Pampetudungia kana i dimba laki hai towau laki
8
1 I pare katalu poparentana Belsyasar,a iko Danieli, molambi mbulina hampaka pampetudungia au karombelana! 2 I lalu pampetudungia iti, kuita arana i wanua Susan pohudaa poparenta poropinsi Elam. Meangkana i wiwi owai Ulai, 3 hai i wiwi owai iti, kuita hambaa dimba laki au motandu.b Tanduna iti ngkararu, agaiana ara hambua au melolu. Tandu au melolu iti tuwo i boko. 4 Kuita dimba iti metandu ntanda i Katampua alo, ntanda i Raa, hai ntanda i Lau.c Bara huba hambaa binata au nabuku moewa binata iti ba tekabaha hangko i kamakuasana. Apa pea peundeana, hangangaa nababehi, hai ia mewali mampemahile.5 Agaiana, tangana mani kutototoki, kuitami hambaa towau laki hangko i Katampua alo molumaohi humalele tampo. Anti kamagasina, barapi toa bitina i tampo.d I olo matana ara hambua tandu au mahile hai ngkararu. 6 Towau laki iti, lao motungka dimba laki au meangka i wiwi owai. Dimba laki iti napombetandua hai kamasekena. 7 Kuita towau laki iti mohungkuki dimba laki, hai anti kamasekena, ia motandu dimba laki iti, alana pontimali tanduna matepo. Anti kadanapi nabuku meewa, dimba laki iti tehepeka hai naihe-ihekimi. Bara ara au nabuku mamperurui.
8 Towau laki iti, rumihi pampemahilena. Agaiana i tempona maroho ntepuumi kuasana, mapohomi tandu au i olo matana hai i kapohoa tandu iti, nakatuwoi iba mbuana tandu au mahile au montani-ntani pelindoanda.
9 Hangko i hambua tandu au iba iti, tuwo hambua tandu kokoi au kamakuasana mambinihi ntanda i kalimpaana, ntanda i Mata alo hai ntanda i tampo au merae.e 10 Tandu iti mewali mahile hai maroho, ido hai pane nabuku lao moewa surodado suruga iami hinangka betue, hai arahe bahangkia hangko i olonda natendehe i tampo hai napangka-pangka. 11 Mogalori tadulako surodado suruga, naewa hai popenomba alo-alona au rapopenomba Iria napopengkaroo. Nodo wori souNa au malelaha ina nagero. 12 Tandu au kokoi iti motudu surodadona mampopengkaroo pohuhu popenomba alo-alona hai penomba au tou, tanda peewana. Ope-ope au naunde nababehi ina mewali.
13 Hangko indo, kuhadi hadua malaeka mololita i malaeka ntanina, nauli, “Hawe impira pampetudungia ide mewali? Hangkia mani kamahaena popenomba au Bara tou iti ina mopahuru popenomba au tou i Pue?f Hangkia mani kamahaena souna Pue hai surodado suruga ina napangka-pangka tandu au kokoi iti?”
14 Mehana malaeka ntanina, nauli, “Rosabu mani talu atuna belana popenomba au bara tou iti rapopenomba, hangko rapakaroari souna Pue Ala au malelaha. Popenomba au bara tou iti rahuhu i tempo madondo hai kalumba.”
Malaeka Gabrieli mampololita lempona pangipi iti
15 Iko, Danieli, tangangku mani mampekiri bona kuisa lempona pampetudungia iti, unga pea meangka i lindoku hadua au nodo tobalilo. 16 Hangko i owai Ulai iti, kuhadi wotu au manguli, “Gabrieli, nupakanotoami tauna iti lempona pampetudungia ide.” 17 Liliu Gabrieli au meangka i lindoku mohungkukina. Mewali tingkarana hai rumihi kalangangku, ido hai tepalumbana.
Nauli Gabrieli iriko, “Ee manusia, bona nuisa, pampetudungia iti kana i kahopoa dunia!”
18 Tangana mani mololita iriko, tepalumbana hai malimpu. Agaiana nakingki taiengku hai napopeangka sulena. 19 Hai nauli, “Kuuliangaako apa au ina mewali i karumpuna Pue Ala, lawi au nuita iti, ina mewali i kahopoa dunia.
20 Dimba laki au nuita iti, rombua tanduna mopandiri datunda to Media hai Persia. 21 Towau laki iti, mopandiri kadatua Yunani, hai tandu mahile au i olo matana iami datu au kaisa.g 22 Iba mbuana tanduh au mesupa i kapohoa tandu au i olo matana, lempona iba kadatua ina mesupa i kadatua Yunani, agaiana rohonda bara himbela hai kadatua au nguru-nguruna.
23 Hai i kahopoa kadatuanda i tempona rumihi gagami kakadakena babehianda, ina mesupa hadua datu au matua laluna hai mapande meakalangi.i 24 Ia ina mewali maroho ntepuu, agaiana kamarohona iti bara rohona haduduana. Ia ina mopaara kapate au melangaki, hai apa au nababehi ina mewali. Bosa tauna au makuasa ina napapate, nodo worihe taunana Pue Ala. 25 Anti kamapandena meakalangi, apa pea au nababehi batena mewali. Ia ina mampemahile ntepuu, hai bara raduduu pekiri ina bosa tauna au napapate. Ia ina pebai moewa Pue Ala au melumbu kamakuasana hangko i ope-ope datu. Nauri nodo, ina hawe tempona ia ranangi, agaiana bara anti karoho manusia.j
26 Pampetudungia kana i popenomba kalumba hai madondo iti, tou-tou mpuu ina mewali. Agaiana hangangaa nuwuniangi hampai i hema-hema pea, lawi ope-ope ide mahae mani hangko mewaliri.”
27 Roo indo, iko Danieli, mahaimona bahangkia alona kamahaena anti kamawowengku. Kamaohangku, timama mbulimona mampopolumao bagongku i datu, agaiana pampetudungia iti kupepekiri liliu hai bara manina mongilo.