nuita iti, bara ina mewali.”
Nodomi ngkorana Pue Ala.
Pampetudungia katalu: Ladu
7 Idemi au napopaita mbuli Pue iriko: I lalu pampetudungia iti, kuita Pue meangka i wongko rindi watu moulu ladu bona mampenoto rindi iti, manoto ba bara. 8 Hai mongkorami Pue iriko, Nauli, “Amos, apa au nuita?”
Mehanana, kuuli, “Au kuita iami ladu!”
Mongkora mbuli Pue, Nauli:
“Bona nuisa, ina mouluNa ladu i tanga-tanganda taunaNgku to Isaraeli.
Tongawa, ihira nodohe rindi watu au bara manoto.
Barapi ina Kubaliki tunggaiaKu, batenda ina Kuhuku.
9 Ope-ope pointua popenombanda pemuleana Isaki
au ara i tongku-tongkuna ina ragero.
Hinangka sou penombaanda to Isaraeli
au malelaha ina ragero wori.
Ina mopatunaNa pemuleana Datu Yerobea i lalu pombeala.”
Amos hai Amasia
10 Amasia, hadua tadulako mpenombanda to Isaraeli i Betel, motuduhe tauna lao i Yerobea, datunda to Isaraeli, bona mopahawe tewaina au manguli node, “Ampuku datu! Amos hai bahangkiahe to Isaraeli, mogombomohe hai moliwomohe moewa datu, hai tauna i kadatua ide moulamohe apa au nauli. 11 Node nauli Amos,
‘Kadatua ide ina tuna,
lawi ina Nagero Pue Ala.
Yerobea ina mate i lalu pombeala,
hai to Isaraeli ina ratawanihe
hai raantihe kakarao hangko i tamponda.’ ”
12 Hangko indo, mololitami Amazia i Amos, nauli, “Pehadingi, nabi! Mesulemoko lao i tampomu tampo Yehuda! Nupahawe lolitana Pue indolou hai inditimoko masaoki paandemu. 13 Ineemoko mopahawe lolitana Pue i Betel, lawi i Betel ide iami paidaa penombaana datu, hai sou penombaa kadatua au malelaha.” 14 Agaiana nahanai Amos, nauli, “Katouana ide iko barana nabi hai bara worina pemulea nabi. Iko topokadipura peana dimba hai topobonde kau ara. 15 Agaiana, nakakiona Pue hangko i pobagoangku hai Natuduna mopahawe lolitaNa i to Isaraeli, taunaNahe.
16 Mewali ide-ide, pehadingi ngkoraNa Pue irio Amazia!
Lawi nuuliangaana node: ‘Ineeko mopahawe lolita au moewahe to Isaraeli,
hai mohowara lolita au moewahe pemuleana Isaki.’
17 Idomi pane Pue mongkora node: ‘Towawinemu ina mewali towawine au masilaka i wanua,
hai anamuhe towawine hai tobalilo ina matehe i pombealaa.
Tampomu ina rahoka hai rakira-kira i tauna ntanina.
Oio ina mateko i tamponda tauna au barahe moisa Pue Ala,
hai to Isaraeli ina ratawanihe hai raantihe kakarao hangko i tamponda.’ ”