Pampetudungia kalima: Pue meangka hungku i pointua popenomba
9
1 I lalu pampetudungia iti, kuita Pue meangka hungku i pointua popenomba, hai mongkora, Nauli,“Wombemide masisimbuku ope-ope wuntu arii au ara i souNgku,
duuna ope-ope atuna modua
hai maoru morumpingi waanda tauna.
Au tuwo manihe ina Kupapatehe i pombealaa,
bara huba hadua au ina peisa melangka
hai bara huba hadua au ina peisa mengkatuwo.
2 Nauri mokaemohe kalolu hawe i paidaa tomate,
batenda ina Kuhore hangko.
Nauri mengkahemohe hawe i langi,
batenda ina Kupopendaulu.
3 Nauri mentabungihe i wowo bulu Karmel,a
batenda ina Kuhaoki hai Kuhakahe.
Nauri rapentabungiaNa i pohi tahi,
ina moparentaiNa ile mahile au i tahib bona laohe natilo.
4 Kehapiri rapaintemohe iwalinda mewali toratawani,
ina Kupohawaahe iwalinda iti bona rapapatehe hai piho.
Batenda ina Kupatuna,
hai barahe ina Kutulungi.”
5 I tempona Pue Ala Au Makuasa mohedo dunia,
tampo batena moenggo.
Humalele dunia moenggo-enggo
nodo pobalumbana owai Nil i tampo Masiri;
idomi pane ope-ope tauna ina mapepa.
6 Pue moaro souNa i wongko langi,
hai mobinihi langi i wongko tampo bona mobobongi dunia.
Ia au moparenta owai tahi pane mewali uda
bona moudahi lore.
Pue au Makuasa au mobabehi hinangkana ide.
Pue ina mohuku taunaNa
7 Pue mongkora i to Isaraeli, Nauli:
“Ikamu to Isaraeli, ba nipehangu kamaahiNgku irikamu
melumbu hangko i to Etiopia?
Bara. Barakau Kupopontani.
Hangkoia, Ikomi au moninikau
mesuwu hangko i tampo Masiri,
nodo polimbaKu to Pelisiti hangko i Kreta,c
hai to Aram hangko i Kir.
8 Nipehadingi, Iko Pue Ala Au Makuasa
mokamata liliuNa to Isaraeli au madosa ide.
Ina Kupatunakau hangko i wongko dunia,
agaiana barakau ope-ope.”
Nodomi ngkoraNa Pue.
9 “Bona niisa, Kuhawakami,
i temponda to Isaraeli ina mopaidai tampo ntanina,
ina Kupilei hangko i olonda
nodo tauna au motapihi pare
bona tepatani ope-ope au bara mobundu hangko i olonda.
10 Ope-ope tomadosa
i olonda taunaNgku manguli,
‘Barake ina Napalikangaa Pue Ala narumpa kapari hai kapate.’
Agaiana, katou-touana ihirari au ina Kupapate i lalu pombeala.”
Dandi kana i katehorema
11 Node ngkorana Pue:
“Ina hawe tempona kadatuana Datu Daudi ina Kuaro hule.
Kadatua iti ide-ide nodo sou au mageromi,
agaiana, ope-ope rindina au magero ina Kupakaroa
hai ina Kuaro hule,
bona mewali nodo hangkoia.
12 Hinangkana iti ina Kubabehi
bona to Isaraeli mokuasaihe pentaraa tamponda to Edom
hai ope-ope ngamba au hangkoia rakuasai i lalu hangaNgku.”d
Nodomi ngkorana Pue, hai Ia au ina mobabehi hinangkana ide.
13 Node ngkorana Pue:
“Nipehadingi! Ina hawe tempona taunaNgku bara manihe roo mepare,
hawe mbulimi temponda mantuda anti kamaruduna tamponda.
Anti kangkaiana wua anggoro,
tauna barahe mengkangkaroo mopie owaina.
Owai anggoro ina tudo hangko i bulu
hai moili hangko i tongku-tongkuna.
14 Ina Kuwati hulehe taunaNgku to Isaraeli.
Wanua au magero ina raaro hai rapaidai hule.
Ina mantudahe anggoro hai raenu owaina.
Ina mantuda-ntudahe hai raande wuana.
15 TaunaNgku ina Kupopaida hulehe i tampo au Kuweimohe hangkoia,e
hai barapohe ina Kupopesuwu hangko indo.
Ihira nodohe tuda-tuda au Kutudami barapi peisa rawuka hule.”
Nodomi ngkorana Pue Ala au nipenombai.