Watu tauna bulawa hai api au lolaa liliu
3
1 Hambela tempo, Datu Nebukadnesar mobabehi watu tauna au hangko i bulawa. Kapangkana rompulo hai pitu mete, hai kapekana talu mete. Watu tauna iti naaro i lembo Duraa i propinsi Babeli. 2 Roo nodo, Datu Nebukadnesar mokakiohe ope-ope sarungkorona, topoparenta, hai ope-ope tauna au mobago i sou kadatua Babeli bona maihe mosabiki potawi peangkanami watu tauna au hangko i bulawa iti. 3 Moteruhu mpuumohe tauna iti mosabiki potawi watu tauna bulawa au napopeangka Datu Nebukadnesar. 4 I tempo iti, mololitami maoni-oni hadua taunana datu, nauli, “Ope-ope tauna i hinangkana ngamba, hinangka tina, hai hinangka basa, nipehadingi! Idemi parentana datu: 5 ane nihadi pomoni tatamburu, tulali, kecapi hai parewa musi au ntanina, hangangaa molingkudukau menomba i watu tauna bulawa au napopeangkami Datu Nebukadnesar iti. 6 Hema-hema au bara molingkudu menomba, i tempo iti peawomi ina ratende i lalu api au lolaa!”7 Karahadina pomoni hinangka parewa musi iti, tauna i humalele ngamba hai tina halembo-halembo hai hinangka basa molingkudumohe menomba i watu tauna bulawa iti.
Rangana Danieli au talu barahe mampeulai parentana datu
8 I tempo iti peawomi, meangkahe bahangkia topangisab mokewa babehianda to Yahudi. 9 Mololitamohe i Datu Nebukadnesar, rauli, “O datu, mononomi tuwomu ampuku! 10 Ampuku datu mampopesuwumi parenta ide: hema-hema pea au mohadi tatamburu, tulali, kecapi hai mampopengaa parewa musi au rapopomoni, hangangaa molingkudu menomba i watu tauna bulawa. 11 Hai hema-hema au bara molingkudu hai menomba, ina ratende i lalu api au lolaa. 12 Agaiana bahangkiahe to Yahudi au nalantimohe datu moparenta i propinsi Babeli, iami Sadrak, Mesak hai Abednego, barahe mampeulai parenta iti. Barahe motoia anituna ampuku hai bara worihe mampenombai watu tauna bulawa au napopeangkami ampuku.”
13 Kanahadina Datu Nebukadnesar kanodona babehianda Sadrak, Mesak hai Abednego, rumpumi, ido hai napopeantihe i lindona. Kahawenda tauna iti, 14 mekunemi Datu Nebukadnesar irihira, nauli, “Sadrak, Mesak hai Abednego, tou pae, barakau motoia anitungku hai barakau menomba i watu tauna bulawa au kupopeangkami? 15 Ane madotakau, ide-ide kanihadina tatamburu, tulali, kecapi hai mampopengaa parewa musi momoni, hangangaa molingkudukau menomba i watu tauna bulawa au kubabehi iti! Agaiana ane barakau madota, i tempo iti peawomi ina ratendekau i lalu api au lolaa. Hai anitu umba au nabuku mokabahakau hangko i kuasangku?”
16 Mehanahe Sadrak, Mesak hai Abednego, rauli, “Ane kana ido, bara bunduna kihanai. 17 Ane Pue Ala au kipenombai Nabuku mohoremangkai, batena Nahoremangkai hangko i api au lolaa, hai Nakabahangkai hangko i kuasamu. 18 Agaiana ane barato woringkai Nahorema, bona naisa ampuku, barangkai ina mampenombai anituna ampuku hai bara woringkai ina menomba i watu tauna bulawa au napopeangkami ampuku iti.”
Sadrak, Mesak hai Abednego ratende i lalu api au lolaa
19 Hangko indo, rumihi mpuu karumpuna Datu Nebukadnesar i Sadrak, Mesak hai Abednego, ido hai pane mawaami lindona. Mewali naparentaimohe taunana bona api au lolaa iti ratambai pitu belana kamapanana. 20 Bahangkiahe surodadona au maroho ntepuu naparentaihe bona mohilu Sadrak, Mesak hai Abednego, hai ratendehe i lalu api au lolaa iti. 21 Rahilu mpuumohe tauna au talu iti kekesiga hai hampinda bara rawosui, hai ratendemohe i lalu api au lolaa. 22 Anti parentana datu, ratambai mpuumi kamapanana api iti, ido hai tauna au motende Sadrak, Mesak hai Abednego nahunderekihe api iti alanda mate. 23 Manawomohe tauna au talu iti i lalu api au lolaa, tanganda tehilu.
24 Hangko indo, tingkarami Datu Nebukadnesar, liliu meangka hai mekune i tauna au mobago i kadatua, nauli, “Bara pae inona talu peahe tauna au tahilu hai tatende i lalu api?”
Rahanai, “Tou, datu!” 25 Nauli datu, “Agaiana kuita arahe iba tauna au molulumao i tanga-tanga api iti, barahe tehilu hai barahe naande api. Hai kaibanda nodori anitu!”
Sadrak, Mesak hai Abednego rakabaha hangko i pehuku hai rapopengkahe lantinda.
26 Mewali, Datu Nebukadnesar mohungkuki api au lolaa iti, hai mololita, nauli, “Sadrak, Mesak hai Abednego, tuduanakau Pue Ala au makuasa, pesuwumodekau hai maikau inde!” Mesuwu mpuumohe Sadrak, Mesak hai Abednego hangko i lalu api iti. 27 Sarungkoronahe datu, topoparenta, hai ope-ope tauna au mobago i kadatua Babeli motolelikihe tauna au talu iti. Raita weluanda, hampinda, pelumbuna watanda bara naande api. Mogalorihe moengaa rambu bara.
28 Mololitami Datu Nebukadnesar, “Tetoiami Pue Ala au rapenombai Sadrak, Mesak hai Abednego! Natudumi mai malaekaNa bona mokabahahe tuduaNa au mepoinalai Iria. Barahe mampeulai parentaku, hai mohubimohe watanda, lawi barahe mau mampenombai anitu. Batena pea Pue Ala au rapenombai. 29 Ido hai mampopesuwuna parenta ide: hema-hema pea au hangko i hinangka ngamba, tina hahalembo hai hinangka basa au mokakabosai Pue Ala au rapenombai Sadrak, Mesak hai Abednego ina ratata-tata hai souna ina ragero-gero, lawi bara ara ntani au makuasa au nabuku mehorema, batena pea Pue Ala au rapenombai.”
30 Hangko indo, Datu Nebukadnesar mampopengkahe lantinda Sadrak, Mesak hai Abednego i propinsi Babeli.