Danieli i lalu lia watu singa
6
1 Bahangkia kamahaena hangko i kapatena datu Belsyasar, moparentami Dariu to Media mewali datu i tampo Babeli.a I tempo iti, tinuwuna ini pulona hai rompare. 2 Hangko indo, Dariu mogaa-gaa kadatuana mewali hangatu rompulo propinsi, hambua-hambua propinsi naparenta hadua gubernur. 3 Naangka worihe talu tauna au mewali to i wongkonda gubernur iti, tepesua Danieli,b hai irihirami rapahawe kana i bagonda ope-ope gubernur bona datu bara rabagiu. 4 Tongawa pobagona Danieli melumbu kamaroana hangko i pobagonda tauna au mapangka lantinda, hai ope-opehe gubernur, lawi rumihi kamapandena hai manoto laluna. Idomi hai napeinao datu ina naangka mewali toiwongkonda ope-ope tauna au mapangka lantinda hai ope-opehe gubernur i humalele kadatua.5 Hangko indo, ope-opehe gubernur hai tauna au mapangka lantinda, mohaokihe kamasalana Danieli i lalu pampopolumaona pobagona. Agaiana, bara huba hampaka salana au rahumba, lawi Danieli tauna au peisa rapoinalai, madota hai manoto i pampopolumaona bago. 6 Roo nodo, mololitamohe tauna iti, rauli, “Bara ara au peisa tasalaia Danieli, ba tauli ane kana i poagamana.”
7 Mewali, hoholigamohe lao i datu hai mololitahe iria, rauli, “O Datu Dariu, mononomi tuwona ampuku! 8 Ope-ope au mapangka lantiki, tadulako, ope-ope gubernur, sarungkoro gubernur hai topobago au ntaninahe, roomongkai mogombo. Kiperapi bona datu mampopesuwu hampaka parenta au hangangaa rapeulai mpuu. Maroa ane datu mampopesuwu hampaka parenta au hangangaa rapeulai i kadatua ide bona i lalu talu pulona alona, inee ara hadua au rapaliu mekakae hai merapi apa au naparaluu i anitu ba i tauna, batena pea i datu. Hema au bara mampeulai parenta iti, ina ranawo i lalu lia singa. 9 Kiperapi datu mampopesuwu hai motekengi sura parenta iti bona mewalimi aturanda to Media hai to Persia au barapi peisa rabaliki.” 10 Idomi pane Datu Dariu mampopesuwumi sura parenta iti.
11 Kanahadina Danieli sura parenta iti rababehimi, mesulemi Danieli i souna. Lincuna au i wongko rasungkekei ntanda i Yerusale; inditimi Danieli mekakae. I lalu hangaloa, talu belana molingkudu mekakae i Pue Ala au napenombai, nodo au paka nababehi. 12 Teduumohe tauna au bara mounde Danieli, hai rahumba mpuu Danieli tangana mekakae i Pue Ala au napenombai.
13 Roo indo, laohe tauna iti i datu, liliu mekunehe kana i sura parentana, rauli, “Bara pae datu mampopesuwumi hampaka parenta bona i lalu talu pulona alona ope-ope tauna batena pea mekakae hai merapi apa au naparaluu i datu, hai hema au bara moula parenta iti ina ranawo i lalu lia singa?”
Mehana datu, “Parenta ide mewalimi atura i tampo Media hai Persia au barapi peisa rabaliki.”
14 Liliu mololitahe tauna iti i datu, rauli, “Danieli, hadua au ratawani mai hangko i tampo Yehuda, bara moholoi hai bara mampeulai parenta au napopesuwumi datu, agaiana mekakaeri i Pue Ala au napenombai, talu belana hangaloa.”
15 Nahadimi datu kanodona, masusami laluna, hai duuna tampu alo nahaoki mani rara bona peisa pea motulungi Danieli.
16 Hoholiga mbulimohe tauna iti lao i datu, hai rauli, “Ampuku, hangangaa nukatuinao, ane moula aturanda to Media hai Persia, parenta au napopesuwumi datu bara peisa rabaliki.”
17 Roo indo, meparentami datu bona Danieli rahaka hai ranawo i lalu lia singa. Mololitami datu i Danieli, nauli “Pue Ala au nupenombai liliu iti, kuharunga Iami au motulungiko!” 18 Baba lia watu iti ratuko hai haogu watu au mahile, hai napene datu pene kadatua hai penenda ope-ope tauna au mapangka lantinda bona bara ara au peisa mokabaha Danieli hangko i singa. 19 Hangko indo, mesulemi datu i sou kadatuana hai hambengia bara maande, bara naunde rapalindo, hai bara peisa leta.
20 Madondo-dondo, mearomi datu hai manggagu lao i lia singa. 21 Kahawena indo, mekakiomi datu i lalu kawiorana hai kamasusana laluna, nauli, “Danieli, tuduana Pue Ala au tuwo! Nabuku pae Pue Ala au nupenombai liliu, mampeparaiko hangko i singa iti?”
22 Mehanami Danieli, nauli, “O datu, mononomi tuwona ampuku! 23 Pue Ala au kupenombai motudumi mai malaekaNa bona mokamumu nganganda singa iti, ido hai barana rapopoapa lawi tongawa barana masala i peitanaNa, hai nodo wori i datu.”
24 Matana mpuumi laluna datu, ido hai moparentaimi taunanahe bona mampopesuwu Danieli hangko i lia watu iti. Pane rapopesuwu mpuumi Danieli hangko i lia watu iti hai tongawa watana bara huba makekerusi, lawi Danieli mepoinalai mpuu i Pue Ala au napenombai. 25 Roo indo, datu moparentai taunanahe bona ope-ope tauna au mopakadake Danieli, rahakahe hihimbela hai sambokonda hai ananda, hai ranawohe i lalu lia singa. Hai i karanawonda iti, bara manihe mampaka toa, ralawamohe singa raande hai maitu buunda rameme.
26 Roo ido, Datu Dariu mopakatu sura i ope-ope tauna i hinangkana ngamba, tina hahalembo hai hinangka basa i humalele kadatua au manguli node: “Kuharunga roa ngkatuwo irikamu katetembaia! 27 I lalu sura ide kupahawe parentaku bona ope-ope tauna au maida i kadatuangku hangangaa langa hai mengkoru i Pue Ala au napenombai Danieli.
Iami Pue Ala au tuwo,
au tetida i hae-haena.
PoparentaNa bara ina tuna,
KamakuasaNa bara mokahopoa.
28 Ia au mehorema hai metulungi;
Ia mobabehi tanda kuasa hai tanda au metingkarai,
maroa i langi, maroa i dunia.
Puemi au mampeparai Danieli,
hangko i pehakanda singa.”
29 Nodemi polumaona katuwona Danieli. Mapangka liliu lantina hawe i tempo poparentana Dariu hai poparentana Koresi, to Persia iti.