Danieli 9

Pekakaena Danieli

1 I pare kaisa poparentana Datu Dariu, anana Ahasiwero, pemuleana to Media au mewalimi datu i Babeli, 2 iko Danieli, mobasa-basana Ngkorana Pue, kupeita hai kupepekiri Ngkora au nauki nabi Yeremia kana i wanua Yerusale au rapatundehiami magero i lalu pitu pulona parena kamahaena.

3 Mewali, kupamanoto lalungku hai pekiringku i Pue Ala, hai mekakaena merapi ahi laluNa. Mopuasana hai mewaru ngkasusana, hai mohudana i awu tanda kamaparina lalungku. 4 Mekakaena mopangaku hinangka dosangki i Pue, Pue Ala au kupenombai.

Kuuli node, “O Pue Ala, au makuasa hai kubila, Nupabukei dandiMu hai ahiMu au bara mokahopoa i tauna au mampokaahiKo hai au mekingkihe i parentaMu. 5 Mobabehimongkai dosa, masalamongkai, kadakemi poantiki. Meewamongkai, parenta hai aturaMu bara kipeulai. 6 Barangkai mampoinalai tuduaMuhe, nabiMuhe au mololitamohe i lalu hangaMu i ope-ope datungki, tadulakongkihe, ulu bubungkihe ba irikami ope-ope to Isaraeli.

7 O Pue, Oio pea au manoto. Agaiana babehiangki mopakaeami watangki, ikami au maidangkai i Yudea hai Yerusale hai ope-opengkai to Isaraeli au mahawu-hawu iumba-umba pea kaarangki anti peewangki Irio. 8 O Pue, ikami hai ope-ope datungki, tadulakongkihe hai ulu bubungkihe, hintotongkai maea lawi madosamongkai Irio. 9 O Pue, Pue Ala au kipenombai, maahi laluMu hai meampungiKo nauri meewamongkai Irio.

10 Barangkai mampehadingi lolitana Pue, Pue Ala au kipenombai, au motudungkai tuwo hintoto hai atura au Nupaturoangkai, melempo i nabi, tuduaMuhe. 11 Ikami to Isaraeli molingkaimongkai hinangka aturaMu, hai madosamongkai lawi barangkai mampehadingi wotuMu. Ido hai molambimongkai pehuku nodo au teuki i lalu surana nabi Musa, tuduaMu anti kamadosangkimi Irio. 12 Nupabukeimi ngkoraMu au Nupahawemi irikami hai i topoparentaki kaina Nupatoana pehuku mahile i Yerusale nodo au bara mani hambela mewali i dunia. 13 Nodo au teuki i lalu surana nabi Musa, hinangka kapari ide morumpamongkai. Agaiana kehapiri nodo, barangkai merapi ahi Irio hai barangkai mampenosoi hinangka salangki hai bara woringkai mohaile kanoto au hangko Irio. 14 Nuhukumongkai hai kapari au Nupatimama amimi. Pue, Pue Ala au kipenombai manoto i hinangka au Nababehi agaiana batena pea bara kipehadingi wotuMu.

15 O Pue, Pue Ala au kipenombai, Nupatongawami kuasaMu i poniniMu taunaMu mesuwu hangko i tampo Masiri. KamakuasaMu iti rakatuinao liliu. Ikami ide madosa hai mobabehimongkai dake. 16 O Pue, moula kamaahina laluMu au Nutudungiamongkai hangkoia, kiperapi bona Nudiimi karumpuMu hangko i Yerusale, wanuaMu, bulu malelaha paidaaMu. Anti kamadosangki hai kamadosanda ulu bubungki, ido hai Yerusale hai taunaMu rakakabosaimohe ope-ope tauna au mewali hintonggiki. 17 O Pue Ala au kipenombai, Nupehadingimi pekakaengku hai pamperapiku. Kuperapi bona souMu au malelaha Nuaro hule hai Nupakaroa bona ope-ope tauna moisa kaOionami Pue Ala. 18 O Pue Ala, pehadingi hai peitangkai. Nuhailengkai hihimbela hai wanuaMu au malelaha au mageromi, lawi mekakaengkai Irio bara anti kamanotona lalungki, agaiana anti kamaahina laluMu. 19 O Pue, pehadingi hai ampungingkai. Nuhaile hai holiga wongkamia Nutulungi bona ope-ope tauna ina moisa Oiomi Pue Ala, lawi Yerusale hai ope-ope taunaMu, Oiomi ampuna.”

Gabrieli mopakanoto apa lempona pitu pulona belana pitu parena

20 Tangangku mekakae mopangaku dosangku hai dosanda hangka to Isaraelingku i Pue, Pue Ala au kupenombai, bona souNa i bulu au malelaha Napakaroa hule, 21 unga peana moita Gabrieli au hangkoia kuita i lalu pampetudungia. Ia membaro mai iriko i temponda tauna mohuhu popenomba kalumba. 22 Mololitami Gabrieli iriko, nauli, “Danieli, ide-ide maiko kutulungi bona nuisa apa lempona ngkora au nubasa au nauki nabi Yeremia. 23 Pepongkamu peami mekakae merapi tulungi i Pue Ala, pamperapimu iti Nahanaimi. Idomi hai pane maina irio bona kupahaweako hanaina pamperapimu iti lawi Napokaahi mpuuko Pue Ala. Mewali, nupehadingi maroa-roa ina kupakanotoako lempona pampetudungia iti.

24 Pitu pulona belana pitu parena iami iba atuna hahio pulona parena, Napakanotomi Pue Ala i hangka to Yahudimu hai i wanuamu au malelaha bona mopatuna hinangka dake. I tempo iti hinangka dosa ina raampungi hai kahintimba au monono ina rapatogo, alana pampetudungia au rauki nabi mewali tongawa hai souNa Pue Ala rapamalelaha hule.

25 Nukatuinao hai nupailalu: mepongka i karapopesuwuna parenta bona Yerusale ina raaro hule duuna i kahawena hadua tadulako au napilei Pue Ala mewali datu, ina ara tempo iba pulona hai hahio parena. I lalu iba atuna talu pulona hai iba parena, wanua iti ina raaro hule. Ope-ope rarana hai bente wanua Yerusale raaro ina hule, agaiana iti ina mewali i tempo au mapari. 26 I kahopona iba atuna talu pulona hai iba parena iti, tadulako au napilei Pue Ala ina rapapate, moleri barato masala. Hai ina mai surodadona hadua datu au maroho, liliu ina mogero wanua Yerusale hihimbela hai souna Pue Ala au malelaha. Kahopoa tempo iti ina mewali ngkasara nodo pelaboa owai au mopaara pombeala hai kamaropu. Ope-ope iti ina mewali hintoto hai popakanotona Pue Ala. 27 Datu au maroho iti ina mopaara podandi hai bosa tauna, au ina mewali i lalu pitu parena kamahaena. I laentanga pitu parena podandi iti, ia ina mampopengkaroo popenomba au rahuwe hai popenomba ntanina. Hangko indo, hampaka au melangaki au rauli ‘Dake au Mepamaropu’, ina rapopaida i souna Pue Ala duuna au mampopeangka rapapate nodo au napakanotomi Pue Ala iria.”