Pangipina Datu Nebukadnesar
2
1 I pare kadua poparentana Datu Nebukadnesar, ia mangipi. Pangipi iti bara mopatinda laluna ido hai bara peisa leta. 2 Napopekakiomohe tomapande, topedodi hai topangisa bona raponotoa apa lempona pangipina iti. Hawe mpuumohe to mapande, topedodi hai topangisa i lindona datu. 3 Nauliangaahe datu, “Mangipina hai barapi tinda lalungku, lawi kupeinao moisa lempona pangipingku iti.”4 Mehanahe to mapande, topedodi hai topangisa iti, rauli, “O datu, mononomi tuwomu! Nupololitami mai iti pangipimu bona kiuliangaako lempona.”
5 Agaiana nahanaihe datu, nauli, “Kubotusimi, ane barana niuliangaa pangipi iti hai lempona, ina ratatakau hai soumi ina ragero-gero. 6 Agaiana ane nibuku mouliangaana pangipi iti hai lempona, ina kuweikau ngkaia parasee au maroa hai lanti au mapangka. Mewali, niuliangaamona pangipingku iti hai lempona!” 7 Mehanahe, “Nupololita hampai pangipimu iti irikami, hangko peisariko kipakanotoa apa lempona.” 8 Mehana datu, nauli, “Kuisato, nioaka modii-dii tempo, lawi niisa karoonami kubotusi: 9 ane bara nibuku mopahawe pangipi iti, ina kuhuku hahakau, hai kuisa karoomimi mogombo bona au niuli iriko au bara tou hai nipopowadi-wadi peana. Nipehangu pae ina kubaliki apa au roomi kubotusi. Mewali niuliangaamona mai pangipi iti bona tongawa kaniisanato wori mopakanoto lempona.”
10 Mehanahe topangisa iti, rauli, “I humalele dunia bara ina ara hadua au nabuku mopakanoto apa au natunggai Datu. Hai bara mani wori ara hadua datu, kehapi noumbami peawana hai kamahilena poparentana, au mamperapi nodo hangko i tomapande, topedodi hai topangisa i kadatua. 11 Au naperapi ampuku datu mapari gaga, hai bara ara hadua au nabuku mopakanoto i ampuku datu, batenda pea anitu, agaiana barahe maida i olonta.”
12 Kanahadina datu pololitanda nodo, rumpumi, ido hai napopesuwumi parenta bona ope-ope tomapande i Babeli rahaokihe rapatuna.
13 I karapopesuwuna parenta bona ope-ope tomapande rapapate, tepesua worihe Danieli hamporangaa.
14 I lalu kapande hai kanoto lalu, laomi Danieli mampololitaa Ariok, tadulako topokampai datu au ina laomi mopapate tomapande i Babeli. 15 Nauli Danieli i Ariok, “Moapari pane datu mampopesuwu parenta au melangaki ntepuu?” Nahanai Ariok hintoto hai au mewalimi.
16 Hangko indo, lao mpuumi Danieli mampombelambia datu hai merapi bona rawei tempo mampololita pangipi iti hai mopakanoto lempona i datu. 17 Roo ido, mesulemi Danieli i ranganahe, Hananya, Misael hai Asarya, hai napololita apa au mewali. 18 Tunggaiana Danieli bona merapihe ahina Pue Ala ampu langi kana i pangipi au tewuniangi iti bona ihira hai tauna ntanina au mapande i Babeli barahe rapapate.
19 Mewali pangipi au tewuniangi mani lempona, napatongawa Pue Ala i Danieli tanga kaindi i lalu hambua pampetudungia, ido hai pane Danieli motoia Pue Ala ampu langi. 20 Mololitami Danieli, nauli, “Tetoiami hangana Pue Ala hangkoia, ide-ide hai i hae-haena lawi hangko Iria pea kapande hai karoho!
21 Ia makuasa mopakanoto hinangka tempo.
Ia au mampopengkaroo datu, Ia au molanti datu.
Ia au mowei kapande i tauna au manoto laluna
hai mokiraia kamatopa i tauna au manoto pekirina.
22 Iami au mopakanoto au bara telambi pekiri;
hai mopatongawa ope-ope au tewuniangi.
Naisa au ara i lalu kamakaindi,
hai baa ara Iria.
23 O Pue Ala au rapenombai ulu bubungku,
kutoia hai kupomahileKo,
lawi Nukiraiamona kapande hai karoho.
Ide-ide Nuuliangaamona au kuperapi Irio;
Nupatongawaamongkai au napowuli datu.”
Danieli mampololita pangipina datu hai mopatongawa lempona
24 Roo nodo, Danieli lao i Ariok au napohawaami datu ina mopatuna tauna au mapande i Babeli, hai mololita node, “Tauna au mapande i Babeli iti ineehe nupapate! Nuantina lao i datu bona kuuliangaa datu lempona pangipi iti!” 25 Barapi molia-lia Ariok liliu moanti Danieli lao i Datu Nebukadnesar hai mololita, nauli, “Kulambimi hadua hangko i olonda to Yahudi au ratawani au nabuku mopatongawa lempona pangipi iti i datu.” 26 Mekunemi datu i Danieli au rahanga wori Beltsasar, nauli, “Nuisa pae mampololita pangipingku hai mopakanoto lempona?” 27 Mehana Danieli, nauli, “Tomapande, topedodi hai au topangisa bara rabuku mopahawe lempona au tewuniangi i lindona datu. 28 Agaiana Pue Ala au ara i Suruga, Ia au peisa mopatongawa hinangka au tewuniangi. Iami au mopahawe i ampuku Datu Nebukadnesar hinangka au ina mewali i alo-alo au ina mai. Idemi pangipi hai hinangka au naita ampuku datu i tempona leta. 29 Tempona ampuku datu leta, mentumbu pangipi kana au ina mewali i alo-alo au ina mai. Pue Ala au mopatongawa hinangka au tewuniangi, mampopaitaami datu apa au ina mewali. 30 Au tewuniangi iti Napatongawaamona, barari anti kapandeku au melumbu hangko i tauna ntanina. Agaiana bona lempona pangipi iti rauliangaa ampuku datu, hai bona ampuku moisa apa au ara i pekirina ampuku.
31 Idemi pangipi iti. Ampuku datu moita hambua watu tauna au mahile hai mapangka, rumihi pengkila-ngkilana hai mewulungai lenggena. Watu tauna iti meangka i lindona ampuku. 32 Waana watu tauna iti hangko i bulawa ntepuu, pondana hai kabuhuana hangko i salaka, taina hawe i pekona hangko i tambaga, 33 paana hangko i besi, bitina hamboho hangko i besi hai hamboho hangko i tampo polo. 34 Tangana ampuku datu mototoki watu tauna iti, unga pea meloli haogu watu hangko i tabingke, liliu morumpa biti watu tauna au hangko i besi hai hangko i tampo polo iti pane marupu. 35 Mewali, besi, tampo polo, tambaga, salaka hai bulawa, hambelalau marupu. Watu tauna iti mewali pearai nodo kungku au ara i pogilia pare, alana nahimbaroka himburu duuna barapi ara au ralambi. Agaiana watu au morumpa watu tauna iti mewali bulu mahile au mobukehi dunia.
36 Itimi pangipina ampuku, hai ide-ide ina kupakanoto lempona. 37 Ampuku au kubila, datu au meawa hangko i ope-ope datu. Pue Ala ampu langi, moweimoko kadatua, kamakuasa, karoho hai peawa. 38 Nawei woriko Pue Ala kuasa i ope-ope tauna, binata hai tadasi au tuwo i dunia. Ampukumi waa au hangko i bulawa iti. 39 Agaiana ane hopomi kadatuana ampuku, ina ara hambua kadatua ntanina au makuasa nauri bara himbela kamahilena hai kadatuana ampuku.a Hangko indo, meusu mbuli kadatua katalu au rapandiri hai tambaga au ina moparenta i humalele dunia.b 40 Hangko indo, meusu mbuli kadatua au kaiba, kamarohona nodo besi au peisa mogero-gero apa pea. Kadatua ide ina mohawu-hawu hai mogero-gero ope-ope kadatua ntanina.c 41 Nodo au naita ampuku, karawe biti watu tauna iti, hanggaa hangko i tampo polo hai hanggaa mbuli hangko i besi. Lempona, kadatua iti bara ina hintuwu; kamarohona ara au nodo besi, agaiana nodo au naita ampuku, besi iti mogalo hai tampo polo. 42 Karawe bitina, hanggaa hangko i besi hai hanggaa hangko i tampo polo; rapandiri nodo kadatua au maroho agaiana ara wori kamaledeana. 43 Nodo au naita ampuku, besi mogalo hai tampo polo, lempona kadatua iti ina rapakaroho i lalu potambinda hai kadatua ntanina, agaiana barahe ina peisa mopaara pohintuwu. Nodo besi bara peisa mogalo hai tampo polo.d
44 I tempo poparentanda datu iti, Pue Ala ampu langi ina moaro hambua kadatua au bara ina magero hawe i hae-haena. Kamarohona hai peawana barapi ina tepalimba i kadatua ntanina. Kadatua iti ina mogero hai mopatuna ope-ope kadatua.e Kadatua iti ina togo i hae-haena. 45 Hintoto hai au naita ampuku, ara watu au maloli hangko i bulu agaiana bara raloli tauna. Watu iti morumpa watu tauna au hangko i besi, tambaga, tampo polo, salaka hai bulawa. Pue Ala au makuasa mouliangaami ampuku datu, apa au ina mewali i alo au ina mai; pangipi iti tou hai lempona peisa rapoinalai.”
Danieli molambi peadaina datu
46 Hangko indo, meampumi Datu Nebukadnesar i Danieli, hai motuduhe taunana bona moadai Danieli hai mohuhuhe popenomba hai dupa au mawongi iria. 47 Mololitami Datu Nebukadnesar i Danieli, nauli, “Tou-tou mpuu Pue Ala au nupenombai iti iami Pue Ala au melumbu hangko i hinangka anitu, au makuasa i hinangka datu, hai au nabuku mopatongawa hinangka au tewuniangi. Kuisa iti, lawi nubuku mpuu mampololita pangipi iti hai mopakanoto lempona iriko.” 48 Hangko indo, Datu Nebukadnesar mampomahile Danieli hai nawei ngkaia anu-anu au masuli. Danieli naangka mewali au makuasa i humalele propinsi Babeli hai nalanti motadulakoi ope-ope tauna au mapande i Babeli. 49 Anti pamperapina Danieli, Datu Nebukadnesar molanti worihe Sadrak, Mesak hai Abednego bona modureihe Danieli moparenta i tampo Babeli, agaiana Danieli pea au maida i sou kadatua.