Pampetudungia au naita Danieli
(7:1–12:13)
Danieli mampololita kana i pinatuwo au iba baana
7
1 Hambela tempo, i pare kaisa poparentana Belsyasara datunda to Babeli, tangangku leta, iko Danieli, moita hambua pampetudungia i lalu pangipingku. Mewali, ope-ope au kuita iti kuuki, hai idemi tuntukana: 2 “Moitana himburu kebuu au mewui hangko i Mata alo, i Katampua alo, ntanda i raa, hai hangko i Lau mampopoenggo tahi au maemba, 3 hai iba baana binata mahile mesuwu hangko i tahi au montani-ntani lenggenda. 4 Au kaisa lenggena nodo singa hai mokapi nodo kapi rajawali.b Tangana mani kutotoki, unga pea malehoki kapina pontimali, hai binata iti teangka hangko i tampo, hai meangka nodo tauna, hai rawei pekiri nodo tauna.5 Hai kuita mbuli hambaa binata ntanina, iami binata kadua. Lenggena nodo berua,c meangka hai biti bokona, hai kuita mampohama talu kauna buu oho. Hangko indo, kuhadi wotu manguli, ‘Nuandemi bau peunde-undeamu.’
6 Tangana mani kutotoki, mesuwu mbulimi binata ntanina au katalu. Lenggena nodo harimau,d agaiana i bengona ara iba mbuana kapi nodo kapi tadasi.e Binata iti mowaa iba,f hai rawei kamakuasa moparenta.
7 Roo indo, kuita mbuli hambaa binata au kaiba, au maroho ntepuu hai melangaki.g Hai ngihina mahengka hangko i besi, ia mehepa-hepa hai meande, hai pentarana naihe-iheki. Binata iti bara himbela hai binata au mesuwu ioru; binata iti motandu hampulo.
8 Tangangku mampepeita tandu iti, unga pea tuwo tandu au ntanina i olo tanduna. Tandu iti kokoi agaiana peisa mopamawuka talu mbuana tandu au tuwohe ioru. Tandu au kokoi iti momata nodo mata tauna hai mohume au mohowara lolita pampemahile.”
Pampetudungia kana i au monono tuwoNa
9 “Tangangku mani mototoki pampetudungia iti, kuita bahangkia kadera kadatua rapahuda indo. Roo ido, Ia Au Monono tuwoNa, mohuda i haogu kadera kadatua iti. WaruNa hai weluaNa bula nodo kakawu. Kadera hai tintilo kaderaNa mawaa nodo rore api. 10 Api mangulele liliu hangko i kadera kadatuaNa iti, nodo poili owai. Isabuna tauna timamahe ina moula hawaNa, hai i jutana tauna meangka i lindoNa. Roo indo, pobotusi kara-kara rapepongkami, hai sura poukia ope-ope babehiah rabungkahimi.
11 Tangana mani kutotoki apa au mewali iti, kuhadi mani tandu au kokoi iti mohowara lolita pampemahile, alana binata au kaiba iti rapapate hai ratende i lalu api duuna pumpu. 12 Hai binata ntanina au kuitahe inona, raingihi kamakuasanda hai rapogiangaahe tuwo hawe i tempo au rapakanotomi.
13 I lalu pampetudungia iti, kuita wori hadua au nodo ana manusia; kahawena tauna iti mendaulu mai i lalu gawu.* Ia mohungkuki Au Monono Tuwona hai raanti lao i lindoNa. 14 Ia rawei kamakuasa hai kameawa, mewali hadua datu. Ope-ope tauna i hinangkana ngamba, tina hahalembo hai hinangka basa motoia Ia. KamakuasaNa iti monono, hai kadatuaNa bara ina tuna.”
Ope-ope pampetudungia rapololita lempona
15 “Ope-ope pampetudungia au kuita iti mopawuli hai mopamasusa lalungku. 16 Mewali, kuhungkuki hadua i olonda tauna au meangkahe indo, hai kuperapi bona hinangkana iti natuntuana lempona. Pane natuntua mpuumona lempona, 17 nauli, ‘Iba baana binata au mahile iti, lempona iba kadatua au ina ara i dunia. 18 Nauri nodo, tauna au mepoinalai i Au Makuasa ina modokohe kuasa moparenta, hai poparentanda iti ina tetida i hae-haena.’
19 Kaliliuana, kupeinao moisa lempona binata au kaiba iti, au bara himbela hai binata ntanina. Binata iti maroho hai melangaki. Hai ngihina au mahengka hangko i besi, ia mehepa-hepa hai meande, hai pentarana naihe-iheki. 20 Kupeinao wori moisa apa lempona tandu au hampulo i waana, hai kana i tandu kokoi au mesupa i boko mopamawuka talu mbuana tandu au tuwohe ioru. Tandu au kokoi iti momata nodo mata tauna hai mohume au mohowara lolita pampemahile. Tandu iti melangaki hangko i tandu au ntanina.
21 Tandu iti kuita mampombealaa taunana Au Makuasa hai ina menangimi. 22 Agaiana, tanganda mombeala, Ia Au Monono TuwoNa hawe mobotusi kara-karanda. Hai hawemi tempona ope-ope taunana Au Makuasa modoko kuasa meparenta.
23 Mewali, tauna au kupampekunei kana i lempona pangipingku iti mololita, nauli, ‘Binata kaiba iti iami kadatua kaiba au ina moparenta i dunia, hai poparentana bara himbela hai kadatua ntanina. Kadatua iti ina mokuasai ope-ope kadatua i dunia, napamarupu hai napangka-pangka. 24 Tandu au hampulo iami hampulo datu au ina moparenta i kadatua iti. Mehurunga hangko irihira, ina ara mbuli hadua datu. Datu iti ina montani ntepuu hangko i datu au ioruhe, hai ia ina monangi talu datu i olonda datu au hampulo iti. 25 Ia ina mohowara lolita au mopapakoi Au Makuasa, hai ina mampopeahi-ahi taunaNa. Ia mopari-pari mobaliki hinangka atura hai alo mahile agamanda taunana Au Makuasa, hai ina nakuasaihe talu parena hantanga kamahaena.
26 Hopo talu parena hantanga, Au Makuasa ina mopaara pobotusi kara-kara, hai kabotuana iami kamakuasana datu iti ina raala hai rapatuna. 27 Roo ido, ope-ope kadatua hai kamakuasa i dunia ina Nakiraiahe Au Makuasa i taunana, hai kuasanda moparenta bara ina mokahopoa. Ope-ope au makuasa i dunia ina mampeulaihe hawanda.’
28 Nodemi lolitakana pampetudungia au kuita. Pekiringku mopamasusa lalungku, ido hai mabadami lindoku, agaiana ope-ope iti bara huba hadua au kuuliangaa.”