Danieli
Lolitakana Danieli hai ranganahe
(1:1–6:28)
Anantomoanenda to Yahudi i kadatuana Nebukadnesar
1
1 I pare katalu poparentana Datu Yoyakim i Yehuda,a moparentami hadua datu au rahanga Nebukadnesar i Babeli. Laomi datu iti mobungka boea Yerusale. 2 Pue mampogiangaa Datu Nebukadnesarb monangi Datu Yoyakim, datu i Yehuda, hai morampaki hanggaa parewa au ara i souna Pue Ala. Parewa iti naanti i Babeli i lalu souna anitunda hai nawoli i lalu pambolia parewa poanitua.3 Hangko indo, mololitami Datu Nebukadnesar i Aspenas, tadulako topobago i sou kadatua, bona moanti bahangkia to Isaraeli pemulea datu hai pemulea tuana, 4 iamohe anantomoane au makara hai maroho watanda, mapandehe i paka-pakana hai matopahe mobago i sou kadatua bona rapaguruhe uki hai basa Babeli.c 5 Datu mopatoka paande hai paenunda alo-alona au himbela hai paande hai paenuna datu. Hangangaa rapaguruhe talu parena, hangko rapopobagorihe i datu.
6 I olonda tauna iti, ara worihe bahangkia to Yehuda, iami Danieli, Hananya, Misael hai Asarya. 7 Aspenas, tadulako topobago i sou kadatua iti, mobaliki hanganda:
Danieli nahanga Beltsasar.d
Hananya nahanga Sadrak,e
Misael nahanga Mesak,f hai
Asarya nahanga Abednego.g
8 Agaiana Danieli mopakanoto bona bara mopakedai watana hangko i paande hai anggoro au biasa naenu datu. Ido hai naperapi ntepuu Danieli i tadulako topobago i sou kadatua iti bona ia inee rawei paande hai paenu au napatokami datu. 9 Anti petulungina Pue Ala, Danieli molambi ahi hai pepokakaia hangko i tadulako topobago i sou kadatua iti. 10 Agaiana, mololitami tadulako topobago iti i Danieli, nauli, “Langana i ampuku datu au mopatokami paande hai paenumi, lawi ane naita montani powatami hangko i anantomoane au arahe inde, iko naimbana masala hai ina napapatena.”
11 Roo indo, mololitami Danieli i topekampai au napohawaami Aspenas, tadulako topobago iti, bona mokampai Danieli, Hananya, Misael hai Asarya, nauli, 12 “Nupetandaka hampulo alona, nuwei peangkai halo-halo kiande hai owai ntoo kienu. 13 Roo indo, nupahintoto powatangki hai powatanda ope-ope anantomoane au moandehe paande au rapatokami himbela hai paandena datu. Roo nodo, nubabehimi irikami hintoto hai pelambiamu.” 14 Napehadingimi pamperapinda iti, hai napetandaka mpuumi i lalu hampulo alona.
15 Liumi hampulo alona, tongawa maroa hai marudu mani watanda ihira pane ope-ope anantomoane au moandehe paande au napatokami hai paandena datu. 16 Mepongka indo, paande hai paenu au hangko i datu naala topekampai iti, napahuruahe halo-halo hai owai ntoo. 17 I anantomoane au ibahe iti, Pue Ala moweihe kapande kana i paka-pakana uki. Danieli, Nawei mani kapande kana i paka-pakana pampetudungia hai pangipi.
18 Liumi tempo au napakanoto datu,h naanti hahamohe Aspenas lao i lindona Datu Nebukadnesar. 19 Molololitami datu hai ihira; hai i olonda anantomoane iti, bara ara nalambi au himbela hai Danieli, Hananya, Misael hai Asarya. Ido hai mepongkamohe mobago i sou kadatua. 20 I paka-pakana pekunena datu irihira au moparaluu kamatopa hai kapande, nalambi datu kapandenda hampulo belana hangko i ope-ope tomapande hai topangisa i humalele kadatuana.
21 Mobago liliumi Danieli i sou kadatua hawe i pare kaisa poparentana Koresi.i