Pampetudungia i wiwi owai Tigris
10
1 I pare katalu poparentana Datu Koresi,* datunda to Persia, ara hampaka ngkorana Pue au rapatongawa i Danieli, au rahanga Beltsasar. Ngkora iti tou, hai mopatongawa kaina arana tempo au mapari ntepuu. Ngkora iti napailalu mpuu, hai nahaoki apa lempona. Pane rapatongawaa mpuumi apa lempona i lalu pampetudungia.2 I tempo iti, iko Danieli mopuasana merapi ampu i Pue talu mingguna kamahaena. 3 Paande au matama bara kuande tepesua bau, barana maenu anggoro, hai bara worina mekakarabi.
4 I alo karompulo hai iba wula kaisa,a meangkana i wiwi owai Tigris au maemba. 5 Unga pea, kuita hadua au mewaru bana bula au maalusu hai mampopampou bulawa ntepuu au hangko i tampo Ufas. 6 Watana meninto nodo paramata, lenggena mewangka nodo kila, matana nodo rore api, taie hai bitina mengkila nodo tambaga au raluluhi, wotuna nodo wotu tauna bosa.
7 Haduduangku pea au moita pampetudungia iti, bara raita ope-ope tauna au hihimbela hai iko nauri nodo wulunga ntepuuhe ido hai melangkahe mentabungi. 8 Haduduangku pearai rapalehi indo.
Tangangku mototoki au metingkarai iti, lindoku mewali mabada hai matantami rohongku. 9 Roo nodo, mohadina wotu tauna au kuita iti hai i kakuhadina wotu iti liliu tepalumba hai malimpuna. 10 Agaiana ara taie au mampopearona ido hai kubuku molingkudu hai mempagana i tampo.
11 Roo nodo, mololitami, nauli, “Danieli, oio tauna au napokaahiko Pue Ala. Meangkamoko hai nupehadingi maroa-roa lolitangku ide. Iko, Natuduna mai irio.” I kanauliangaangku ide, meangkana morada-rada.
12 Roo ido, nauli iriko, “Danieli, ineeko langa. Mepongka peami alo kaisa i kanupakanotonami lalumu mengkaiwoi i Pue Ala au nupenombai bona mongiloko kana i pampetudungia iti, Napehadingimi pekakaemu. Anti pekakaemu, alo iti peawomi kemaimona irio.
13 Idori, hadua tokadake au mokuasai kadatua Persiab mampombealaana rompulo hai hangalo kamahaena. Agaiana Mikaeli, hadua au hangko i olonda tadulako malaeka, hawe motulungina hai ia kupalehi indo molindo datunda to Persia. 14 Mewali, maina mopatongawaako apa au ina mewali i ope-ope hangka to Yahudimu, i alo-alo au ina mai. Lawi au nuita iti iami mampololita kana i alo au ina mai.”
15 I kanauliangaangku ope-ope iti, motumpamona hai barana peisa mololita. 16 Unga pea napetobo humengku, ido hai kubungkahimi humengku hai mololitana iria, kuuli, “Ampuku, pampetudungia iti mohaingina hai mopamatanta rohongku. 17 Ide iko hawimuna, bara kusauru mololita irio! Rohongku barapi ara hai maparimi kuhadi moinao.”
18 Roo nodo, natobo mbulina ido hai maroho hulena.
19 Hai ia mololita, nauli, “Danieli, oio napokaahiko Pue Ala, ineeko langa, nupatindami lalumu. Marohomoko! Maroho ntepuumoko.”
Tangana mololita iriko, kuhadi maroho mbulimi watangku hai mololitamona, kuuli, “Ampuku! Mololitamoko iriko, lawi nuweimona roho.”
20-21 Mewali mololita mbulimi, nauli, “Ara nuisa, moapa hai maina irio? Tunggaiana iami bona kupololita irio apa au teuki i sura ngkanoto lalu. Ide-ide hangangaa mesulena lao mampombealaa tokadake au mokuasai kadatua Persia. Roo ido, tokadake au mokuasai kadatua Yunani ina hawe mampombealaana. Hai bara huba hadua au motulungina batena pea Mikaeli, malaeka au mokampai to Isaraeli.